MUTU WA MULONG WA KWILEJ WA 23
MUMINY 2 Yehova Diawiy Dijin Diey
Dijin da Yehova—Difanyidin Kurumburik ik kud etu?
‘Yehova ulondin anch “udiany atuman am.”’—ISAY 43:10.
MU WISWIMP
Tukuman yom tukutwisha kusal mulong wa kutumbish dijin da Yehova ni kumekesh anch yom yalonday Satan piur pend yid ya makasu.
1-2. Mutapu ik twija anch dijin da Yehova did da usey nakash kud Yesu?
DIJIN da Yehova did da usey nakash kud Yesu. Kwikil kand muntu mukwau wasalap kal yom mud mwasalay Yesu mulong wa kwijikish dijin da Yehova. Mud mutwamanang mu mutu wa mulong wasambelang, Yesu witiya kufa mulong wa dijin da Yehova ni mulong wa kumekesh anch Yehova ud utumbila ni yom yawonsu yisadiningay yitentamin. (Mar. 14:36; Heb. 10:7-9) Ni kupwa kwa Winyikel wa Mivu Kanan, Yesu ukuchirish ulabu wawonsu mulong wa kutumbish dijin da Yehova. (1 Kor. 15:26-28) Rukat ra Yesu mulong wa dijin da Nzamb rimekeshin yom yivud piur pa urund ukwetay ni Tatukwend. Yom yawonsu yasalay Yesu mulong wa Yehova yimekeshin anch umukatin kamu nakash.
2 Yesu weza pa divu mulong wa kulond mu dijin da Tatukwend. (Yoh. 5:43; 12:13) Wijikisha dijin da Tatukwend kud in kwilej end. (Yoh. 17:6, 26) Wafundisha kand mu dijin da Yehova ni wasala yilay mu dijin dined. (Yoh. 10:25) Yesu wamulembila Yehova chakwel ayilam in kwilej end palonday anch: “Yichidija nich ukash wa dijin diey.” (Yoh. 17:11) Chakin kamu, dijin da Nzamb dading ni usey nakash kud Yesu, kusutamu yom yin yawonsu. Chawiy, mutapu ik ukutwishay muntu kulond anch ud mwin kwilej wakin wa Kristu anch kijap ni kasadidinap kwend dijin da Tatukwend?
3. Yom ik tukumana mu mutu wa mulong winou?
3 Mulong tud in Kristu akin, tukat kwikasikesh kulondul chilakej cha Yesu kusutin kumekesh rukat ni kalimish mulong wa dijin da Yehova. (1 Pita 2:21) Mu mutu wa mulong winou, tukuman mulong wak, Yehova upanin dijin dend kud antu alejena “rusang ruwamp ra Want” nlel. (Mat. 24:14) Tukuman kand mulong wak dijin da Yehova did da usey nakash kud muntu ni muntu panrend.
‘ANTU MULONG WA DIJIN DEND’
4. (a) Kurutu kwa kuchirik mwiur Yesu wayinkisha in kwilej end chisend ik? (b) Chipul ik tukwisambina piur pa chisend chinech?
4 Chisu chikemp kurutu kwa kuchirik mwiur, Yesu wayileja in kwilej end anch: “Ukutambulany ukash chisu chikukushirikinanyay spiritu utumbila, ni ukwikalany atuman am mu Yerusalem, mu Yudeya mwawonsu, mu Samariya, kushik ni ku jindond ja kulemp nakash ja pa divu.” (Mid. 1:8) Chawiy rusang ruwamp afanyina kurilejan ndond jawonsu kadap kwau ching mu Isarel. Mu kusut kwa chisu, antu a michid yawonsu afanyina kwikal ni mutapu wa kwikal in kwilej a Yesu. (Mat. 28:19, 20) Pakwez Yesu walonda anch: “Ukwikalany atuman am.” Ov, in kwilej asu afanyina kwijik dijin da Yehova, anch afanyina kwau kwikal atuman a Yesu? Yinship yilejenau mu Midimu shapitre wa 15 yitukwashin kwakul ku chipul chinech.
5. Mutapu ik wamekeshau atwimbuy nau amakurump anch antu awonsu ading akwet kuswir kwa kwijik dijin da Yehova? (Tal kand chipich.)
5 Mu muvu wa 49 C.C., atwimbuy nau amakurump ading ku Yerusalem akumangana mulong wa kushinshikin ni kuman anch in Yuda ading akwet kuswir kwa kuyitwal kumukand mulong wa kwikal in Kristu. Kwinsuden kwa mambamb, Jakobu mwanchend a Yesu walonda anch: ‘[Pita] waturumburil kal nawamp nakash mutapu wayibanginau antu a michid kapamp ka kusambish kud Nzamb mulong wa kudosh pakach pau, antu mulong wa dijin dend.’ Dijin ik disambinay Jakobu? Pamujimbulay muprofet Amos, walonda anch: ‘Chakwel antu ashadinaku amusurab Yehova, pamwing ni antu a michid yawonsu, antu atazukinau pa dijin dam, mwamu mulondinay Yehova.’ (Mid. 15:14-18) In kwilej asu kafanyinap kusu kwau kwilej ching piur pa Yehova pakwez afanyina kand ‘kuyitazuk pa dijin dend.’ Charumburik anch afanyina kwijikish dijin da Nzamb kud antu akwau ni afanyina kand kuyijingunin kusutin dijin dined.
Ku chikumangan cha chisak chitakedila cha mu mivu chitot ya kusambish, amakundj inay ashinshamena ajingunina anch in Kristu afanyidin kwikal antu mulong wa dijin da Nzamb (Tal paragraf wa 5)
6-7. (a) Mulong wak Yesu weza pa divu? (b) Diyingishin ik dikwau da usey nakash dezinay Yesu pa divu?
6 Dijin da Yesu dirumburikin anch ‘Yehova Ud Dipandish,’ chawiy Yehova wamusadina mulong wa kuyipandish antu awonsu akweta ritiy muday ndiy ni Mwanend. Yesu weza pa divu mulong wa kuyikol antu avud. (Mat. 20:28) Kusutin kupan chakupesh, Yesu wasala anch antu avud apanda ni kwikal ni mwom wa chikupu.—Yoh. 3:16.
7 Chad, mulong wak antu ading akwet kuswir kwa difut mulong wa kupand? Mulong wa yom yasadika mu chir cha Eden. Mud mutapu twamanang mu mutu wa mulong wasambelang, anvaj etu a kusambish, Adam ni Eve, amubwambwila Yehova ni ashadisha dilau da kushakam chikupu. (Dis. 3:6, 24) Pakwez, Yesu weza pa divu mulong wa kusal chom chikweta usey nakash kupandakanamu dipandish da antu. Satan walonda makasu makash piur pa dijin da Yehova. (Dis. 3:4, 5) Chawiy dipandish da an a Adam ni Eve dading dikwatijadin ni mulong uda ujim nakash—kutumbish dijin da Yehova. Mulong Yesu wading umumekeshin Yehova nawamp, chawiy wading ni chisend chijim mu kutumbish kwa dijin da Yehova.
Mutapu ik ukutwishay muntu kulond anch ud mwin kwilej wakin wa Kristu anch kijap ni kasadidinap kwend dijin da Tatukwend?
8. In kwilej awonsu a Yesu akwikal ni kuswir kwa kwijik yom ik?
8 Antu awonsu akuteka ritiy rau muday Yesu, ikala in Yuda ap Antu a michid yikwau, akez kwijik anch dipandish dau didokil kud Yehova, Tatukwend a Yesu. (Yoh. 17:3) Mud Yesu, niyau akez kuyijingunin kusutin dijin da Yehova. Akez kutesh kand mulong wak chid cha usey kutumbish dijin dined. Mulong dipandish dau dikez kwimen kand pa dijin dined. (Mid. 2:21, 22) Chawiy in kwilej a Yesu awonsu ashinshamena akwet kuswir kwa kwilej piur pa Yesu ni Yehova. Chitushimokishinap kuman anch Yesu wapwisha malembil mend mada mu Yohan shapitre wa 17, nich mazu malondina anch: ‘Am nayijikishin dijin dey ni nikudijikish kand, chakwel rukat wankata nich am rikal mudau awiy ni am mu uumwing ni awiy.’—Yoh. 17:26.
“UDIANY ATUMAN AM”
9. Mutapu ik tukutwisha kumekesh anch dijin da Yehova did da usey kud etu?
9 Kutumbish dijin da Yehova kufanyidin kwikal kwa usey nakash kud in kwilej awonsu akin a Yesu. (Mat. 6:9, 10) Afanyidin kumekesh kusutin yom yisadinau anch dijin da Yehova did da usey nakash kud awiy. Chawiy yom ik tukutwisha kusal mulong wa kutumbish dijin da Yehova ni kumekesh anch yom yalonday Satan piur pa Yehova yid kwau ya makasu?
10. Yom ik tutangina mu buku wa Isay shapitre 42-44? (Isay 43:9; 44:7-9) (Tal kand chipich.)
10 Isay shapitre wa 42-44 ulejen usey wa chisend tukweta cha kutumbish dijin da Yehova. Mu mashapitre minam Yehova uyitin antu akad kumwifukwil chakwel amekesh anch anzamb adaku chakin kamu. Uyitin kand antu kwez kupan uman umekeshina anch anzamb inay adaku. Pakwez kwikil ap umwing ukutwisha kusal mwamu!—Tang Isay 43:9; 44:7-9.
Tukat kumekesh mu mazu ni mu yom tusadina anch kwikil Nzamb mukwau mud Yehova (Tal paragraf wa 10-11)
11. Kukwatijan ni Isay 43:10-12 yom ik yilondinay Yehova kud antwend?
11 Tang Isay 43:10-12. Yehova ulondin piur pa antwend anch: “Udiany atuman am, . . . yam kamu [Nzamb].” Yehova uyitin chakwel akula ku chipul ech: “Ov, kudi kand Nzamb mukwau?” (Isay 44:8) Etu tukwet dilau da kwakul ku chipul chinech. Kusutin mazu ni yaku yetu, tukat kumekesh anch Yehova ndiy kusu Nzamb wakin. Dijin dend did da usey kupandakan. Tukat kumekesh mu mwom wetu wawonsu anch tumukatin chakin kamu Yehova ni anch tumushinshamedin—chikalap nchik rupompat ra Satan. Mwamu tukwikal ni mutapu wa kunung chikas ku kutumbish dijin Dend.
12. Mutapu ik wawanyina uprofet uda mu Isay 40:3, 5?
12 Tukutwish kumwimburij Yesu anch twakwash dijin da Yehova ap katumb kend. Isay wasambela kand kulejan anch “Wapishany njil ya [Yehova].” (Isay 40:3) Mutapu ik wawanyina mazu minam? Yohan Mubatish watenchika njil mulong wa Yesu, muntu wafanyina kwez mu dijin da Yehova ni kulond mu dijin dined. (Mat. 3:3; Mar. 1:2-4; Luka 3:3-6) Uprofet winou ulondin kand anch: “Uyaj wa Yehova ukez kamekan.” (Isay 40:5) Mutapu ik wawanyina mazu minam? Pezay Yesu pa divu, wamumekesha Yehova mu mutapu uwanyidina ni chamekana mud Yehova amwinend weza pa divu.—Yoh. 12:45.
13. Mutapu ik tukutwisha kumwimburij Yesu?
13 Mud Yesu, niyetu tud atuman a Yehova. Tukwet dijin da Yehova ni tukat kuyilej antu awonsu piur pa mikadil yend yishimwokishena. Chakin kamu, mulong wa kupan uman mu mutapu uwamp tufanyidin kand kuyilej antu yom yisadinay Yesu mulong wa kutumbish dijin da Yehova. (Mid. 1:8) Yesu ud Kaman mujim nakash wa Yehova. (Kuj. 1:5) Pakwez, dijin da Yehova difanyidin kurumburik ik kud etu?
CHIRUMBURIKINA DIJIN DA YEHOVA KUD ETU
14. Mud mumekeshinay Kuseng 105:3, mutapu ik tukata kwiyov piur pa dijin da Yehova?
14 Tukwet musangar mulong wa dijin da Nzamb. (Tang Kuseng 105:3.) Yehova ukat kusangar nakash anch twibaz mulong wa dijin dend. (Jer. 9:23, 24; 1 Kor. 1:31; 2 Kor. 10:17) Did dilau kud etu kulimish ni kutumbish dijin dend. Tufanyidinap kwov usany wa kuyilej ambay netu a mudimu, a ku shikol, amutej netu ni antu akwau anch tud Atuman a Yehova! Satan djabul ukatin anch twimik kuyilej antu akwau piur pa Yehova. (Jer. 11:21; Kuj. 12:17) Chikwau kand, Satan nau aprofet end a makasu akatin kuyibachik antu kuvuramen dijin da Yehova. (Jer. 23:26, 27) Pakwez rukat tukweta mulong wa dijin da Yehova rikat kutukwash kudandamen kusangar “machuku mawonsu.”—Kus. 5:12; 89:17.
15. Chirumburikin ik kutazuk pa dijin da Nzamb?
15 Tudandamedin kutazuk pa dijin da Yehova. (Jow. 2:32; Rom 10:13, 14) Kutazuk pa dijin da Yehova kwimedinap kwau kusu pa kwijik ni kutazuk pa dijin da pakampwil da Nzamb. Twamwijikin kal Nzamb mud muntu, tumuchingejidin, ni tukat kukimb ukwash ni umutakel wend. (Kus. 20:8; 99:6; 116:4; 145:18) Tukat kulejan kand dijin dend ni mikadil yend kud antu akwau ni kuyikasikesh kukarumuk ni kusal yom yimusangareshina mulong wa kwikal ni dilau dend.—Isay 12:4; Mid. 2:21, 38.
16. Mutapu ik tukutwisha kumekesh anch Satan ud mukamakasu?
16 Twitiyidin kuman mar mulong wa dijin da Yehova. (Jak. 5:10, 11) Anch twashal ashinshamena mu mar, tukumekesh anch Satan ud mukamakasu. Pa chirung cha Job, Satan wayifunda antu amusadidina Yehova palonday anch: “Yom yawonsu yikwetay muntu ukuyipan mulong wa kuchidij mwom wend.” (Job 2:4) Satan wamekesha anch antu akumusadin Yehova ching kusu mu yirung ya musangar. Ni anch akumulik ang arish ni yikokujol. Job ikundj ushinshamena, wamekesha anch chitongijok chinech chading kwau cha makasu. Nlel, niyetu tukwet dilau da kumekesh anch chikalap nchik yikokujol yikutwishay Satan kutubachikin, tukutwishap kwimik kumusadin Yehova. Tufanyidin kwikal ni kashinsh anch Yehova ukudandamen kutuking mulong wa dijin dend.—Yoh. 17:11.
17. Mud mulejenau mu 1 Pita 2:12 mu mutapu ik ukwau tukutwisha kutumbish dijin da Yehova?
17 Tukat kumekesh kalimish mulong wa dijin da Yehova. (Jnsw. 30:9; Jer. 7:8-11) Mulong antu ij anch tud atuman a Yehova, yom tusadina yifanyidin kutumbish dijin dend. (Tang 1 Pita 2:12.) Chawiy tufanyidin kusal usu nakash mulong wa kumushiman Yehova mu mazu ni mu yisal yetu. Anch twasal mwamu, tukushiman dijin dend chikalap nchik kuburen kuwanyin kwetu.
18. Mutapu ik ukwau tukutwisha kumekesh anch dijin da Yehova did da usey nakash kud etu? (Tal mazu ma kwinshin.)
18 Tukwatin nich usey nakash dijin da Yehova kusutamu katumb ketu. (Kus. 138:2) Mulong wak chid cha usey kusal mwamu? Mulong anch twasal yom yimusangareshina Yehova, yisu yivud antu kakatap kusangar ni akat kutulond nayimp.a Yesu witiya kufa rufu ra usany mud mpopol mulong wa kutumbish dijin da Yehova. ‘Wapipeja usany’ kusutin kulik kwiyakamish nakash ap kubangaku yom yading yitonginau antu piur pend. (Heb. 12:2-4) Washinshikina pa kusal rusot ra Tatukwend.—Mat. 26:39.
19. Mutapu ik wiyovila piur pa dijin da Yehova, ni mulong wak?
19 Tukwet musangar wa kumusadin Yehova ni kututazuk anch Atuman a Yehova. Mulong dijin da Yehova did da usey kud etu, tukudandamen kumutumbish ap anch antu atuduburil. Dijin da Yehova did da usey nakash kusutamu katumb ka ayinetu. Chawiy tukwatany mupak wa kudandamen kutumbish dijin da Yehova ap anch Satan wapakish kutuziyish. Anch twasal mwamu tukumekesh anch dijin da Yehova did da usey nakash kud etu mud muchida kand kud Yesu Kristu.
MUMINY 10 Tumushimanany Yehova Nzamb Wetu!
a Ap Job muntu ushinshamena, wasambisha kutong nakash piur pa mutapu wading umumenau kud antu chisu chalondau amakundj asatu anch pamwing ap kud chom chiyimp chasalangay. kwinsambishin, pafishay anend ni kushadish yom yadingay nich, “Job kasalap chitil, ap [kumufish nich] Nzamb” mu chom ap chimwing. (Job 1:22; 2:10) Pakwez, chisu chamwelau Job anch wasala yom yiyimp, Job wasambisha kwiyingish nich ni kulond “mazu . . . ma usup.” Wakimba katumb kend, pa ndond pa kutumbish dijin da Nzamb.—Job 6:3; 13:4, 5; 32:2; 34:5.