MUTU WA MULONG WA KWILEJ WA 22
MUMINY 15 Tumushimanany Mwan wa Kusambish wa Yehova!
Dijin da Yehova—Dirumburikin ik kud Yesu?
‘Am nayijikishin dijin dey ni nikudijikish kand.’—YOH. 17:26.
MU WISWIMP
Tukuman mutapu wijikishay Yesu dijin da Nzamb ni mutapu waditumbishay ni kuditokish ku masaal.
1-2. (a) Yom ik yasalay Yesu uchuku kurutu kwa kumujip? (b) Yipul ik yikwakulau mu mutu wa mulong winou?
TUD UCHUKU wa Dakanying machuku ma ngond 14 Ngond wa Nisan, muvu wa 33 C.C., Yesu akimbin kumutungan, kumurumburish, kumufish nich, kumumesh mar, ni kumujip. Wading wapwish kal kuda yakuda ya pakampwil mu kapalakany ka piur pamwing nau atwimbuy end ashinshamena. Kupwa kwa yakuda yiney, Yesu wayikasikesh kal in kwilej end. Ni chisu chikemp kurutu kwa awonsu kubudik mu kapalakany ka piur, Yesu wasal kal malembil ma usey nakash. Kambuy Yohan wafunda malembil minam mu mukand wend wa Yohan shapitre wa 17.
2 Malembil ma Yesu matukwashin kujingunin ik piur pa yom yading yimwakamishina pa chisu chinicha? Malembil minam mamekeshin mutapu ik yom yading ya usey kud ndiy mu mudimu wend wawonsu wa kulejan padingay pa mangand? El tutanany yakul ku yipul yiney.
‘NAYIJIKISHIN DIJIN DEY’
3. Yesu walonda yom ik piur pa dijin da Yehova, ni mazu mend marumburikin ik? (Yohan 17:6, 26)
3 Mu malembil mend, Yesu walonda anch: ‘Nayijikishin dijin dey.’ Yesu wovakesha chitongijok chinech tupamp twaad mu malembil mend. (Tang Yohan 17:6, 26.) Yom ik yading yikimbinay kulond? Ov, wayileja dijin dading dakadau kal kwijik? In kwilej a Yesu ading in Yuda, chawiy ading ij kamu nawamp dijin da Yehova. Dijin dined ading adifundin tupamp piswimp 7 000 mu Mifund ya Hebereu. Komb Yesu kadingap kisambidina dijin da pakampwil da Nzamb; pakwez wading wisambidin chimekeshina chakin kamu dijin dined. Yesu wijikisha wuntu wading ujingamina mu dijin da Yehova, kuwejinaku ntong jend, yom yasalay kal, ni mikadil yend, mu mutapu wakaday kal muntu mukwau kusal mwamu.
4-5. (a) Chirumburikin ik kwijik dijin da muntu? Let chilakej. (b) In kwilej a Yesu ashikena nchik kwijik dijin da Yehova?
4 Chilakej, tong bil mud anch pakach pa amakurump a chikumangen chen umwing dijin dend David, ud dokter. Umwij mukadivar winou kudosh pakur. Chad dichuku dimwing wayel kamu nakash ni wikal ni kuswir kwa dokter mau mau mulong wa kukok. Akutwal mau mau ku opital kusadidinay mukadivar winou, wakwok wayerik. Ov, dijin da mukadivar winou dikwikal ni kurumburik ik kud ey? Chakin kamu dikurumburish yom yivud! David kakwikalap kand kwend kusu mukurump wa chikumangen wija, pakwez ukwikal kand dokter wapandisha mwom wey.
5 Mu mutapu umwing kand, in kwilej a Yesu ading ij dijin da Yehova. Pakwez dijin dined dikala ni usey nakash kud awiy mulong Yesu wayikwasha kumwijik Yehova nawamp. Mulong wak tukutwish kulond mwamu? Mulong Yesu wamwimburija Tatukwend mu yom yawonsu yasalangay ap yalondangay. Mwamu atwimbuy end ashikena “kumwijik” Yehova nawamp kusutin kutesh yom yafundishangay Yesu ni kuman mutapu wayisadinangay antu.—Yoh. 14:9; 17:3.
“DIJIN DIEY, DIAWIY DIJIN DIWANGINKISHA AM”
6. Yom ik yakimbay Yesu kurumburil palonday anch Yehova wamwinkishin kal dijin Dend? (Yohan 17:11, 12)
6 Mu malembil mend, Yesu wayitina in kwilej end, walonda anch: “Yichidija nich ukash wa dijin diey, diawiy dijin diwanginkisha.” (Tang Yohan 17:11, 12.) Ov, chinech chirumburikin anch afanyina kumutazuk Yesu anch Yehova? Bwat. Man anch, pisambidinay Yesu piur pa dijin da Yehova, ulondin anch “dijin diey.” Chawiy komb, dijin da Yehova dikalap dijin da pakampwil da Yesu. Chad yom ik yakimbay Yesu kurumburil palonday anch amwinkishin kal dijin da Nzamb? Cha kusambish Yesu wading umekeshin wuntu wa Yehova ni amutuma mulong wa kumulondin Ndiy. Weza mu dijin da Tatukwend ni wasala yilay mu dijin dined. (Yoh. 5:43; 10:25) Chikwau kand, dijin da Yesu dirumburikin anch “Yehova ud Dipandish.” Chawiy dijin da Nzamb dikwatijadin ni da Yesu.
7. Let chilakej chimekeshina mutapu walonday Yesu mu dijin da Yehova.
7 Chilakej, tongin piur pa muntu ushicha mwi ngand yindj mulong wa kulondin ngand yau. Mulong umumekeshin mwant wa ngand yau, yisu yimwing ukutwish kulond mu dijin dend. Chawiy mazu mend ma kwikal ni usu mud ma mwant wa ngand yau. Chilik chimwing kand, Yesu wamekesha wuntu wa Yehova ni walondang kand mu dijin Dend.—Mat. 21:9; Luka 13:35.
8. Mu mutapu ik wading dijin da Yehova ‘muday’ Yesu ap kurutu eza pa divu? (Kubudik 23:20, 21)
8 Bibil umutazukin Yesu anch “Dizu” mulong Yehova wamusadina mulong wa kuyilej angel ni antu yom yading yikatinay Nzamb anch asala. (Yoh. 1:1-3) Chimeken anch Yesu ndiy wading mwangel watumay Yehova mulong wa kuyichidij in Isarel chisu chadingau mu kabeng. Payilejay in Isarel kumuziyin mwangel winou, Yehova walonda anch: “Mulong dijin diam didi mwi ndiy.”a (Tang Kubudik 23:20, 21.) Dijin da Yehova dading ‘muday’ Yesu, charumburik anch wading umumekeshin Yehova ni ndiy walondina dijin da Tatukwend ni kuditumbish.
‘TATUKU, TUMBISH DIJIN DEY’
9. Dijin da Yehova dading dikwet usey ik kud Yesu? Rumburil.
9 Mud mutapu twamana kal, ap kurutu Yesu eza pa divu, Dijin da Yehova dading dikwet usey nakash kud ndiy. Pezay pa divu, Yesu wamekesha anch dijin da Yehova did da usey nakash kud ndiy kusutin yom yasalangay! Pashikay kwinsuden kwa mudimu wend wa kulejan, Yesu wamuleja Yehova anch: ‘Tatuku, tumbish dijin dey.’ Kapamp kamwing, Tatukwend wamwakula nich dizu da piur anch: ‘Naditumbish kal ni nikuditumbish kand.’—Yoh. 12:28.
10-11. (a) Mutapu ik watumbishay Yesu dijin da Yehova? (Tal kand chipich.) (b) Mulong wak dijin da Yehova afanyidin kuditumbish ni kudishitwish?
10 Yesu niyend watumbisha dijin da Tatukwend. Mutapu ik? Mutapu umwing wasalay mwamu wading kusutin kuyilej antu akwau mikadil ni yisal yiwamp ya Tatukwend. Pakwez wasala kand yom yivud nakash mulong wa kutumbish dijin dined. Yesu wafanyina kand kumekesh anch Yehova wasala yom yawonsu yitentamina ni dijin dend ditumbil.b Yesu wamekesha usey ukweta dijin dined chisu chayifundishay in kwilej end malembil ma chilakej. Walonda anch: “Tatukwetu uda mwiur, dijin dey aditumbish.”—Mat. 6:9.
11 Mulong wak dijin da Yehova afanyidin kuditumbish ni kudishitwish? Mulong mu chir cha Eden, Satan Djabul wadimbana makasu mulong wa dijin dined. Satan walonda anch Yehova ud mukamakasu ni anch uyikishin Adam ni Eve chom chiwamp. (Dis. 3:1-5) Kusutin kusal mwamu wamekesha kand anch Yehova ukat kusal yom pakad kutentam. Mulong wa makasu ma Satan antu akutwish kutong anch Yehova ud Nzamb muyimp. Kushik pa chirung cha Job, Satan walonda anch antu amusadidina Yehova akat kusal mwamu mulong kusu kwau wa yom yikatau kutaninawamu. Mukamakasu winou walonda kand anch kwikil muntu umukatina Yehova ni ukutwisha kudandamen kumusadin anch warish ni yikokujol. (Job 1:9-11; 2:4) Chading chitin chisu mulong wa kujingunin nany wading mukamakasu, Yehova anch Satan.
Yesu wayifundisha in kwilej end usey wa kutumbish dijin da Nzamb (Tal paragraf wa 10)
“NITIYIN KUPAN MWOM WAM”
12. Mulong wading ukatin dijin da Yehova, Yesu wakata kusal yom ik?
12 Mulong wa rukat radingay nich mulong wa Yehova, Yesu wakata kusal usu wawonsu mulong wa kutumbish ni kushitwish dijin da Yehova. Walonda anch “nitiyin kupan mwom wam.” (Yoh. 10:17, 18) Chakin kamu, wading witiyin ap kufa mulong wa dijin da Yehova.c Antu aad a kusambish awanyidina, Adam ni Eve, amulika Yehova mulong wa kwibomb ni Satan. Pakwez, Yesu weza pa divu ni wamekesha anch umukatin chakin kamu Yehova. Wasala mwamu kusutin kumuziyin Yehova mu yom yawonsu yalondangay ni yasalangay. (Heb. 4:15; 5:7-10) Washala ushinshamena mu mwom wend wawonsu djat ni ku rufu risansena pa mutond wa mar. (Heb. 12:2) Kusutin kusal mwamu, wamekesha rukat rend mulong wa Yehova ni mulong wa dijin dend.
13. Mulong wak Yesu ndiy wading uwanyidina kamu kumekesh anch Satan ud mukamakasu? (Tal kand chipich.)
13 Kusutin yom yawonsu yasalay mu mwom wend, Yesu wamekesha kamu patok anch Satan ud mukamakasu, pakwez Yehova bwat! (Yoh. 8:44) Yesu wading umwij Yehova nakash kusutamu muntu win mwawonsu. Anch kwading uyakin ap umwing pakach pa yom yalonday Satan piur pa Yehova, Yesu wafanyina kuwijik. Pakwez wakwata mupak wa kudandamen kulondin dijin da Yehova. Ap anch chamekana mud Yehova wamulika, Yesu witiyina kufa ni kushal ushinshamena kud Tatukwend wa rukat pa ndond pa kumulik.—Mat. 27:46.d
Yom yawonsu yasalangay Yesu yamekesha kamu patok anch Satan ndiy mukamakasu kadap Yehova! (Tal paragraf wa 13)
“NAWANYISHIN KAL MUDIMU WANGINKISHA KUSAL”
14. Mutapu ik wamufutau Yesu kud Yehova mulong wa kushinshaman kwend?
14 Mu malembil masalay uchuku kurutu kwa kufa, Yesu walonda anch: “Nawanyishin kal mudimu wanginkisha kusal.” Wading ukwet kashinsh anch Yehova ukumufut mulong wa kushinshaman kwend. (Yoh. 17:4, 5) Yesu kidimbap pamuchingejinay Tatukwend. Yehova kitiyap anch adandamen kushal mwi nzay. (Mid. 2:23, 24) Wamuvumbula ni wamwinkisha ndond ya piur nakash mwiur. (Fil. 2:8, 9) Disuden, Yesu wasambisha kuyikel mud Mwant wa Want wa Nzamb. Want winou ukusal yom ik? Chikunku cha kaad cha malembil ma chilakej chilondin anch: “Want wey weza. Rusot rey [Yehova] arusala pansh mudi mwiur.”—Mat. 6:10.
15. Yom ik yikwau yikusalay Yesu?
15 Piswimp ap, Yesu ukurish nau akankuny a Nzamb ni kuyishesh antu ayimp kwi njit ja Armagedon. (Kuj. 16:14, 16; 19:11-16) Chisu chikemp kupwa kwa chinship chinech, ukumudjibul Satan “mu dibuku diakad musul,” mu mwikadil wakad kutwish kusal chom ufanakena ni rufu. (Kuj. 20:1-3) Yesu ukuchirish chisambu ni kuyikwash antu kwikal awanyidina pa chirung cha Winyikel wa Mivu Kanan. Ukuyivumbul afu. Ukusal anch divu dawonsu dikala Paradis. Rutong ra Nzamb rikuwanyin kamu!—Kuj. 21:1-4.
16. Mutapu ik ukwikala mwom kwinsuden kwa Winyikel wa Mivu Kanan?
16 Yom ik yikusadika kwinsuden kwa Winyikel wa Mivu Kanan? Chitil ni kuburen kuwanyin yikwikalapaku kand. Antu kakwikalap kand ni kuswir kwa kwit dilikishin da yitil yau kusutin difut; kakwikalap kand ni kuswir kwa mwin kuyisankesh ap kwa win kupesh. Ni ‘mukankuny wa nsuden ukusheshau ud rufu’ twaswana kud Adam. Mu jinzay mukwikalap kand antu. Afu akuyichirishin kand mwom. Antu awonsu pa divu akwikal awanyidina.—1 Kor. 15:25, 26.
17-18. (a) Yom ik yikusadika mu kwinsuden kwa Winyikel wa Mivu Kanan? (b) Yom ik yikusalay Yesu anch chisu chend cha kuyikel chapwa? (1 Korint 15:24, 28) (Tal kand chipich.)
17 Chom ik kand chikwau chikusadika kwinsuden kwa Winyikel wa Mivu Kanan? Mu chisu kanang, chom chimwing cha pakampwil chikusadik. Ntad piur pa katumb ka dijin da Yehova jikwimen pinipa. Mutapu ik? Mu chir cha Eden Satan walonda anch Yehova ud mukamakasu, anch kayiyikedinap antu kwa rukat. Kudosh kamu pinipa, dijin dend akat kudishitwish tupamp ni tupamp kud antu amulimishina ni amwovila wom. Chawiy kwinsuden kwa Winyikel wa Mivu Kanan, katumb ka dijin da Yehova akukachirish kamu rawonsu. Pakad kwidjidjek Yehova ukumekesh anch ud Tatuku wa mwiur ukweta rukat.
18 Kupwa kwa Winyikel wa Mivu Kanan, antu awonsu akwijik kamu anch komb yom yawonsu yalonday Satan piur pa Yehova yid kwau ya makasu. Yom ik yikusalay Yesu anch chisu chend cha kuyikel chapwa? Ov, ukulondul chilakej cha Satan kusutin kumubwambwil Yehova? Bwat! (Tang 1 Korint 15:24, 28.) Yesu ukuchirish Want kud Tatukwend. Ukwikal mwinshin mwa winyikel wa Tatukwend. Chakin kamu, chinyim ni Satan, Yesu ukulikap yom yin yawonsu mulong wa rukat rikwetay mulong wa Yehova.
Yesu ud mwiur, ukat kupan chibangul kud Yehova (Tal paragraf wa 18)
19. Dijin da Yehova dirumburikin ik kud Yesu?
19 Chitushimwokishinap pa kuman anch Yehova wamwinkisha mwanend dijin Dend! Yesu wamekesha wuntu wa Tatukwend mu mutapu uwanyidina. Chawiy, komb dijin da Yehova dirumburikin ik kud Yesu? Did da usey nakash kud ndiy kusutamu chom chin chawonsu. Witiya kufa mulong wa dijin dined, ni ukwitiy kuchirish yom yin yawonsu kud Yehova kwinsuden kwa Winyikel wa Mivu Kanan. Mutapu ik tukutwisha kwimburij chilakej cha Yesu? Tukwakul ku chipul chinech mu mutu wa mulong wambakedinap.
MUMINY 16 Tumushimanany Yehova Mulong wa Mwanend Watonday
a Yisu yimwing, angel niyau amumekesha Yehova chisu chapanau uruu mu dijin dend. Chawiy chisadina anch yisu yimwing mu Bibil mwangel amutazuka anch Yehova. (Dis. 18:1-33) Ap anch Bibil ulondin anch Moses watambula Chijil kud Yehova amwinend, maverse makwau mamekeshin anch Yehova wasadina mwangel mulong wa kupan Chijil chinech mu dijin Dend.—Lv. 27:34; Mid. 7:38, 53; Gal. 3:19; Heb. 2:2-4.
b KURUMBURIL MAZU: Dizu “kutumbish” dirumburikin kulimish, ap kuman chom anch chid chitumbila. Dizu “kushitwish” dirumburikin kuchirish kalimish ka muntu ku makasu mamudimbenau ap kumekesh anch kafilap nich.
c Rufu ra Yesu rayinkisha kand antu mutapu wa kwikal ni mwom wa chikupu.
d Tal “Yipul ya in Kutang” mu Chinong cha Kalam, cha Ngond wa 4, 2021, pa paj wa 30-31.