Pan Katumb kud Yehova

1. Nlel antu avud ashinshikidin pa yom ik?

OV, NIYEY wamen kal anch nlel antu avud akatin kwitumbish ayinau? Chilakej, nlel anch wandam pa tupend twa kupalangeshin jinsang, ukutwish kuman anch antu avud akat kwibaz mulong wa ayinau ni mulong wa yom yisadinau. Pakwez, antu akemp nakash awiy akata kumutumbish Yehova Nzamb. Mu mutu wa mulong winou, tukuman chirumburikina kumutumbish Yehova ni mulong wak tufanyidin kusal mwamu. Tukuman kand mutapu tukutwisha kumwinkish Nzamb katumb kawanyidinay kamu kutambul ni mutapu ukutumbishay amwinend dijin dend piswimp ap.

CHOM IK CHIRUMBURIKINA KUPAN KATUMB KUD YEHOVA?

2. Yom ik yasalay Yehova ku Mukandu wa Sinay? (Tal kand chipich.)

² Katumb chom ik? Mu Bibil, dizu “katumb” dikutwish kurumburik yom yikata kusal anch muntu ikal ushimwokishena. Machuku makemp kupwa kwa kuyidosh in Isarel mu Idjibit, Yehova wamekesha anch ud Nzamb ushimwokishena nakash. Tong bil: dichuku dinida, in Isarel akumangana kwinshin kwa Mukandu wa Sinay mulong wa kutesh mafundish ma Nzamb. Mukandu wawonsu aubwika ku didj dijim. Pakad kulab, kwalanka mish yivud, kuzal kwa divu kukash, milayilay, anzaj ni chidjimin chijim cha mpuny. (Kub. 19:​16-18; 24:17; Kus. 68:9) Pasalay Yehova yom yiney in Isarel afanyina kamu kushimwok nakash pamanau dikand dend.

3. Chom ik chirumburikina kupan katumb kud Yehova?

³ Antu niyau akutwish kumwinkish Yehova katumb. Mutapu umwing tukata kumutumbish Yehova kud kuyilej antu akwau piur pa mikadil yend yishimwokishena. Tukat kumutumbish kand Nzamb anch twachirish katumb kud ndiy mulong wa yom tusadina kusutin ukwash wend. (Isay 26:12) Mwant David ud chilakej chiwamp nakash piur pa kupan katumb kud Yehova. Kurutu kwa chikumangen cha Isarel, David wamulembila Nzamb anch: “A! [Yehova], kujimb, ni ukash, ni uyaj, ni kupandakan, ni kuwap, yawonsu yidi yeyey, mulong yawonsu yidia mu maur ni yidia pansh yidi yeyey.” Papwishay kulembil, “[chikumangen] chawonsu chamushimana [Yehova].”​—1 Jsng. 29:11, 20.

4. Mutapu ik wapanay Yesu katumb kud Yehova?

⁴ Padingay pa divu, Yesu wamutumbisha Tatukwend kusutin kulond anch Ndiy wading Musul wa yilay yasalangay. (Mar. 5:​18-20) Wapana kand katumb kud Yehova kusutin yom yalondangay piur pa Tatukwend ni yom yayisadinangay antu akwau. Dichuku dimwing, Yesu wading ukat kufundish mu Sinagog umwing. Pakach pa antu ading amuteshina pading mband umwing wading ukweta chilembil kudosh mivu 18. Chilembil wading wamufumba kal nyim ni kadingap ni mutapu wa kwonik. Chading kamu chikokujol chikash kud mband winou! Mulong wamwovila riy, Yesu wamusejina ni wamuleja nich ranaken anch: “Mband ey, mayej mey mapwa kal.” Kupwa, wamwazuka makas ni kapamp kamwing mband winou wonika ni “wasambish kumutumbish Nzamb.” Wamujikitisha Yehova nakash mulong wamukwasha kamu kwikal ni ukash wa mujimbu uwamp! (Luka 13:10-13) Mband winou wading kamu ni mayingishin ma kupan katumb kud Yehova, chilik chimwing kand niyetu.

MULONG WAK TUKAT KUMUTUMBISH YEHOVA?

5. Mayingishin ik tukweta ma kumulimishin Yehova?

⁵ Tukat kumutumbish Yehova mulong tumulimishin chikurikina. Tukwet kamu mayingishin mavud ma kumulimishin. Yehova ud Nzamb wa dikand dawonsu; kakatap kuziy ap pakemp. (Kus. 96:4-7) Manang mend makat kumeken mu yom yasalay. Ndiy uda Musul wa mwom wetu ni Ndiy kand ukata kuulam. (Kuj. 4:11) Ushinshamen. (Kuj. 15:4) Yom yawonsu yikatay kusal yikat kurumburik, ni ukat kuwanyish chisu chawonsu kushilamu kwend. (Jos. 23:14) Yawiy yalondinay muprofet Yeremiy piur pa Yehova anch: “Kwikil mukwau udia mudi ey pakach pa in mangand awonsu a michid, ap pakach pa ant au”! (Jer. 10:6, 7) Chakin kamu, tukwet mayingishin mavud ma kumulimishin Tatukwetu uda mwiur. Pakwez Yehova kadap kwend ching Nzamb uwanyidina kutambul kalimish ketu. Ukwet mikadil yiwamp yitubachikina kumukat nakash.

6. Mulong wak tumukatin Yehova?

⁶ Tukat kumutumbish Yehova mulong tumukatin nakash. Tumukatin Yehova mulong wa mikadil yend yiwamp yivud nakash. Ud Nzamb wa riy ni ranaken. (Kus. 103:13; Isay 49:15) Anch twovil ushon, niyend ukat kwov ushon. (Zak. 2:8) Ukat kutukwash kumwijik ni kwikal arunend. (Kus. 25:14; Mid. 17:27) Wikepishin mulong “ukat kutal mes pa yom yidia kwishin, ni kutal yom mudi muyidia mwiur ni pansh. Ukat kulangwish mukemp ku rufunfut.” (Kus. 113:6, 7, TMK.) Mulong wa mayingishin minam mawonsu, tukatin kamu kumutumbish Nzamb wetu mujim.​—Kus. 86:12.

7. Dilau ik da pakampwil tukweta?

⁷ Tukat kumutumbish Yehova mulong tukatin anch antu akwau amwijik. Antu avud kijap uyakin piur pa Yehova. Mulong wak? Mulong Satan wayibwikin kal manang kusutin kupalangesh makasu mavud piur Pend. (2 Kor. 4:4) Satan wayibachikin kal antu kwitiyij anch Yehova ud Nzamb wa ujim nakash, wakad kuyibanginang antu, ni ndiy uda musul wa mar mavud mada pa mangand. Pakwez etu twij uyakin piur pa Nzamb wetu! Tukwet dilau da kuyilej antu akwau chiday kamu chakin ni kuyikwash kumutumbish. (Isay 43:10) Kuseng wa 96 ukasikeshidin nakash pa usey wa kupan katumb kud Yehova. Pitushinshikidina mazu ma kuseng winou, man mutapu ukutwisha kumwinkish Yehova katumb kawanyidinay kamu kutambul.

MUTAPU IK TUKUTWISHA KUMWINKISH YEHOVA KATUMB KAWANYIDINAY KUTAMBUL?

8. Mutapu ik tukutwisha kumutumbish Yehova? (Kuseng 96:1-3)

⁸ Tang Kuseng 96:1-3. Tukutwish kumutumbish Yehova kusutin yom tulondina piur pend. Maverse minam mayikasikeshin antu a Nzamb ‘kumuwangin Yehova,’ ‘kushiman dijin dend,’ ‘kulejan dipandish dend,’ ni ‘kulejan uyaj wend pakach pa michid.’ Yiney yawiy mitapu tukutwisha kumutumbish Tatukwetu wa mwiur. In Yuda ashinshamena ni in Kristu a mu mivu chitot ya kusambish, ading akatin nakash kuyilej antu akwau piur pa yom yawonsu yiwamp yayisadilau kud Yehova ni piur pa mikadil yend yiwamp. (Dan. 3:16-18; Mid. 4:29) Mutapu ik tukutwisha kuyimburij?

9-10. Yom ik wilejidina ku chilakej cha Angelena? (Tal kand chipich.)

⁹ Shinshikin chilakej cha Angelena,a nambaz umwing ushicha mu États-Unis. Walonda nich kutakaman piur pa mikadil yiwamp ya Yehova ku mudimu. Mulong wading nsal a mudimu musu, amutazuka ku chikumangan chimwing kwayitazukau antu ading achida asu ku mudimu chakwel ikal ni mutapu wa kuyilej ambay nau a mudimu piur pa mwom wau. Angelena warijeka yipich yimwing mulong wa kumekesh musangar ukwetay mulong ud Kaman wa Yehova. Pakwez, kurutu alonda, mbay nend wa mudimu umwing walejena anch wapamina mu dijuku da Atuman a Yehova ni wasambisha kulond nayimp piur pa yitiyij yetu. Angelena ulondin anch: “Nanenganana nakash. Pakwez nading nij anch yom yading yilondinay piur pa Yehova yadingap yakin. Chawiy nalonda mu muchim wam anch: ‘Nifanyidinap kuninet.’ Chawiy nakwata mupak wa kuyilej uyakin piur pa Yehova.”

¹⁰ Papwishay mbay nend wa mudimu kulond, Angelena wasala malembil miswimp mu muchim. Kupwa wamuleja nich ranaken anch: “Niyam anlidina mu dijuku da Atuman a Yehova ni nidandamedin kwikal Kaman kushik ni pinap.” Ap anch chading chikasiken, Angelena kazazatap. Wayileja ambay nend a mudimu yipich padingay ndiy ni arunend akat kumusadin Yehova ni musangar ni warumburila yitiyij yend nich kalimish. (1 Pita 3:15) Yom ik yashikena? Papwishay Angelena kulond, ikundj winou waduta. Walonda kand yom yiwamp yamanay padingay nsand ni padingay pamwing nau Atuman a Yehova. Angelena ulondin anch: “Tufanyidin kamu kumulondin Yehova. Kulond piur pa dijin dend did kamu dilau dijim.” Niyetu tukwet dilau da kumushiman ni kumutumbish Yehova ap anch antu akwau kamulimishinap.

11. Mutapu ik ukatau in kwifukwil akin kusadin mbil yida mu Kuseng 96:8 kudosh pakur?

¹¹ Tang Kuseng 96:8. Tukutwish kumutumbish Yehova kusutin kumwinkish yom yetu ya usey. In kwifukwil akin a Nzamb akweting chaku cha kumutumbish Yehova mu mutapu winou. (Jnsw. 3:9) Chilakej, in Isarel apana nfalang jau ni yom yau ya usey mulong wa kukwash mudimu wa kutung ni kurijek tempel. (2 Ant 12:4, 5; 1 Jsng. 29:3-9) In kwilej amwing a Yesu ‘asadinang yom yau’ mulong wa kumukwash nich ndiy nau atwimbuy end. (Luka 8:1-3) In Kristu a mu mivu chitot ya kusambish niyau apana yom yau mulong wa kuyikwash nich akadivar ni anambaz nau. (Mid. 11:27-29) Nlel, niyetu tukutwish kumutumbish Yehova kusutin yipan yetu ya kwikatin.

12. Yipan yetu yikutwish kupan katumb kud Yehova mutapu ik? (Tal kand chipich.)

¹² Shinshikinanyaku chilakej chimwing chimekeshina anch yipan yetu yikat kumutumbish Yehova. Mu 2020, mu Zimbabwe mwading chang chikash chalaba nakash. Mwom ya antu avud yading mu ubaj mulong kadingap ni yakuda, kuwejaku ni mwom wa nambaz Prisca. Ap anch chirung chinech chading chikasiken nakash, Prisca wadandamena kulejan Dakasatu ni Dakatan dawonsu, ap pa chirung cha kudim. Antu a piswimp asambisha kumulondol mulong wayangang mu mudimu wa kulejan pa ndond pa kuya ku chir, amwelang anch: “Ey ukufa ni nzal.” Nich kashinsh kawonsu, Prisca wayakulang anch: “Yehova kakuyilikangap atushalapol end.” Kupwa kwa chisu chikemp, watambula ukwash wadokala ku dirijek detu. Dirijek dikala ni mutapu wa kumukwash Prisca ni antu akwau mulong tukweting chaku cha kupan yipan ya kwikatin. Amutej nend a Prisca ashimwoka nakash ni amuleja anch: “Nzamb kakulikinap, chawiy tusotin kwilej yom yivud piur pend.” Pakach pau, antu sambwad asambisha kukumangan ku yikumangan yetu.

13. Mutapu ik ukutwisha yaku yetu kumutumbish Yehova? (Kuseng 96:9)

¹³ Tang Kuseng 96:9. Tukutwish kumutumbish Yehova kusutin yaku yetu. In kupesh amusadinang Yehova ku tempel, ading afanyidin kwikal inangina ku mujimbu. (Kub. 40:30-32) Pakwez, cha usey nakash ading afanyidin kwikal ishitwila. (Kus. 24:3, 4; 1 Pita 1:15, 16) Tufanyidin kusal usu nakash mulong wa ‘kudjol wuntu ukur’ ni ‘kudjal wuntu usu.’ Chinech chirumburikin anch tufanyidin kusal usu wetu win wawonsu mulong wa kwiyep yitongijok ni yaku yiyimp yakad kumusangaresh Yehova. Tufanyidin kand kusal usu wa kutong ni kusal yom mu mutapu umekeshina anch tumwimburijin Yehova ni mikadil yend yiwamp. (Kol. 3:9, 10) Ku ukwash wa Yehova, ap antu ijondila nakash ni akweta chisum nakash akutwish kuswimp ni kudjal wuntu usu.

14. Yom ik wilejidina ku chilakej cha Jack? (Tal kand chipich.)

¹⁴ Shinshikin chilakej cha Jack, wading ukweta chisum ni wapilau anch Chilembil. Mulong wa yom yiyimp yasalay, amufisha nich mulong wa kumujip. Pakwez, pading pachingedinay chisu cha kumujip, Jack witiya kwilej Bibil pamwing ni mukadivar waya kwendin rukan radingay. Ap anch wasala yom yiyimp yivud nakash, Jack watwisha kudjol wuntu wend ukur ni mu kusut kwa chisu amubatisha. Jack waswimpa kamu nakash. Chawiy dichuku dayau kumujip, atulam amwing a rukan rinara adila paladikijanau nend. Isalay umwing wasadina ku rukan rinara walonda anch: “Jack ndiy wada muntu wa rukan muyimp nakash mwinomu. Pakwez katat, ndiy uda muntu wa rukan muwamp nakash.” Rubing rumwing kupwa kwa kumujip Jack, akadivar aya kutakel chikumangan cha mukach mwa rubing mu rukan rinara amanijana ni muntu umwing wakumangana kapamp ka kusambish. Yom ik yamubachika kwez ku chikumangan chinech? Chilakej cha Jack chamupukuna nakash. Mutapu waswimpay wamwinkisha impu ya kwijik yom yading yifanyidinay kusal mulong wa kumwifukwil Yehova. Chakin kamu, yaku yetu yikutwish kumutumbish Tatukwetu uda mwiur!​—1 Pita 2:12.

MUTAPU IK UKUTUMBISHAY YEHOVA DIJIN DEND PISWIMP AP?

15. Mutapu ik ukutumbishay Yehova dijin dend rawonsu piswimp ap? (Kuseng 96:10-13)

¹⁵ Tang Kuseng 96:10-13. Maverse minam ma nsuden ma Kuseng wa 96 malejen anch Yehova ud Nzuj ni Mwant utentamina. Mutapu ik ukutumbishay Yehova dijin dend piswimp ap? Kusutin kurumburish nich kutentam. Piswimp ap ukumushesh Babilon Mujim mulong wasaadikishin kal dijin dend nakash. (Kuj. 17:5, 16; 19:1, 2) Antu amwing akumana kusheshik kwa Babilon Mujim akutwish kusambish kumwifukwil Yehova pamwing niyetwetu. Kupwa, kwi njit ja Armagedon, Yehova ukushesh mangand mawonsu ma Satan ni antu awonsu akata kumubwambwil ni kusaal dijin dend. Pakwez ukuyipandish awonsu amukatina, amuziyidina ni akatina kumutumbish. (Mar. 8:38; 2 Tes. 1:6-10) Kupwa kwa kupak kwa nsuden kukushikena kwinsuden kwa Winyikel wa Mivu Kanan wa Kristu, Yehova ukutumbish kamu dijin dend rawonsu. (Kuj. 20:7-10) Pa chisu chinacha, ‘divu dikez kwizul nich ronganyin ra katumb ka Yehova mud mem mizwila mu karung.’​—Aba. 2:14.

16. Wakwat kal mupak wa kusal ik? (Tal kand chipich.)

¹⁶ Kukwikal musangar nakash pakupanay muntu mwawonsu kud Yehova katumb kawanyidina dijin dend! Pakwez pa chisu chinech, tufanyidin kusal yawonsu tukutwisha mulong wa kulond piur pa Nzamb wetu ni kwikal ni yaku yimutumbishina. Mulong wa kukasikeshin pa usey wa kusal mwamu, Chisak Chitakedila chatondin Kuseng 96:8 kwikal mufund wetu wa muvu wa 2025: “Mwinkishany Yehova uyaj uwanyidina dijin dend.”