Dizu dia Yehova Didi Diom
Manans Majim ma Buku wa Kasatu ni wa Kanying wa Kuseng
MU MALEMBIL mend mamulembilay Nzamb, nfund-a-kuseng wipwil anch: “Akat kulond ya rukat rey rudimukina mu jinzay anch? Ap ya kulam kwey pakach pa afu?” (Kuseng 88:11) Chakin kamu, chakul chidi anch, bwat. Pakad mwom, tukutwishap kumushiman Yehova. Kumushiman Yehova diawiy diyingish dipandikena kuwap dietwetu kwikal aom, ni kwikal aom didi diyingish diwamp dia kumushiman Yehova.
Buku wa Kasatu ni wa Kanying wa Kuseng, masambishina nich Kuseng 73 djat ku Kuseng 106, matwinkishin mayingish mavud ma kumushiman Sakatang ni kutumbish dijin diend. Kutongijokin pa kuseng kwinoku kukat kukasikesh nakash kusanger kwetu “Dizu . . . [dia] Nzamb” ni kutubachik kukasikesh ni kuwapish mazu metu ma kumushiman Yehova. (Hebreu 4:12) Nich kusanger nakash, el tukarumukinany bil ku Buku wa Kasatu wa Kuseng.
“KUDI AM CHIDI CHIWAMP KAMU KUSEJ PISWIMP KUDI NZAMB”
(Kuseng 73:1–89:52)
Miminy 11 ya kusambish ya buku wa kasatu wa kuseng ayifunda kud Asaf ap kud yid ya dijuku dia Asaf. Muminy wa kusambish urumburil chom chamukwasha Asaf kulik kupumbuk nich yitongijok yiyimp. Washikena ku chiyul chiwamp. Ndiy wawanga anch: “Kudi am chidi chiwamp kamu kusej piswimp kudi Nzamb.” (Kuseng 73:28) Kwinan piur pa kusheshik kwa Yerusalem kudi mu Kuseng 74. Miminy ya Kuseng 75, Kuseng 76, ni Kuseng 77 yilejen Yehova mud Nkalansambu utentamina, Mupandish wa in kwitudish, ni ukata kutesh kulembil. Kuseng 78 uchirikidin milong ya pakur ya Isarel kudiosh pa chirung cha Moses djat ku chirung cha David. Kuseng kwa 79 kudi kwinan piur pa kusheshik kwa tempel. Kuseng 80 madi malembil mulong wa kuyichirish antu a Nzamb. Kuseng 81 didi dikasikesh dia kumuziyil Yehova. Kuseng 82 ni Kuseng 83 madi malembil mulong wa dirumburish dia Nzamb piur pa ankalansambu ayimp ni piur pa akankuny a Nzamb.
“Mupim wam winana kuman dibur dia [Yehova],” mwamu mwawangau an a Kore. (Kuseng 84:2) Kuseng 85 kudi kumulembil Nzamb ayiyukisha ankwal achirika kudiokal mu winkwal. Kuseng winou ukasikeshidin anch yiyukish ya muspiritu yidi ya usey nakash kupandakanamu yiyukish ya ku mujimbu. Mu Kuseng 86, David umwitin Nzamb amulama ni amufundisha. Mu Kuseng 87, mudi muminy wawangau piur pa Zion ni piur pa antu avadikina kwinikwa ni kwalondul malembil mamulembilau Yehova madia mu Kuseng 88. Rukat ra Yehova risambidinau mu manswik masukau ni David arikasikeshidin mu Kuseng 89, wawangay Etan, Etan winou ukutwish kwikal umwing wa amakundj anying in manangu adingaku pa machuku ma Salomon.—1 Ant 4:31, Traduction du monde nouveau.
Yakul ku Yipul Yipwilau Piur pa Mifund:
Kuseng 73:9—Mutapu ik uzambwilau antu ayimp ‘mu kan mwau mwiur, ni rudim rau rikat kunyingumuk nchik pansh’? Mulong antu ayimp kakatap kumulimish muntu ap wisu udia mwiur ap udia pansh, kakatap kwidjidjek pa kumusaal Nzamb nich kan kau. Akat kuyifukejin kand antu akwau nich rudim rau.
Kuseng 74:13, 14—Chisu ik chabuzay Yehova ‘mitu ya ngandu pa yimem ni kupuchol mutu wa Levatan’? Farao “mwant wa in Idjibit,” amutazukining anch “ikwal a ngandu ulela mu wit . . . wa Nil.” (Ezekiel 29:3) Levatan ukutwish wafanikesh antu akash a Farao. (Kuseng 74:14) Kupuchol mitu yau chimeken anch kwisambidin kupuchol kwapucholau Farao ni amasalay end chisu chayikolau in Isarel mu uswik wa Idjibit kud Yehova.
Kuseng 75:4, 5, 10—Dizu “musengu” dirumburikin ik? Misengu ya nnam yiding ut ukash. Chawiy lel, dizu “musengu” didi chijingidij cha ukash, ap anch usu. Yehova ukat kuzambul misengu ya antu end, ukat kusal anch atumba, oku ukat ‘kukatul misengu ya antu ayimp.’ Atudimwishin kulik ‘kuzambulang musengu wetu’ charumburik anch tufanyidinap kwibaz ap kwitutul ni chibud. Mulong Yehova ndiy ukata kuzambul, komb chifanyidin kuman yisend ya midimu mu chikumangen anch yidiokil kud ndiy.—Kuseng 75:7.
Kuseng 76:10—Ov, ‘ujim wa muntu’ ukutwish nchik kumutumbish Yehova? Chisu chikatay Nzamb kuyilikin antu amekesha ujim wau pantaliken netu anch mulong tudi atushalapol end, kukutwish kwikal chibudikin chiwamp. Mwikadil win wawonsu wa mar utukutwisha kwikal nich ukutwish kutupup mu mutapu kanang. Yehova ulikidin mar ching kusu mu chilik cha kutufumb kwa mutapu winou. (1 Pita 5:10) ‘Ujim wa muntu ushadilaku, Nzamb ukuudjal mwi ntul.’ Ov, chikwikal nchik anch twaman mar mu chilik cha kufa? Chom chinech ni chawiy chikutwish kumushiman Yehova mulong antu atumena anch tujijamen ni kushinshaman akutwish kand kusambish kumushiman Nzamb.
Kuseng 78:24, 25—Ov, mulong wak utazukinau mana anch “mbut ya mwiur” ni “yakudia ya angel”? Mazu minam maad kimarumburikinap anch mana madinga yakudia ya angel. Madinga “mbut ya mwiur” mulong madiokala mwiur. (Kuseng 105:40) Mulong angel, ap anch “antu in ukash,” ashiching mwiur, mazu “yakudia ya angel” makutwish kurumburik anch Nzamb ushichinga mwiur, ndiy wamaleta. (Kuseng 11:4) Pamwing ap Yehova wayisadila kand angel mulong wa kuyinkish in Isarel mana.
Kuseng 82:1, 6—Anany atazukinau anch “anzamb” ni “anend Ndiy Udia Piur”? Mazu minam mawonsu maad misambidin ankalansambu adinga mu Isarel. Chinech chiyifanyidin mulong antu inay asala mud atutum ni antimesh a Nzamb.—Yohan 10:33-36.
Kuseng 83:2—Chirumburikin ik kulond anch muntu ‘udjindwil mutu’ wend? Chisal chinech chirumburikin kwikal tayad mulong wa kuyikel ap kusal chom kanang, pakampwil kubwambwil, kurish, ap kumeshan mar.
Malejan kud Etu:
Kuseng 73:2-5, 18-20, 25, 28. Kitufanyidinap kuyovilang ris antu ayimp mulong wa mapit mau ni kwimburij mashakamin mau makad kumulimish Nzamb. Antu ayimp adi pa ndond yisidina. Chakin kamu akez ‘kuwil mu disheshik.’ Chikwau kand, mulong chitwishikinap kudiosh uyimp mwishin wa winyikel wa muntu mwin yitil, usu wetu wawonsu tukutwisha kusal mulong wa kuudiosh udi wa chamwamu. Mud Asaf, chikwikal cha manangu anch turisha nich uyimp kusutil ku “kusej piswimp kudi Nzamb” ni kusanger urund wa piswimp ni Nzamb.
Kuseng 73:3, 6, 8, 27. Tufanyidin kudimukin kwibaz, kwitutul, kulond kwa kuswing, ni wij. Mwamu chidia ap anch kusal mwamu kumeken kwikal ni ukwash.
Kuseng 73:15-17. Anch yitongijok yaturumbangan, tufanyidin kukwat pa kan kangal twabudish patok yitongijok yetu yirumbangena. ‘Kulond mwamu’ kukutwish kuyiziyish antu akwau. Tufanyidin kutongijok nawamp piur pa milong yetu ni kusot mutapu wa kuyipwish pamwing ni ambay netu akaritiy.—Jinswir 18:1.
Kuseng 73:21-24. Kovang ‘kusansan ku muchim’ mulong wa kumekan kwa mwikadil uwamp wa antu ayimp kudi kusal mud nnam wakad kutongang. Yisal yend yiding ya kukashimuk, yengamidining nakash-nakash pa yovil. Pakwez etu, chiyul cha Yehova chawiy chifanyidina kututakel, nich kuchingejin kamu anch ndiy ukez ‘kutulam ba ku chikas cha katatuku’ ni kutukwash. Chikwau kand, Yehova ‘ukez katutumbish,’ mu urund wa piswimp nend.
Kuseng 77:6. Kumekeshang yovil ya muchim mulong wa uyakin wa muspiritu ni kukimbijol nawamp kwitin chisu cha kwilej ni kutongijok. Chidi cha usey mud ik kwitekin chisu cha kwikuchikin zoong pa ayinetu mu mwom!
Kuseng 79:9. Yehova uteshining malembil metu, pakampwil anch matadil pa kutumb kwa dijin diend.
Kuseng 81:13, 16. Kutesh dizu dia Yehova ni kwendil mu jinjil jend kuletining yiyukish yivud.—Jinswir 10:22.
Kuseng 82:2, 5. Kuburen kutentam kukat kusal anch “jimbumbu jawonsu ja pansh” jinyikeka. Yisal yakad kutentam yikat kuvundangesh mwikadil uwamp wa chisak cha antu.
Kuseng 84:1-4, 10-12. Kusanger kwa in kufund a kuseng mulong wa ndond ya kumwifukwil Yehova ni yovil yau ya kusanger yisend yau ya mudimu yidi kudi etu yilakej yiwamp.
Kuseng 86:5. Tufanyidin kujikitish mud ik anch Yehova “witenchikin mu kulikishilan”! Ndiy ukat kukimbang uman wawonsu ukutwisha kumutwishish kumekesh ranaken kud muntu wasadila chitil witina dilikishin.
Kuseng 87:5, 6. Ov, antu akeza kutambwil mwom mu Paradis wa pansh kakezap kwijik majin ma antu akezau kuvumbwil ku mwom wa mwiur? Maverse minam malejen anch mwamu chikutwisha chikal.
Kuseng 88:13, 14. Kulab kwa kutambul chakul ku malembil metu piur pa mulong kanang kukutwish kwarumburik anch Yehova utusotin tumekesha kwipan kwetu kwakin kud ndiy.
“MUJIKITISHANY NDIY, UYUKISHANY DIJIN DIEND”
(Kuseng 90:1–106:48)
Tushinshikinany mayingish kushalijan ma kumushiman Yehova malejenau mu buku wa kanying wa kuseng. Mu Kuseng 90, Moses utekin kushalijan kudia pakach pa mwom wa “Mwant wa chikupu” ni mwom wa machuku makemp wa muntu. (1 Timoteu 1:17) Kukwatijan nich Kuseng 91:2, Moses wisambidin Yehova mud ‘Dipat diend ni kwikang kwend’—Musul wend wa diking. Miminy yilondwilaku ya kuseng yisambidin ngikadil yiwamp ya Nzamb, yitongijok ya piur nakash, ni midimu yamushena. Piswimp miminy yisatu yisambishin nich mazu manam ‘[Yehova] waswan kal want.’ (Kuseng 93:1; 97:1; 99:1) Palonday piur pa Yehova mud Muumb wetu, nfund-a-kuseng utwitin anch: “Mujikitishany Ndiy, uyukishany dijin diend!”—Kuseng 100:4.
Mutapu ik ukatay nyikel umwovila Yehova wom kutakel yom yend? Kuseng 101, wawangay Mwant David, utwinkishin chakul. Kuseng wambakedinap utulejin anch Yehova “ukutesh kand kulembil kwa antany, kakudiurilip kulembil kwau.” (Kuseng 102:17) Kuseng 103 upwitidin manangu pa rukat ni ranaken ra Yehova. Pisambidinay yitang yivud ya Nzamb yidia pansh, nfund-a-kuseng ulondil anch: “A [Yehova], midimu yey yivud yivud, wasadil yawonsu ni chiyul.” (Kuseng 104:24) Miminy yaad ya nsudiel ya Buku wa Kanying yikat kumushiman Yehova mulong wa midimu yend yamushena.—Kuseng 105:2, 5; 106:7, 22.
Yakul ku Yipul Yipwilau Piur pa Mifund:
Kuseng 91:1, 2—“Ndond ya kujingamin yend Ndiy Udia Piur” chom ik, ni mutapu ik tukutwisha ‘kushakamamu’? Yiney yidi ndond ya chijingidij ya diking ni zoong ya muspiritu—mwikadil wa diking ku chak cha muspiritu. Ndond yiney yijingamin mulong yijikenap kud antu akad kumuchingejin Nzamb. Tukat kumwikadish Yehova ndond yetu ya kushakam pitukarumukidina kud ndiy mud dipat dietu dia kwikangin, pitumushimena mud Mukaleng Mwant mwin mangand, ni pitulejena rusangu ruwamp ra Want. Twiyovil mu diking dia muspiritu mulong twij anch Yehova witenchikin kal mulong wa kutukwash.—Kuseng 90:1.
Kuseng 92:12—Ov, mutapu ik ukatau kukul antu atentamina mud “mitond ya mabu”? Dibu dijiken mulong wa kwonak kwadi ni kusong kwadi kwa mivu yivud. Muntu utentamin udi mud dibu mulong wonikin ku mes ma Yehova ni udandamedin “kusong mabuj” ni mu mabuj minam mudi midimu yiwamp.—Mateu 7:17-20.
Malejan kud Etu:
Kuseng 90:7, 8, 13, 14. Yitil yitukata kusal yikat kushesh urund wetu ni Nzamb wakin. Ni yitil yijingamina chikasiken kumujindjikinay Nzamb. Pakwez, anch twakarumuk chakin kamu ni kulik mwikadil wa kusal yitil, Yehova ukez kutwitiyij kand, ni ‘ukutwikutish nich rukat rend.’
Kuseng 90:10, 12. Mulong mwom udi wiswimp, chawiy tufanyidin kwilej “mwakuchindil machuku metu.” Mutapu ik? Chidi kusutil ku ‘kutambul muchim wa chiyul’ ap ku kusadil manangu chakwel anch kangal twashesh machuku metu mashalaku kal, pakwez tumasadila mu mutapu umusangareshina Yehova. Chinech chitin anch tuteka pa ndond ya kusambish yom ya muspiritu ni kusadil chisu chetu nich manangu.—Efesus 5:15, 16; Filipoi 1:10.
Kuseng 90:17. Chitufanyidin kulembil anch Yehova ‘ajamisha mudimu udia pa makas metu’ ni kuyukish usu wetu mu mujikit wa kulejan.
Kuseng 92:14, 15. Anch ikal in kwilej akash a Dizu dia Nzamb ni kukumanganang wakad kujing ni antu a Yehova, amapal adandamedin kwikal ‘atalela ni mem mau’—akash muspiritu—ni kwikal akweta usey mu chikumangen.
Kuseng 94:19. Wikalap nchik musul wa “kuvul kwa minan mu muchim”, kutang ni kutongijokin pa “kwongoj” kudia mu Bibil kukez kutwongoj.
Kuseng 95:7, 8. Kutesh yiyul ya Bibil, kuta matu ku yiyul yiney, ni kuyiziyil kukez kutuchidij ku kwikal ni michim yichinchikina.—Hebreu 3:7, 8.
Kuseng 106:36, 37. Maverse minam malondil anch kwifukwil akish kudi chilik chimwing ni kuyilambul ayilembil. Chinech chimekeshin anch muntu ukata kusadil akish ukutwish kwikal ubachikinau kud usu wa ayilembil. Chawiy lel Bibil ukasikeshin anch: “Babalany ayinen kudiok ku akish.”—1 Yohan 5:21.
“MUYUKISHANY [YEHOVA]!”
Miminy yisatu ya nsudiel ya Buku wa Kanying wa Kuseng yipwil nich chiyul chinech: “Muyukishany [Yehova]!” Kuseng wa nsudiel niyend usambishin nich mazu minam. (Kuseng 104:35; 105:45; 106:1, 48) Chakin kamu mazu “Muyukishany [Yehova]!” madi tupamp tuvud mu Buku wa Kanying wa kuseng.
Chakin kamu tukwet mayingish ma kumushiman Yehova. Kusambish nich Kuseng 73 djat ku Kuseng 106 matwinkishin yom yivud ya kutongijokin, kwizwish michim yetu nich kumujikitish Tatukwetu wa mwiur. Pitukata kutongijokin yom yawonsu yatusadilay ni yikezay kutusadil mu machuku ma kurutu, ov, tudiap abachikinau ‘kumushiman Yah’ nich usu wetu wawonsu?
[Chipich pa paj wa 8]
Mud Asaf, tukutwish kurish nich uyimp kusutil ku “kusej piswimp kudi Nzamb”
[Chipich pa paj wa 9]
Farao amupandakana usu ku Karung Musunz
[Chipich pa paj wa 9]
Ov, wij mulong wak utazukiningau mana anch “yakudia ya angel”?
[Chipich pa paj wa 11]
Ukwash ik tukweta wa kuninetish “kuvul kwa minan mu muchim”?