Mutapu wa Kuman Chitokish Chakin

CHADINGA pa Kachirikin 18, 1810. Uchuku wadinga wasambish kal kujal. Kwalanka rinkind wa mambek, pa karung, ku mutambu wa kurul ni kwingangel piswimp ni chikum cha Écosse, British Navy HMS Pallas waat wa mau nakash (waat wa amasalay in kwasin njit pa mem) washadisha njil ya kuya. Kwajala mididim bwi ni nej wanaka muvud nakash chad chayikasikena nakash in kwawish kujingunin yimunyik ya kasu yadinga yiswiridinau chakwel kuya kushind waat wau pa chikum chiwamp. Tongin musangar wovau pamanau yitokish ya kasu ni atadisha kamu waat wau pinipa! Pakwez, cha ushon, yiney yadingap yitokish ya kasu yadinga yiswiridinau. Chakin kamu, yitokish yiney yadinga ya kasu ka antu akata kusadil mudimu pa chikum. Atadisha waat wa Pallas mu mayal ni wajiya wawonsu. Antu dikum ni umwing in kusal mudimu afa mu mem. Kuyindam mud ik!

Mu rusangu riner ra Pallas, kachilim kamwing kusu kaleta kusheshik kukash. Pakwez, pa yisu yimwing in kusal mudimu ku maat arisha ni chak chijim—yitokish ya kasu ya kupumbwish maat. Buku umwing (Wrecks, Wreckers and Rescuers) ulondil anch: Yitokish mud yiney adinga ni kuyitek mulong wa kuyidimb in kwawish chakwel aya kushind maat ku yikum ya mayal mulong ajiya, chad atwisha kubuu.

‘Mifund Yitumbila Yikutwisha Kukushikij ku Dipandish’

Mu kukimbijol kwey kwa chitokish, ukat kurish nich yak mud yarishau nich in kusal mudimu a ku waat inay. Ukutwish walondul rusangu ra makasu, ap kand akutwish akudimb. Njil yikwau yikutwish kukutwal ku kusheshik. Ov, chom ik ufanyidina kusal mulong wa kwichidij? Shinshikin anch musul wey wa chitokish udi wakin ni wa kuchingejin. Mu mivu 125 ni kusut, gazet winou watakeja kal Dizu dia Nzamb diapepilau, Bibil, mud musul ujim upandikena wa chitokish mulong mudi ‘mifund yitumbila yikwet usu ukutwisha kukushikij ku dipandish.’—2 Timote 3:15-17.

Chakin, chakwel anch umwitiyij Bibil mud chitokish cha umutakel wa kuchingejin, chidi cha usey kushinshikin uyakin wend. (Kuseng 119:105; Jinswir 14:15) Ikal nich want ipey wa kuyifundin in kupalangesh gazet winou chakwel akwinkisha jinsangu jiyikwashina antu avud kwitiyij anch chakin Bibil amupepila kud Nzamb. Chilakej, tang broshir Un livre pour tous.a Ulejen jinsangu jivud jilejena anch Bibil udi zenzal, wakin, ni amufunda nich ukwash wa spiritu wa Nzamb.

Uyakin wa pa Dishin

Wisu umwing wa uyakin wa pa dishin udia mu “mifund yitumbila” yiney? Tushinshikinany yilakej yilondwila ey.

Kudi Nzamb umwing Mwin Dikand Diawonsu ni Sakatang watanga yom yawonsu. (Disambishil 1:1) Tudiaku kusu “Mulong [Nzamb] watanga yom yawonsu” ni watwinkisha mwom. (Kujingunik 4:11) Chawiy lel ndiy kusu tufanyidina kwifukwil. Sakatang ndiy kamu Musul wa chitokish chin chawonsu. (Kuseng 36:9; Isay 30:20, 21; 48:17, 18) Ukwet dijin diend disotilingay anch etu tudisadila. (Kubudik 3:15) Dijin dined, adifunda mu mamuny ma Hebereu ni adifundirila YHWH, ni didi mu Bibil piswimp tupamp 7 000. Pasutil kal mivu yivud, dijin dined dijiken mu Uruund anch “Yehova.”—Kuseng 83:18, Mukanda Usandu wa Zambi.

Yehova wayitanga ikundj ni mband chakwel ashakam chikupu mu ngikadil ya Paradis panap pa divu. Wayitanga antu nich yipau ya ngikadil ya muspiritu mud yikwetay. Wayinkisha yipau ni ukaliweny yikuyitwishisha kwikal ni mwom wa chikupu usangareshina panap pa divu. (Disambishil 1:26-28) Katenchikap anch divu dikal ndond ya kuyipakin amakundj ni amband—mud anch ndond ya kuyirijekin chakwel kuya mu mwom wa muspiritu wa mwiur, mud anch ching mwiur mwawiy mukutwishau kwikal ni urund ni Nzamb.

Mu muntu mwadingap chom chiyimp pamutangau kud Nzamb. Uyimp weza kwikalaku yitang yimwing ya Nzamb—ya chiuntu ni ya muspiritu—piyasadila nayimp want ipau wau wa kutond ni yamubwambwila Nzamb. (Kuvurik Yijil 32:5) Anvaj etu a kusambish adinga ni mbil ya kwitondil chom chiwamp ni chiyimp. (Disambishil 2:17; 3:1-5) Chawiy chaleta rufu mu dijuku dia muntu. (Disambishil 3:19; Rom 5:12) Chakwel anch Yehova apwisha mulong wadiokala ku kubwambwil, ndiy wakwata mupak wa kulikidil uyimp mu kachisu kakemp. Pakwez, rutong rend piur pa divu ni mulong wa dijuku dia muntu kiraswimpap. (Isay 45:18) Amakundj ni amband akez kushakam kand chikupu mu mikadil ya Paradis pa divu dishitwishinau.—Mateu 6:10; Kujingunik 21:1-5.

Yesu Kristu kadiap Nzamb Mwin Dikand Diawonsu, pakwez Mwan a Nzamb. Yesu Kristu amwinend ndiy wayileja in kwilej end alembil anch: “Tatukwetu udia mwiur, Dijin diey aditumbish.” (Mateu 6:9) Kalondap anch wiliken ni Nzamb. Pakwez, ndiy walonda anch: “Tatuku wimpandakenamu.”—Yohan 14:28.

Yesu ukwet mwaz ujim mu kusadish rutong ra Nzamb. Nzamb wamutuma “mudi kutok kwa mangand, chakwel mwawonsu ukwitiyila padi [ndiy] kakushakamip mu mididim.” (Yohan 12:46) Kukwatijan ni yalonday kambuy Pita, “Dipandish kididip mu muntu mukwau.” (Midimu 4:12) Wawiy winou uyakin mulong dipandish dietu dimedin pa mash ma Kristu. (1 Pita 1:18, 19) Yesu Kristu wapana mwom wend mud chakupesh cha difut mulong wa kuyikol antu ku chitil chaletau anvaj etu a pasak, Adam ni Eve, mu dijuku dia muntu. (Mateu 20:28; 1 Timote 2:6) Nzamb wamusadila kand Yesu, mulong wa kujingunish rusot ni rutong Rend.—Yohan 8:12, 32, 46, 47; 14:6; Midimu 26:23.

Nzamb wimikisha kal Want mwiur, ap anch guvernema, uyikedilay Yesu Kristu pamwing ni antu atondau mukach mwa antu. Rusangu riner ra Want wa Nzamb arisambidin mu Bibil wa kabuj. Nzamb winkisha guvernema winou mudimu wa kushinshikin anch rusot rend risadik pa divu mud muridinga mwiur. (Mateu 6:10) Rutong ra kusambish ra Nzamb kiradingap anch antu aya mwiur. Ndond yau ya kushakam yidi divu. Pakwez, kwinyim kwa muntu kusal chitil, Nzamb watonga chom chimwing chisu. Watenchika kuyitond antu “a michid yawonsu, ni antu a jindim jawonsu, ni a majuku mawonsu, ni a mangand mawonsu . . . akez kuyikel” pamwing ni Kristu mu guvernema wa mwiur. (Kujingunik 5:9, 10, Manswik Masu) Want winou ukez piswimp ap kamu “kushesh mant makwau mawonsu” ma milad ya winyikel wa antu, maletina riyind rijim ni mar makash mu dijuku dia muntu.—Daniel 2:44.

Mupim ufiling. Uyakin winou wa pa dishin wa Bibil uletin chitokish piur pa muntu ni pa ruchingej ra mwom wend. Udioshin kand kutesh kuyimp ni jinsangu jiyimp jikata kuyivundangesh antu piur pa ngikadil ya afu.

Buku wa Bibil wa kusambish utulejin anch: “[ Yehova] Nzamb wamuumba muntu nich rufunfut ra divu, wamupimina mwiku wa mwom mu mazur mend, chad muntu wikala mwom.” (Disambishil 2:7) Ov, wovil kurumburik kwa chom chinech? Mupim chidiap chom chidia mu mujimbu wa muntu. Muntu kakwetingap mupim. Udi mupim—kubombakan kwa yom kanang yidia mu “rufunfut ra divu” ni usu udiokila kud Nzamb. Mupim udiap wakad kufang. Pakatay muntu kufa, mupim ufiling.—Disambishil 3:19; Mulej 9:5, 10.

Chitwishikin kuyichirish antu afa kal ku mwom kusutil ku disanguk. Pichikeza kupwa chisu chikemp chilikidilay Nzamb uyimp usadika, “awonsu adia mwi nzay [akez katesh] chidjimin cha dizu diend [Yesu], Ni kubudik; in kusal nawamp ku disanguk dia mwom ni in kusal nayimp ku disanguk dia kufa nich.” (Yohan 5:28, 29; Midimu 24:15) Disanguk dikez kuyichirish antu ku mwom mu paradis pa divu, ku mulad wa mwom wayisotinau antu kud Nzamb kudiosh kwinsambishil.

Kushinshikin nawamp Mifund Dichuku ni Dichuku

Ov, umen mutapu ukutwisha kukukwash ronganyin ra uyakin winou wa pa dishin? Mu machuku minam ma mar makash, ronganyin riner rikutwish kukuchidij ku rubil ra Satan Djabul, ridimbilau anch ridi “ronganyin rakin.” Mulong ndiy ukat kwikarumun mud “mwangel wa kutok,” ni antimesh end “akwikarumun ayinau mudi atushalapol atentamin.” (1 Timote 6:20; 2 Korint 11:13-15) Ronganyin rakin ra Bibil rikutwish kukuchidij ku chom chitazukinau anch chitokish chengamidina pa mafilozofi ma “in kubabal ni in manangu,” a mangand “Alika kal mazu [ma Yehova].”—Mateu 11:25; Jeremiy 8:9.

Kambuy Yohan wayibabesha in Kristu a mu mivu chitot ya kusambish anch: “Kangal witiyijany aspiritu awonsu”, mulong kwadinga malejan mavud ma makasu ni mafilozofi mu machuku minima. Walonda kand anch: ‘Pakany chakwel ushinshikany mazu minam mapepidilau anch madiokil kudi Nzamb.’ (1 Yohan 4:1, Traduction du monde nouveau) Tushinshikinany chilakej chinech. Anch watambul uruu ukweta usu nakash mu mwom wey, ov, ukutwish kuwitiyij kapamp kamwing anch mulong udiokil ku musul wakin? Bwat kwau. Ukutwish kushinshikin kudiokila uruu winou ni kuushinshikin kurutu kwa kuwitiyij.

Kusutil ku rusangu rapepilau ni rafundau rikweta uyakin wa pa dishin, Nzamb watwishisha anch chikuswapela kusal kamu mwamu—chakwel ‘ushinshikin’ anch chitokish chiletina umutakel, ap anch yimunyik ya kasu, yiulondwila yidi yakin. (1 Tesalonik 5:21) Antu adinga ni manangu mawamp a mu mivu chitot ya kusambish ayijikitisha mulong “ading ni kutang mukand wa Nzamb pichuku pichuku” mulong wa kushinshikin anch yom yilejau yadinga chakin kamu uyakin. (Midimu 17:11) Niyey ukutwish kusal mwamu. El Bibil, “mwend ukata kumunyik mwi ndond ya mididim,” akutakela nawamp mu diking. (2 Pita 1:19-21) Anch wasal mwamu, ukez “kutan ronganyin ra Nzamb,” riletininga chitokish chakin.—Jinswir 2:5.

[Mazu madia kwishin kwa paj]

[Chipich chidia pa paj wa 4]

Dizu dia Nzamb didi mud mwend wa kasu

[Chipich chidia pa paj wa 5]

Nzamb dijin diend nany?

[Chipich chidia pa paj wa 5]

Dikez dia mutapu ik dichingedinau antu?

[Chipich chidia pa paj wa 6]

Ov, Yesu udi Nzamb Mwin Dikand Diawonsu?

[Chipich chidia pa paj wa 6]

Afu adi kwisu?

[Chipich chidia pa paj wa 7]

Disanguk dia afu udi uyakin wa pa dishin ulejenau mu Bibil