Yikumangan ya Michid ni ya Distrik Yikat Kutubachik Kumushiman Nzamb!
Yikumangan ya Michid ni ya Distrik “Panany Uyaj Kud Nzamb” yisadikina djat ni katat yapana uman uwamp nakash. Yishiken yiney ya uteokras yadinga mulong wa kushiman dijin dia Yehova ni kuwapish ukaliweny wetu wa ‘kupan kud Yehova uyaj wa dijin dien.’ (Kus. 96:8) Chakin kamu, ndiy kamu uwanyidina kutambul uyaj mulong wa midimu yend ya uumb yamushena, yimekeshina ngikadil yend yipandakena kuwap.—Job 37:14, NW; Kuj. 4:11.
Nich kusadil yipul yilondwila ey pamwing nich yom yiwafunda, irijeka mulong wa kusadil pamwing mu kuchirikinamu kwa program wa chikumangan kukusadika pa rubing ra Mwinkind 20.
1. Ov mutapu ik yitang yakad mwom yikata kulejan uyaj wa Nzamb, ni mutapu ik kushalijadina ni mutapu ukatau kumushiman antu? (Kus. 19:1-3; kudiokal mu diskur “Yitang Yikat Kulejan Uyaj wa Nzamb”)
2. Chom ik chilejena kukarumuk kwa chifu cha Yesu, ni mutapu ik uyakin winou uyikasikeshina in Kristu nlel? (kudiokal mu diskur nfungwil, “Yishimushimu ya Uprofet wa Uyaj Yitukasikeshin!”)
3. Mutapu ik tukutwisha kukudish mulad wa kwikepish mud wamekeshay muprofet Daniel, ni ukwash ik tukutaninamu kusutil kusal mwamu? (Dan. 9:2, 5; 10:11, 12; kudiokal ku diskur “Uyaj wa Yehova Aujingunin Kud in Kwikepish”)
4. (a) Yom ik yisatu piur pa dirumburish dia Nzamb tukutwisha kwilej kusutin ku uprofet wa Amos? (Amos 1:3, 11, 13, NW; 9:2-4, 8, 14, NW) (b) Dilejan ik dia kusadil dikutwishau kwilej Atuman’a Yehova nlel kusutin ku chilikej cha dibabesh chidia ku Amos 2:12, NW? (kudiokal ku diskur dia yikunku yisatu “Uprofet wa Amos—Ukwet Uruu Mulong wa Chirung Chetu”)
5. (a) Ubaj ik udiaku ku kuna pakad kupep pa chopu, ap anch muntu kakwachikinap kwend? (b) Mutapu ik ukutwishau kupwish mulong wa kuna pakad kupep pa chopu? (Marko 9:43; Ef. 5:18; kudiokal ku diskur “Ipukany Mupit wa Kuna Maar Pakad Kupep pa Chopu”)
6. Mutapu ik watambwilanya ukwash udiokila ku mukand usu “Voici le Beau Pays”? (kudiokal mu diskur “ ‘Ngand Yiwamp’—Chifanikesh cha Paradis”)
7. Mu mitapu ik yisatu mu tukutwisha ‘kumunyik mud yintadil ya uyaj wa Yehova’? (2 Kor. 3:18; kudiokal mu diskur dia yikunku yisatu “Tumunyikany Uyaj wa Yehova Mud Makalash”)
8. Ov, wisu musul wa rukis rakad mulong, ni chom ik chikutwisha kulam kushinshaman kwetu kwikalap nchik rukis riner? (Kus. 109:1-3; kudiokal ku diskur “Akisinau Pakad Mulong”)
9. Chitongijok mud cha Kristu piur pa ukurump chom ik, ni mutapu ik ukutwishay muntu kukwat mupak wa kukudish chitongijok chinech mutapu ujim nakash? (Mat. 20:20-26; kudiokal ku diskur “Tukudishany Chitongijok Mud cha Kristu Piur pa Ukurump”)
10. Chom ik chikutwisha kutukwash kushal akash muspiritu chikalap nchik kuziy kwa mujimbu? (kudiokal ku diskur “Aziyila, Pakwez Akad Kuchirik Kwinyim”)
11. Ov antu ik amwing akatay kusadil Satan chakwel kukudish makasu, ni chakul ik cha Mifund chifanyidina ku kupakish kuwish ritiy retu? (Yohan 10:5; kudiokal ku diskur “Babalany Nich ‘Dizu dia Aeny’ ”)
12. (a) Mutapu ik ukutwishau anvaj kulondul chilikej cha Yesu chidia ku Marko 10:14, 16? (b) Chom ik usangeridina piur pa buku musu Ilejina Kudiay Mulej Mujim? (kudiokal ku diskur “Anetu—Uswan Upandakena Kuwap”)
13. Mutapu ik ukatau ansand kumushima Yehova? (1 Tim. 4:12; kudiokal ku diskur “Mutapu Ukatau Ansand Kumushiman Yehova”)
14. Masengan ik ma dram “Tupanany Uman Pakad Wom Kwikalap Nchik Rupompat” ulamina mu manangu mey?
15. Mutapu ik tukutwisha kwimburij chilikej chashay (a) Pita ni Yohan? (Midimu 4:10) (b) Stefan? (Midimu 7:2, 52, 53) (c) kud chikumangen cha mu chitot cha mivu cha kusambish? (Midimu 9:31; kudiokal ku dram ni diskur “Tulejanany Rusangu Ruwamp ‘Pakad Kulik’ ”)
16. (a) Mu jinjil ik twakwatina mipak ya kumushiman Nzamb? (b) Tukwet kashinsh ik pitukata kusadil yitwilejina ku Yikumangan “Panany Uyaj Kud Nzamb”? (Yohan 15:9, 10, 16; kudiokal ku diskur “ ‘Songany Mabuj Mavud’ Mulong wa Uyaj wa Yehova”)
[Caption on page 1]
[Picture on page 1]
Kusutil ku kutongijokin pa malejan ma muspiritu mapanau ku chikumangan, tukez kwikal abachikinau kusadil yom yitwileja. (Flp. 4:8, 9) Chinech chikez kukasikesh mupak wetu wa “kusal yawonsu mulong wa uyaj wa Nzamb.”—1 Kor. 10:31.