“Malejan Mey Mawiy Musangar Wam”

“Yom yawonsu yafundau pakuru ayifundila kutulej nich etu.”—ROM 15:4.

1. Mutapu ik ukatay Yehova kutwinkish malejan, ni mulong wak tumakatiling?

YEHOVA wayinkisha antwend malejan chakwel kuyikwash kurish nich yipwichik ya yisu yikash. Mamwing ma malejan minam makat kumekan pa chisu utangina Bibil, makwau mading jinsangu ap mud yirumburil yikatau kulejan ku yikumangan ya Ukristu. Yom yivud yitukata kutang ap kutesh pa yisu yiney yidingap yisu kud etu. Chitwishikin, twashinshikina kal rusangu riner. Mulong tukat kuvuramenang, tuswiridin chisu chawonsu kuvurish manangu metu piur pa ntong ja Yehova, yijil yend ni malejan mend. Tufanyidin kusanger malejan ma Nzamb. Makat kutukasikesh kusutil ku kutukwash kudandamen kutek manangu metu pa mayingishin makata kutubachik kwikal nich mwom wambatena nich rusot ra Nzamb. Chawiy, nfund-a-kuseng wamuwangila Yehova anch: “Malejan mey mawiy musangar wam.”—Kuseng 119:24.

2, 3. (a) Ov, mulong wak Yehova walama jinsangu ja antu isambidinau mu Bibil djat ni ilel muten? (b) Jinsangu ik ja Bibil jikwisambinau mu mutu wa mulong winou?

² Ap anch adifunda pasutil kal mivu yivud, Dizu dia Nzamb dikwet usu nakash. (Hebereu 4:12) Ditulejin jinsangu jakin ja antu a pa muten wa Bibil. Ap anch yishankur ni yitongijok yaswimpa kal nakash kudiosh pa muten wa Bibil, yikokujol yiturishina nich yiding chisu chivud mud yarishau nich pa muten winiwa. Jinsangu jivud ajilama mulong wa kutulej etu mu Bibil jitwinkishin yilakej ya antu amukata Yehova ni amusadila nich kushinshaman chikalap nchik mikadil yikash. Jinsangu jikwau jitulejin mulad wa mwikadil ukisinay Nzamb. Yehova wasala anch jinsangu ja antu jinej jawonsu, jiwamp ni jiyimp, ajifunda mu Bibil mulong wa kutulej etu. Chidi mud mwafunday kambuy Paul anch: “Mulong yom yawonsu yafundau pakuru ayifundila kutulej nich etu, chakwel tukutambul ruchingej mu kudandamen ni mu kwongoj kwa mukand wa Nzamb.”—Rom 15:4.

³ El tushinshikinany jinsangu jisatu jidia mu Bibil: rusangu ra David nenday Saul, ra Ananias ni Safira, ni ra mwikadil wa Josef ni mband wa Potifar. Rusangu ni rusangu ritulejin malejan mamwing ma usey.

Kushinshaman ku Yitenchik ya Nzamb

4, 5. (a) Mulong ik wadingaku wamukwata Mwant Saul ni David? (b) Mutapu ik wakulay David ku ukankuny wa Saul?

⁴ Mwant Saul wikala wakad kushinshaman kud Yehova ni kafanyinap kand kuyiyikel antu a Yehova. Chawiy Nzamb wamulika ni wamutakela muprofet Samwel chakwel amuzizila David many mud mwant ukwambakenap wa Isarel. Pamekeshay David nkeu mud isalay ni antu pamwinkishau ntumb, Saul wasambisha kumuman David mud mukankuny nend. Chisu ni chisu Saul wasota kumujip. Pakwez David wapanda pa yisu yiney yawonsu mulong Yehova wadinga nend.—1 Samwel 18:6-12, 25; 19:10, 11.

⁵ Mu kusut kwa mivu, David wikala mwin kuwembujok. Pikalay nich mutapu wa kumujip Saul, ambay a David amukasikesha anch mujipa, nich kulond anch Yehova wamupan kal kamu mukankuny wa David mu makas mend. Pakwez, David walika. Kushinshaman kwend kud Yehova ni kalimish kadingay nich piur pa mwaz wa Saul mud mwant uzizidilau many wa antu a Nzamb kwamubachika kusal mutapu winou. Oku, Yehova ndiy wamutonda Saul mud mwant wa Isarel, ov, kimwawiyap? Yehova ndiy ukeza kumumwang pa want pa muten ufanyidina. David watonga anch kichadingap chisend chend kusal mwamu. Kupwa kwa kusal yawonsu yasotay kusal mulong wa kutudish ukankuny wa Saul mulong wendendiy, David walonda anch: “Yehova amwinend ukez kumubul; ap dichuku diend dia kufa dikez kushik, ap ukez kuya kwi njit ukez kufil kwinikwa. Kinikutwishap ku mutambu wam, kulondulijan nich kuman kwa Yehova, kwonan chikas cham pantaliken nend uzizidilau many wa Yehova!”—1 Samwel 24:3-15; 26:7-20, NW.

6. Ov, mulong wak rusangu ra David ni Saul ridi ra usey kud etu?

⁶ Rusangu riner rikwet malejan ma usey. Ov, wiyipulap kal mulong wak mu chikumangen cha Ukristu mukat kulank milong kanang? Chitwishikin anch muntu kanang asadila yom mu mutapu umwing wakad kufanyin. Chitwishikin pamwing ap kasadilap chitil, pakwez ngikadil yend yikusangareshinap. Ov, ukusal nchik? Mulong usotil kumubangin muntu winou ni usotil kand kushinshaman kud Yehova, ufanyidin kwisamb nend mu mutapu wa kalimish, nich rutong ra kumwisak. Chad, chikwikal nchik, anch mulong udandamedin? Anch wapwish kusal yawonsu yifanyidina kusal, ukutwish pamwing kulikin mulong winou mu makas ma Yehova. Mwamu mwasalay David.

7. Mu kumwimburij David, mutapu ik tukutwisha kusal anch twarish nich yisal ya kasolikany ni ya katond?

⁷ Ap kand ukutwish kurish nich milong ya kasolikany mu chisak ap milong ya katond ka relijon. Chisu chimwing, ukutwish wakangany ap cha kusal pa chisu chinech. Mwikadil mud winou ukutwish wikal ukash kujijamen, pakwez tukwilejin ku mutapu wasalay David mulong wa kasolikany. Nfund-a-kuseng David wafunda rusangu rikwatina ku muchim ridiap ching mulong wa malembil mend madiokila ku muchim mamulembilay Nzamb chakwel amulama kulemp ni Saul pakwez kand piur pa kujijaman kwend kud Yehova ni kubangin kwend kushiman kwa dijin dia Nzamb. (Kuseng 18:1-6, 25-27, 30-32, 48-50; 57:1-11) David washinshamana kud Yehova ap anch Saul wadandamena mu mivu yivud kusal yom yakad kutentam. Niyetu tufanyidin kushinshaman kud Yehova ni ku dirijek diend chikalap nchik kasolikany turishina nich ni yom yikusalau antu akwau. Tufanyidin kwijik chakin anch Yehova wij kamu nawamp yisadikina.—Kuseng 86:2.

8. Mutapu ik wasalau Atuman a Yehova a mu Mozambik payipakau mulong wa kushinshaman kwau kud Yehova?

⁸ In Kristu a mu Mozambik adi chilakej cha katat cha antu amwing ashala ashinshamena kud Yehova mu chisu cha choziu. Mu muvu wa 1984, antu antombuj akwata mat ni kuyandamin chisu ni chisu mu mal mau, iya yom, osha yikumbu, ni ajipana. Chamekana anch kwadingap chom chelau kusal in Kristu inay akin mulong wa kwikamunin ayinau. Antu a mu teritwar winiwa ayikwata ku usu mulong wa kuyandjik mu usalay ap kuyishindil kuyikwash mu mutapu windjing. Atuman a Yehova amana anch kusal mwamu kukwatijadinap nich mwikadil wa Ukristu wa kulik kwandam mu yom ya mangand. Kulik kwau kwayovisha amasalay ujim nakash. Atuman amband ni amakundj 30 ni kusut ayijipa mu chisu chinech cha kanvundangesh, pakwez ap wom wa rufu watwishap kujiril kushinshaman kwa antu a Nzamb.a Mud David, ajijamana ku kasolikany ni eza kupandakan.

Yivurish ya Kutubabesh

9, 10. (a) Mutapu ik tukutwisha kwisakin yilakej yimwing yidia mu Bibil? (b) Uyimp ik wadinga mu yisal ya Ananias ni Safira?

⁹ Antu amwing ajimbwilau mu Bibil adi malejan ma kutubabesh piur pa mwikadil tufanyidina kwipuk. Chakin kamu, Bibil ukwet jinsangu jivud ja antu, ap mukach mwa atushalapol a Nzamb, asala uyimp ni amana yibudikin yiyimp. (1 Korint 10:11) Rusangu rimwing ridi ra Ananias ni Safira, ambay a uruw adinga yid ya chikumangen cha Ukristu cha mu Yerusalem mu mivu chitot ya kusambish.

¹⁰ Kupwa kwa Pentekot mu muvu wa 33 mu chirung chetu, chafanyina kupan ukwash wa ku mujimbu mulong wa kuyikwash in kwitiyij asu adinga mu Yerusalem chakwel kwisakin ku kwikal kwau pamwing ni atwimbuy. Yid yimwing ya chikumangen yalandisha kapamp kamwing yom yau chakwel kuyikwash antu adinga mu maswir. (Midimu 2:41-45) Ananias ni Safira alandisha chir chau ni aleta kwau chikunku cha nfalang kud atwimbuy, ni kulond anch chipan chau jawiy nfalang jawonsu jalandishau chir. Uyakin udi anch, Ananias ni Safira adinga afanyidin kupan yom yivud ap yikemp mudi mwadia musotilau ayinau, pakwez yibachikin yau yadinga yiyimp, ni yisal yau yakad uyakin. Asota kumekan mud antu awamp ni amekana anch asotil kusal yivud kupandakanamu chakin mwadingau. Kambuy Pita, mwishin mwa umutakel wa mwiku utumbila, wasaula kuburen kwau uyakin ni rubabek rau, ni Yehova wayijipa.—Midimu 5:1-10.

11, 12. (a) Misu malejan mamwing matuvurishina usey wa win yakin? (b) Yiyukish ik yidingaku ya kwikal in uyakin?

¹¹ Anch tukat kusot kulond makasu mulong wa kwiwapish ku mes kwa antu, rusangu ra Ananias ni Safira rikutwish kwikal dibabesh dia usu nakash kud etu. Tukutwish kuyidimb akwetu antu, pakwez tukutwishap kumudimb Yehova. (Hebereu 4:13) Chisu ni chisu Bibil utukasikeshin kwikal antu akin umwing ni mukwau, mulong akamakasu kakezap kwandam mwi ngand yitentamina mukezau kudiosh kuburen kutentam. (Jinswir 14:2; Kujingunik 21:8; 22:15) Tufanyidin kwov nawamp chom chinech. Musul wa makasu mawonsu udi ching kamu Satan Djabul.—Yohan 8:44.

¹² Kwikal nich mwom wa uyakin kuletining yiyukish yivud. Mu yiyukish yiney mudi kom katok ni musangar wa kwikal muntu wa kuchingejin kud antu akwau. Mu yisu yivud, in Kristu akat kuman mudimu, ap alamin midimu yau, mulong ading antu akin. Pakwez, chiyukish chipandikena kujimb, uyakin ututwishishin kwikal arund a Nzamb Mwin Dikand Diawonsu.—Kuseng 15:1, 2.

Ikalany Ishitwila

13. Mu mwikadil ik mwikalay Josef, ni mutapu ik wasalay?

¹³ Josef, mwan ikundj wa nshakur Yakob, amulandisha mud muswik pa reng ra mivu 17. Kupwa amuteka mu chikumbu cha Potifar, nzuj mujim mwin Idjibit, kwawiy kwinikwa mband wa mwant wend wamusangera nakash. Mband wasota kulal ni Josef, wadinga nsand ikundj wa chifu cha ufun, ni pichuku-pichuku mband wadandamena kumwel anch: “Ez, tulala ni yamam!” Josef wadinga kulemp ni dijuku diend mwi ngand mwakad muntu umwija. Wela kulal kamu nawamp ni mband winou pakad antu akwau kwijik. Pakwez, pamuturumukinau mu chidjal kud mband wa Potifar, Josef wafusa mau.—Disambishil 37:2, 18-28; 39:1-12.

14, 15. (a) Ov, mulong wak rusangu ra Josef ridi ra usey kud etu? (b) Ov, mulong wak mband umwing mwin Kristu wasangara nakash pateshay yivurish ya Nzamb?

¹⁴ Josef amulila mu dijuku diamwovanga Nzamb wom, ni ndiy wijika anch kulalijan kwa antu akad kwatijan chidi chitil. Josef wamwipula anch: “Ing am nikutwish nchik lel kusal kuyip mudi kwinoku, ni kusal kand chitil kurutu kwa Nzamb?” Chasalay achitakela nich ronganyin ra chijil cha Nzamb chayinkishay antu mud mwachilonday mu Eden, cha ikundj umwing, mband umwing. (Disambishil 2:24) Antu a Nzamb ilel unou akutwish kwisakin ku kutongijokin pa mutapu wasalay Josef mu mwikadil winou. Mu materitwar mamwing, antu itiyijin kwau kusal masandj mu chilik cha kwel anch ansand alikina kumasal akat kuyipipesh kud arund nau. Masandj pakach pa mbay a uruw ni muntu wakad kwikal nfumwend ap mukajend mapalangen mukach mwa amakurump. Chawiy lel, rusangu ra Josef rituvurishin chom cha usey kud etu tufanyidina kuvurik pa chisu chetu. Chijil cha Nzamb chidi anch kwimik dis ni usund yidi yitil. (Hebereu 13:4) Antu avud awidila mu yipwichik ya masandj itiyijin anch kudi diyingish diakin dia kulik kusal masandj. Mukach mwa yibudikin yiyimp mudi usany, kom kijondila, mikau, madikaj, ni mayej makata kusamburikin ku kusal masandj. Mud kamu mutuvurishinay Bibil, muntu ukata kwimik dis usadidil “mujimbu wend amwinend chitil.”—1 Korint 5:9-12; 6:18; Jinswir 6:23-29, 32.

¹⁵ Jenny,b Kaman mujich wa Yehova, uyingin kusanger yivurish ya Nzamb. Ku mudimu, kwadinga nsand umwing ukweta chifu cha ufun wamusadila yom ya rukat. Padingay Jenny ni kulik kumwakul, nsand winou wadandamena kumusadil yom yivud ya rukat. Jenny ulondil anch: “Nafanyidina kurish amwinam mulong wa kushal wishitwila, mulong chikat kusangaresh anch muntu ikundj ukat kukusanger.” Ap mwamu, Jenny wajingunina anch ikundj winou wasota amuchindina ku uvud wa amband asala kal nend masandj. Pamanay anch wasambish kal kuziy mu mutapu wa kujijaman kudi ndiy, Jenny wamulembila Yehova amukwasha mulong wa kushinshaman kud Ndiy. Jenny wamana anch yom yilejay padingay ni kukimbijol mu Bibil ni mu mikand ya Ukristu yadinga mud “yivurish ya kwimbachik chakwel nikasikesha kubabal kwam.” Chimwing cha yivurish yiney radinga rusangu ra Josef ni mband wa Potifar. Wapwisha ni kulond anch: “Pinadandamena kwivurish mutapu nimukatina Yehova, naswiridinap kwov wom anch nikez kusal uyimp winou ujim ni kusal chitil kurutu kwend.”

Tesh Yivurish ya Nzamb!

16. Mutapu ik tukutwisha kwisakin pituchirikidina ni kutongijokin mwom wa antu ajimbwilau mu Bibil?

¹⁶ Etu awonsu tufanyidin kusanger yijil ya Yehova pitwikasikeshina kutesh mulong wak watufundilau jinsangu jimwing mu Bibil. Jitulejin yom ik? Ngikadil ik ap yibachikin ik yamekeshau antu a pa muten wa Bibil yitufanyidina kwimburij ap kwipuk? Chakin kamu mu Dizu dia Nzamb mudi jinsangu ja yitot ya antu. Antu awonsu akatina malejan ma Nzamb awapidil kukudish maku mulong wa katok ka manangu, ni malejan tukutwisha kwilejin ku yilakej yasalay Yehova anch ayilama nawamp. Gazet winou chisu ni chisu ukat kubudish mitu ya milong yisambidina antu akweta jinsangu jikweta ya kutulej. Ukutwish witekin chisu cha kuchirikin jinsangu jinej.

17. Mutapu ik wovila piur pa yivurish ya Yehova, ni mulong wak?

¹⁷ Tufanyidin kujikitish mud ik mulong wa kubangin kwa rukat kukatay kumekesh Yehova mulong wa antu asadila usu wa kusal rusot rend! Chakin kamu tudiap antu awanyidina, mud mwadingau amakundj ni amband ajimbwilau mu Bibil. Pakwez, jinsangu ja yisal yau jafundau jidi musul wa usey kud etu. Anch twatesh yivurish ya Yehova, tukutwish kwipuk kusal yisal ya kurumbuk kukash, ni tukutwish kwimburij yilakej yiwamp ya antu endila mwi njil ya kutentam. Anch twasal mwamu, tukez kutwish kuwang pamwing ni nfund a kusang anch: “Ayuk kwau akata kulam malejan mend, akata kumusot ni muchim wa kabuj. Mupim wam walondula malejan mey, nimakatil nakash chipandiken.”—Kuseng 119:2, 167.

[Mazu madia kwishin kwa paj]

Mutapu ik Ukwakula?

• Chom ik tukutwisha kwilejin ku ngikadil ya David pantaliken nend Saul?

• Rusangu ra Ananias ni Safira ritulejin chom ik?

• Ov, mulong wak rusangu ra mwom wa Josef ridi ra usey wa pakampwil ilel unou?

[Chipich chidia pa paj wa 18]

Ov, mulong wak David walika kumujip Saul?

[Chipich chidia pa paj wa 19]

Chom ik twilejidina ku rusangu ra Ananias ni Safira?

[Chipich chidia pa paj wa 20]

Mulong wak Josef wachina masandj?