“Dichuku Dijim Dia [Yehova] Didi Piswimp”
“Dichuku Dijim dia [Yehova] didi piswimp, didi kamu piswimp, dezil mau!”—SOFONIY 1:14.
1, 2. (a) Dichuku ik dia pakampwil dichingedinau in Kristu? (b) Yipul ik yitufanyidina kwiyipul, ni mulong wak?
1 CHANGADIM ukat kusangerang nakash kusejin piswimp kwa dichuku dia musambu wa kwachik kwend. Mband ukweta madikaj uchingedining nich musangar dichuku dikuvadikay mwanend. Mwin kusal mudimu uziyina nakash usangaredining nakash dichuku dikusambisha konje wend wachingedinay chisu chilemp. Chom ik chimwing chikwetau awonsu inay? Awonsu achingedin dichuku dia pakampwil—dichuku dikeza kwikal nich usu kanang mu mwom wau. Yovil yau yidi yikash pakwez yishalijadin. Chakin kamu dichuku dichingedinau dikushiken kwez, ni anch diashik, achingejin kwikal tayad pa dichuku dinidia.
2 Nlel, chilik chimwing ni in Kristu akin, achingedin nich impu yikash kwez kwa dichuku dia pakampwil. Didi ‘dichuku dijim dia Yehova.’ (Isay 13:9; Yowel 2:1; 2 Pita 3:12) Ov, kwez kwinoku kwa “Dichuku dia [Yehova],” kurumburikin ik ni kukwet usu ik padi antu? Chikwau kand, mutapu ik tukutwisha kwijik anch tudi tayad pidikweza dichuku dined? Chidi cha usey ujim anch tukimba yakul ku yipul yiney katat mulong uman umekeshin uyakin wa mazu ma Bibil malondwila am: “Dichuku Dijim dia [Yehova] didi piswimp, didi kamu piswimp, dezil mau!”—Sofoniy 1:14.
“Dichuku Dijim dia [Yehova]”
3. “Dichuku Dijim dia [Yehova]” chom ik?
3 “Dichuku Dijim dia [Yehova]” chom ik? Mu Bibil wa kabuj dizu “dichuku dia [Yehova]” disambidin yisu ya pakampwil pa chisu Yehova chayirumburishay akankuny nend ni kutumbish dijin diend dijim. Antu akad kushinshaman a mu Yuda ni Yerusalem pamwing ni in kumeshan mar adinga ashicha mu Babilon ni mu Idjibit awonsu akwachika pa ‘machuku ma Yehova’ chisu chayirumburishau kudi Yehova. (Isay 2:1, 10-12; 13:1-6; Yeremiy 46:7-10) Pakwez, “dichuku dia [Yehova]” dipandakena kujimb dichidi kurutu oku. Didi “dichuku” dikezay Yehova kuyirumburish antu akata kusaal dijin diend mulong wa kuyishesh. Dikez kusambish nich kushesh kwa “Babilon mujim,” winyikel wa mangand mawonsu wa relijon wa makasu, ni dikez kushiken pa musong wadi pa chisu cha kusheshik kwa yishadilaku ya ditenchik diyimp dia yom pa njit ja Armagedon.—Kuburik 16:14, 16; 17:5, 15-17; 19:11-21.
4. Ov, mulong wak ufanyidinau antu avud kwov wom mulong wa kusejin piswimp kwa dichuku dia Yehova?
4 Adijika ap bwat, antu avud oviling wom nakash mulong wa kusejin piswimp kwa dichuku dined. Mulong wak? Yehova wakwil, kusutil kudi muprofet Sofoniy, anch: “Dichuku dinidia dikez kikal dichuku dia ujim, dichuku dia yakamish ni mar, dichuku dia kujiy ni kusheshik, dichuku dia mididim ni yiur, dichuku dia madj diakad muten.” Chakin kamu dikwatishen wom! Chikwau, muprofet ulondil anch: “Nikez kayimesh antu awonsu mar makash . . . Awiy asala kal yitil kudi am.”—Sofoniy 1:15, 17.
5. Chitongijok ik chiwamp chikwetau mamiliyon ma antu piur pa dichuku dia Yehova, ni mulong wak?
5 Pakwez, mamiliyon makwau ma antu, asangaredin nich impu yikash kwez kwa dichuku dia Yehova. Ov, mulong wak? Chidi mulong kudi awiy chidi chisu cha dipandish ni kukwolik mulong wa kutentam, dichuku dikezay Yehova amwinend kwitumbish nakash ni dijin diend ditumbila. (Yowel 3:16, 17; Sofoniy 3:12-17) Ap anch dichuku dined adiovil wom ap anch adichingedin nich impu yikash mu mutapu ujim, kupand kwengamidin pa mutapu usadidilau antu mwom katat. Mutapu ik umena ey kusejin piswimp kwa dichuku dined? Ov, wirijekin kal mulong wa kwez kwadi? Ov, kulond anch dichuku dia Yehova diazez kal kukwet usu pichuku-pichuku pa mwom wey kusambish kamu katat?
“Kukez Kez in Maswimbu ni Maswimbu Mau”
6. Mutapu ik mumeningau antu avud “dichuku dia [Yehova],” ni mulong wak in Kristu akin kakatap kwau kukashimuk?
6 Chikalap nchik mwikadil wa swa-swa, antu avud ashicha pa divu kabangidinap kwau pa kwez kwa “dichuku dia [Yehova].” Akat kuyichiril ni kuyiswimbul antu akata kuyidimwish pa kwez swa kwa dichuku dined. In Kristu akin kakatap kukashimuk pa chom chinech. Awiy avurikin dibabesh diafunday mupostol Pita anch: “Sambilany kuchijik chinech anch, ku machuku ma kwisudiel kukez kez in maswimbu ni maswimbu mau, akez kendil mu maku mau ayinau, ni kulond anch, ing kushilimu kwa kwez kwend kudi kwisu? Mulong kudiokal palangalau atatukwetu mu tul [twa rufu], yom yawonsu [yidi mudi muyadinga kudiokal] kwisambishil kwa mangand.”—2 Pita 3:3, 4.
7. Chom ik chikutukwasha kulam chovil cha swa-swa?
7 Chom ik chikutukwasha kujijaman ku chitong chinech chiyimp ni kulam chovil cha swa-swa? Pita utulejin anch: “Nikat kuburish manangu men nawamp ni kukuvurishany, chakwel en uvurikany mazu malondau pasak kudi aprofet atumbila, ni yijidik ya Mwant ni Mupandish kudi apostol end.” (2 Pita 3:1, 2) Kuta kwetu matu ku yibabesh ya uprofet kukez kutukwash ‘kuburish manangu metu nawamp.’ Pamwing ap twateshin kal yivurish yiney chisu ni chisu, pakwez chidi cha usey katat, kupandakanamu muchadinga kwisambishil, tudandamenany kuta matu ku yibabesh yiney.—Isay 34:1-4; Luka 21:34-36.
8. Ov, mulong wak antu amwing akat kudiburil yibabesh ya Bibil?
8 Ov, mulong wak antu amwing akat kudiburil yivurish yiney? Pita udandamedin anch: “Yikat kuvuramenau yawiy ey, anch kwading maur pa muten wa pasak, ni ngand ayitangila pa mem, yichidi mu mem, mulong wa dizu dia Nzamb; ni mem mabwika ngand yading pasak, yajiya ni mem.” (2 Pita 3:5, 6) Inge, chakin kamu kudi antu alikina kwez kwa dichuku dia Yehova. Kasotinap chom chimwing chimika gwa mwom wau. Kasotinap anch eza ayirumburisha kudi Yehova mulong wa mashakamin mau mayimp! Mudi mulondilay Pita, akat kwendil “mu maku mau ayinau.”
9. Ngikadil ik ya manangu yamekeshau antu a pa machuku ma Noa ni ma Lot?
9 Mulong wa ‘maku mau,’ in maswimbu asotin kuvuramen anch Yehova wandaminap kal mu milong ya antu pakur. Yesu Kristu ni mupostol Pita isambidin yinship yiney yaad, “Machuku ma Noa” ni “machuku ma Lot.” (Luka 17:26-30; 2 Pita 2:5-9) Kurutu kwa Mabeb ma Mem, antu adiburila kwau dibabesh diayinkishau. Chilik chimwing, kurutu kwa disheshik dia Sodom ni Gomora, Lot “wamekana kudi atatuwenend mudi mwin maswimbu.”—Disambishil 19:14.
10. Chom ik chikusalay Yehova pantaliken ni antu alikina kwitiyij?
10 Chishalijadinap ni nlel. Chikwau kand, shinshikin chisal cha Yehova pantaliken nau antu alikina kwitiyij: “Nikez kalejan kadimu kud antu akata kwichingejin ayinau, akata kulond anch: ‘[Yehova] kakusalap chom chiwamp ap chom chiyimp.’ Mapit mau akez kamabuu, ni yikumbu yau akez kayisheshol. Awiy kakez kashakamap mu yikumbu yatungau, ap kuna maar ma nviny ma mitond yakunau.” (Sofoniy 1:12, 13) Antu akutwish kudandamen mudi “muchidinga” nich mijikit yau ya pichuku-pichuku, pakwez kakezap kutaninamu chikupu mu mudimu wau ukash. Mulong wak? Chidi mulong dichuku dia Yehova dikez kuyikashimwish, ni mapit mawonsu makutwishau kwikungin makezap kwikal ma usey.—Sofoniy 1:18.
“Ey Chingel”
11. Chiyul ik tufanyidina kulam mu manangu?
11 Kushalijan nich mangand mayimp matwombilamu, tufanyidin kulam mu manangu chiyul chafunday muprofet Abakuk anch: “Rufunda mulong chisu chau chakuruwanyish kand kal chishika. Pakwez chikat kwez swa. Yom yinikulejina yikwikalaku kamu. Ap anch chisu chalabap nchik, ey chingel, chikuwanyin kwau. Kichikulabap, bwat.” (Abakuk 2:3) Ap anch dichuku dined diamekan mudi dilabin kukwatijan nich kuman kwetu kwakad kuwanyin, tufanyidin kuvurik anch Yehova kakatap kulabijok. Dichuku diend dikez kez kamu pa chisu chifanyidina, pa chisu chakad kuchingejin kudi antu.—Mako 13:33; 2 Pita 3:9, 10.
12. Yesu wababeshana piur pa chom ik, ni chishalijadin nchik nich yisal ya in kwilej ashinshamena a Yesu?
12 Yesu niyend wayula anch ap amwing a in kwilej end akez kushadish chovil cha kusal swa-swa, pakasikeshinay usey ujim wa kudandamen kuchingel dichuku dia Yehova. Yesu wabwaka piur pau anch: “Pakwez anch kashalapol muyimp walond mu muchim wend anch, Nsalejam uchishich kwend; ndiy wasambish kuyibul atushalpol nakwau, wend udia ni kuna ni kuzel maruvu; mwant wa kashalapol winau ukez kez mu dichuku diakad kuchingejay ndiy, ni chisu chakad kwijikay, ndiy ukez kamumesh mar.” (Mateu 24:48-51) Chinyim ni chinech, chisak cha kashalapol wakin ukweta manangu chilamin nich kushinshaman yovil yend ya swa-swa. Chisak cha kashalapol chidandamedin kuchingel ni chidi tayad. Yesu wamuteka kal “piur pa yom yend yawonsu yikwetay” yidia panap pansh.—Mateu 24:42-47.
Kuswir kwa Kusal Swa-swa
13. Mutapu ik wakasikeshinay Yesu maswir ma chovil cha kusal yom swa-swa?
13 Chadinga cha usey ujim kudi in Kristu a mu mivu chitot ya kusambish kulam chovil chau cha kusal yom swa-swa. Ading aswiridin kukwat mipak pakad kulab mulong wa kuchin mu Yerusalem chisu chamanau “amunyingumuk kudi in njit.” (Luka 21:20, 21) Chom chinech chashikena mu muvu wa 66 C.C. Tal mutapu wakasikeshinay Yesu maswir ma kusal yom swa-swa ku mutambu wa in Kristu adingaku pa chisu chinicha: “Udia pa nsiny pa chikumbu kakushikip pansh ni kudiosh yom mu chikumbu chend; ni udia mu chir kakuchirikip kutambul kabwik wend.” (Mateu 24:17, 18) Pa kuman uman ulejena jinsangu anch Yerusalem wapanda mivu yinying, ov, mulong wak in Kristu aswirikena kutesh mazu ma Yesu mu mutapu wa kusal yom swa-swa mu muvu wa 66 C.C.?
14, 15. Ov, mulong wak chayifanyina in Kristu a mu mivu chitot ya kusambish kusal swa wakad kulab pamanau Yerusalem amunyingumuk kudi amasalay?
14 Ap anch chadinga chakin anch amasalay a in Rome kasheshap Yerusalem djat mu muvu wa 70 C.C., mivu yiney yinying yadingap ya chisambu. Chakapuk chaya kwa! Mivu yiney yadinga ya chisum ni ya kwichik kwa mash mavud. Mwin kwilej jinsangu ja pakur umwing urumburil mwikadil wadinga mu Yerusalem pa chisu chinicha mudi “njit jikata kwichil mash jikwatishena wom ja an a ngand, pamwing ni yisal yikash ya chisum.” Atonda ansand mulong wa kukasikesh usu, akwata mat, ni kusadil mudi amasalay. Ayijidisha pichuku-pichuku masengan ma usalay. Awonsu amekana anch asotin kwikal ku mutambu wa in Rome ayipompata pakampwil. Antu adinga kulik kupan ukwash ujim ku yisal yiney adinga ni kuyiman mudi in matung. Anch in Kristu ashakama chisu chilemp mu musumb, ela kwikal mu mwikadil umwing wa ubaj nakash.—Mateu 26:52; Mako 12:17.
15 Chifanyidin kushinshikin anch Yesu walonda anch “adia mu Yudea,” kadingap ching kusu adinga mu Yerusalem, achina. Chom chinech chadinga cha usey nakash mulong mu angond akemp kusu kwinyim kwa kudiokal kwau mu Yerusalem, yisak ya amasalay a in Rome yeza kusambishiril kand njit jau. Akwata bil, Galalia mu muvu wa 67 C.C., ni kupwa akwat kand Yudea mu muvu walondulaku. Chom chinech chaleta mar makash mwi ngand yawonsu. Chikala kamu chikash kudi mwin Yuda mwawonsu kudiokal mu Yerusalem. Yis ya musumb adinga ayilamin, ni muntu mwawonsu wasota kuchin amumana kudi in Rome mudi uman umekeshina anch akuyikwat in Yuda.
16. Ngikadil ik yadinga yiswiridinau in Kristu a mu mivu chitot ya kusambish chakwel apanda pa chisu cha mar?
16 Nich yom yiney yawonsu mu manangu, tukutwish kutesh mulong wak wakasikeshinay Yesu mwikadil wa kusal yom swa-swa. Chayifanyina in Kristu kwipan, kangal kwizuwol ayinau mulong wa mapit ma ku mujimbu. Chayifanyina kwikal tayad kusha mapit, ni ‘kulik yom yawonsu yadingau’ nich mulong wa kuziyil ku dibabesh dia Yesu. (Luka 14:33) In Kristu aziyila kapamp kamwing ni achina aya ushad ukwau wa Yordan apanda.
Tulamany Chovil Chetu cha Kusal Swa-swa
17. Ov, mulong wak tufanyidina kukasikesh chovil chetu cha kusal yom swa-swa?
17 Uprofet wa Bibil ulejen patok anch tushich kamu mu chisu cha nsudiel. Kupandakanamu muchadinga pa kusambish, tuswiridin kukasikesh chovil chetu cha kusal yom swa-swa. Isalay udia mu chirung cha chisambu kakatap kwov yakamish ni ubaj wa njit. Pakwez, anch kamenap kuswir kwa kushakam uchila ku mes ni anch amukashimwish chakwel kuya swa kwi njit, kakutwishap kwikal wirijekina nawamp, ni kukwikal yibudikin yiyimp nakash. Mwamu chidinga kand mu spiritu. Anch twashadish pakemp-pakemp chovil chetu cha kusal yom swa-swa, tukutwishap kwirijek chakwel kwichidij ku yoziu yikata kwez kuturishish ni dichuku dia Yehova dikez kutwoz mu mutapu wakad kuchingejin. (Luka 21:36; 1 Tesalonika 5:4) Anch kudi muntu ‘uchirikina kwinyim walik kumulondul Yehova,’ katat chawiy chisu chendendiy kumukimb kand kakwau.—Sofoniy 1:3-6; 2 Tesalonika 1:8, 9.
18, 19. Chom ik chikeza kutukwash kulam mu manangu ‘dichuku dia kumekan kwa Yehova’?
18 Kwikil chinshilend anch mupostol Pita watubabesha chakwel tudandamena kulam mu manangu “dichuku dia kumekan kwa Nzamb”! Ov, tukudilam mutapu ik? Njil yimwing yidi ya kwiyandjik mutu ni mend “mu yom yiwamp ni yom yawonsu yitumbila.” (2 Pita 3:11, 12) Kukwatikan nakash mu mijikit yiney kukutukwash kuchingel nich impu yikash kwez kwa “dichuku dia Yehova.” Dizu dia Ugrek diakarumunau anch: ‘Lamany mu manangu’ dirumburikin dizu ku dizu anch “swapejaku.” Chakin kamu tukutwishap kuswapejaku chisu chishadilaku djat ni pidikwezina dichuku dia Yehova. Pakwez, pituchingedina dichuku dined, chisu chimeken anch chiyil mau-mau anch twakwatikan mu mudimu wa Nzamb.—1 Korint 15:58.
19 Kutongijokin pa Dizu dia Nzamb ni kushinshikin yivurish yidiamu kukez kutukwash kusal mwamu—‘kuchingej kwez’ kwa dichuku dined, inge, ‘kudichingel chisu chin chawonsu.’ (2 Pita 3:12) Kuwejin ku yivurish yiney kudi uprofet uvud wabwakau kangal kusu piur pa kwez kwa dichuku dia Yehova pakwez kand piur pa kwizulijan kwa yiyukish yikezau kuyinkish antu ‘adandamedina kumuchingel Yehova.’—Sofoniy 3:8.
20. Chiyul ik chitufanyidina kusadil?
20 Katat chawiy kamu chisu chakin chetwetu awonsu cha kutesh chiyul chapanau kusutil kudi muprofet Sofoniy: “Piwakad kal ujim wa [Yehova] kukwoshany, ni pidiakad kal kushik dichuku dimekeshinay ujim wend. Chirikany kudi [Yehova], en antu witudishinanya, ukata kuziyilany ku mazu mend. Ziyilany ayinen, usalany yom yitentamina kudi [Yehova], chakwel ap wez wakwasinikany ku kadimu kakulejanay Nzamb pa dichuku dia ujim wend.”—Sofoniy 2:2, 3.
21. Chiyul ik chikusadilau antu a Nzamb mu muvu wa 2007?
21 Chawiy lel, mufund wa muvu watondinau mulong wa muvu wa 2007 ufanyidin kamu: “Dichuku dijim dia [Yehova] didi piswimp.” Antu a Nzamb itiyijin anch: “Didi kamu piswimp, dezil mau!” (Sofoniy 1:14) ‘Kidikulabap, bwat.’ (Abakuk 2:3) Chawiy lel, pituchingedina dichuku dined, twikalany achila ku mes pa chisu chinech, ni kwijik anch kuwanyin kwa nsudiel kwa uprofet winou kudi piswimp!
Ov, Ukutwish Kwakul?
• “Dichuku Dijim dia [Yehova]” chom ik?
• Mulong wak antu avud adiwil kuya swa-swa kwa chisu?
• Ov, mulong wak in Kristu a mu mivu chitot ya kusambish ading aswiridin chovil cha kusal yom swa-swa?
• Ov, mutapu ik tukutwisha kulangwish chovil chetu cha kusal yom swa-swa?
[Tablo wa jinsangu udia pa paj wa 12]
Mufund wa muvu wa 2007 ukwikal: “Dichuku dijim dia [Yehova] didi piswimp.”—Sofoniy 1:14.
[Chipich chidia pa paj wa 9]
Mudi muchadinga mu machuku ma Noa, in maswimbu akez kuyikashimwish pakezay Yehova kusal
[Chipich chidia pa paj wa 10]
In Kristu ading afanyidin kusal pakad kulab pamanau Yerusalem “amunyingumuk kudi amasalay”