Atulam Adia “Chilikej Chiwamp Kudi Amikoku”

“Lamany amikoku a Nzamb adia mukach mwen . . . salany mu rusot ra Nzamb . . . , ni kutakaman . . . , mekeshany chilik chiwamp kudi amikoku.”—1 PITA 5:2, 3.

1, 2. (a) Chisend ik chamwinkishau Pita kudiay Yesu, ni mulong wak Yesu wayinga kumuchingejin? (b) Mutapu ik mukatay kwiyov Yehova piur pa atulam atondinay?

KURUTU kwa Pentekot mu muvu wa 33 C.C., Pita ni in kwilej akwau musamban adia yisakol yayirijekinau kud Yesu pa chikum cha Karung wa Galalia. Kinak kadingap kapamp ka kusambish kenday Pita kumuman Yesu kudiosh pavumbukinay, ni wasangara nakash pijikay anch Yesu udi mwom. Pakwez Pita wiyakamisha. Mulong, kwading kwasut kal machuku makemp, Pita wamwituna Yesu kurutu kwa antu anch kamwijap. (Luka 22:55-60; 24:34; Yohan 18:25-27; 21:1-14) Ov, Yesu wamuswejina Pita pitay dilikishin mulong wa kuburen kwend ritiy? Bwat. Pakwez, Yesu wamwinkisha Pita chisend cha kudish ni kulam “an a amikoku” end. (Yohan 21:15-17, Manswik Masu) Mud muchilejenau mu rusangu ra chikumangen cha Ukristu cha mu mivu chitot ya kusambish ridia mu Bibil, Yesu wayinga kumuchingejin Pita. Chakin, Pita, pamwing ni atwimbuy akwau ni amakurump adinga mu Yerusalem, alama chikumangen cha Ukristu mu chirung chimwing cha yoziu ni cha kujimb kwa chikumangen.—Midimu 1:15-26; 2:14; 15:6-9.

² Ilel, kusutil kud Yesu, Yehova wayitonda kal amakundj awanyishina yitinay chakwel ikala atulam ayitakedila amikoku end mu chirung cha machuku makash mu rusangu ra muntu. (Efes 4:11, 12; 2 Timote 3:1) Ov, Yehova uyingin kuyichingejin amakundj inay? Ukadivar wa Ukristu wa chisambu udiaku mu mangand ulejen anch uyingin kwend nich. Chakin, atulam inay adi antu akad kuwanyin, mud mwadingay Pita. (Galatia 2:11-14; Yakob 3:2) Chikalap nchik mwamu, Yehova uyinkishin chisend cha kuyilam amikoku “ikadila kal aend mulong wa mash ma Mwanend.” (Midimu 20:28, MM) Yehova uyikatin nakash amakundj inay, ni uyimen anch afanyidin “kalimish kawanyidina tupamp twaad.”—1 Timote 5:17.

3. Mutapu ik ukutwishau amakurump mu chikumangen kwikal nich spiritu wa musangar?

³ Mutapu ik ukutwishau amakurump kwikal nich spiritu wa musangar, chakwel ikal yilakej kud yid ya chikumangen? Mud Pita ni atulam akwau a mu mivu chitot ya kusambish, ikamedin pa mwiku utumbila wa Nzamb, ukata kuyinkish usu uswiridinau mulong wa chisend chau chijim. (2 Korint 4:7) Mwiku utumbila niyau ukat kusongish dibuj diau mu awiy—rukat, musangar, chisambu, kushimpish kwa muchim, kudimuk, kuwap, ritiy, kwitudish, ni kwilam. (Galatia 5:22, 23, MM) El tushinshikinany jinjil jimwing mukutwishau atulam kwikal chilakej cha kumekesh dibuj dined payidishinau amikoku a Nzamb adia mwishin mwa umutakel wau.

Katany Chikumangen Chawonsu ni Kumukat Muntu ni Muntu

4, 5. (a) Mutapu ik umekeshiningay Yehova ni Yesu anch achikatin chikumangen? (b) Mu jinjil ik jimwing mukatau atulam kumekeshin rukat rau mulong wa chikumangen?

⁴ Ngikadil ya kusambish yikata kusongish mwiku utumbila wa Nzamb yidi rukat. Yehova umekeshin anch uchikatin chikumangen chawonsu pakatay kuchinkish yakudia yivud ya muspiritu. (Isay 65:13, 14; Mateu 24:45-47) Ap mwamu, kuwejin pa kudish chikumangen, Yehova usadil yivud. Yehova umukatin muntu ni muntu pakampwil. (1 Pita 5:6, 7) Yesu niyend ukatil chikumangen. Wapana mwom wend mulong wa chikumangen, ni umwij muntu ni muntu, pa “dijin diend.”—Yohan 10:3, 14-16.  

⁵ Atulam amwilakejin Yehova ni Yesu. Amekeshin anch ayikatin amikoku a Yehova awonsu kusutil ku ‘kwipan ayinau chakwel kuchifundish’ chikumangen. Minsamb yau yimedina pa Bibil yikwashining kudish ni kulam chikumangen, ni mudimu wau ukash pa chinech umeken patok kud antu awonsu. (1 Timote 4:13, 16) Pakwez, kudi yikwau yakad kumekan yikatau kusal mud chisu chikatau kusutish mu kufund marapor ma chikumangen, kufund ni kwakul ku mikand, kutenchik maprogram, ni kusal yom yikwau yivud chakwel kushinshikin anch yikumangan ya chikumangen ni mijikit yikwau yisadikin “nawamp wakad kurumbangan.” (1 Korint 14:40, MM) Chisu chivud midimu yiney yikat kusadik pakad kumekan kud antu ni kakatap kuyijikitish atulam mulong wa midimu yiney. Chakin kamu yidi midimu ya rukat.—Galatia 5:13.

6, 7. (a) Mwi njil ik yimwing mukatau atulam kuyijikin nawamp yid ya chikumangen? (b) Ov, mulong wak chisu chimwing chiding chiwamp kumwijikish mukurump yovil yetu?

⁶ Atulam in rukat asadiling usu wau wawonsu wa kumubangin muntu ni muntu mu chikumangen. (Filip 2:4) Njil yimwing mukatau atulam kwijikijan nawamp ni muntu ni muntu yidi kusutil ku kusal nau pamwing mudimu wa patok wa kukun dizu. Yesu wadinga nikuya pamwing ni in kwilej end mu mudimu wa kukun dizu ni wasadila chisu chinech mulong wa kuyikasikesh. (Luka 8:1) Kalam umwing wija yom yivud ulondil anch: “Najingunina anch njil yimwing yiwamp nakash ya kuyijik ni kuyikasikesh akadivar ni anambaz yidi kusal nau pamwing mu mujikit wa chingand.” Anch wadiap ni mutapu wa kusal ni umwing wa amakurump mu mujikit wa chingand, ukutwish witenchik swa chakwel ulejana ni umwing wa amakurump.

⁷ Rukat ramubachika Yesu kwov musangar ni ushon wovau in kwilejend. Chilakej, pachirikau in kwilejend 70 nich musangar kudiokal mu mudimu wau wa kulejan, Yesu wova “musangar nakash.” (Luka 10:17-21, MM) Pakwez, pamanay ushon wadingau nich Mariy, dijuku diend ni arund nend pa rufu ra Lazar, “Yesu wadila.” (Yohan 11:33-35, MM) Chawiy kand, atulam adimukina ilel kadiap antu achinchikina michim pantaliken ni yid ya chikumangen. Rukat riyibachikin atulam ‘kusangar pamwing nau antu asangera’ ni ‘kudil nau antu adidila.’ (Rom 12:15) Anch usanger ap anch wovil ushon mu mwom wey, yileja atulam swa yovil yey pakad kuyijindjikin. Kutesh piur pa musangar wey kukuyikasikesh. (Rom 1:11, 12) Anch ijik yoziu urishina chikez kuyikwash kuman mutapu wa kukukasikesh ni kukwongoj.—1 Tesalonik 1:6; 3:1-3.

8, 9. (a) Mukurump umwing wamumekeshina nchik mukajend rukat? (b) Mulong wak chidi cha usey anch kalam amekesha rukat ku dijuku diend?

⁸ Rukat ra kalam mulong wa chikumangen rimekening pakampwil mu mutapu ukatay kusadil dijuku diend. (1 Timote 3:1, 4) Anch kalam udi ngatan, rukat ni kalimish yimwinkishinay mukajend yidi chilakej chikutwishau kwimburij angatan akwau. (Efes 5:25; 1 Pita 3:7) Tal bil yalonday Linda, mband mwin Kristu. Nfumwend wadinga mukurump mivu 20 ni kusut kurutu kwa kufa kwend. Linda ulondil anch: “Nfumwam wadinga chisu chawonsu ukwatikena nakash mulong wa chikumangen. Pakwez wansala niyova anch tusadil nend pamwing. Wadinga ni kwinjikitish chisu ni chisu mulong wa ukwash wam, ni wadinga ni kusutish pamwing nam chisu chend cha kwiswedish. Mud chibudikin, niyova anch winkatin ni novap mukau mulong wa chisu chadingay ni kusutish mu kusadil chikumangen.”

⁹ Anch kalam ukwet an, mutapu ukatay kuyipup nich rukat ni kuyijikitish chisu ni chisu anikanch inay ukwikal chilakej chifanyidinau kwimburij anvaj akwau. (Efes 6:4) Chakin, rukat rimekeshidinay dijuku diend ridi uman umekeshina anch ushich kwambatan nich chisend chamwinkishau pamutondau kud mwiku utumbila.—1 Timote 3:4, 5.

Ikal Musul wa Musangar ni Chisambu mu Minsamb

10. (a) Chom ik chikutwisha kwikal ni chibudikin chiyimp pa musangar ni chisambu cha chikumangen? (b) Mulong ik wela kushesh chisambu cha chikumangen mu mivu chitot ya kusambish, ni aupwisha nchik?

¹⁰ Mwiku utumbila ukutwish kwikal musul wa musangar ni chisambu mu muchim wa mwin Kristu, mu chisak cha amakurump, ni mu chikumangen chawonsu. Pakwez, kuburen kwa minsamb ya patok kukutwish kwikal ni chibudikin chiyimp pa musangar ni chisambu chinech. Salomon walonda anch: “Kwakad chiyul kutenchik kukat kuwa, pakwez in chiyul avud kutenchik kukat kujamish.” (Jinswir 15:22) Pakwez, minsamb ya kalimish ni ya patok yiding musul wa musangar ni chisambu. Chilakej, mulong wa kuya ku mukand pawela kushesh chisambu cha chikumangen cha mu mivu chitot ya kusambish, chisak chitakedina chadinga mu Yerusalem chakimba umutakel wa mwiku utumbila. Amakurump inay aleta kand yitongijok yau kushalijan pa mulong winou. Kwinyim kwa kwisamb yom yivud yisangareshina, ashikena ku chiyul chimwing. (Midimu 15:6-22) Chisu chijikishau ku yikumangen chiyul chakwatau awonsu pamwing, akadivar ‘asangara ni akasikana mu ritiy.’ (Midimu 15:23, 25, 31; 16:4, 5) Kwikala musangar ni chisambu.

11. Mutapu ik ukutwishau amakurump kwikal musul wa musangar ni chisambu mu chikumangen?

¹¹ Chawiy kand ilel, atulam adi musul wa musangar ni chisambu mu chikumangen kusutil ku kwikal in kwisamb ni antu awonsu. Anch milong yasot kushesh chisambu cha chikumangen, akat kukumangan pamwing ni kulond patok yitongijok yau. Akat kutesh nich kalimish yilondilau ambay nau atulam. (Jinswir 13:10; 18:13) Kupwa kwa kwit mwiku utumbila, akat kwengamishin yiyul yau pa yijil ya Bibil ni pa yany ya “kashalapol wakin ukweta manangu.” (1 Korint 4:6) Anch chisak cha amakurump chakwat chiyul chiwamp chimedina pa Bibil, mukurump ni mukurump ukuziyil ku umutakel wa mwiku utumbila ni kwitiyij chiyul chinech ap anch amakurump akwau alik yitongijok yend. Kwikepish kwa mutapu winou kudi musul wa musangar ni chisambu ni kuding chilakej chiwamp kud yid ya chikumangen mu kumusadil Nzamb. (Mike 6:8) Ov, ukweting chaku cha kwikepish ni kwitiyij yiyul yimedina pa Bibil yikwatinau atulam mu chikumangen?

Ikalany in Kushimpish Muchim ni in Riy

12. Ov, mulong wak Yesu waswiridina kushimpish muchim ni kwikal mwin riy mu kuyisadil atwimbuy end?

¹² Yesu wadinga mwin kushimpish muchim ni mwin riy mu kuyisadil atwimbuy end, chikalap nchik kurumbuk kwau chisu ni chisu. Chilakej, chisu ni chisu Yesu wayiyulanga pa mulong wa kwikepish. (Mateu 18:1-4; 20:25-27) Chikwau kand, uchuku wa nsudiel wa mwom wa pansh wa Yesu, kupwa kamu kwa kuyinkish dilejan piur pa kwishikumwish payowishay mend, “kwalanka ntand pakach pau in kwilej, mulong wa kwijik nany wa pakach pau ukutongau antu anch, upandakenamu kujimb.” (Luka 22:24; Yohan 13:1-5) Ov, Yesu wayibarokina atwimbuy? Bwat, Yesu watongijoka nau kwa riy, ni kulond anch: “Ov, nany upandakenamu kujimb, ushicha ku mes ni kudia, anch ndiy ukata kumuletil yakudia? Chakin, ushicha ku mes ni kudia, ndiy mujim. Pakwez am nidi pakach pen mudi mwin kulet yakudia.” (Luka 22:27, MM) Kushimpish muchim ni riy ra Yesu—pamwing nich chilakej chend chiwamp—chakin kamu yashika ku michim ya atwimbuy.

13, 14. Chisu ik chifanyidinau atulam kwikal in riy?

¹³ Chawiy chimwing, kalam ukuswiriken chisu ni chisu kumuyul muntu mulong wa kurumbuk kanang. Kalam ukutwish kumujimen muntu kanang. Pakwez, anch kalam wavurik kurumbuk kwend amwinend pa chisu ‘chimukandinay mwin kurumbuk,’ ndiy ukutwish kushimpish muchim ni kwikal mwin riy padiay mwanamakwend, mud mukatau Yesu ni Yehova kuyimekeshin in Kristu awonsu ngikadil yiney—pamwing kand ni atulam.—1 Tesalonik 5:14; Yakob 2:13.

¹⁴ Yisu yimwing, atulam akutwish kumwinkish muntu wasadila chitil chijim yiyul yikash. Anch muntu kasotilap kukarumuk, atulam akumwopat mwin kurumbuk mu chikumangen. (1 Korint 5:11-13) Chikalap nchik mwamu, akumusadil muntu winou mu mutapu umwing umekeshina anch akisin chitil, kamukisinap muntu. (Yuda 23) Anch atulam amumekeshin riy chikumuswapel mwin kurumbuk kuchirik swa mu chikumangen.—Luka 15:11-24.

Ritiy Riyibachikin Kusal Yisal Yiwamp

15. Mwi njil ik yimwing mukatau atulam kwimburij kuwap kwa muchim wa Yehova, ni chom ik chiyibachikininga kusal mwamu?

¹⁵ ‘Yehova udi muwamp,’ ap kud antu akad kusanger yikatay kuyisadil. (Kuseng 145:9; Mateu 5:45) Kuwap kwa muchim wa Yehova kumeken patok mu mutapu uyituminay antwend kulejan “katumb kawamp ka want.” (Mateu 24:14) Atulam niyawiy akat kumekesh kuwap kwa muchim wa Yehova kusutil ku kutakel mudimu wa kulejan. Chom ik chikata kuyibachik kusal usu mwamu? Ritiy rikash mudiay Yehova ni mu kushilamu kwend.—Rom 10:10, 13, 14.

16. Mutapu ik ukutwishau atulam ‘kuyisadil nawamp adiau nau mu ritiy’?

¹⁶ Kuwejin pa ‘kuyisadil nawamp antu awonsu’ kusutil ku kulejan, atulam akwet chisend cha kuyisadil yiwamp ‘chipandikena in adia nau mu ritiy.’ (Galatia 6:10) Akat kusalang mwamu kusutil ku kuyendil nich kuyikasikesh. Mukurump umwing ulondil anch: “Nikat kusanger kuyendil akadivar ni anambaz. Kuyendil kwinoku kukat kwinginkish mutapu wa kuyijikitish mulong wa usu usadilau ni kuyikwash kwijik anch amakurump asangaredin mudimu wau.” Yisu yimwing, atulam akutwish kumuvurish muntu jinjil jikutwishay kusadil chakwel kuwapish mudimu wend umusadidinay Yehova. Wawiy mutapu ukatau atulam adimukina kumwilakej kambuy Paul. Shinshikin mutapu wayilejay akadivar in Tesalonik: “Mulong wa Nsalejetu tukuchingejinany en, twij anch ukat kusalany, chad ukudandamenany kand kusal yom yitwakulejanya.” (2 Tesalonik 3:4, MM) Mazu minam ma ruchingej makat kushik ku yovil yiwamp ya yid ya chikumangen ni makat kuyikadish aswapela ‘kuyiziyil ni kwikepish kudi in kuyitakel.’ (Hebereu 13:17) Anch amakurump akwendil ni kukukasikesh, ukutwish wamekesh amboku kujikitish mulong wa kukwendil kwinoku.

Kwitudish Kwitin Usu wa Kwilam

17. Dilejan ik dilejay Pita kusutil kud Yesu?

¹⁷ Yesu wadinga mwin kwitudish, ap pa chisu chamwovishau ujim. (Mateu 11:29) Yesu witudisha ni kumekesh usu ujim wa kwilam, pamupanau kud akankuny ni kumukwat. Pita, mwin muchim wa kaduduk, wapurila mpak yend ya musamun ni wifundakesha. Pakwez, Yesu wamuvurisha anch: “Komb utongil anch am kinikutwishap kumwikodil Tatukwam wantumin pinap katat angel apandakenamu a tunan makum sambwad ni twaad?” (Mateu 26:51-53; Yohan 18:10) Pita watesha nawamp dilejan ni weza kuyivurish in Kristu anch: “Kristu kand wakumenanya en mar, wakushilanya chilik chakwel ulondulany mu ruzau rend. . . . Pamusalau, kachirishap masal; pamumeshau mar, ndiy kalondap dizu.”—1 Pita 2:21-23.

18, 19. (a) Chisu ik cha pakampwil chifanyidinau atulam kumekesh kwitudish ni usu wa kwilam? (b) Yom ik tukushinshikina mu mutu wa mulong wambakedinap?

¹⁸ Chilik chimwing, atulam awamp adi in kwitudish ap pakatau kuyisadil yom yakad kutentam. Chilakej, antu amwing akatau kupakish kukwash mu chikumangen akutwish alik kwitiyij. Anch muntu uswiridina ukwash uziyil muspiritu ap anch wasadil chitil, ukutwish wakul ku chiyul nich “kulond mazu makash mudi kutap kwa mpak ya musamun.” (Jinswir 12:18) Pakwez, mud Yesu, atulam kakatap kuchirish mazu makash ap kusal yisal ya kwifundakesh. Pa ndond pa kufundakesh, akat kusadil usu wa kwilam ni kumekesh yovil ya kumutesh mbay nau, yawiy yikutwisha kwikal chiyukish kud muntu uswiridina ukwash. (1 Pita 3:8, 9) Ukutwish wilejin ku chilakej cha amakurump cha kumekesh kwitudish ni usu wa kwilam pa chisu chikwinkishinau yiyul.

¹⁹ Pakad kwidjidjek, Yehova ni Yesu asangaredin nakash mudimu ukash usadilau tunan twa atulam alamina chikumangen cha pa mangand mawonsu. Yehova ni Mwanend ayikatin kand nakash tunan twa ankwash a mudimu akata kuyikwash amakurump pakatau ‘kuyisadil in Kristu.’ (Hebereu 6:10) Ov, mulong wak lel, ukatau akadivar amwing kwidjidjek kuwanyish yiyitinau mulong wa kusal “mudimu uwamp” winou? (1 Timote 3:1) Mutapu ik ukatay Yehova kuyifundish antu atondinay kwikal atulam? Yawiy yom tukushinshikina mu mutu wa mulong wambakedinap.

Ov, Uvurikin?

• Jisu njil jimwing mukatau atulam kumekeshin rukat mulong wa chikumangen?

• Mutapu ik ukutwishau kwikal antu awonsu adia mu chikumangen musul wa musangar ni chisambu?

• Ov, mulong wak ukatau atulam kwitudish ni kwikal in riy pa chisu chipaninau yiyul?

• Mutapu ik umekeshinau amakurump kuwap kwa muchim ni ritiy?

[Chipich chidia pa paj wa 19]

Rukat rikat kuyibachik atulam kusadil chikumangen

[Chipich chidia pa paj wa 19]

Akat kusutish kand chisu pamwing ni majuku mau pa chisu cha kwiswedish . . .

[Chipich chidia pa paj wa 19]

. . . ni mu mujikit

[Chipich chidia pa paj wa 20]

Minsamb yiwamp pakach pa atulam yiding musul wa musangar ni chisambu mu chikumangen