DILEJAN DIA 53
Tond Kwipuwangej Kumusangareshina Yehova
Yehova uding ‘Nzamb wa musangar.’ (1 Timote 1:11) Usotin anch niyetu twikala ni musangar ni tusangera mwom. Ukat kusangar anch twitekin chisu mulong wa kwipuwangejaku. Mu dilejan dined, tukuman mutapu tukutwisha kusadin chisu chetu cha kwipuwangej mu mutapu uwamp ni usangareshina—pakwez umusangareshina kand Yehova.
1. Yom ik tufanyidina kuvurik pitutondina mitapu ya kwipuwangej?
Yom ik ukatining kusal mulong wa kwipuwangej? Antu amwing akatining kwau kusutish chisu chinech zoong ku chikumbu, mu kutang mabuku, kutesh mizik, kutal mafilim ap kutalol yom pa Internet. Akwau akatining kusutish chisu chinech nau arund nau—mu kwendangan, kwisay, ap kusengan. Chikalap nchik yom tukatina kusal, tufanyidin kwikal nich kashinsh anch kwipuwangej kwetu kukat “kumusangarish Nsalejetu.” (Efes 5:10) Chid cha usey kud etu kwijik uyakin winou mulong kwipuwangej kuvud kupalangena nlel kukwet yom yivud yikisinay Yehova, mud chisum, yom ya masandj ni ya ayilembil. (Tang Kuseng 11:5.) Yom ik yikutukwasha kutond mitapu ya kwipuwangej nich manangu?
Anch twatond arund amukatina Yehova, akutwish kutukwash ni kutukasikesh kutond kwipuwangej kuwamp. Mud mutapu twamena mu dilejan dimwing, “muntu ukata kwend nau in manangu, niyend ukwikal mwin manangu.” Ku mutambu ukwau, anch twibomb nakash nau antu akad kukat mbil ja Nzamb, tukuman “mar.”—Jinswir 13:20.
2. Mulong wak chid cha usey kushinshikin chisu tusutishina mu kwipuwangej?
Ap anch kwipuwangej tutondina kukuyipishap urund wetu ni Yehova, tufanyidin kubabal chakwel kangal twasutish chisu chivud mu kwipuwangej kwau. Chamwamu tukwikalap ni chisu cha kusal yom ya usey nakash. Bibil utukasikeshin ‘kusadin nawamp nakash chisu chetu.’—Tang Efes 5:15, 16.
ILEJA CHIKURIKINA
Ileja mutapu wa kutond nich manangu mitapu ya kwipuwangej.
3. Ipuk kwipuwangej kuyimp
Mulong wak tufanyidin kutond nawamp kwipuwangej kwetu? Talany VIDEO, kupwa isambinany yipul ey:
Mutapu ik ufanakena masengan ma antu arishang tutaku mu Rom ni kwipuwangej kumwing kwa nlel?
Mu video winou, yom ik yajinguninangay Danny piur pa kwipuwangej?
Tang Rom 12:9, kupwa isambinany chipul ech:
Verse winou ufanyidin kukubachik kukwat mipak ik piur pa kwipuwangej?
Yom ik yimwing yikisiningay Yehova? Tang Jinswir 6:16, 17 ni Galatia 5:19-21. Kupwa kwa kutang mukand ni mukand, isambinany chipul ech:
Yom ik yimwing yijimbwilau mu maverse minam yivulijadina mu kwipuwangej kwa nlel?
Mutapu wa kutond kwipuwangej nich manangu
Iyipula anch:
Nich yom ik? Ov, mu kwipuwangej mwinomu mud yom yikisinay Yehova?
Mu asaa inch? Ov, kwinkangeshin kusal yom ya usey nakash?
Ni nany? Ov, kwinsejishin piswimp nakash ni antu akad kumukat Yehova ap kusutish nau chisu nakash?
Mulong wa kwichidij, tufanyidin kuchin ubaj. Chilik chimwing kand, tufanyidin kwipuk kwipuwangej kwin kwawonsu twakad kwikal nich kashinsh anch kuwapin
4. Sadin nawamp chisu chey
Talany VIDEO, kupwa isambinany chipul ech:
Ap anch mukadivar walejanau kal mu video winou kadiap katadina yom yiyimp, pakwez wading ni mulong ik?
Tang Filip 1:10, kupwa isambinany chipul ech:
Verse winou ukutwish mutapu ik kutukwash kukwat mupak piur pa chisu tusutishina mu kwipuwangej?
5. Tond kwipuwangej kuwamp
Ap anch kwipuwangej kumwing kumukisishin Yehova, pakwez kud yom yivud yisangareshina yikatinay. Tang Mulej 8:15 ni Filip 4:8, kupwa isambinany chipul ech:
Kwipuwangej ik kuwamp ukata kusangerang?
Ukutwish kusanger kwipuwangej ni kwiswedish kuwamp
ANCH MUNTU WAKWEL ANCH: “Chiyipinap kwau kwipuwangej nich yom ya chisum, ya masandj ap ya ayilembil anch am nisadinap kwam yom yiney.”
Ey ukwakul nchik?
YOM TWILEJA KAL
Yehova ukatin anch tutonda ni tusanger kwipuwangej kuwamp.
Ov, uvurikin?
Kwipuwangej ik kufanyidinau in Kristu kwipuk?
Mulong wak tufanyidin kubabel chisu tusutishina mu kwipuwangej?
Mulong wak ufanyidin kutond kwipuwangej kumusangareshina Yehova?
JINGUNIN KAND
Tal nany ufanyidina kututondin yom ya kwipuwangej nich.
“Ov, Atuman a Yehova Ajidikining Mafilim, Mabuku, Ap Maas Yimwing?” (Mutu wa mulong udia pa jw.org)
Tal mutapu ukutwisha kukwat mipak yiwamp piur pa kwipuwangej ni kwiswedish.
“Ov, Kwipuwangesh Kwey Kudi Kwa Ukwash?” (Chinong cha Kalam cha 1 Ngond wa 10, 2011)
Mu rusangu rilondina anch “Nalika kuyikis akwetu,” tal mulong wak ikundj umwing waswimpa mutapu wend wa kwipuwangej.
“Bibil Ukarumwin Mwom ya Antu” (Chinong cha Kalam cha 1 Ngond wa 3, 2010)
Tal mutapu mwakwatay maku umwing mupak uwamp piur pa kwipuwangej kukweta nsangu ja ayilembil.