DILEJAN DIA 6

Kusadin Mifund ni Kuyovikesh

Yohan 10:33-36

MU WISWIMP: Kangal kutang kwau verse mau mau ni kumatik mulong wa kutang mukwau. Ikal ni kashinsh anch in kukutesh ovil nawamp kukwatijan kudia pakach pa verse utangina ni dinans ushinshikidina.

MUTAPU WA KUSADIN:

Kukasikeshin pa mazu madia ma usey. Kupwa kwa kutang verse, kasikeshin pa mazu makwatijadina kapamp kamwing ni dinans diwisambidina. Ukutwish kusal mwamu kusutin kukuchirikin mazu minam ap kukwipul chipul chikusala anch in kukutesh ajingunina mazu ma usey.

Anch wasadin mazu kushalijan mulong wa kuchirikin chitongijok cha verse, ikal ni kashinsh anch in kukutesh akutwish kudandamen kuman mutapu ukwatijadina mazu ma mu Bibil aminau ni dinans wisambidina.
Kukasikeshin pa dinans diukatina anch in kukutesh alama. Anch ukimbin kutangish mukand ni walejan yiuutangishidina, rumburil mutapu ukwatijadina mazu majim ma verse winou ni diyingishin diumutangidina.

Chisu wisambidina verse, kangal wabwik Bibil. Kusal mwamu kukuyikwash in kukutesh kubombakesh kwovijan kudia pakach pa yom ulondina ni yom yidia mu verse utangina.
Kuswapej yom yiulondina. Ipuk kulondol yom yivud yakad ukwash ku dinans dijim. Imen pa yom yijau kal in kukutesh piur pa mutu wa mulong ni usey wa dinans dined, tond jinsangu jidia ja usey chakwel in kukutesh ova nawamp yiulondina.