DILEJAN DIA 47
Ov, Katat Umen Anch Akutwish Kukubatish?
Wilejin kal yom yivud nakash piur pa Yehova kusutin dilejan diey dia Bibil. Chimeken kamu anch waswimpin yom yimwing mulong wa kusadin yom wilejina. Pakwez kukutwish pamwing ap kwikal yom yimwing yikukangeshina kwipan kud Yehova ni kukubatish. Dilejan dined dikwisambin yom yimwing yiyikangeshina antu kuyibatish ni mutapu wa kuyipandakan.
1. Yom ik ufanyidina kwijik kurutu kwa kukubatish?
Mulong wa kukubatish, ufanyidin kwikal ni ‘ronganyin rakin ra uyakin.’ (1 Timote 2:4) Chinech chirumburikinap anch ufanyidin kwikal ni yakul ku yipul yawonsu ya Bibil kurutu akubatisha. Ap in Kristu abatishinau kal kudiosh pakur niyau adandamedin kwilej. (Kolosay 1:9, 10) Pakwez ufanyidin kwijik mafundish ma pa dishin ma Bibil. Amakurump a chikumangen akukukwash kwijik anch ukwet ronganyin riwanyidinaku.
2. Nzau ik jimwing ufanyidina kuwanyish kurutu kwa kukubatish?
Kurutu kwa kukubatish ufanyidin ‘kukarumuk, kudiokal ku yitil.’ (Tang Midimu 3:19.) Chinech chirumburikin anch ufanyidin kunenganan nakash mulong wa yitil wasala pakur ni kumwit Yehova chakwel akulikishin. Ufanyidin kand kulikap kamu yaku yiyimp ni kushakam mu mutapu umusangareshina Nzamb. Chikwau kand, ufanyidin kusambish kwipan mu mijikit ya chikumangen mu kukumangan ku yikumangan ni kulejan rusangu ruwamp mud mwin kulejan wakad kal kutambul dibatish.
3. Mulong wak ufanyidinap kwov wom?
Antu amwing akat kwov wom anch kakutwishap kwau kusal yom yikumukanau Yehova. Chakin kamu, yisu yimwing ukutwish kurumbuk, mud mwasalau amakundj ni amband amwing ashinshamena ajimbwilau mu Bibil. Pakwez Yehova kachingejinap anch atushalapol end ikala antu awanyidina. (Tang Kuseng 103:13, 14.) Ukat kusangar anch wasal usu wey wawonsu! Chakin kamu ukukukwash. Chawiy, Yehova utwinkishin kashinsh anch “kwikil chom . . . chikutwisha kutwauril etu ku rukat [rend].”—Tang Rom 8:38, 39.
ILEJA CHIKURIKINA
Tal mutapu ukutwisha kupandakan yom yikutwisha kukukangesh kukubatish kusutil kumwijik Yehova nawamp ni kwitiy ukwash wend.
4. Ileja kumwijik Yehova nawamp
Ov, ufanyidin kumwijik Yehova kushik mu chilik ik kurutu akubatisha? Ufanyidin kumwijik mu chilik cha kushiken kumukat ni kusot kumusangaresh. Talany VIDEO mulong wa kuman mutapu usadinau mwamu in kwilej a Bibil pa mangand mawonsu. Kupwa isambinany chipul chilondwilaku ech:
Mu video winou, yom ik yayikwasha antu amwing kwirijek mulong wa kuyibatish?
Tang Rom 12:2, kupwa isambinany yipul ey:
Ov, widjidjekin piur pa yom yifundishinay Bibil ni anch Atuman a Yehova afundishin kamu uyakin?
Anch mwawiy, yom ik ukutwisha kusal pa mulong winou?
5. Pandakan yom yikukangeshina kukubatish
Anch twakwat mupak wa kwipan kud Yehova ni kutubatish, etu awonsu tukat kurish ni yikokujol kanang. Mulong wa kuman chilakej chimwing, talany VIDEO, kupwa isambinany yipul ey:
Mu video winou, yikangesh ik yafanyinay Narangerel kupandakan mulong wa kumusadin Yehova?
Kumukat Yehova kwamukwasha mutapu ik kupandakan yikangesh yiney?
Tang Jinswir 29:25 ni 2 Timote 1:7, kupwa isambinany chipul ech:
Yom ik yitwinkishina kutakaman kwa kupandakan yikangesh?
6. Chingejin ukwash wa Yehova
Yehova ukukukwash chakwel umusangaresha. Talany VIDEO, kupwa isambinany yipul ey:
Mu video winou, yom ik yamukangesha mwin kwilej wa Bibil kumubatish?
Yom ik yilejay yamukwasha kukasikesh ruchingej rend mudiay Yehova?
Tang Isay 41:10, 13, kupwa isambinany chipul ech:
Mulong wak ukutwish kwikal nich kashinsh anch ukuwanyish kushilamu kwey kuukusala piukwipana?
7. Kudish kujikitish kwey mulong wa rukat ra Yehova
Anch watongijokin nakash piur pa mutapu ukukatinau kud Yehova, ukwikal mwin kujikitish nakash ni ukukat nakash kumusadin chikupu. Tang Kuseng 40:6, kupwa isambinany chipul ech:
Yiyukish ik ya Yehova usangaredina nakash?
Muprofet Jeremiy wading umukatin Yehova ni Dizu diend, ni wasangerang nakash chisend cha kusend dijin dia Yehova. Walonda anch: ‘Mazu mey makat kwizwish muchim wam nich musangar ni kuzangijal, mulong am nisendin dijin diey, A Yehova Nzamb.’ (Jeremiy 15:16) Akul ku yipul ey:
Mulong wak kwikal Kaman wa Yehova did dilau dia pakampwil?
Ov, ukatin kukubatish mulong wa kwikal Kaman wa Yehova?
Ov, kud chom chikukangeshina kusal mwamu?
Ey amwiney utongin anch chom ik ufanyidina kusal mulong wa kushiken ku dibatish?
ANCH MUNTU WAKWEL ANCH: “Novil wom mulong chikutwish kwinkasiken kuwanyish yom yawonsu nikushilamu anch ambatish.”
Ov, niyey mwawiy wiyovila?
YOM TWILEJA KAL
Ku ukwash wa Yehova, ukutwish kupandakan yom yawonsu yikukangeshina kukubatish.
Ov, uvurikin?
Ufanyidin kwijik yom yinch mu Bibil chakwel akubatish?
Yom ik yimwing ufanyidina kuswimp mu mwom wey kurutu kwa kukubatish?
Mulong wak ufanyidinap kulik anch wom ukukangesha?
JINGUNIN KAND
Tal yom yifanyidina kukubachik kukwat mupak wa kukubatish.
“Ov, Udi Wirijekina Mulong wa Kutambul Dibatish?” (Chinong cha Kalam cha Ngond wa 3, 2020)
Tal mutapu wa kupandakan yom yimwing yikutwisha kukukangesh kukubatish.
“Chom Ik Chinkangeshina Kwimbatish?” (Chinong cha Kalam cha Ngond wa 3, 2019)
Tal mutapu watwishay ikundj umwing kupandakan yikangesh yijim mulong wa kumubatish.
Kwinsambishin, ikundj utazukinau anch Ataa widjidjekang pa kukwat mupak wa kumubatish. Tal yom yamukasikesha kukwat mupak winou ujim.