“A, Mudi Nikatila Yijil Yey!”

“A, mudi nikatila yijil yey! Nikat kuyitong mu yisu yawonsu.”—KUSENG 119:97.

1, 2. (a) Mwikadil ik warishay nich nfund-a-Kuseng 119? (b) Mutapu ik wasalay, ni mulong wak?

MUNTU wafunda Kuseng 119 warisha nich choziu chikash. Akankuny achinchikina michim adiburila chijil cha Nzamb amuswingisha ni kumudimben. An a ant amupungana ni amuzengola. Antu ayimp amwombamu bwalakan, ni mwom wend wadinga mu chak. Yom yiney yawonsu yasala anch ‘ashadisha tul mulong wa runeng.’ Chikalap nchik choziu chinech, nfund-a-kuseng wawanga anch: “A, mudi nikatila yijil yey! Nikat kuyitong mu yisu yawonsu.”—Kuseng 119:97.

² Ukutwish wiyipul anch, “Ov, mutapu ik chijil cha Nzamb chela kwikal musul wa rongoj kudiay nfund-a-kuseng?” Chom chamukwasha chadinga ruchingej anch Yehova ukat kumubangin. Kwisakin yiyukish ya kuziyil ku chijil chapanay Nzamb nich rukat kwamusangaresha nfund-a-kuseng, chikalap nchik mar mamumeshau kud akankuny nend. Ndiy wajingunina anch Yehova wadinga ni kumukwash. Chikwau kand, kusadil umutakel wa chijil cha Nzamb kwamwinkisha nfund-a-kuseng manangu kuyipandakanamu akankuny nend ni kwamupandisha. Kuziyil ku chijil kwamuletina chisambu ni kom katok.—Kuseng 119:1, 9, 65, 93, 98, 165.

3. Ov, mulong wak chikasiken ilel unou kud in Kristu kushakam kukwatijan ni yijil ya Nzamb?

³ Atushalapol amwing a Nzamb ilel unou niyawiy ayipakin nakash ritiy rau. Tukutwishap kurish nich milong yikash yitekina mwom mu ubaj mud nfund-a-kuseng, pakwez tushich mu machuku ma “ma mar nakash.” Antu avud tukata kutanijan nau dichuku ni dichuku kakatiningap yom ya muspiritu—ntong jau jidi ching ja kwitongin ayinau ni kusot mapit, akwet ngikadil ya kwitutul ni yakad kumulimish Nzamb. (2 Timote 3:1-5, MM) Ansand in Kristu afanyidin kurish chisu chawonsu nich milong ya ngikadil yipakina kushinshaman kwau. Mu mwikadil mud winou, chikutwish kwikal chikash kudandamen kumukat Yehova ni kukat yom yitentamina. Ov, mutapu ik tukutwisha kwilam ayinetu?

4. Mutapu ik wamekeshay nfund-a-kuseng musangar wend mulong wa chijil cha Nzamb, ov, in Kristu afanyidin kusal chilik chimwing?

⁴ Chom chamukwasha nfund-a-kuseng kujijaman mu mar mamanay chadinga kwitekin chisu cha kwilej nakash ni kutongijokin pa chijil cha Nzamb. Wawiy mutapu washikenay ku kuchikat. Chakin, piswimp maverse mawonsu ma Kuseng 119 misambidin mutambu umwing wa chijil cha Yehova.a Ilel unou, in Kristu kadiap mwishin mwa Chijil cha Moses, chapanay Nzamb ku muchid wa Isarel wa pasak. (Kolosay 2:14) Pakwez, yijil yidia mu Chijil chinech yidi ya usey wa chikupu. Yijil yiney yamwongoja nfund-a-kuseng, mud muyikutwisha kuyikwash atushalapol a Nzamb arishina nich yikokujol ya mwom wa katat.

5. Yom ik tukushinshikina yidia mu Chijil cha Moses?

⁵ Tutalany dikasikesh tukutwisha tukutaninamu ku yom yisatu kusu ya Chijil cha Moses: ditenchik dia Sabat, ditenchik dia kupupurol ya kwangul, ni chijil cha kwilam ku ris. Mu chimwing ni chimwing, tukuman anch kutesh kuwamp kwa yany yidia kwinyim kwa yijil yiney kudi kwa usey anch tusotil kurish nich yikokujol ya pa muten wetu.

Kuwanyish Maswir Metu ma Muspiritu

6. Maswir ik ma pa dishin makwetau antu awonsu?

⁶ Antu ayitanga nich uvud kanang wa maswir. Chilakej, kwikal nich yakudia, yakuna, ni chikumbu, yidi ya usey anch muntu usotil kwikal nich ukash wa mujimbu. Pakwez, muntu ufanyidin kand kubangin “maswir ma muspiritu.” Chakin, muntu kakutwishap kwikal ni musangar anch kawanyishinap maswir mend ma muspiritu. (Mateu 5:3, NW) Yehova wamana anch kuwanyish maswir ma chivadik kudi kwa usey nakash chawiy chayilejay antwend anch imika midimu ya ku mujimbu dichuku dimwing dia kabuj pa rubing ni rubing mulong wa kuta muchim ku milong ya muspiritu.

7, 8. (a) Mutapu ik watekay Nzamb kushalijan pakach pa Sabat ni machuku makwau? (b) Sabat yadinga nich rutong ik?

⁷ Ditenchik dia Sabat diakasikeshina usey wa kuwapish urund wa muntu ni Nzamb. Kapamp ka kusambish kamekena dizu “sabat” mu Bibil disambidin ditenchik dia man mwi mpay. Ayileja in Isarel anch akutwish kunon yakudia yiney ya chilay mu machuku musamban. Pa dichuku dia musamban, afanyidin kunon “yakudia ya machuku maad,” mulong pa dichuku dia sambwad, yikwikalakwap. Dichuku dia sambwad diadinga “dichuku dia kwiswedish [dia Yehova],” ni dichuku dined muntu ni muntu wafanyina kushakam pa ndond yend. (Kubudik 16:13-30) Chimwing cha Yijil Dikum chajidika kusal mudimu dichuku dia Sabat. Dichuku dined diadinga ditumbila. Mwawonsu walika kulam dichuku dined chamufanyina kufa.—Kubudik 20:8-11; Kuchind Michid 15:32-36.

⁸ Chijil cha Sabat chamekesha anch Yehova ukat kubangin uwamp wa ku mujimbu ni wa muspiritu wa antwend. Yesu walonda anch: “Dichuku dia Kwiswedish aditeka mulong wa kuyikwash antu.” (Marko 2:27, MM) Dichuku dined diayitwishishap ching kusu in Isarel kupim pakwez diayinkisha kand mutapu wa kusej kudiay Sakatang wau ni kumukat. (Kuvurik Yijil 5:12) Diadinga dichuku diawurilau mulong wa yisakin ya muspiritu. Mu yisakin ya muspiritu yiney mwadinga difukwil dia dijuku, malembil, ni kutongijokin pa Chijil cha Nzamb. Ditenchik dined diadinga mulong wa kuyichidij in Isarel ku kusadil chisu chau chawonsu ni usu wau wawonsu mu kulondul mapit ma ku mujimbu. Sabat wading ni kuyivurish anch urund wau ni Yehova wadinga wa usey ujim mu mwom wau. Yesu wachirikina chijil chinech chakad kuswimpang palonday anch: “Achifundila kal anch: ‘Muntu kakwikalap mwom ku mabot kusu, pakwez ching ku dizu diawonsu dikubudika mukan mwa Nzamb.’”—Mateu 4:4.

9. Ditenchik dia Sabat diyifundishin in Kristu dilejan ik?

⁹ Antu a Nzamb kayitinap kand kupim pa sabat wa asaa 24, pakwez ditenchik dia Sabat diashala mivu kupandakanamu yom ya pakur. (Kolosay 2:16) Ov, chidiap chivurish chitufanyidina niyetu kuta muchim mulong wa mijikit ya muspiritu? Milong ya mapit ni kwipuwangesh yifanyidinap kuyikel mijikit yambatena ni difukwil dietu. (Hebereu 4:9, 10) Chawiy tufanyidin kwiyipul anch: “Chom ik chifanyidina kwikal pa ndond ya kusambish mu mwom wam? Ov, nitekin pa ndond ya kusambish dilejan, malembil, kukumangan ku yikumangan ya Ukristu, ni kulejan rusangu ruwamp ra Want? Ov, yisakin yikwau yiyikedil mijikit yiney ya muspiritu?” Anch twatek yisakin ya muspiritu pa ndond ya kusambish mu mwom wetu, Yehova utwinkishin kashinsh anch kitukezap kuburen yom ya usey ya mwom.—Mateu 6:24-33.

10. Tukwisakin nchik anch twitekin rutong ra kuwanyish maswir ma muspiritu?

¹⁰ Chisu tukata kusal mu kwilej Bibil ni mikand yisambidina Bibil, pamwing ni kutongijok nakash pa uruu udiamu, chikutwish kutukwash kusej piswimp ni Yehova. (Yakob 4:8) Suzan witekina pasutil kal mivu 40, chisu cha kwilej Bibil, ulondil anch chadingap chiswapela kwinsambishil. Chadinga chikasiken. Pakwez, mu kudandamen kutang nakash ndiy wakata Bibil nakash. Katat ukat kwov ushon anch waburen dilejan diend mulong wa mayingish kanang ni anch wakangany kwilej. Suzan ulondil anch: “Dilejan diankwasha kumwijik Yehova mud Tatuku. Nikutwish kumuchingej, kwimen padi ndiy, ni kusej kudiay ndiy mu malembil nich kom kawamp. Chidi chakin kamu chamushena pa kuman mutapu ukatinay Yehova atushalapol end, mutapu ukatay kwimbangin am pakampwil, ni mutapu ukatay kwinkwash.” Tukutwish kwikal nich musangar ujim anch tukat kuwanyish maswir metu ma muspiritu!

Chijil cha Nzamb Piur pa Kupupurol ya Kwangul

11. Mutapu ik wasalanga ditenchik dia kupupurol ya kwangul?

¹¹ Chom cha kaad cha Chijil cha Moses chimekeshina anch Nzamb ukat kubangin kuwap kwa antwend chadinga mbil ya kupupurol ya kwangul. Yehova waleta chijil anch ndim mwin Isarel anch wangwil mbut ja chir chend, chifanyidin kuyilej atuzweny kwez kunon yishilau in kwangul. Andim kadingap ni kwangul yawonsu kuns-kuns kwa yir yau, ni kadingap kand ni kwangul mipach yau bwi. Mbut jadingau ni kuvuramen mu yir kachirikangap kand mulong wa kujinon. Dined diadianga ditenchik dia rukat mulong wa kazweny, wa angendj, wa an a nshon, ni wa adia-afu. Chakin, kupupurol ya kwangul kwita mudimu ukash ku mutambu wau, pakwez kusutil ku ditenchik dined, kwayitwishisha atuzweny kulik kwikal in kuswal.—In Levi 19:9, 10; Kuvurik Yijil 24:19-22; Kuseng 37:25.

12. Ditenchik dia kupupurol ya kwangul dialeja andim mutapu wa kusal ik?

¹² Chijil piur pa kupupurol ya kwangul kichalejanap uvud wa mbut wading ufanyidinau andim kusha mulong wa kazweny. Chadinga chiyitadil ayinau kukwat mupak anch yikushau kuns kwa yir yau yakad kwangul yikwikal yivud ap yikemp. Pa chinech, ditenchik diayileja mutapu wa kwikal nich muchim wa kupan. Diayinkisha andim mutapu wa kumekesh kumujikitish mwin Kupan Mujim wa yom ya kwangul, mulong “mwin kumwovil kazweny riy ukat kumulimish Wamutanga.” (Jinswir 14:31) Mwamu mwasalay Bowaz. Washinshikina nich riy anch Rut, mwadia-mufu wadia ni kupupurol mu yir yend, wangula uvud ufanyidina wa mbut. Yehova wamuyukisha Bowaz nakash mulong wa muchim wend wa kupan.—Rut 2:15, 16; 4:21, 22; Jinswir 19:17.

13. Chijil cha kupupurol ya kwangul chitufundishin yom ik?

¹³ Chijidik chidia kwinyim kwa chijil cha kupupurol ya kangul kichikarumukinap. Yehova uyichingejin atushalapol end ikala nich muchim wa kupan, nakash pantaliken nau atuzweny. Anch tukwet muchim wa kupan nakash, yiyukish yetu yikez kwikal yivud. Yesu walonda anch: “Yinkishany akwen, chad Nzamb ukukwinkishany niyen. Ndiy ukukwinkishany chilik chiwamp, cha kunyikumun, achiband, chizwil sens, yikwau yapalok pansh. Chilik chiukata kuyilikinany nich akwen, chawiy chikez kukwilikinanyau nich niyen kudi Nzamb.”—Luka 6:38, MM.

14, 15. Ov, mutapu ik tukutwisha kumekesh muchim wa kupan, ni tukwisakinamu ik etu ayinetu ni antu tukata kukwash?

¹⁴ Kambuy Paul walonda anch: “Pachidia muten tuyisadilany antu awonsu nawamp, tupandikesh kuyisadil in ritiy retu nawamp.” (Galatia 6:10) Chawiy, tuswiridin kamu kubangin anch ambay netu in Kristu atambwil ukwash wa muspiritu pakatau kurish nich yipakiu ya ritiy rau. Pakwez akutwish kand kuswir ukwash wa ku mujimbu, chilakej, mutapu wa kwez ku Chot cha Want ap mutapu wa kuya kuland yom ku makashing? Ov, kudi amapal, ayej, ap in majuku adia mu chikumangen chen akutwisha kusanger kuyendil mulong wa kuyikasikesh ap kuyikwash ku mujimbu? Anch twasal usu wa kuyitesh pa maswir minam, Yehova ukutwish watusadil mulong wa kwakul ku malembil ma kazweny. Ap anch kutalijan umwing ni mukwau yidi mbil ya Ukristu, kusal mwamu kukat kumukwash kand mwin kupan. Kuyikat chakin ambay netu akaritiy uding musul wa musangar ujim ni kujikitish nakash kukata kulet kwitiyik kud Yehova.—Jinswir 15:29.

¹⁵ Mutapu ukwau ujim umekeshinau in Kristu ngikadil yakad choy udi kusadil chisu chau ni usu wau mulong wa kulejan ntong ja Nzamb. (Mateu 28:19, 20) Muntu win mwawonsu wamana musangar wa kumukwash muntu mukwau kushiken pa rizau ra kupan mwom wend kud Yehova wamen kal uyakin wa mazu ma Yesu anch: “Chiyukish chijim kudi mwin kupan chamupandakan mwin kutambul.”—Midimu 20:35.

Ipuk Ris

16, 17. Chijil cha dikum chajidika chom ik, ni mulong wak?

¹⁶ Chom cha kasatu cha Chijil cha Nzamb chayinkishau in Isarel tusotila kushinshikin chidi chijil cha dikum, chadinga chilikishin ris. Chijil chalonda anch: “Kangal wikal ni ris ku chikumbu cha mukwen. Kangal wikal ni ris kwi mband wa mukwen, ap ku kashalapol wend, ap ku mwilomb wend, ap kwi ngomb wend, ap ku chimbur wend, ap ku yom yawonsu yidia ya mukwen.” (Kubudik 20:17) Kwikil muntu ap umwing ukutwisha kukasikeshin chijil mud chinech, mulong kwikiling muntu utwishining kuman yidia mu michim. Pakwez, chijil chinech, chazambwisha Chijil nakash kupandakanamu chijil cha muntu. Chamwijikisha mwin Isarel mwawonsu anch akupan kuchind kamu kud Yehova, ukutwisha kwijik yitongijok ya mu muchim. (1 Samwel 16:7, NW) Chikwau kand, chijil chinech chashika kamu ku muj wa yisal yiyimp.—Yakob 1:14.

¹⁷ Chijil chalikisha ris chayikasikesha antu a Nzamb kwipuk kusot mapit, kupumb kudia, ni kwinan nakash mulong wa mwom wau. Chayilama kand ku choziu cha kwiy ap cha kusal masandj. Kukez kwikal antu adia ampich tukutwisha kubaz ap kushinshikin mu mutapu umwing ap ukwau, ap akutwisha kumekan mud atupandakenamu etu. Anch twakangany kuyikel yitongijok yetu mu ngikadil yiney, tukutwish kuburen musangar ni kuyovil antu akwau ris. Bibil ujimbwil ris mudi chijingidij chimekeshina anch “Nzamb wayilikin mu manangu mau marumbangena.” Tuwapidil kamu kulik ris.—Rom 1:28-30.

18. Spiritu ik upalangena ilel mu mangand, ni yibudikin ik yiyimp yisongishinay?

¹⁸ Spiritu upalangena mu mangand ilel unou ukasikeshin kusot mapit ni kubambel. Kusutil ku rubil ra kwikalaku kwa yom, kulangwishina maku ma winsak mulong wa yom yisu chisu ni chisu kukat kulet chitongijok cha kuburen musangar anch tuyikwetap. Yawiy ngikadil yiney yifishinau nich mu Chijil cha Yehova. Ngikadil yifanikena nich yiney yifishinau nich mu chijil cha Yehova yidi impu ya kusot kwikal wa kusambish mu mwom ni kuruzuk mapit. Pakwez, kambuy Paul wababesha anch: “Pakwez kudi antu asotila kwikal ampich akuwa mu yoziu, ni mu disu dia mapit, ni kwisupul kwa maku mayimp ni yom ya usany yikata kuyandjik antu mu kuyindam ni kujiy. Mulong rukat ra nfalang wawiy muj wa mitapu yawonsu yiyimp; antu avud asota kwikal ampich akat kurumbuk mwi njil ya ritiy, abuzikin kal michim yau nich maushon mavud.”—1 Timote 6:9, 10.

19, 20. (a) Mulong wa rukat ra chijil cha Yehova, yom ik yidia chakin ya usey? (b) Yom ik tukushinshikina mu rusangu rambakedinap?

¹⁹ Antu akatila chijil cha Nzamb ij ubaj wa ngikadil ya kusot mapit ni ichidijin ayinau. Chilakej, nfund-a-kuseng, wamulembila Yehova anch: “Fumba muchim wam mu malejan mey, kangal wova ris ra yom. Mazu ma mukan mey madi mawamp kudi am chipandiken tunan twa nfalang.” (Kuseng 119:36, 72) Kwitiyij uyakin wa mazu minam kukez kutukwash kwikal isikena ni kwipuk mipit ya mapit, kupumb kudia, ni kuburen kusangar nich mwom wetu. Chom chijim mulong wa kutan chipar chipandikena kujimb udi “mwom wa kumulondul Nzamb,” chidiap kwiruzukin mapit.—1 Timote 6:6.

²⁰ Yijidik yidia kwinyim kwa Chijil chapanay Yehova ku muchid wa Isarel wa pakur yidi ya usey pa muten wetu unou wa yikokujol mud muyadinga pa chisu chapanay Yehova Chijil kud Moses. Anch twayisadil mu mwom wetu, tukez kuyisanger nakash, tukez kuyikat nakash, ni tukez kwikal in musangar nakash. Chijil chikwet malejan mavud ma usey mulong wetwetu, ni yivurish yiwamp ya usey way yimekedin ku mwom ni yamanau antu adingaku pa muten wa Bibil. Mu mutu wa mulong wambakedinap ou, tukushinshikinaku malejan ni yivurish yimwing.

[Mazu madia kwishin kwa paj]

Ov, Ukwakul Nchik?

• Ov, mulong wak nfund-a-kuseng wa Kuseng 119 wakata chijil cha Yehova?

• Chom ik chikutwishau kwilej in Kristu ku ditenchik dia Sabat?

• Usey ik wa chikupu ukweta chijil cha Nzamb piur pa kupupurol ya kwangul?

• Chijil piur pa ris chitukingin mutapu ik?

[Chipich chidia pa paj wa 13]

Chijil cha Sabat chakasikeshina chom ik?

[Chipich chidia pa paj wa 15]

Chijil piur pa kupupurol ya kwangul chitulejin chom ik?