Yehova Upanin “Spiritu Utumbila Kudi Awiy Akata Kumwit”

“Anch en lel ayimp wijany mwa kupan yom yiwamp kudi anen, ing lel tatukwen wa mwiur kakupandikeshimup kupan spiritu utumbila kudi awiy akata kumwit?”—LUKA 11:13.

‘NIKUTWISHAP kurish nich amwinam. Nikez kutwish kujijaman ku choziu chinech ching kusu ni ukwash wa spiritu utumbila!’ Ov, yovil yiney ya muchim yakushikenap kal? Mwamu mukatau kwiyov in Kristu avud. Pamwing ap mwamu muwiyova piwijika anch musong ukash wakukwatin kal. Ap pa chisu chiwafisha mbay ney a uruw wasadina kal nend mivu yivud. Ap chisu chaswimpa mwikadil kanang wa musangar wikal wa mar makash. Pa yisu ya mar mu mwom, pamwing ap wiyova anch wapand kal mulong kusu spiritu utumbila wa Yehova wakwinkisha “ukash upandakena ukash wawonsu.”—2 Korint 4:7-9, MM; Kuseng 40:1, 2.

² In Kristu akin akat kurish nich kuvulijan kwa yakamish ni rupompat yidiokila ku mangand makad kumwijik Nzamb. (1 Yohan 5:19) Chikwau, in kwilej a Kristu akat kuyirishish kudi Satan Djabul amwinend, ukat kuyirishish njit jikash antu “akata kulam yijidik ya Nzamb ni kusend uman wa Yesu Kristu.” (Kuburik 12:12, 17) Chawiy lel, choviken kamu nawamp, anch tuswiridin katat ukwash wa spiritu wa Nzamb kupandakanamu muchadinga pasak. Ov, chom ik tufanyidina kusal chakwel tushinshikin anch tutambwil spiritu utumbila muvud wa Nzamb? Ni mulong wak tufanyidina kwikal nich kashinsh anch Yehova usotin nakash kutwinkish usu utuswiridina mu chisu cha kupakiu? Tukutan yakul ku yipul yiney yawonsu yaad mu yilakej yaad yalonday Yesu.

Dandamen mu Kulembil

³ Mwin kwilej umwing wa Yesu wamwita anch: “Mwant tulejap kulembil.” (Luka 11:1) Pa kumwakul, Yesu wayileja in kwilej end yilakej yaad yiyila pamwing. Cha kusambish chidi cha ikundj umwing waka ngendj, ni cha kaad chidi cha tatuku umwing umuteshina mwanend ikundj. El tushinshikinany yilakej yiney chimwing ni chimwing.

⁴ Yesu walonda anch: “Nany pakach pen ukweta murund nend, chikuyay kudiay ndiy pakach pa uchuku wamwel anch, ‘Murund, nsondjikap mitand ya mabot yisatu; mulong murund nam wez kal ku weny, am kinikwetip cha kumutudil kurutu kwend’; ndiy pakwakulay mukach ni kulond anch, ‘Kangal wangakamish, katat chis chidi kal cha kupat, nidi nau anam pa ulal; kinikutwiship kulank nikwinkisha?’ Nakulejany anch, ap anch kalankinip ni kumwinkish mulong chidiay murund nend, ndiy ukulankin mulong wa kulamat kwend, ukumwinkish yom yisotilay.” Kupwa Yesu warumburila mutapu chilakej chinech chikwatijadina nich malembil, walond anch: “Nakulejany anch, Itany, akez kaninkishany ; surubany, ukutanany; kokalany, akunazurilany kwen. Mulong mwawonsu ukata kwit ukwak, ukata kusurub ukutan, ni ukukokala akumwizuril.”—Luka 11:5-10.

⁵ Chilakej chinech chiswapela ni chovikena cha ikundj wadandamena chilejen mutapu ufanyidina kwikal ngikadil yetu ya manangu pa chisu tukata kulembil. Tal Yesu ulondil anch ikundj winou watwisha kutambul yom yadinga yiswiridinay “mulong wadandamena kwit.” (Luka 11:8, MM) Dizu “kudandamen kwit” didi kapamp kamwing kusu mu Bibil. Adikarumwin kudiokal ku dizu dia Ugrek dirumburikina anch “pakad usany.” Chisu chivud kwikal wakad usany kulejening chaku chiyimp. Pakwez, kwikal wakad usany ap anch kudandamen anch akumekeshin mulong wa chisal chiwamp, kukutwish kwikal ngikadil yiwamp. Mwamu chidia ku mutambu wa mwin kwak ngendj wisambidinau mu chilakej. Kovap usany ap ukemp wa kudandamen kwit yom yadinga yiswiridinay. Mulong Yesu wamumekesha mwin kwakan winou mudi chilakej kudi etu, malembil metu ni mawiy mafanyidin kwikal ma kudandamen. Yehova utusotin anch ‘tudandamena kwit, tudandamena kukimb, tudandamena kukokal.’ Ndiy ukez kwakul nich “kupan spiritu utumbila kudi awiy akata kumwit.”

⁶ Yesu katulejinap ching kusu mutapu tufanyidina kulembil—nich kudandamen—pakwez utulejin kand mulong wak tufanyidina kusal mwamu. Chakwel kujingunin nawamp dilejan dined, tufanyidin kushinshikin mutapu wamanau antu amutesha Yesu palonday chilakej cha kudandamen kwa muntu waka ngendj chaku cha kwikal ni muchim wa kuyak angendj. Maverse mavud madia mu Bibil malejen anch pa yisu ya Bibil, kuyibangin angendj chadinga chaku chasendau nich usey nakash, nakash kamu kudi atushalapol a Nzamb. (Disambishil 18:2-5; Hebreu 13:2) Chadinga kurumbuk kuburen kuyak angendj. (Luka 7:36-38, 44-46) Nich chitong chinech mu manangu, tushinshikinany rusangu riner ralonday Yesu.

⁷ Mwin kwakan wisambidinau mu chilakej waka ngendj pakach pa uchuku. Mwin kwakan wiyova anch chimufanyidin kumwinkish ngendj wend yakudia pakwez kadingap nich chom “chakumutudil kurutu kwend.” Chom chinech, mu manangu mend, chadinga cha kusal swa-swa! Chading chimufanyidin kuman mikat, chikalap nchik yafanyidinay kusal. Chawiy waya kudi murund nend ni pakad usany wamulangwisha. Watoy dizu anch: “Murund, nsondjikap mitand ya mabot yisatu.” Wadandamena kwit djat ni pamwinkishau chadinga chisotilay. Patambulay kal mitand ya mabot, ndiy wikala lel mwin kwak ngendj muwamp.

Maswir Makash—Kwit Kukash

⁸ Chilakej chinech chilejen ik piur pa diyingishin ditukata kudandamen kulembil? Ikundj wadandamena kwit mabot mulong wamana anch kwikal nich kwadinga kwa usey nakash chakwel awanyisha chakin kamu chisend chend cha kwak ngendj. (Isay 58:5-7) Pakad mabot, kelap kwikal mwin kwakan muwamp. Chawiy chimwing, mulong twij anch kwikal nich spiritu wa Nzamb kudi kwa usey ujim mulong wa kuwanyish mudimu wetu mudi in Kristu akin, chawiy tudandamedin kumulembil Nzamb, kumwit atwinkish spiritu wend. (Zakariy 4:6) Pakad spiritu winou, tukutwishap. (Mateu 26:41) Ov, waman kal dilejan dijim tukutwisha kutan mu chilakej chinech? Anch twaman spiritu wa Nzamb mudi chom tuswiridina nakash, niyetu tukudandamen mu kumwitay.

⁹ Chakwel kusadil dilejan dined mu mwom wetu wa katat, tongin anch chid chimwing cha dijuku diey chayel pakach pa uchuku. Ov, ukumulangwish dokiter chakwel akukwasha? Ukumulangwishap, anch mayej madi kwau makemp. Pakwez, anch uyedil musong wa rudung, ukovap usany wa kumutazuk dokiter. Ov, mulong wak? Mulong ukwet mulong ukash. Wij anch ukat kujipan ni chifanyidin kamu kumukwash swa-swa. Kulik kwit ukwash kukutwish kulet rufu. Chawiy chimwing, in Kristu akin akwet mulong ukash, anch tukutwish kulond mwamu. Uyakin udi anch, Satan udi mudi “ntambu, wend uzomb,” ni kusot uwapidilay kudia. (1 Pita 5:8) Chakwel anch twikal aom mu spiritu, ukwash wa spiritu wa Nzamb udi wa usey ujim nakash. Kulik kumwit Nzamb ukwash kukutwish kulet rufu. Chawiy lel, nich kudandamen tukat kumwit Nzamb atwinkisha spiritu wend utumbila. (Efesus 3:14-16) Ching anch twasal mwamu chad lel tukwilamin usu utuswiridina mulong wa ‘kujijaman ni kushik kwisudiel.’—Mateu 10:22; 24:13.

¹⁰ Chidi lel cha usey ujim ku mutambu wetu twikuchika yisu kanang ni twiyipula ayinetu anch, ‘Ov, chakin kamu, malembil metu madi ma kudandamen?’ Vurikany anch, pitukata kujingunin anch tuswiridin chakin kamu ukwash wa Nzamb, malembil metu mulong wa kwit spiritu utumbila makez kwikal ma kudandamen.

Chom ik Chikata Kutubachik Kulembil Nich Ruchingej?

¹¹ Chilakej cha Yesu cha mwin kwak ngendj mwin kudandamen chikasikeshidin ngikadil ya muntu ukata kulembil—mwin ritiy. Chilakej cha kaad chikasikeshidin ngikadil ya muntu ukata kutesh malembil—Yehova Nzamb. Yesu wipula anch: “Nany umukweta tatukwend mukach mwen, anch wamwit mabot ndiy wamwink diyal? Ap anch wamwit insh ndiy wamwink nnak? Ap anch wamwit diy komb ukumwink kapambamb?” Yesu wadandamena ni warumburila, walond anch: “Anch en lel ayimp wijany mwa kupan yom yiwamp kudi anen, ing lel tatukwen wa mwiur kakupandikeshimup kupan spiritu utumbila kudi awiy akata kumwit?”—Luka 11:11-13.

¹² Nich chilakej chinech cha tatuku umwakwila mwanend ikundj, Yesu ulejen mutapu wovilingay Yehova pantaliken nau antu akata kukarumukin kudi ndiy mu malembil. (Luka 10:22) Cha kusambish, tal kushalijan kudiap. Pakad kwikal mudi muntu wisambidinau mu chilakej cha kusambish widjidjeka kwakul ku kupan ukwash wamwitau, Yehova udi mudi nvaj ukata kubangin nakash, udia tayad kwakul ku yimwitinau kudi mwanend. (Kuseng 50:15) Yesu walejana kand anch Yehova udi tayad pantaliken netu kusutil kutongijokin kudiokal kudi tatuku wa ukauntu djat ni kudi tatuku wa mwiur. Yesu walonda anch tatuku wa ukauntu, ap anch ‘udiap nchik muyimp’ mulong wa chitil cha kuswan, ukat kupanang yom yiwamp kudi mwanend ikundj, ov, chipandikenap kuwap anch tukutwish kuchingejin anch Tatukwetu wa mwiur, mwin rukat, ukupan spiritu wend utumbila ku dijuku diend dia in kumwifukwil!—Yakob 1:17.

¹³ Dilejan ik didiaku mulong wetwetu? Tufanyidin kuchingej anch pitukata kumwit Tatukwetu wa mwiur spiritu utumbila, ndiy uding tayad nakash kutwinkishay. (1 Yohan 5:14) Anch twakarumukin kudi ndiy mu malembil chisu ni chisu, Yehova kakezap kulond, mudi muchadinga anch: “Kangal wanswidiosh! Natekang kal mukwadiak ku chis.” (Luka 11:7, MM) Pakwez, Yesu walonda anch: “Itany, akez kaninkishany; surubany, ukutanany; kokalany, akunazurilany kwen.” (Luka 11:9, 10) Inge, Yehova ukez ‘kuyakul awonsu akata kumutazuk.’—Kuseng 20:9; 145:18.

¹⁴ Chilakej cha Yesu cha tatuku mwin kubangin chikasikeshidin kand anch kuwap kwa Yehova kudi kujim nakash kupandakanamu kuwap kukutwishay kumekesh nvaj wa ukauntu mwin mwawonsu. Chawiy lel, kwikil umwing wetu ufanyidina kwiyov anch yoziu yitukutwisha kurish nich yimekeshin anch Nzamb katusangaredinap bwat. Satan, mukankuny netu mujim nakash, ndiy usotina anch etu tutonga mutapu winou. (Yob 4:1, 7, 8; Yohan 8:44) Mu Bibil mwikil yitongijok ya kwifish nich mudi yiney. Yehova kakatap kutupak “nich kuyip.” (Yakob 1:13) Kakatap kutupak nich yoziu yidia mudi nnak ap mudi kapambamb. Tatukwetu wa mwiur upanining “yom yiwamp kudi awiy akat kumwit.” (Mateu 7:11; Luka 11:13) Chakin kamu, mu chilik tukata kusanger kuwap kwa Yehova ni kusot kwend kutukwash, chawiy kand tukeza kwikal abachikinau nakash kumulembil nich ruchingej. Anch twasal mwamu, niyetu tukez kwikal tayad kumekesh yovil mudi ya nfund-a-kuseng wafunda anch: “Nzamb wateshil kwend, wova dizu dia kulembil kwam.”—Kuseng 10:17; 66:19.

Mutapu Udingay Spiritu Utumbila Nkwash Wetu

¹⁵ Kachisu kakemp kurutu kwa rufu rend, Yesu wachirikina kand kashinsh kapanay mu yilakej yend. Palondinay piur pa spiritu utumbila, wayileja atwimbuy end anch: ‘Am nikumwit Tatuku, ndiy ukukutuminany mwin kukwashany mukwau, ukeza kushakam ni yenen chikupu.’ (Yohan 14:16, MM) Chawiy Yesu washilamu anch nkwash, ap anch spiritu utumbila, ukez kikal pamwing ni in kwilej end mu yisu ya kurutu, ni mu machuku metu. Yisu njil yimwing yakin mutukata etu nlel kutanin ukwash winou? Spiritu utumbila utukwashining kujijaman ku yoziu kushalijan. Mutapu ik? Mupostol Paul, wamana amwinend yoziu, warumburila mu mukand wayifundilay in Kristu a ku Korint mutapu spiritu wa Nzamb wezay kumukwash. Tushinshikin katat mu wiswimp yafunday.

¹⁶ Cha kusambish, Paul wayileja patok ambay nend in ritiy anch wadinga urishin nich “muy mu mujimbu wa mbij,” choziu cha mulad kanang. Kupwa wawejinaku anch: “Namulembila Mwant [Yehova] tupamp tusatu mulong wa chom chinech, chakwel chindiokala.” (2 Korint 12:7, 8) Ap anch Paul wamulembila Nzamb chakwel amudiosh mar mend, mar minam mapwap kwau. Pamwing ap udi niyey mu ngikadil mudi yiney nlel. Mudi Paul, walembila kal nich kudandamen ni ruchingej, kumwit Yehova akudiosh choziu. Pakwez, chikalap nchik kulembil kwey chisu ni chisu, mulong winou uchidandamedin kamu. Ov, chom chinech chirumburikin anch Yehova kakwilap ku malembil mey ni anch spiritu wend kakukwashinap? Bwat! (Kuseng 10:1, 17) Tushinshikin yalonday mupostol Paul.

¹⁷ Mu kwakul ku malembil ma Paul, Nzamb wamuleja anch: “Ranaken ramam ruwanyidin kal kudi ey; mulong usu wamam ukuwanyishil mu kuziy.” Paul walonda anch: “Chawiy nasweja kusangar nakash mulong wa kuziy kwam, chakwel usu wa Kristu ukez kushakamin padi am.” (2 Korint 12:9; Kuseng 147:5) Chawiy, Paul wamana anch kusutil kudi Kristu, diking dia usu dia Nzamb diadinga padi ndiy mudi ntent. Nlel, Yehova wakwil ku malembil metu mu mutapu wawiy umwing. Ukat kuyibwik atushalapol end nich diking diend mudi cha kwibwik.

¹⁸ Chakin, ntent yikutwishap kukangesh ruval kunak ap rinkind kutut, pakwez yikat kulet diking ku yom yiney. Chawiy chimwing, diking didiokila ku “usu wa Kristu” dikatap kukangesh yoziu kutushiken ap yisu yikash. Pakwez, ukat kulet diking dia mu spiritu pantaliken nich yom yiney yiyimp ya mangand minam ni kurishish kwa nyikel wau, Satan. (Kuburik 7:9, 15, 16) Chawiy lel, ap anch urishin nich choziu chakad ‘kupwang,’ ukutwish kwikal nich kashinsh anch Yehova wij milong urishina nich ni ukutwish wakul ku ‘dizu dia chidil chey.’ (Isay 30:19; 2 Korint 1:3, 4) Paul wafunda anch: “Nzamb udi wakin, ndiy kakwitiyip en anozany kusut usu wen; pakwez yoziu anch yez, ndiy ukunilejany njil ya kukwasinik, chakwel ukwikalany ni usu wa kupandakan.”—1 Korint 10:13; Filipoi 4:6, 7.

¹⁹ Chakin, “machuku ma kwisudiel” minam ma mangand makad Nzamb madi ma “yom yikash.” (2 Timoteu 3:1) Ap mwamu, kudi atushalapol a Nzamb, yisu yiney yidiap yikash kamu kushakam. Ov, mulong wak? Mulong wa ukwash ni diking dia spiritu utumbila wa Nzamb, upaninau muvud nich rukat kudi Yehova kudi antu in awonsu akata kumwitay ni kudandamen ni ruchingej. Chawiy lel, etu awonsu, tukwatany mupak wa kudandamen kulembil mulong wa spiritu utumbila pichuku-pichuku.—Kuseng 34:6; 1 Yohan 5:14, 15.

Ov, Ukwakul Nchik?

• Chom ik tuswiridina kusal chakwel kutambul spiritu utumbila wa Nzamb?

• Ov, mulong wak tufanyidin kwikal nich ruchingej anch Yehova ukez kwakul ku malembil metu patumwitina spiritu utumbila?

• Mutapu ik utukwashiningay spiritu utumbila kujijaman ku yoziu?

[Yipul ya Dilejan]

1. Chisu ik tukata kuswir ukwash wa pakampwil wa spiritu utumbila?

2. (a) Chom ik chirishinau nich in Kristu akin? (b) Yipul ik tukushinshikina mu rusangu riner?

3, 4. Chilakej ik chashimuninay Yesu, ni mutapu ik wachambatanishay nich malembil?

5. Chilakej cha kudandamen kwa ikundj chitulejin ik piur pa ngikadil yetu pa chisu tukata kulembil?

6. Mu machuku ma Yesu, mutapu ik wadinga chaku cha kuyak angendj?

7. Ov, mulong wak mwin kwak ngendj wa mu chilakej cha Yesu kovap usany wa kumulangwish murund nend?

8. Chom ik chikutubachika kudandamen kulembil mulong wa kutambul spiritu utumbila?

9, 10. (a) Let chilakej chimekeshina anch tuswiridin kudandamen mu kumwit Nzamb spiritu wend. (b) Chipul ik tufanyidina kwiyipul ayinetu, ni mulong wak?

11. Mutapu ik wambatanishay Yesu chilakej cha tatuku ni mwanend ikundj ni malembil?

12. Chilakej cha tatuku uteshina kwit kwa mwanend ikundj chimekeshin mutapu ik anch Yehova usotining kwakul ku malembil metu?

13. Kashinsh ka chom ik tufanyidina kwikal nich pitukata kumulembil Yehova?

14. (a) Yitongijok ik yiyimp yikata kuyakamish antu amwing arishina nich yoziu? (b) Piturishina nich yoziu, ov, mulong wak tufanyidina kumulembil Yehova nich ruchingej?

15. (a) Kushilamu ik kwashilayimu Yesu piur pa spiritu utumbila? (b) Yisu njil yimwing mukatay spiritu utumbila kutukwash?

16. Ov, ngikadil yetu yikutwish kwikal nchik mudi yadingay nich Paul?

17. Mutapu ik wakulay Yehova ku malembil ma Paul?

18. Ov, mutapu ik tukutwisha kujijaman ku yoziu?

19. Ov, mupak ik ufanyidina kukwat, ni mulong wak?

[Chipich chidia pa paj wa 13]

Chom ik twilejidina ku chilakej cha Yesu cha mwin kwak ngendj wadandamena?

[Chipich chidia pa paj wa 15]

Ov, ukat kudandamen mu kulembil mulong wa spiritu utumbila wa Nzamb?

[Chipich chidia pa paj wa 16]

Chom ik twileja kal piur pa Yehova kusutil ku chilakej cha tatuku mwin kubangin?