Dizu dia Yehova Didi Diom

Manans Majim ma Buku wa Katan wa Kuseng

MPICH ukutwish kulond anch: “Anetu amakundj mu usand wau akez kukul mudi mitond yikash, ni anetu amband akwikal mudi manguj ma kusong ku makonk mu chikumbu cha mwant. . . . amikoku etu akat kuval an tunan.” Chikwau kand, mpich ukutwish kulond anch: “Ayuk kwau antu anch chidi mwamu mukach mwau!” Pakwez, chinyim ni chinech, nfund-a-kuseng ulondil anch: “ayuk kwau antu amukweta [ Yehova], Nzamb wau!” (Kuseng 144:12-15) Ov, mutapu ik chitwishikina kwikal mwamu? Yehova udi Nzamb wa musangar, ni musangar udi chom chiyinkishinau antu akata kumwifukwil. (1 Timoteu 1:11) Uyakin winou aulejen patok mu mubombu wa nsudiel wa miminy yapepilau kud Nzamb, mubombu wa Kuseng 107 djat ku 150.

Buku wa Katan wa Kuseng niyend ukasikeshidin ngikadil yijim ya Yehova, pamwing ni rukat ridimukina, uyakin, ni uwamp. Anch twak manangu mavud tukwak wuntu wa Nzamb, tukumukat ni kumwov wom nakash. Chinech chikez kuwejin nakash ku musangar wetu. Ridi rusangu ra usey mud ik ridia mu Buku wa Katan wa Kuseng!—Hebreu 4:12.

ASANGER MULONG WA RUKAT RUDIMUKINA RA YEHOVA

(Kuseng 107:1–119:176)

In Yuda atwalau mu uyong pachirikau kudiokal mu uswik mu Babilon awanga anch: “Apana bil kujikitish kwau kudi [ Yehova] mulong wa rukat rend rudimukina ni mulong wa midimu yend yijim kudiau an a antu.” (Kuseng 107:8, 15, 21, 31) Pamushimanay Nzamb, David wawanga anch: “Uyakin wey washika ku madj.” (Kuseng 108:4) Mu muminy ulondwilaku, walembila anch: “Nkwashaku A [Yehova], Nzamb wam, mpandishap mudi mwikadila riy rey.” (Kuseng 109:18, 19, 26) Kuseng 110 udi uprofet wa winyikel wa Mesia. Kuseng 111:10 ulondil anch: “Wom wa Nzamb udi disambishil dia chiyul [manangu].” Kukwatijan ni kuseng wambakedinap: “Wayuk muntu umwovila [Yehova] wom.”—Kuseng 112:1.

Kuseng 113 djat ku 118 akutazukining anch Kuseng kwa Nkumbu, akutazukining mwamu mulong kukat kuchirikin chisu chawonsu dizu “Mushimanany [ Yehova]!” Kukwatijan ni yilondila buku Mishnah—mudia jinsangu ja chinshakur jafundau mu chitot cha kasatu—miminy yiney ading ni kuyiwang pa musambu wa Kusut kwa Yehova ni pa misambu yisatu ya pa muvu yasalangau in Yuda. Kuseng mulemp nakash kupandakanamu mashapitre mawonsu madia mu Bibil, Kuseng 119 ukat kushiman dizu dia Yehova diajinguninau, ap anch uruu.

Yakul ku Yipul Yipwilau Piur pa Mifund:

Kuseng 109:23—Chom ik chasotay kulond David palonday anch: ‘Nidi mudi mwizuzwimb ulepishilau, nifanyidin kuya’? David wadinga usotil kusu kulond anch wova anch rufu rend rasej kal piswimp nakash.—Kuseng 102:11.

Kuseng 110:1, 2—Chom ik chadinga chisadilay Yesu Kristu ‘Nsalejend [a David]’, pashakamay ku chikas cha katatuku cha Nzamb? Kwinyim kwa kuvumbuk kwend, Yesu waya mwiur ni wachingela ku chikas cha katatuku cha Nzamb djat mu muvu wa 1914 pasambishay kuyikel mud Mwant. Pa chisu chinech, Yesu wayiyikela in kwilej end azizidilau many, wayitakela mu mudimu wau wa kulejan ni wa kwikadish in kwilej pamwing ni kuyitenchik mulong wa kuyikel nend pamwing mu Want wend.—Mateu 24:14; 28:18-20; Luka 22:28-30.

Kuseng 110:4—Yehova wachipa piur pa chom ik ‘chakaday ndiy kwez kukarumuk’? Machip minam madi manswik masukay Yehova ni Yesu Kristu chakwel asala mud Mwant ni Mwin Kupesh Mujim.—Luka 22:29.

Kuseng 113:3—Mutapu ik ukutumbishau dijin dia Yehova “kusambish ku kucha pamanch kushik ni ku kuzwek kwa muten”? Chom chinech chitin yivud kupandakanamu kwau chisak cha antu in kumwifukwil Nzamb pichuku-pichuku. Kusambish ku kusasimuk kwa muten kwingangel kushik ku kuzwek kwau kurand, nsis ja muten jikat kumunyik pa divu diawonsu diakabuj. Chawiy chimwing, akumutumbish Yehova pa divu diawonsu. Chom chinech chitwishikinap pakad usu urijekinau. Chitudia Atuman a Yehova, twitapila kal dilau dia kumushiman Nzamb ni kusal nich mushiku mudimu wa kulejan Want.

Kuseng 116:15—Mutapu ik ‘rufu ra antu end ashinshamena riding ra usey ku mes kwa Yehova’? In kumwifukwil Yehova akwet usey nakash kudi ndiy mu chilik cha kwel anch ndiy umen kufa kufilau mud chisak kumwitin yivud pa kwitiyij anch afa. Anch Yehova witiyij anch rufu riyishikena, chikez kumekan mud anch akankuny nend amupandakenamu usu. Chikwau kand, kukezap kwikal muntu ap umwing ukeza kushal pansh mud mufulandal wa mangand masu.

Kuseng 119:71—Ov, chitwishikin nchik kwikal chiwamp kuman mar? Mar makutwish kutulej mutapu wa kumuchingejin ching Yehova kusu, kumulembil nakash, ni kwikal nich mushiku nakash mu kwilej Bibil ni kusadil yilondilay. Chikwau kand, kwitiyij ap kulik mar kukutwish kujingunin yilim ya untu wakad kuwanyin yifanyidina kutenchik. Tukezap kwov kusansan kukash kwa mar anch twakulik kutuwapisha.

Kuseng 119:96—Mazu ‘Nsudiel ya kuwanyin kwa yom yawonsu’ marumburikin ik? Nfund-a-kuseng wisambidin kuwanyin mu kuman kwa antu. Wadinga wij anch chitongijok cha muntu piur pa kuwanyin chikwet mimbu. Pakwez, yijidik ya Nzamb yikwetap mimbu. Umutakel way usadil ku milad yawonsu ya mwom. Bibil umwing (New International Version) ulondil mazu minam anch: “Namana nsudiel ya kuwanyin kwawonsu, pakwez yijidik yidi yakad mimbu.”

Kuseng 119:164—Kumushiman Nzamb “tupamp sambwad pa dichuku” kurumburikin ik? Uvud sambwad chisu chivud ulejening kuwanyin. Chawiy lel, nfund-a-kuseng ulondil anch Yehova ndiy kusu ufanyidina kushiman kwetu kwawonsu.

Malejan Kudi Etu:

Kuseng 107:27-31. Manangu ma mangand makez ‘kuvundangan’ pakeza kashik Armagedon. (Kuburik 16:14, 16) Kakezap kumupandish muntu ap umwing ku disheshik. Ching kusu antu akata kumuchingejin Yehova chakwel ayipandisha awiy akeza kwikal aom mulong wa ‘kumujikitish Yehova mulong wa rukat rend rudimukina.’

Kuseng 109:30, 31; 110:5. Mpak ya musamun yidia mu chikas cha katatuku cha isalay yiburedining diking dia rikibu, ridia mu chikas cha kamaku. Mu chifanikesh, Yehova udi “ku chikas cha katatuku” cha atushalapol end, mulong wa kuyirishin. Chawiy ukuyiking ni kuyikwash—diawiy diyingish dietwetu dipandakena kuwap dia ‘kumujikitishin nakash’!

Kuseng 113:4-9. Yehova udi piur nakash chawiy chikatay kutal mes pansh amana “yom mudi muyidia mwiur ni pansh.” Chikwau kand, ukat kumwanaken muntu mukemp, kazwendj, ni mband mumb. Mukaleng Mwant Yehova witudishin ni usotil anch in kwifukwil end niyawiy ikal itudishina.—Yakob 4:6.

Kuseng 114:3-7. Kwilej midimu yishimokishina yasalay Yehova mulong wa antu end ku Karung Usuz, ku Wit wa Yordan, ni ku Mukandu wa Sinai kukutwish kutukwat nakash. Antu, afanikeshinau nich “divu,” afanyidin kwakam—mu chifanikesh ‘kuzalizal’—kurutu kwa mpal ya Nsalejetu.

Kuseng 119:97-101. Kwak manangu, njingunin, ni chovu cha Dizu dia Nzamb kukat kutulam ku chak cha mu spiritu.

Kuseng 119:105. Dizu dia Nzamb didi mwend wa kasu ku mend metu mulong dikutwish kutukwash kurish nich yikokujol yetu ya katat. Didi kand mu chifanikesh chimunyik mwi njil yetu, mulong dikat kutulej ntong ja kurutu ja Nzamb.

ASANGER KWIKALAP NCHIK MAR

(Kuseng 120:1–145:21)

Mutapu ik tukutwisha kujijaman mu mikadil ya yoziu ni kupandakan mar? Kuseng 120 djat ku 134 utwakwil nawamp ku chipul chinech. Tukutwish kupand ku ngikadil yikash ni kulam musangar wetu kusutil ku kuchinin kudiay Yehova chakwel atukwasha. Miminy ya kuseng yiney, ayitazukining anch miminy ya Kukandam, chimeken anch adinga ni kuyiwang pa chisu chadingau in Isarel ni kuya ku Yerusalem mulong wa misambu yau ya pa muvu ni muvu.

Kuseng 135 ni 136 kumulejen Yehova anch udi Muumb wa chom chawonsu chimusangareshina, mu kushalijan kukash ni akish akad ukwash. Kuseng 136 amusala mulong wa kwakul ku muminy, chikunku cha nsudiel cha verse ni verse achiwanga mulong wa kwakul ku chikunku cha kusambish. Kuseng wambakedinap ushimunin mwikadil wa runeng ra muchim wa in Yuda mu Babilon adinga asotila kumwifukwil Yehova ku Zion. Kuseng 138 djat ku 145 kudi kwa David. Wasota ‘kumushiman Yehova ni muchim wend wawonsu.’ Mulong wak? Ndiy walonda anch, chidi “mulong wantanga nawamp mwamu.” (Kuseng 138:1; 139:14) Mu miminy yitan ya kuseng yambakedinap, David walembila mulong amulama pantaliken nau amakundj ayimp, mulong wa dipup ditentamina, mulong wa kumukol mu makas ma in kuzengol, ni mulong wa kumutakel mu mwikadil. Wakasikeshina musangar wa antu a Yehova. (Kuseng 144:15) Kupwa kwa kushinshikin kujimb ni uwamp wa Nzamb, David walonda anch: “Mukan mwam mukamushiman [Yehova], mbij jawonsu jikuyukish dijin diend ditumbil chikupu ni chikupu.”—Kuseng 145:21.

Yakul ku Yipul Yipwilau Piur pa Mifund:

Kuseng 122:3—Yerusalem wading “musumb winungina kumwing” mutapu ik? Mud muchadinga ku misumb ya pasak, yikumbu ya mu Yerusalem yawonsu ayitunga kadjik kadjik. Musumb wadinga ujikina ti ni chaswapala kuuchidij. Chikwau kand, kwikal kudjik kwa yikumbu kwayitwishisha in kushakam mu musumb kwichingejin umwing ni mukwau mulong wa kukwashijan ni kwichidij umwing ni mukwau. Chom chinech chafanikesha uumwing wa mu spiritu wa tubil 12 twa in Isarel pakumanganau pamwing mulong wa kwifukwil.

Kuseng 123:2—Chisu chitongijok chijim cha chilakej cha mes ma atushalapol? Kwadinga mayingish maad masala anch atushalapol ni amilomb atala ku chikas cha nsalejau ikundj ap mband: mulong wa kulejan yisotilay ni kutambul diking ni yom ya kukwash mwom. Chawiy chimwing, tukat kutal kudi Yehova chakwel kushinshikin rusot rend ni kwitiyik kudi ndiy.

Kuseng 131:1-3—Mutapu ik ‘waninetishay David mupim wend zong, mudi mwan wadioshau kal ku diyel dia makwend’? Mudi mwan wadioshau kal ku diyel ukat kuchingejin kutan rongoj ni diking mu makas ma makwend, David niyend wachingejina kuninetish mupim wend zong mudi “mwan unenetin ku diyel dia makwend.” Mutapu ik? Kusutil ku kulik kwikal mwin kwitutul mu muchim ni chibud pa mes ni kusutil ku kulik kukimb yom yidinga yijim kud ndiy. Pa ndond pa kukimb ntumb, David wadinga ni kujingunin mimbu yend ni wikepisha. Chidi cha manangu kwimburij ngikadil yend, pakampwil anch twashiken ku kwikal nich yisend mu chikumangen.

Malejan Kudi Etu:

Kuseng 120:1, 2, 6, 7. Kutwamb makasu ni kulond kwa dichim kukutwish kuyinenganesh nakash antu akwau. Kutong kurutu kwa kulond yidi njil yimwing yikutwisha kutushichik mu “chisambu.”

Kuseng 120:3, 4. Anch tufanyidin kushakam ni muntu ukwetinga “rudim [ra] kudimban,” tukutwish kutan rongoj mu kwijik anch Yehova ukez kwonan milong pa chisu chifanyidina. In kutwamb makasu akez kuman mar ku makas ma “ayilabu.” Chakin kamu akez kutambul dirumburish disansena dia Yehova difanikeshinau “ni makal ma kasu!”

Kuseng 127:1, 2. Mu usu wetu wawonsu, tufanyidin kutal kud Yehova mulong wa kututakel.

Kuseng 133:1-3. Uumwing wa antu a Yehova udi utudishina, wishitwila, ni ukasikeshina. Kitufanyidinap kuushesh mu kwiyandjik ni kukimbang kurumbuk, kutend, ap kunyinyit.

Kuseng 137:1, 5, 6. In kumwifukwil Yehova atwalau mu uyong iyova anch alamatin ba ku Zion, chifanikesh cha dirijek dia Nzamb. Ov, chidi nchik ku mutambu wetu? Ov, tulamatin ba ku dirijek disadidilay Yehova ilel?

Kuseng 138:2. Yehova ukat ‘kupandikesh, ni kutumbish dijin diend ni dizu diend’ mulong kuwanyin kwa yom yiney yawonsu yashilayimu mu dijin diend kukez kwikal piur nakash kupandakanamu yom yin yawonsu tukutwisha kuchingejin. Chakin kamu, tuchingejin ruchingej rijim kurutu oku.

Kuseng 139:1-6, 15, 16. Yehova wij mijikit yetu, yitongijok yetu, ni mazu metu ap kurutu kwa kumalond. Ndiy utwij kudiosh pa chisu chisambishinay mwan mwivum, kurutu chid ni chid cha mujimbu chimekana nawamp. Nzamb utwij muntu ni muntu mu mutapu ‘ushimokishina nakash.’ Chongojin mud ik kwijik anch Yehova kakatap kuman ching kusu mwikadil wa choziu utukutwisha kurish nich pakwez uteshining kand yibudikin yach padi etu!

Kuseng 139:7-12. Kwikil ndond tukutwisha kuya yidia kulemp nakash mu chilik chakwel anch Nzamb ukukangany kutukasikesh.

Kuseng 139:17, 18. Ov, tukat kusanger kumwijik Yehova? (Jinswir 2:10) Anch inge, komb twashikin kal ku musul wa musangar wakad kupwang. Yitongijok ya Yehova yipandikenamu “usukuril kuvul!” Kukez kwikal yivud ya kwilej piur pend.

Kuseng 139:23, 24. Tumuswiridin Yehova chakwel ashinshikin muntu wetu wa mukach mulong wa ‘yom yiyimp’—yitongijok yiyimp, maku mayimp, ni yibachikin yiyimp—ni atukwasha kuyibwit.

Kuseng 143:4-7. Ov, mutapu ik tukutwisha kujijaman ap mu mikadil ya mar makash? Nfund a kuseng utwinkishin chiyul chiwamp anch: Tongijokin pa mujikit wa Yehova, bangin nakash yisal yend, ni kumulembil chakwel akukwash.

“Mushimanany [Yehova]”

Umwing ni umwing wa mibombu yawonsu yinying ya kusambish ya kuseng yipwil nich mazu ma kumushiman Yehova. (Kuseng 41:13; 72:19, 20; 89:52; 106:48) Chilik chimwing ni mubombu wa nsudiel. Kuseng 150:6 ulondil anch: “Yom yawonsu yikata kupim yimushimana kwau [ Yehova]. En mushimanany [ Yehova]!” Chom chinech chikez kwikal chakin mu mangand masu ma Nzamb.

Pituchingedina chiyukish chinech chidia kurutu, tukwet diyingish diwamp dia kumushiman Nzamb wakin ni kushiman dijin diend. Pitukata kutong ya chisambu chitukweta mulong wa kumwijik Yehova ni kwikal nend urund uwamp, ov, tudiap abachikinau kumushiman nich muchim utok?

[Chipich chidia pa paj wa 31]

Midimu yamushena ya Yehova yimeken patok

[Chipich chidia pa paj wa 32]

Yitongijok ya Yehova yipandikenamu “usukuril kuvul”