Yehova Uyifundishin Atulam A Amikoku End

“[Yehova] ndiy ukata kupan manangu, mu kan mwend mukat kubudik manangu ni ronganyin.”—JINSWIR 2:6.

1, 2. Ov, mulong wak ukatau akadivar ababatishau kal kuwanyish yitinau mulong wa yisend yijim mu chikumangen?

NICK wasadila kal mivu sambwad mud mukurump walonda anch: “Nasangara nakash pantondau mud mukurump, namana chisend chinech mud mutapu wa kujimbish mudimu wam unikata kumusadil Yehova. Niyova mud nikwet dibaz diend dijim dia kumujikitish mulong wa yawonsu yansadilay kal. Nasota kand kuyikwash yid ya chikumangen muchitwishikina, mu chilik chimwing mud mwankwashau am kud amakurump akwau.” Pakwez, nova musangar pamwing ni kwiyakamish. Nick udandamedin kulond anch: “Mulong nadinga piswimp ni kuwanyish mivu 30 pantondau, chawiy niyakamisha anch nikwetap nkeu yiswiridikina—mud njingunin ni manangu—mulong wa kulam nawamp chikumangen.”

² Antu atondinay Yehova mulong wa kulam chikumangen chend akwet mayingish mavud mayisangareshina. Kambuy Paul wayivurisha amakurump a ku Efes diyingish dimwing, payilejay yalonday Yesu, anch: “Chiyukish cha mwin kupan chipandakenamu cha mwin kutambul.” (Midimu 20:35, MM) Kusadil mud nkwash a mudimu ap mud mukurump kuyinkishin akadivar ababatishau kal mitapu yikwau ya kumwinkish Yehova ni ya kupan ku chikumangen. Chilakej, ankwash a mudimu, asadining pamwing ni amakurump. Ankwash inay asadining kand midimu yikwau ya usey yitininga chisu. Rukat ra Nzamb ni ra mutej nau riyibachikin akadivar inay kusal mudimu wa usey.—Marko 12:30, 31.

3. Ov, mulong wak ukatau antu amwing kwidjidjek kuwanyish yitinau mulong wa kusend yisend ya chikumangen?

³ Chad chikwikal nchik kud mukadivar wababatishau kal wiyovila anch kafanyidinap ni widjidjekin kuwanyish yitinau mulong wa kwikal nkwash a mudimu ni kurutu kwikal mukurump? Mud Nick, ukutwish wiyakamish anch kakwetap nkeu jiswiridikina kwikal kalam muwamp. Ov ey, udi mukadivar wababatishau kal, udia mukach mwa antu iyovila mwamu? Yovil yiney yidi yakad diyingish. Yehova ukuyirumburish antu atonday mud atulam mulong wa mutapu usadidilau chikumangen. Yesu walonda anch: “Muntu winkishau yom yipandakena kuvul, Nzamb ukez kumwipul kand yom yipandakena kuvul.”—Luka 12:48, MM.

4. Yehova uyikwashin nchik antu atondinay mulong wa kulam amikoku end?

⁴ Ov, Yehova uyichingejin antu atonday mud ankwash ni amakurump kusal midimu yau pakad ukwash? Bwat, ndiy upanin ukwash ufanyidina uyitwishishina kujijaman ni kupandakan kand. Mud mwachisambidinau mu mutu wa mulong wasambedila, Yehova uyinkishin mwiku wend utumbila, mabuj ma mwiku winou mayikwashin kulam nawamp amikoku. (Midimu 20:28; Galatia 5:22, 23) Chikwau kand, Yehova uyinkishin manangu, ronganyin, ni njingunin. (Jinswir 2:6) Mutapu ik usadiningay mwamu? El twisambinany mitapu yisatu yikatay kusadil Yehova mulong wa kuyifundish antu atondinay mulong wa kulam amikoku end.  

Ayifundishin Kud Atulam Ija Yivud

5. Mutapu ik washikenay Pita ni Yohan kwikal atulam awamp?

⁵ Pezau kambuy Pita ni Yohan kwiman kurutu kwa Sanedrin, anzuj ajim in manangu a dirumburish dined ayimana amakundj inay adinga iminya kurutu kwau anch adi “antu amwamu akad kwilej.” Ap anch, awiy kilejap malejan ma Mifund ya in rabi, awiy ading ij kutang ni kufund. Ap mwamu, Pita ni Yohan pamwing ni in kwilej akwau adinga alej ayifuvu, ayishikija avud pakach pa antu ayitesha ku kwitiyij. Mutapu ik washikenau antu inay amwamu ku kwikal alej ajim? Kupwa kwa kuyitesh Pita ni Yohan, dirumburish diajingunina anch, “komb antu inay ading pamwing nend Yesu.” (Midimu 4:1-4, 13, MM) Chakin kamu, atambula mwiku utumbila. (Midimu 1:8) Pakwez, chamekana kand patok—ap kudi in anzuj akad njingunin ya muspiritu—anch Yesu wayifundisha amakundj inay. Padingay nau pansh, Yesu wayileja atwimbuy end mutapu wa kuyikumangej antu adia mud amikoku ni mutapu wa kuyilam anch ikal yid ya chikumangen.—Mateu 11:29; 20:24-28; 1 Pita 5:4.

6. Chilakej ik cha kuyifundish antu akwau chashay Yesu ni Paul?

⁶ Kupwa kwa Yesu kuvumbuk, ndiy wadandamena kuyifundish antu atonday mud atulam. (Kujingunik 1:1; 2:1–3:22) Chilakej, ndiy amwinend wamutonda Paul ni wamufundisha. (Midimu 22:6-10) Paul wasangera mafundish mamufundishau ni wayifundisha amakurump akwau yom yilejay. (Midimu 20:17-35) Chilakej, ndiy wasutisha chisu chivud ni usu uvud mulong wa kumufundish Timote chakwel ikala “mwin mudimu . . ., wakad mulong wa kwov usany” mu mujikit wa Nzamb. (2 Timote 2:15) Amakundj inay aad ikala arund nakash. Paul wafunda piur pa Timote anch: “Nasala nend mudimu mudi mukat kusalay mwan ni tatukwend mulong wa kwambat Rusangu Ruwamp.” (Filip 2:22, MM) Paul kasotap kumwikadish Timote ap muntu windjing mwin kwilej wendendiy. Pakwez, wayikasikesha ambay akaritiy ‘kumwimburij ndiy, mud chikatay niyend kumwimburij Kristu.’—1 Korint 11:1.

7, 8. (a) Uman ik ulejena yibudikin yiwamp yidingaku anch amakurump amwimburij Yesu ni Paul? (b) Chisu ik chifanyidinau amakurump kuyifundish antu akezau kutond mud ankwash ni amakurump?

⁷ Chakwel kumwimburij Yesu ni Paul, atufung ija yivud akat kusal rizau ra kusambish ra kuyifundish akadivar ababatishau kal, ni kuding yibudikin ya chilik chimwing. Tushinshikinany chamanay Chad. Chad wakudila mu dijuku diaurikina mu ritiy pakwez amutondin katat kamu mud mukurump. Ulondil anch: “Mu kusut kwa mivu, amakurump ija yom yivud ankwasha kuya kurutu muspiritu. Mulong tatukwam kadingap mwin ritiy, amakurump inay ankwasha mu mutapu wa pakampwil ni ikala mud atatukwam a muspiritu. Itekina chisu cha kwinfundish mu mujikit wa kulejan, ni kupwa, mukurump umwing wanfundisha mutapu wa kusal midimu ya chikumangen yanginkishau.”

⁸ Mud muchilejenau mu uman wa Chad, atulam akweta njingunin asambishining kamu kuyifundish antu akeza kwikal ankwash ni amakurump kurutu kamu kand kal awanyisha yitinau muchifanyidina mulong wa yisend yiney. Ov, mulong wak kusal mwamu? Mulong Bibil ulondil anch ankwash ni amakurump awonsu afanyidin kushiken chilik cha piur nakash cha ngikadil ni cha yijil ya muspiritu kurutu kwa kuyitond kwikal ankwash ap amakurump. Chiyifanyidin “bil kuyipak.”—1 Timote 3:1-10.

9. Chisend ik chikwetau atulam akudila muspiritu, ni mulong wak?

⁹ Anch chifanyidin kuyipak akadivar ababatishau kal, chidi kand chiwamp kusambel kuyifundish. Chilakej: Anch amwit nsand a shikol kusal ekizame mukash pa yom yakadau alej kumufundish nawamp, ov, nsand a shikol ukuying ekizame? Chakin kamu, kakuyingap. Chawiy lel, mafundish madi ma usey. Pakwez, alej awamp kakatap kuyifundish ansand a shikol ching kusu mulong wa kuying ku ekizame pakwez chiding kand mulong wa kusadil ronganyin riyinkinau. Chawiy chimwing, amakurump in mushiku ayikwashining akadivar ababatishau kal kukudish ngikadil yitinau ya muntu utondilau nich kuyifundish mu mutapu wa pakampwil wijikena. Kakatap kusal mwamu anch mulong asotil kuyitond akadivar inay pakwez chiding kand mwamu mulong akadivar inay akutwish kulam nawamp chikumangen. (2 Timote 2:2) Chakin, akadivar ababatishau kal afanyidin kusal usu ku mutambu wau ni kusal nakash mulong wa kuwanyish yimwitinau nkwash ap mukurump. (Titus 1:5-9) Chikalap nchik mwamu, atulam ija yivud akutwish kuyikwash kuya kurutu swa kusutil ku kusot kuyifundish antu awanyishina yitinau.

10, 11. Mutapu ik ukutwishau atufung kusambish kuyifundish antu akwau mulong wa yisend yikwau?

¹⁰ Atulam ija yivud, akutwish nchik kuyifundish antu akwau kusal nawamp midimu ya chikumangen? Cha kusambish, afanyidin kuyibangin akadivar adia mu chikumangen—kusal nau chisu ni chisu mu mudimu wa kulejan ni kuyikwash kuwapish nkeu jau ja ‘kulejan dizu dia uyakin mu kutentam.’ (2 Timote 2:15) Atulam aswila akuyilej akadivar inay musangar udiokila ku kuyisadil antu akwau ni musangar ovilingau amakurump pa kwitekin ni kuwanyish ntong ja muspiritu. Akutwish kand nich rukat kuyinkish yiyul kanang piur pa mutapu ukutwishay mukadivar kwitenchik ni kwikal “chilik chiwamp kudi yisak ya amikoku a Nzamb.”—1 Pita 5:3, 5, MM.

¹¹ Anch amutond mukadivar mud nkwash a mudimu, atufung in manangu akudandamen kumufundish. Bruce, wasadila kal makum ma mivu mud mukurump, ulondil anch: “Nikatining kushakam pamwing ni nkwash a mudimu musu ni kuchirikin nend yany yapalangeshay kashalapol wakin ukweta manangu. Tutangining kand yany yikwau yitadila pa mudimu wend, ni nikatining kusal nend pamwing djat ni pakwijikinay nawamp midimu yend.” Chiyilay nkwash ni kwijik yom yivud, chitwishikin kand kumufundish mudimu wa ukafung. Bruce udandamedin anch, “anch naya ni nkwash mu mudimu wa ukafung, nikat kumukwash kutond mifund yikumukasikesha ni kumubachik muntu ap dijuku twendidina. Kwilej mutapu wa kusadil Bibil mu mutapu wa kushik ku muchim kudi kwa usey anch nkwash usotil kwikal kalam muwamp.”—Hebereu 4:12; 5:14.

12. Mutapu ik ukutwishau atulam ija yivud kuyifundish amakurump asu?

¹² Atulam asu niyawiy akat kwisakin nakash kuyifundish kukwau. Nick, ujimbwilau kwinsambishin, ulondil anch: “Mafundish manfundishau kud atulam aad amapal madinga ma ukwash nakash mwi njil kanang. Chisu ni chisu, akadivar inay adinga ni kutesh mutapu wa kupwish milong kampand. Adinga ni kwintesh nich kushimpish ni kushinshikin nakash yitongijok yam—ap anch kayitiyijap kwau. Nileja yom yivud pa kushinshikin kwikepish kwau ni kalimish kau mu mutapu wa kuyisadil akadivar ni anambaz mu chikumangen. Amakurump inay akasikeshina maswir ma kusadil Bibil nich nkeu pa chisu cha kukatul milong ap pa kupan dikasikesh.”

Dizu dia Nzamb Diyifundishin

13. (a) Chom ik chiswiridinay mukadivar chakwel kwikal kalam muwamp? (b) Ov, mulong wak Yesu kalondap ku ulabu wend amwinend?

¹³ Chakin kamu, Bibil, Dizu dia Nzamb, dikwet yijil, yany, ni yilakej yiswiridinay kalam chakwel ikala “uwanyidina mu kusal mudimu wawonsu uwamp.” (2 Timote 3:16, 17) Mukadivar ukutwish kwikal muntu wileja shikol nakash, pakwez ridi ronganyin rend ra Mifund ni mutapu uyisadidilay yikumukwasha kwikal kalam muwamp. Shinshikin chilakej cha Yesu. Ndiy wadinga kalam wa muspiritu mwin ronganyin rijim, mwin njingunin yijim, ni mwin manangu upandikenamu wadinga pa mangand; pakwez ap mwamu, ndiy kachingejinappa manangu mend amwinend payifundishay amikoku a Yehova. Ndiy walonda anch: “Malejan minilejena kimadiap mamam amwinam, pakwez madiokil kudi Nzamb wantuma.” Ov, mulong wak Yesu wamuchingejina Tatukwend wa mwiur? Ndiy warumburila anch: “Muntu ukulonda ku ulabu wend amwinend usotil katumb kend amwinend.”—Yohan 7:16, 18, MM.

14. Mutapu ik wipukiningau atulam kwikimbin katumb kau ayinau?

¹⁴ Atulam ashishamena kakatap kusot katumb kau ayinau. Kakatap kwengamishin yiyul yau ni dikasikesh diau, pa manangu mau ayinau, pakwez pa Dizu dia Nzamb. Ijing anch mudimu wa kalam udi wa kumukwash muntu udia mu chikumangen kwikal ni “chitongijok cha Kristu,” udiap wa kumukwash kwikal ni chitongijok cha amakurump. (1 Korint 2:14-16, MM) Chilakej, chikwikal nchik anch mukurump ukwashina ambay a uruw watan milong yikash chad ndiy wengamishin yiyul yend pa manangu mend pa ndond pa kulondul yijil ya Bibil ni jinsangu japalangeshay kal ‘kashalapol wakin ukweta manangu’? (Mateu 24:45, MM) Yiyul yend yikutwish yengamin nakash pa yinshakur ni yikwimen pa ronganyin rend rikemp. Chakin, yinshakur yimwing yidiap yiyimp, ni mukurump ukutwish kwikal nich uman wa mu mwom. Pakwez, yid ya chikumangen yikutwish kwisakin sens pakatau atulam kuyikasikesh kutesh dizu dia Yesu ni yilondilay Yehova kupandakanamu kutesh yitongijok ya antu ap yijil ya chishankur.—Kuseng 12:6; Jinswir 3:5, 6.

“Kashalapol Wakin Ukweta Manangu” Uyifundishin

15. Yesu wamwinkisha “kashalapol wakin ukweta manangu” mudimu ik, ni disu diyingishin dimwing dia kupandakan kwa chisak cha kashalapol?

¹⁵ Atulam mud kambuy Pita, Yohan, ni Paul awonsu adinga yid ya chisak chajimbulay Yesu anch “kashalapol wakin ukweta manangu.” Chisak chinech chidi ching cha akadivar a Yesu adia pa divu, akweta ruchingej ra kuyikel pamwing ni Kristu mwiur. (Kujingunik 5:9, 10) Mu machuku minam ma nsudiel ma ditenchik dined, uvud wa akadivar a Kristu adia pa divu wakepin kal nakash. Pakwez, mudimu wayinkishay Yesu kusal, mudimu wa kulejan rusangu ruwamp ra Want kurutu nsudiel yishika—ausadin nakash kupandakanamu mutapu wa usalau kwinsambishil. Ap mwamu, chisak cha kashalapol chapandiken kal nakash! Ov, mulong wak? Ku mutambu umwing, chidi mulong awiy ayifundisha yid ya “amikoku akwau” mulong wa kuyikwash mu mudimu wa kufundish ni wa kulejan. (Yohan 10:16; Mateu 24:14; 25:40) Ilel, chikunku chijim cha mudimu winou achisadil kud chisak chinech chishishamena cha amikoku akwau.

16. Chisak cha kashalapol chiyifundishining nchik amakundj atondau?

¹⁶ Chisak cha kashalapol chiletining mutapu ik difundish dined? Mu mivu chitot ya kusambish, antimesh a chisak cha kashalapol adinga nich mbil ya kuyifundish ni kuyitond atulam mu yikumangen, ni kupwa atulam inay, niyawiy, ayifundisha yid ya chikumangen. (1 Korint 4:17) Mwamu chidia kand ilel. Chisak Chitakedila—kachisak ka amakurump azizidilau many adia antimesh a chisak cha kashalapol—ayinkishin antimesh au mbil ya kuyifundish ni kuyitond ankwash a mudimu ni amakurump mu makum ma tunan twa yikumangen yidia mu mangand. Chikwau, Chisak Chitakedila chikat kutenchik shikol ya kuyifundish yid ya Komite wa Mutiy, atulam in kwendangan, amakurump, ni ankwash a mudimu mutapu uwamp wa kulam yid ya chikumangen. Umutakel ukwau akat kuupan kusutil ku mikand, mu mitu ya milong yipalangeshinau mu Chinong cha Kalam, ni kusutil ku mabuku, mud Atenchikinau Chakwel Kusal Rusot ra Yehova.a

17. (a) Mutapu ik umekeshinay Yesu ruchingej rend mu chisak cha kashalapol? (b) Mutapu ik ukutwishau atulam kumekesh anch achingejin chisak cha kashalapol?

¹⁷ Ruchingej ra Yesu mu chisak cha kashalapol ridi rikash chawiy wachiteka “piur pa yom yend yawonsu yikwetay”—yawiy kamu, yisakin yend yawonsu yidia pa divu. (Mateu 24:47) Atulam atondau kal amekeshin niyawiy anch achingejin chisak cha kashalapol anch asadil yany yiyinkinau kud Chisak Chitakedila. Inge, pakatau atulam kuyifundish akwau, ni pakatau kwitiyij ayinau anch Dizu dia Nzamb diyifundisha, ni pakatau kusadil mafundish mayifundishau kud chisak cha kashalapol, akat kulet uumwing pakach pa amikoku. Tukwet musangar mud ik anch Yehova wayifundishin kal amakundj akata kubangin nakash chid ni chid cha chikumangen cha Ukristu!

[Mazu madia kwishin kwa paj]

Ov, Ukwakul Nchk?

• Mutapu ik ukatau atufung akudila muspiritu kuyifundish akwau?

• Ov, mulong wak atufung kakatap kwimen pa yitongijok yau palejenau?

• Mutapu ik ni mulong wak umekeshiningau atufung ruchingej rau mu chisak cha kashalapol?

[Chipich chidia pa paj wa 25]

Amakurump ayifundishin ansand adia mu chikumangen

[Chipich chidia pa paj wa 26]

“Kashalapol wakin ukweta manangu” uletin mafundish mavud mulong wa amakurump