Ov, Kushishaman Kukwet Difut Ik?
“UKAT kufutang usey ukash mulong wa asirans wa ukash wa mujimbu,” mwamu mwalonday Karl, ntimesh wa kompanyi wa asirans.a “Anch wandam mu kompanyi wam, ukez kwilamin mud difuk ma-euro 15 pa ngond, nfalang jivud nakash.”
“Chikutwish kwikal chakin,” mwamu mwakulay Jens. “Pakwez nikweting kal asirans wam wa ukash wa mujimbu nich kompanyi winou kamu mu mivu yivud. Pa kusambish adinga kwau ni kwinkwashang kamu nakash, niyam nisotil kushal ushishamena kud awiy.”
“Kushishaman yidi ngikadil yiwamp,” mwamu mwakulay Karl. “Pakwez, kwikal ushishamena kukat kukudia nfalang!”
Karl wayinga kwend. Chisu ni chisu, kwikal ushishamena, kud muntu windjing kwitining nfalang.b Kwitining kand chisu, usu, ni kwitiyij kushilamu mu manangu. Ov, kushishaman kudi kwa usey ufanyidina yawonsu yiney?
Avud Akutumbishin, Pakwez Akemp Kusu Akata Kukusadil
Mu kukimbijol kwasalau mu Allemagne kud Allensbach Opinion Research Instute, antu 96 pakach pa in kwakul chitot amana win-yakin mud ngikadil yimwing yiswiridikina nakash. Kukimbijol kwa kaad kwa Allensbach kwasalau pa antu akweta mivu 18 kushik ku 24 kwamekesha anch antu 2 pa 3 akula pantaliken nich win-yakin mud “upalangen,” charumburik anch, aumana nawamp nakash.
Ap anch kushishaman, ap win-yakin, akutumbishin nakash kwawonsu, chidi mutapu windjing pichifanyidina chakin kamu kwikal ushishamena, ap kwikal mwin-yakin. Chilakej, mu jingand jivud ja Mwimputu, chisu ni chisu ambay a uruw ap yid ya dijuku akat kwimekeshin kushishaman kukemp umwing ni mukwau. Chisu ni chisu arund niyawiy kakatap kwikal ashishamena umwing kud mukwau. Ni kushishaman kwin kwadinga pasak ni kuyinung pamwing mukurump wa mudimu ni mwin kusal mudimu ap mwin winsak nau in kuland kwashadikin kal kamu. Ov, chidi mulong wak?
Yisu yimwing kukwatikan nakash nich mwom kushil chisu chikemp ap yovil ya muchim yikemp mu kwovijan kwitina kushishaman. Antu arumbukinau mu urund pakach pa antu pamwing ap ni katat idjidjekin kushishaman kud muntu ap wisu. Akwau akutwish kusot mulad wa mwom wa nga-yam-mu-chikas (mwom w’ilel, ukushadika diamashik) wakad kusot kushishaman.
Dikalap nchik diyingish, kushishaman yidi ngikadil yimwing ya usey yitumbishinau nakash pakad kuyisadil. Chawiy lel, yipul yawiy ey: Ov, kushishaman kukwet difut ik? Anch mwamu chidia, nany tufanyidina kushishamen, ni mu jinjil ik? Kwikal ushishamena kuletining yiyukish ik?
[Mazu madia kwishin kwa paj]
a Majin makwau amakarumwin mu rusangu riner ni mu rambakedinap.
b Ap anch “kushishaman” ni “win-yakin” kakatap kuyisadil chisu chawonsu mwi njil yimwing, akat pa yisu yimwing kuyisadil mutapu umwing mu jinsangu jinej.
[Tablo wa jinsangu udia pa paj wa 3]
Kushishaman yidi ngikadil yiwamp yitumbishinau nakash pakad kuyisadil