Ov, Ukez Kumunyik Uyaj Wa Nzamb?

‘Etu . . . tukat kumunyik mud makalash uyaj wa Yehova.’—2 KORINT 3:18.

1. Chom ik chamanay Moses, ni kupwa yom ik yashikenaku piyasuta yom yiney?

CHADINGA chimwing cha yishimushimu yidiokila ku spiritu wa Nzamb yamushena chakad kal kumekanap kud muntu ap umwing. Moses wakandama amwinend, ku Mukandu wa Sinay, amwinkisha chom chimwing cha pakampwil. Amutwishisha kuman chom chadinga kand kal muntu ap umwing achimana—uyaj wa Yehova. Chakin kamu, Moses kamumanap Yehova mpal ni mpal. Chifu cha Nzamb chidi cha ufun nakash chakwel anch kwikil muntu ukutwisha kumuman ni kushal mwom. Pakwez, Yehova wamubwika Moses “chikas” chend mud chibwik cha kumuchidij djat ni pakusutilay, chakin kamu ndiy wasadila ntimesh mwangel. Chad Yehova wamutwishisha Moses kuman nsis ja uyaj wa kumekan kwend. Yehova wisamba kand nend Moses kusutil kud mwangel. Bibil ushimunin yashikenaku piyasuta yom yiney anch: “Chashirikay Moses kudiokal ku mukandu wa Sinay, . . . chikand cha mpal yend chading ni kupay, mulong wa kwisamb kwend ni Nzamb.”—Kubudik 33:18–34:7, 29.

2. Chom ik chafunday kambuy Paul piur pa uyaj umunyikinau in Kristu?

² Tongin anch udi pamwing nend Moses pa mukandu winou. Chikwikal chizangamishina ni kusangaresh mud ik kuman kupay kwamushena kwa Mwin Dikand Diawonsu ni kutesh mazu mend! Chikwikal kwitapil dilau mud ik kushirik ku Mukandu wa Sinay pamwing nend Moses, chapakach cha manswik ma Chijil! Ov, wading wij anch, nlel, mu jinjil jimwing, in Kristu akin amunyikin uyaj wa Nzamb mu mutapu umwing upandikenamu ap mutapu wamunyikay Moses? Uyakin ukurikina winou udi mu mukand wafunday kambuy Paul. Ndiy wafunda anch in Kristu azizidilau many ‘amunyikin mud makalash uyaj wa Yehova.’ (2 Korint 3:7, 8, 18) Mwi njil yawiy yimwing, in Kristu akweta ruchingej ra kushakam pansh amunyikin niyawiy uyaj wa Nzamb.

Mutapu Umunyikinau in Kristu Uyaj wa Nzamb

3. Ov, mutapu ik twashikedina kal ku kumwijik Yehova mu jinjil jaburenay Moses?

³ Ov, mutapu ik tukutwisha kumunyik uyaj wa Nzamb? Kand kal tumumana ap kumutesh Yehova mud Moses. Pakwez, twashikedin kal kumwijik Yehova kupandakanamu mutapu Moses wamwijikay. Yesu wamekana mud Mesia piswimp mivu 1500 kwinyim kwa rufu ra Moses. Chawiy, Moses kelap kwijik mutapu wading ufanyidina kuwanyin Chijil mudiay Yesu, muntu wafa mulong wa kuyikol antu ku riyind ra chitil ni rufu. (Rom 5:20, 21; Galatia 3:19) Chikwau kand, Moses wamana kusu mu kukep uyaj wa rutong ra Yehova, wadinga wasidina pa Want wa Umesia ni Paradis ukezay kulet pa divu. Etu tumen kamu uyaj wa Yehova, chidiap nich mes metu ma mbij, pakwez nich mes ma ritiy rengamidina pa malejan ma Bibil. Chikwau kand, twateshin kal dizu dia Yehova, chidiap kusutil kud mwangel, pakwez kusutil ku Bibil, nakash kamu mu rusangu ruwamp, risambidina mu mutapu usangareshina malejan ni mujikit wa Yesu.

4. (a) Mutapu ik ukatau kumunyik in Kristu azizidilau many uyaj wa Nzamb? (b) Mutapu ik ukatau kumunyik uyaj wa Nzamb antu akweta ruchingej ra kushakam pansh?

⁴ Ap anch in Kristu kakatap kumunyik uyaj wa Nzamb kusutil ku kupay kwa jimpal jau, chakin kamu mpal jau jipayin pakatau kuyilej antu akwau piur pa untu ni ntong jitumbila ja Yehova. Piur pa dichuku dietu, muprofet Isay wasambela kulond anch antu a Nzamb akez “kalejan katumb [ka Yehova] mukach mwa michid.” (Isay 66:19) Chikwau kand, ku 2 Korint 4:1, 2, tutangin anch: “Chawiy mudi etu tukwet mudimu winou . . . , etu twalik yom ya ujindj yikwatishena usany, kitukat kwendip ni kwidimwosh, kitukat kuyidimbip antu nich dizu dia Nzamb, pakwez tukat kudimekesh patok mu uyakin, chakwel tumeken mwamu ku kom ka muntu ni muntu, ni ku mes kwa Nzamb.” Paul wading wisambidin pakampwil in Kristu azizidilau many, antu adia “in mudimu a manswik masu.” (2 Korint 3:6) Pakwez mudimu wau wikadil kal nich usu pa antu avud nakash ikadila kal nich ruchingej ra mwom wa chikupu pa divu. Mu mudimu wa yisak yawonsu yaad mudi kumunyik uyaj wa Yehova chidiap ching kusu ku yikatau kufundish pakwez kand ni mu mashakamin mau. Chidi chisend chetu ni dilau dietu kumunyik uyaj wa Nzamb Udia piur Nakash!

5. Kushakam kwetu kuwamp kwa muspiritu kudi uman wa chom ik?

⁵ Ilel unou, rusangu ruwamp ritumbila ra Want wa Nzamb akat kurilejan mu mangand mawonsu, mud mwatakelay Yesu kulond. (Mateu 24:14) Antu a michid yawonsu, a majuku mawonsu, a mangand mawonsu, ni a jindim jawonsu itiyijin nich musangar rusangu ruwamp ni akarumwin kal mwom wau chakwel kusal rusot ra Nzamb. (Rom 12:2; Kujingunik 7:9) Mud in Kristu a kusambish, kakutwishap kulik kulondil piur pa yamanau ni yateshau. (Mudimu 4:20) Antu mamiliyon musamban ni kusut, avud nakash kupandakanamu mwadingau pa muten ap wisu wa rusangu ra muntu, akat kumunyik ilel uyaj wa Nzamb. Ov, udi umwing wau? Kushakam kuwamp kwa muspiritu kwa antu a Nzamb kuletin uman witiyikishina wa chiyukish ni diking dia Yehova. Mulong wa mausu makash maturishishina, chimeken kamu nakash anch spiritu wa Yehova udi pad etu. El tushinshikin mulong wak chidia mwamu.

Kutwishik Kuyinenetish Antu a Nzamb

6. Ov, mulong wak kwikal ku mutambu wa Yehova kwitin ritiy ni kwikasikesh?

⁶ Tulonda bil anch akutazuk ku dirumburish chakwel kupan uman piur pa mpongirik wakad riy. Wij anch mpongirik winou ukwet dirijek dia usu nakash ni ukez kusadil mitapu yin yawonsu chakwel kukukangesh kumusaul patok. Chakwel upana uman wa kumufish nich mpongirik winou chitin kwikasikesh ni kwikal nich ruchingej anch anyikel akez kukuchidij. Tudi mu mwikadil wa chilik chimwing. Pa kupan uman piur pa Yehova ni piur pa ntong jend, tukat kulond yidia chinyim nend Satan Djabul, nich kumusaul patok mud mpongirik ni mukamakasu ukata kudimb mangand mawonsu ma antu. (Yohan 8:44; Kujingunik 12:9) Kwikal kwey ku mutambu wa Yehova ni kumupompat Djabul kwitin ritiy ni kwikasikesh.

7. Usu ik ukwetay Satan, ni chom ik chipakishinay kusal?

⁷ Yehova udi, chakin kamu, Upandakena Awonsu. Dikand diend didi dikash kupandakanamu kulemp dia Satan. Tukutwish kwikal nich kashinsh anch Yehova kadiap kusu ukutwisha pakwez usotil kand kutuking anch twamusadil nich kushinshaman. (2 Jinsangu 16:9) Chakin kamu, Satan udi nyikel wa ayilembil ni wa mangand ma antu ashadika kal kud Nzamb. (Mateu 12:24, 26; Yohan 14:30) Chamudjibwilau pa divu ni wizwil too nich “ujim [ukash],” Satan uyipompatin nich ujim atushalapol a Yehova ni usadidil mangand madia mu winyikel wend chakwel kupakish kujik tun twa antu in awonsu alejena rusangu ruwamp. (Kujingunik 12:7-9, 12, 17) Ov, mutapu ik musadilingay mwamu? Ukat kusadil jinjil jisatu.

8, 9. Ov, mutapu ik ukatay Satan kusadil rukat riyimp, ni mulong wak tufanyidina kusadil manangu pa kutond arund netu?

⁸ Njil yimwing yisadidilay Satan mulong wa kutuzuwol yidi kubangin kwa mwom. Antu a mu machuku minam ma nsudiel adi in kukat nfalang, in kwikat ayinau, ni in kukat kwisangaresh. Kadiap in kumukat Nzamb. (2 Timote 3:1-4) Pakwatikenau nakash nich milong ya mwom ya pichuku-pichuku, antu avud ‘kitiyijinap kwau’ rusangu ruwamp tukata kuyitwadil. Kasangaredinap kwau kwilej uyakin wa Bibil. (Mateu 24:37-39) Mwikadil winou ukutwish kusamburik, kutushikij mu mwikadil wa kuzuwol muspiritu. Anch twilikidil kukudish rukat ra yom ya ku mujimbu ni kwisangaresh kwa mwom, rukat retu piur pa Nzamb rikez kutalal kamu zoong.—Mateu 24:12.

⁹ Pa chinech, in Kristu akat kusadil manangu chakwel kutond nawamp arund nau. “Muntu ukata kwend ni in manangu niyend ukez kwikal mwin manangu,” mwamu mwafunday Mwant Solomon, “pakwez ukata kwend nau ayisup ukez kaman mar.” (Jinswir 13:20) El ‘twendany’ nau antu amunyikina uyaj wa Nzamb. Chidi chisangareshina mud ik kusal mwamu! Mud mutukumangena pamwing nau akadivar ni anambaz netu a muspiritu ku yikumangan ni pa yisu yikwau, tukat kwisakin dikasikesh dia rukat rau, ritiy rau, musangar wau, ni manangu mau. Urund winou uwamp ukasikeshin chiyul chetu cha kudandamen mu mujikit wetu.

10. Ov, Satan ukat kuyisadil antu amunyikina uyaj wa Nzamb dikonkuril mu jinjil ik?

¹⁰ Njil ya kaad yisadidilay Satan chakwel kuyikangesh in Kristu awonsu kumunyik uyaj wa Nzamb yidi dikonkuril (mazak). Nkeu yiney yifanyidinap kutukashimwish. Pa chisu cha mujikit wend pa divu, Yesu Kristu amukonkurila—amusipa, amujola masun, amusesa, amusala masaal ma usany, ni kumuchil mat. (Marko 5:40; Luka 16:14; 18:32) In Kristu a kusambish niyawiy ayikonkurila. (Midimu 2:13; 17:32) Atushalapol a katat a Yehova arishin nich mar ma chilik chimwing. Kwambatan nend kambuy Pita, akez kuyipil dijin anch “aprofet a makasu.” Pita wasambela kulond anch: “Ku machuku ma kwisudiel, kukez kez in maswimbu ni maswimbu mau, akez kendil mu maku mau ayinau, ni kulond anch, Ing kushilimu kwa kwez kwend kudi kwisu? Mulong, . . . yom yawonsu ‘yidi kwau mud muyadinga kudiosh payitanginau.’” (2 Pita 3:3, 4) Antu a Nzamb akat kuyikonkuril mud anch kijap kwau uyakin wa yom. Yijil ya ngikadil yidia mu Bibil ayimening mud yom yasika kal. Kud antu avud, uruu utukata kulejan udi usup. (1 Korint 1:18, 19) In Kristu akat kutan dikonkuril ku shikol, ku mudimu, ni yisu yimwing ap mu dijuku diau. Pakad kuziy, tudandamedin kumunyik uyaj wa Nzamb kusutil ku kulejan kwetu, mud Yesu twij anch Dizu dia Nzamb didi uyakin.—Yohan 17:17.

11. Mutapu ik wasadidilay Satan kuzengol mulong wa kupakish kuyinenetish in Kristu?

¹¹ Njil ya kasatu yisadidilay Djabul mu kusot kutunenetish yidi rupompat ap kuzengol. Yesu wayela in kwilejend anch: “Chawiy akez kanipanany ku mar ni kunijipany. Akez kanikisany kudi michid yawonsu mulong wa kwambat dijin diam.” (Mateu 24:9) Chakin kamu, mud Atuman a Yehova, twarishin kal nich rupompat rikash mu mitambu kushalijan ya divu. Twij anch Yehova wasambela kal kulondil rukis riner, ap anch ukankuny, ukez kwikal pakach pa in kumusadil Nzamb ni in kumusadil Satan Djabul. (Disambishil 3:15) Twij kand anch kusutil ku kushinshaman mu choziu, tukat kupan uman anch Yehova ndiy ukweta mbil ya kwikal mwant mwin mangand. Kwijik chom chinech kukutwish kutukasikesh ap anch tudi mu mikadil yikash chipandikena. Kwikil kuzengol kukeza kutunenetish chikupu ang twakwat mupak wa kudandamen kumunyik uyaj wa Nzamb.

12. Ov, mulong wak tufanyidina kusangar anch twajijaman ku rupompat ra Satan?

¹² Ov, ukat kujijaman ku makasu ma mangand ni kwimekesh ushishamena chikalap nchik dikonkuril ni rupompat? Komb ukwet diyingish dia kusangar. Yesu wayileja nich kashinsh antu akeza kumulondul anch: “Wayukany kwen pakunisalolau kudi antu, ni pakunizengolau, ni pakunitwambilanyau kuyip kwawonsu mulong wa kwingambat am. Zangamany ni musangar ujim, mulong difut dien didia mwiur diaswej kujimb, mulong chawiy kand chayimeshangau aprofet ading kurutu kwenen mar.” (Mateu 5:11, 12) Kujijaman kwey kumekeshin anch spiritu mukash utumbila wa Yehova udi pad ey, ukwinkishin usu wa kumunyik uyaj wend.—2 Korint 12:9.

Kujijaman Nich Ukwash wa Yehova

13. Wisu mulong ujim utukata kujijaman mu mujikit wetu wa Ukristu?

¹³ Mulong wa kusambish utukata kujijaman mu mujikit udi anch tumukatin Yehova ni tusanger kumunyik uyaj wend. Antu akat kuyimburij antu akatilingau ni kuyilimish, ni kwikil muntu ap umwing tufanyidina kwimburij kumupandakanamu Yehova Nzamb. Mulong wa rukat rend rijim, ndiy wamutuma Mwanend pa divu chakwel kulet uman wa uyakin ni kuyikol antu aziyidila. (Yohan 3:16; 18:37) Mud Nzamb, tusotil anch antu a milad yawonsu ashikena ku kukarumuk ni ku dipandish; chawiy tukata kuyilejin. (2 Pita 3:9) Maswir minam, pamwing nich chiyul chetu cha kumwimburij Nzamb, yikat kutubachik kudandamen mu kumunyik uyaj wend kusutil ku mujikit wetu.

14. Ov, mutapu ik ukatay Yehova kutukasikesh chakwel tujijamana mu mujikit wetu?

¹⁴ Chijim, usu wetu wa kujijaman mu mujikit wa Ukristu udiokil kud Yehova. Ndiy ukata kutukwash ni kutukasikesh kusutil ku spiritu wend, ku dirijek diend, ni ku Dizu diend, Bibil. Yehova “ndiy mwin kupan kujamish” kud antu asotila kumunyik uyaj wend. Ndiy ukat kwakul ku malembil metu ni kutwinkish manangu ma kurish nich yoziu. (Rom 15:5, Manswik Masu; Jakobu 1:5) Chikwau kand, Yehova kakatap kutulik atwoza mu choziu chakad etu kutwish kupandakan. Anch twamuchingejin Yehova, ndiy ukez kutenchik njil chakwel tukutwish kudandamen kumunyik uyaj wend.—1 Korint 10:13.

15. Chom ik chikata kutukwash kujijaman?

¹⁵ Kujijaman mu mujikit wetu kupanin uman anch tukwet spiritu wa Nzamb. Chilakej: Tulonda anch muntu kanang wakwit kwangan mulad kanang wa dibot ku chis ni chis, pakad difut. Wakulej kusal mwamu nich nfalang jey ni chisu chey. Kupwa, wez watesh anch antu akemp kusu awiy akatina chakin dibot diey; amwing akez kukangesh ap usu usadila mulong wa kwangan dibot. Ov, utongin anch ukudandamen kusal mudimu winou ngond ni ngond, muvu ni muvu? Pamwing ap bwat. Pakwez, ukutwish kwipan amwiney mu kulejan rusangu ruwamp nich kusadil chisu chey ni nfalang jey mivu yivud, ap mu makum ma mivu. Ov, mulong wak? Ov, chidiap mulong umukatin Yehova ni kusutil ku spiritu wend ndiy uyukishin usu usadila nich kukukwash chakwel kujijaman? Mwawiy kamu!

Mudimu Ufanyidinau Kuvurik

16. Kujijaman mu mudimu wetu kurumburikin ik kud etu ni kud antu atuteshina?

¹⁶ Mujikit wa manswik masu udi chipau chipandakena kujimb. (2 Korint 4:7) Chawiy chimwing, mujikit wa Ukristu usadilau amikoku akwau kunyingumuk mu mangand udi chipar. Chiudandamedina mu mujikit wey, ukutwish, mud mwamufundinau Timote kudiay Paul, “[kwipandish] ey amwiney ni awonsu akukutesha ey.” (1 Timote 4:16) Tongin bil chirumburikina chom chinech. Rusangu ruwamp ulejena riyinkishin antu akwau mutapu wa kushakam chikupu. Ukutwish kuta urund ukash nau antu ukata kukwash muspiritu. Tongin mutapu chikeza kwikal cha musangar kushakam chikupu mu Paradis pamwing nau antu wakwasha kwilej piur pa Nzamb! Chakin kamu kakezap kuvuramen usu wey wasala mulong wa kuyikwash. Udi musul wa musangar mud ik!

17. Ov, mulong wak chirung chetu chidi cha pakampwil mu rusangu ra muntu?

¹⁷ Ushich mu chirung chimwing cha pakampwil mu rusangu ra muntu. Rusangu ruwamp kakezap kand kurilejan pakach pa antu apumbuka kal kudiay Nzamb. Nowa washakama mu mangand mud minam, ni wamamana chimasuta. Ukez kusangar mud ik pakezay kwijik anch wasala rusot ra Nzamb pa kutung wat nich kushinshaman, mwipandishinay amwinend ni dijuku diend! (Hebereu 11:7) Niyey ukutwish kwikal nich musangar mud winou. Tongin bil chiukeza kov mu mangand masu ang watal kwinyim pa mujikit wey wa mu machuku minam ma kwisudiel, nich kwijik anch wasala yiwatwisha kusal mulong wa kutwal kurutu yisakin ya Want.

18. Yehova uyinkishin atushalapol end kashinsh ni dikasikesh ik?

¹⁸ Komb, tudandamenany kumunyik uyaj wa Nzamb. Kusal kwetu mwamu kukez kwikal chom tukeza kuvurikang chikupu. Yehova niyend ukat kuvurikang midimu yetu. Bibil ukasikeshin anch: “Mulong Nzamb kadip wakad kutentam wa kuvuramen mudimu wen ni rukat riukata kumekeshilany mu dijin diend, muukata kuyisadilany in Kristu, ni katat uchidi kuyisadilany. Etu tusotil chakwel mwawonsu wa pakach pen amekesha mushiku wa kudandamen kwinoku kwa kuwanyish kwa ruchingej ni kushik kwisudiel; kangal wikalany ni usweral, pakwez ikalany in kuyilakej awiy akata kudandamen mu ritiy ni kuswan kushilimu.”—Hebereu 6:10-12.

Ov, Ukutwish Kurumburil?

• Ov, mutapu ik ukatay mwin Kristu kumunyik uyaj wa Nzamb?

• Jisu njil jisadidilay Satan mu kupakish kwend kuyinenetish antu a Nzamb?

• Uman ik udiaku umekeshina anch spiritu wa Nzamb udi pad etu?

[Chipich chidia pa paj wa 9]

Mpal ya Moses yapaya uyaj

[Chipich chidia pa paj wa 10]

Tukat kumunyik uyaj wa Nzamb mu mujikit wetu