Dizu dia Yehova Didi Diom

Manans Majim ma Buku wa Kaad wa Kuseng

CHITUDIA atushalapol a Yehova, twij anch tukutwish kuman yoziu ni kupakiu mu mwom wetu. Kambuy Paul wafunda anch, “antu awonsu asotila kushakam mu kwipan kud Nzamb mu Kristu Yesu akez kuyizengol kand.” (2 Timote 3:12) Chom ik chikeza kutukwash kujijaman ku yoziu ni kuzengol, chakwel tutwisha kushal ashinshamena kud Nzamb?

Mubombu wa kaad wa mibombu yitan ya kuseng utwinkishin ukwash winou. Kuseng 42 djat ku Kuseng 72 utulejin anch, anch tusotil kujijaman ku yoziu ni kuwin yoziu, tufanyidin kumuchingejin nakash Yehova ni kwilej kumuchingejin mulong wa kutupandish. Chakin kamu, didi dilejan dia usey nakash kud etu! Uruu wa Buku wa Kaad wa Kuseng, mud yikunku yikwau ya Dizu dia Nzamb, didi “diom, ni usu” djat ni ilel unou.—Hebereu 4:12.

YEHOVA NDIY “KWIKANG KWETU NI USU WETU”

(Kuseng 42:1–50:23)

Mwin Levi udi mu uswik. Cha ushon chidi anch, katwishinap kuya kwi ndond yitumbila ya Yehova mulong wa kumwifukwil, ndiy wiyongojin amwinend nich kulond anch: “Mulong ik unenganena, A Mupim wam, mulong ik upurumukina? Chingejin mudi Nzamb.” (Kuseng 42:5, 11; 43:5) Mazu ma maverse minam mamekena chisu ni chisu manungin yikunku yawonsu yisatu ya Kuseng 42 ni Kuseng 43 kwikal chikunku chimwing. Kuseng 44 madi malembil mulong wa Yuda—muchid wadinga mu mar makash, pamwing ap mulong wa kuyifunyin kwa in Asiri mu machuku ma Mwant Ezekias.

Kuseng 45, udi muminy wa uruw wa mwant, udi uprofet piur pa Mwant Mesia. Kuseng 46, 47 ni 48 umurumburil Yehova mud “kwikang kwetu ni usu wetu,” “Mwin-Mangand wa pansh pawonsu,” ni “ndond ya kwikang ya piur.” (Kuseng 46:1; 47:2; 48:3) Kuseng 49 ulejen mu mutapu uwamp anch kwikil muntu ap umwing “ukutwish kwiland ni kumufut Nzamb kumulikish”! (Kuseng 49:7) Miminy chinan ya kusambish ya mubombu wa kaad wa kuseng yidi ya an enday Kore. Muminy wa chidivu, Kuseng 50, aufunda kud Asaf.

Yakul ku Yipul Yipwilau Piur pa Mifund:

Kuseng 44:19—“Ndond ya amiyeu” yadinga yom ik? Pamwing ap nfund-a-kuseng wadinga ni kwisambin ndond ya njit, mulong antu adinga ni kufa kwinikwa adinga ni kuyidia kud amiyeu.

Kuseng 45:13, 14a—Nany “Mwan mband wa mwant” ukezau ‘kutwal kudi mwant’? Udi mwan mband wa “Mwant wa chikupu,” Yehova Nzamb. (Kujingunik 15:3, NW) Mwan mband winou ufanikeshin chikumangen chitumbila cha in Kristu 144 000, alidinay Yehova mud anend kusutil ku kuyizizil many ma mwiku wend utumbila. (Rom 8:16) “Mwan mband” winou wa Yehova, ‘amurijeka mudi ngachik uyila kudi nfumwend,’ akez kumutwal djat kudiay ngatan—Mwant Mesia.—Kujingunik 21:2.

Kuseng 45:14b, 15—‘Ajik’ inay adi anany? Adi “chisak chipandiken kujimb” cha in kwifukwil akin, inungina ni kumukwash kashal uzizidilau many. Mulong awiy “adiokila mu mar makash” mwamu, akez kikal pansh chisu chikeza kusadik musambu wa uruw wa Mwant Mesia mwiur. (Kujingunik 7:9, 13, 14) Pa chisu chinicha, akez kwizulijan nich “musangar uvud ni kuwang miminy.”

Kuseng 45:16—Mutapu ik ukezau an amakundj kuyiswinkan atatukwau pa want? Pavadikay Yesu pa divu, wadinga ni atatukwend a pansh. Akez kikal anend amakundj pakezay kuyivumbul kudiokal ku afu mu Winyikel wend wa Mivu Kanan. Amwing pakach pau akez mukach mwa inang atondau mud ‘answan mwi ngand ya kabuj.’

Kuseng 50:2—Ov, mulong wak wamutazukau Yerusalem anch “ndond ya ufun upandikena”? Chadingap mulong wa ufun wa musumb. Pakwez, chadinga mulong Yehova wausadila ni wateka ufun pa musumb winou pawikadishay musumb wa tempel wend ni musumb ujim wa ant end azizilay many.

Malejan kud Etu:

Kuseng 42:1-3. Mud ngurung chikatay kupijamijan mulong wa kusot mem mu chan, Mwin Levi wapijamijana pa kumusot Yehova. Muntu winou wadinga nich ushon nakash mulong katwishap kumwifukwil Yehova mwi ndond Yend yitumbila chawiy ‘mansoj mend mikala yakudia yend muten ni uchuku’—kovap maku ma kudia. Ov, tufanyidinap niyetu kwikal nich musangar nakash mulong wa kumwifukwil Yehova pamwing nau ambay netu akaritiy?

Kuseng 42:4, 5, 11; 43:3-5. Anch atwauril kulemp ni chikumangen cha Ukristu mulong wa mayingishin kanang, kuvurik musangar wa urund winou kukutukwash. Ap anch tukwov cha kusambish ushon nakash wa kwikal pa ayinetu, tukez kuvurik kand anch Nzamb udi kwikang kwetu ni tufanyidin kumuchingejin mulong wa kutupandish.

Kuseng 46:1-3. Chikalap nchik chakamish chin chawonsu tukutwisha kurish nich, tufanyidin kuchingejin nakash anch “Nzamb ndiy kwikang kwetu ni usu wetu.”

Kuseng 50:16-19. Mwin kudimban mwawonsu ni kusal yisal yiyimp kakutwishap kwikal ntimesh wa Nzamb.

Kuseng 50:20. Pa ndond pa kwisambinang ching kurumbuk kwa antu akwau, tufanyidin kulikishijadin umwing ni mukwau.—Kolosay 3:13.

“MUPIM WAM IKUCHIKINA KUMUCHINGIL NZAMB KUSU”

(Kuseng 51:1–71:24)

Miminy yiney ya kuseng yisambishin nich malembil ma yovil yikash ya David yovay kupwa kwa kusal chitil ni Batisheba. Kuseng 52 djat ku Kuseng 57 ulejen anch Yehova ukez kuyipandish antu akata kumutwik mafund mau malimina ni akata kumuchingel chakwel ayipandisha. Mud muchilondilau mu Kuseng 58-64, pa mar mend mawonsu, David wamwikadisha Yehova ndond yend ya kwikangin. Ndiy wawanga anch: “Mupim wam ikuchikina kumuchingil Nzamb kusu, ruchingej ram rukat kudiokal ching kudiay Ndiy.”—Kuseng 62:5.

Urund wa piswimp ni Mupandish wetu ufanyidin kutubachik kuwang ‘kushiman kwa dijin diend.’ (Kuseng 66:2) Amwisambidin Yehova mud mwin kupan mujim mu Kuseng 65, mud Nzamb wa yisal ya kupandishan mu Kuseng 67 ni 68, ni mud Mupandish mu Kuseng 70 ni 71.

Yakul ku Yipul Yipwilau Piur pa Mifund:

Kuseng 51:12—Nich “muchim wa kusal nawamp” David wita amukwasha nich yom ik? Riner, ridiap rusot ra Nzamb ra kumukwash David ap mwiku utumbila wa Yehova, pakwez muchim wa David amwinend —chitongijok cha muchim wend. Ndiy umwitin Nzamb amwinkish maku ma kusal yom yitentamina.

Kuseng 53:1—Mutapu ik udiay “chisup” muntu ulondila anch Nzamb kwikil? Usup pinap urumburikinap kuburen kwa manangu. Muntu winou udi chisup mu mikadil ni usup winou ukutwish kumeken ku yibudikin ya mikadil yiyimp yirumburilau mu Kuseng 53:1-4.

Kuseng 58:3-5—Muntu muyimp udi mud nnak mutapu ik? Makasu makatau kuyidimben antu akwau madi mud ulemb wa nnak. Akat kuyipish katumb kawamp ka antu akatau kudimben. “Mudi chisud kajika-matu,” muntu muyimp kakatap kutesh dizu dia kumukand.

Kuseng 58:7—Mutapu ik mupwilingay muntu muyimp “mudi mem makat kwandam pansh”? Chimeken mud David wadinga ni kutongijokin pa tuwit tumwing twa mwi nkurubuk ya mwi Ngand ya Kushilamu. Ap anch mabeb mizwishanga too mem mwi nkurubuk yiney, mem minam madinga ni kupwa swa. Chawiy David wadinga ni kulembil chakwel muntu muyimp ashadika swa.

Kuseng 68:13—Ov, mutapu ik “jimpur ja diyemb jibwika ni utad utok, ni mavuj mend ni utad usunz”? Amayemb amwing akweta ulombu wa kujal kwa maur adinga ni kulay pa mavuj mau mamwing. Mavuj mau mamekana mud chikung cha or chilayina pa muten. Pamwing ap David wadinga ni kufanikesh kuwin kwa amasalay in Isarel pachirikinau kudiokal kwi njit mud iyemb—ukata kutwik nakash ni ulayina. Mud mulondilingau in kwilej amwing a Bibil, dirumburil dined dikutwish kand kwikal dia chom chimwing cha ufun, ap chipar, chatambulau. Chikalap nchik mwamu, David wadinga ni kwisambin kuwin kwa Yehova kwayinkishay antwend piur pa akankuny nau.

Kuseng 68:18—Anany adinga “mulambu kudi antu”? Mulambu winou wadinga amakundj akwatau kwi njit ja kukwat Ngand ya Kushilamu. Amakundj inay ayinkisha mudimu wa kuyikwash in Levi mu mudimu wau.—Ezra 8:20.

Kuseng 68:30—Kwit anch “yikwatisha wom annam a mpat” kurumburikin ik? Mu kulond kwa chifanikesh piur pa akankuny a antu a Yehova mud annam, David wamwita Nzamb ayikwatisha wom, ap anch ayikangesh kusal uyimp.

Kuseng 69:23—Chirumburikin ik ‘kuzalizal kwa nyim ya mukankuny’? Mbij ja nyim jiding ja usey nakash mulong wa kusal midimu yikash, mud kuzambul ni kusend yom yilimina. Kuzalizal kwa nyim kurumburikin kuburen usu. David walembila chakwel akankuny nend aburena usu.

Malejan kud Etu:

Kuseng 51:1-4, 17. Kusal chitil kufanyidinap kutudiosh kud Yehova Nzamb. Anch twakarumuk, tukwikal nich ruchingej mu ranaken rend.

Kuseng 51:5, 7-10. Anch twasal chitil, tukutwish kumwit Yehova dilikishin mulong wa kuswan kwa chitil chetu. Tukutwish kand kumulembil atutokish, atwikadish asu, atukwash kubwit yitongijok ya chitil mu muchim wetu, ni atwinkish ukash wa kujijaman.

Kuseng 51:18. Yitil ya David yashesha kuwap kwa mashakamin ma muchid wawonsu wa kabuj. Chawiy walembila mulong Nzamb asala nawamp ku Zion. Anch twasal chitil chijim, chikat kulet katumb kayimp pa dijin dia Yehova ni pa chikumangen. Tufanyidin kulembil kud Nzamb chakwel arijek uyimp twasadila.

Kuseng 52:8. Tukutwish kwikal “mudi mutond utalel wa jimpach mu chikumbu cha Nzamb”—mushejina Yehova ni song mabuj mu mujikit wend—anch twamuziyil ni kwitiyij dipup diend.—Hebereu 12:5, 6.

Kuseng 55:4, 5, 12-14, 16-18. Mpung ya ukankuny yasambishay mwanend Absalom ni matung ma mwin kuyulan mukash Akitofel yamuneganesha David nakash. Pakwez, chom chinech chashadishap ruchingej ra David mudiay Yehova. Kitufanyidinap kulikin runeng rikepisha ruchingej retu mudiay Nzamb.

Kuseng 55:22. Mutapu ik tukata kutek chisend chetu kud Yehova? Tukat kusal mwamu (1) pitukata kumulej milong yetu mu malembil, (2) pitukata kukimb umutakel ni ukwash mu Dizu diend ni ku dirijek diend, ni (3) pitukata kusal yitukutwisha kusal mulong wa kwonan mwikadil.—Jinswir 3:5, 6; 11:14; 15:22; Filip 4:6, 7.

Kuseng 56:8. Yehova wij chidiap kusu mwikadil wetu pakwez wij kand yibudikin ya yovil yau pad etu.

Kuseng 62:11. Nzamb kakatap kuchingej musul ap umwing mulong wa kwikal ni usu. Ndiy amwinend udi musul wakin wa usu. “Usu uding kudi Nzamb.”

Kuseng 63:3. ‘Rukat ridimukina ra Nzamb ripandaken mwom kuwap’ mulong anch rukat ridimukina kwikil, mwom udi wa chamwamu ni wakad rutong. Chikwikal cha manangu kud etu kuta urund ni Yehova.

Kuseng 63:6. Chisu cha uchuku chiding chisu cha zoong ni chakad kampuw chikutwish kwikal chisu chiwamp cha kutongijokin.

Kuseng 64:2-4. Kulond kuyimp kukutwish kushesh katumb kawamp ka muntu wakad mulong. Kitufanyidinap kuteshang mazu minam mayimp ni kumapalangesh.

Kuseng 69:4. Chakwel kulam chisambu, chikutwish kwikal cha manangu “kuchichirish” yisu yimwing kusutil ku kwit dilikishin, ap anch twitiyijinap anch twarumbukang.

Kuseng 70:1-5. Yehova uteshin malembil metu ma swa-swa mulong wa ukwash. (1 Tesalonik 5:17; Yakob 1:13; 2 Pita 2:9) Nzamb ukutwish walik choziu chidandamena, chikalap nchik mwamu ukutwinkish manangu chakwel kupwish mulong ni usu wa kujijaman. Kakutulikap atwoza kupandikanamu usu wetu wa kujijaman.—1 Korint 10:13; Hebereu 10:36; Yakob 1:5-8.

Kuseng 71:5, 17. David wakudisha kuhamuk ni usu pamuchingejinay Yehova kudiosh kamu mu winsand wend—ap kurutu kwa kurish kamu nend Chitabu Goliat mwin Filistin. (1 Samwel 17:34-37, NW) Ansand awapidil kumuchingejin Yehova mu yom yawonsu yisadilau.

“DIVU DIAWONSU DIZULA SENS NI UYAJ WEND!”

Muminy wa nsudiel wa mubombu wa kaad wa kuseng, Kuseng 72, wisambidin winyikel wa Salomon, wadinga mwinzwizwimb wa mikadil yikeza kwikalaku mu winyikel wa Mesia. Yiyukish yiwamp mud ik yisambidinau mu muminy winou—chisambu too, kupwa kwa mar ni yisal ya chisum, mbut yivud nakash pa divu! Ov, tukez kwikal umwing wa antu inay akeza kusanger yom yiney ni yiyukish yikwau ya Want? Tukutwish kwikal pakach pa antu inay anch, mud nfund-a-kuseng, tukwet musangar wa kumuchingejin Yehova, ni kumwikadish ndond yetu ya kwikangin ni usu wetu.

‘Kulembil kwa David kupwil’ nich mazu manam anch: “Mwant Nzamb uyukila! Mwant Nzamb wa Isarel, Ndiy kusu ukat kusal yikwamushen! Adiyukisha bil dijin diend dia uyaj chikupu, ni divu diawonsu dizula sens ni uyaj wend! Amen ni Amen!” (Kuseng 72:18-20) El niyetu nich muchim wetu wawonsu tumuyukish Yehova ni kushiman dijin diend dia uyaj.

[Chipich chidia pa paj wa 9]

Ov, wij ufanikeshinay “mwan mband wa mwant”?

[Chipich chidia pa paj wa 10]

Ov, wij mulong wak wadingau ni kumutazuk Yerusalem anch “ndond ya ufun upandikena.”?