Kujingunik kwa Yohan

Padingay kambuy Yohan mu rukan pa ditung da Patimos, Yesu wamumekeshina yishimushimu 16 piur pa machuku ma kurutu. Yishimushimu yiney yamekesha mutapu ukutumbishau dijin da Yehova, mutapu ukweza Want wend, ni mutapu ukusadika rusot rend panap pansh mud mwiur.

Mu chishimushimu chimwing, Yohan umumen Yehova mu ditand dend da uyaj mwiur, amunyingumukin kud amakurump 24 adjit masun matok ni adjit yibangul ya or ku mitu yau. Milaylay ya chitokish ni chidjimin cha nzaj yidokil ku ditand dend. Amakurump 24 asin manungin kurutu kwa Yehova ni kumwifukwil. Mu chishimushimu chikwau, Yohan umen chisak chijim cha antu adokila ku michid yawonsu, antu awonsu, ni mazu mawonsu akat kumwifukwil Yehova. Mwan a mukoku, Yesu, uyitakedin ni uyitwadin ku mem ma mwom. Kupwa, mu chishimushimu chikwau, Yesu wasambish kal kuyikel mud Mwant mwiur pamwing nau amakurump 24. Mu chikwau kand, Yohan umen Yesu ukat kumurishikish nnak mujim, dijin dend Satan, ni ayilembil end. Yesu wayidosh mwiur wayidjubul pansh.

Kupwa Yohan umen chishimushimu chiwamp cha Mwan a Mukoku ni antu 144 000 iminy ku Mukandu wa Ziyon. Umen kand mwangel utwikin unyingumokin pa divu dawonsu, ukat kuyilej antu anch mwovany Nzamb wom ni mwinkishany uyaj.

Mu chikwau kand, akat kurish njit ja Armagedon. Pa chisu cha njit jinija Yesu nau amasalay end awin kal mangand mayimp ma Satan. Mu chishimushimu cha nsuden, Yohan umen kovijan kuwanyidina mwiur ni pa divu. Satan ni mbut jend ajiy kal kamu. Muntu mwawonsu mwiur ni pa divu umen dijin da Yehova anch did ditumbila ni umwifukwidin ching ndiy.