Yipul ya in Kutang

Ov, twij nchik anch mutapu urumburilau manangu misambidinau mu Jinswir 8:22-31 wisambidin Yesu Kristu padingay kand kal avadik mud muntu?

Yirumburil yapepilau piur pa manangu yidia mu buku wa Jinswir yilondil anch: “Yam manangu kantangau kudi [Yehova] pa kusambish kwa midimu yend, chawiy chom chakusambish cha midimu yend ya pakur. . . . Kurutu kand kal aumba mikandu ni yinanginang, am nading navadika kal, . . . Patangay [Yehova] diur am nading kwinikwa, . . . pinipa yam kamu manangu nadinga nend pamwing mudi mwant wa mudimu. Namusangarishanga pichuku ni pichuku, nasangaranga kand kurutu kwend machuku mawonsu. . . . Nasangera mu mangand mwend mashichau antu.”

Maverse minam kimisambidinap kwau chamwamu piur pa manangu ma Nzamb ap piur pa manangu ma muntu. Ov, mulong wak? Mulong manangu misambidinau pinap ‘amatanga’ mud nsambishil ya yitang ya Yehova. Yehova Nzamb udingaku chikupu ni chikupu ni uding mwin manangu chikupu. (Kuseng 90:1, 2) Manangu ma Yehova kimakwetingap nsambishil; kwikil muntu wamatanga. Kwikil ‘wamovila kuswan kwa kuval.’ Chikwau kand, manangu minam amisambidin anch makat kulond ni kusal yisal, mamufanikeshin muntu.—Jinswir 8:1.

Buku wa Jinswir ulondil anch kudiosh pakur manangu madinga pamwing ni Yehova, Sakatang, mud “mwant wa mudimu.” Mazu minam misambidin piur pa Yesu. Mivu yivud kurutu eza pansh, Yesu wasala ni Yehova pamwing ni chawiy chilondila Dizu dia Nzamb anch: “Ndiy udi kurutu kwa yom yawonsu, ni yom yawonsu yisankedin mwi ndiy.”—Kolosai 1:17; Kuburik 3:14.

Amurumburil nawamp Mwan ikundj wa Nzamb mud manangu, mulong Ndiy wajingunina jintong ni yijidik ya manangu ya Yehova. Padingay kand kal ikal muntu, Yesu wadinga Dizu dia Nzamb, ap anch Muruu. (Yohan 1:1) Amurumburil mud “ukash wa Nzamb ni manangu ma Nzamb.” (1 Korint 1:24, 30, MM) Kumurumburil Mwan ikundj wa Nzamb mu mutapu uwamp mud ik, rukat rend mulong wa antu ramubachika apana mwom wend mud difut mulong wa antu!—Yohan 3:16.