Kangal Waziyany Mu Kujikitish Kwen

“A Nzamb, yitongijok yey yaswej kuwap nakash kudi am! Mudi mujimbidila bil yom yau pakuyibombakesh!”—KUSENG 139:17.

1, 2. Ov, mulong wak tufanyidina kusanger Dizu dia Nzamb, ni mutapu ik wamekeshay nfund-a-kuseng kusanger kwend?

KWADINGA kujingunin kumwing kusangareshina. Chisu chadingau ni kurijek tempel wa Yehova mu Yerusalem, Mwin Kupesh wa pa Mutu Hilikiy wajingunina “Mukand wa Yijil ya [Yehova] yamwinkishau Moses,” mukand wa yijil wa kusambish kamu wapwishau kufund pasutil kal mivu 800! Ov, ukutwish kutongin mutapu wovay Mwant Yosias mwin kumwov Nzamb wom pa chisu chamuletinau buku winou? Chakin kamu, waukata ni wamuleja Shafan, kalerik, kapamp kamwing kuutang nich dizu piur.—2 Jinsangu 34:14-18.

² Ilel, mamiliyon ma antu makutwish kutang, Dizu dia Nzamb, dikala diawonsu dia kabuj ap chikunku. Ov, kupalangan kwinoku kwa Bibil kumukepishin usey? Bwat! Twamb oku twel oku, mu Bibil mudi yitongijok yin ya Mwin Dikand Diawonsu, yafundau mulong wa ukwash wetu. (2 Timoteu 3:16) Nfund-a-kuseng David wafunda palejanay yovil yend piur pa Dizu dia Nzamb anch: “A Nzamb, yitongijok yey yaswej kuwap nakash kudi am! Mudi mujimbidila bil yom yau pakuyibombakesh!”—Kuseng 139:17.

3. Chom ik chimekeshina anch David wadinga muntu wadinga ni chovu chijim cha mu spiritu?

³ Kusanger kwa David mulong wa Yehova, mulong wa Dizu diend, ni mulong wa ditenchik diend dia difukwil diakin kwakepap. Kuseng kuvud kuwamp kwafunday David kulejen mutapu wovay. Chilakej, mu Kuseng 27:4, ndiy wafunda anch: “Nikwet chom chimwing chinisotil kumwit [Yehova], chinikimbila, chakwel am nikez kasok mu chikumbu cha [Yehova] machuku mawonsu ma kupand kwam, chakwel ni kubandjil ufun wa [Yehova] ni kutongijok padi Ndiy mu chikumbu chend chijidila.” Mu Chihebreu cha kusambish, mazu “kutongijokin” marumburikin kubandjil ufun, kushinshikin, kutal nich kusanger, kuzangam. Choviken patok, David wadinga ikundj wadinga nich yovil ya kusanger chakin yitenchik ya mu spiritu ya Yehova ni wadia kachom ni kachom ka uyakin wa mu spiritu wajinguninay Nzamb. Tufanyidin kwimburil chilakej chend cha kusanger.—Kuseng 19:7-11.

Sanger Dilau dia Kwijik Uyakin wa Bibil

4. Chom ik chamusala Yesu ‘asangera mu spiritu utumbila’?

⁴ Kujingunin Dizu dia Nzamb kwengamidinap pa kwilej nakash ap pa manangu ma mangand, makata kuletang chibud. Pakwez, kwengamidin pa ranaken ra Yehova, ranaken riner riyil kudi antu itudishina, antu akweta michim yitok ija maswir mau ma mu spiritu. (Mateu 5:3; 1 Yohan 5:20) Chisu chatongijokinay Yesu pa uyakin ulondina anch antu amwing akayitil adinga akat kuyifund majin mau mwiur, “wasangera mu [s]piritu [u]tumbila, walond anch: Nakujikitish, A Tatuku, Mwant wa diur ni divu, piwajindjika yom yiney kudiau ababela ni in manangu, wayimekesh kudi anikanch.”—Luka 10:17-21.

5. Ov, mulong wak in kwilej a Yesu kafanyinap kuman uyakin wa Want wayijinguninau mudi wa chamwamu?

⁵ Kupwa kwa kulembil malembil minam madiokila ku muchim, Yesu wakarumukina kudi in kwilej end ni walonda anch: “Mayuk kwau mes makata kuman yom yiumenany en. Nakulejany anch, aprofet avud ni ant asota kuman yom yiumenanya en, kayimanap; ni kutesh yiukata kuteshany en, kayiteshap.” Mwaning, Yesu wayikasikesha in kwilej end ashinshamena chakwel kangal amana anch uyakin wa usey wa Want wayijinguninau udi wa chamwamu. Uyakin winou kaujinguninap kudi yizaz ya kusambish ya atushalapol a Nzamb, ni kaujinguninap kudi “in kubabal ni in manangu” adingaku pa chirung cha Yesu!—Luka 10:23, 24.

6, 7. (a) Kushalijan ik kudiaku ilel pakach pa relijon wakin ni wa makasu? (b) Chom ik chisadilau antu avud akweta michim yitok?

⁶ Pa chirung chetu, tukwet mayingish mapandakenamu nakash ma kusanger uyakin wa Nzamb, mulong Yehova, kusutil kudi “kashalapol ushishamena ni kubabal,” wayinkishin kal antu end chovu chijim cha Dizu diend. (Mateu 24:45; Daniel 12:10) Piur pa chisu cha kwisudiel, muprofet Daniel wafunda anch: “Antu avud akez kushesh usu wau mulong wa kupakish kwijik yom yisutila.” (Daniel 12:4) Ov, witiyijinap anch ronganyin ra kumwijik Nzamb ilel unou ‘ravulijadin kal’ ni atushalapol a Yehova adil nawamp mu spiritu?

⁷ Kudi kushalijan mudi ik kutumena pakach pa kuya kurutu kwa antu a Nzamb mu spiritu ni kanvundangesh ka relijon wa Babilon Mujim! Mudi chibudikin, antu avud arumbukidinau kudi relijon wa makasu akat kuchinin ku difukwil diakin. Adi antu mudi amikoku akad kusot ‘kwibomb nend pa yitil yend’ ni “kutambul yipupu yend.” Yehova ni atushalapol end ayitin antu inay awonsu kwez mu chikumangen cha Ukristu chakin.—Kuburik 18:2-4; 22:17.

Antu Asangaredina Ezin Kudi Nzamb

8, 9. Mutapu ik uwanyidina ilel mazu ma Hagai 2:7?

⁸ Yehova wasambela kulond, piur pa chikumbu chend cha mu spiritu cha kwifukwil anch: “Nikez kayikwatish michid yawonsu wom, yikez kalet mapit mau kunoku. Chad Chikumbu cha [Yehova] chikez kizwil sens nich mapit.” (Hagai 2:7) Uprofet winou ushimokishina wawanyina pa muten wa Hagai antu a Nzamb ashalaku patungirilau tempel mu Yerusalem. Ilel, mazu ma Hagai makat kuwanyin mu mutapu ukwau piur pa tempel mujim wa mu spiritu wa Yehova.

⁹ Mamiliyon ma antu makat kwez ku tempel wa chifanikesh mulong wa “kumwifukwil [Nzamb mu spiritu] ni uyakin,” muvu ni muvu tunan twa “mapit” ma michid yawonsu tukat kwezamu. (Yohan 4:23, 24) Chilakej, rapor wa mangand mawonsu wa muvu wa mudimu wa 2006 ulejen anch antu 248327 ayibabatishin mulong wa kumekesh kwipan kwau kudi Yehova. Uvud winou udi wa antu asu 680 dichuku ni dichuku! Kukat kwau uyakin ni impu yau ya kumusadil Yehova mudi atutwambil a Want udi uman ulejena anch ayipwita chakin kamu kudi Nzamb.—Yohan 6:44, 65.

10, 11. Shimunin uman ulejena mutapu ukatau antu kushiken ku kusanger uyakin wa Bibil.

¹⁰ Avud pakach pa antu inay akweta michim yitok apwichikidin ku uyakin mulong ajingunin ‘kushalijan kudia pakach pa antu atentamina ni ayimp, pakach pa antu amusadidila Nzamb ni akad kumusadil.’ (Malakiy 3:18) Tushinshikinany yamanay Wayne ni Virginia, ambay a uruw adinga mu egliz wa Aminshon pakwez adinga nich yipul yivud yakad yakul. Ading akisin njit ni adinga mu kanvundangesh ni kijikap cha kusal padingau ni kuyiman amakurump a chikumbu cha nzamb akat kuyiyukish amasalay ni mat mau. Pananapau, iyova anch ayivuramedin kal kudi antu akwau adia mu chikumbu chau cha nzamb, ap anch Virginia wileja Shikol ya Malejan ma Diarubing mu mivu yivud. Alonda anch: “Kwikil muntu wadinga ni kutwendin ap kubangin ukash wetu wa mu spiritu. Chom chijim chakata egliz chadinga ching kusu nfalang jetu. Twiyova anch twashadik kal.” Ova kand kuyip nakash chisu chitiyija egliz ngikadil ya utum wa amakundj ni amakundj.

¹¹ Pa chisu chinicha mwijikurau mband, mwan wa Wayne ni Virginia ni mwanau mband ikala Atuman a Yehova. Ap anch Wayne ni Virginia ajimana kwisambishil, awiy aswimp yitongijok yau ni itiyija kwilej Bibil. Wayne walonda anch: “Mu angond akemp kusu, twileja yom yivud piur pa Bibil kupandakanamu yitwileja mu mivu 70 yasutila ey! Twadingap twija anch dijin dia Nzamb didi Yehova, ni twadinga twija chom ap chimwing piur pa Want ni Paradis wa pa divu.” Kipalabap, ambay inay a uruw akweta michim yitok asambisha kukumangan ku yikumangan ya Ukristu ni kuya mu mudimu wa kulejan. Virginia walonda anch: “Tusotil kumulej muntu win mwawonsu uyakin.” Awonsu aad chikwetau mivu 80, ayibabatisha mu muvu wa 2005. Awiy alonda anch: “Twatan kal chikumbu chetu cha Ukristu wakin.”

Sanger Kwikal ‘Uwanyishinau Kusal Mudimu Wawonsu Uwamp’

12. Chom ik chikatay kutenchik Yehova chisu ni chisu mulong wa atushalapol end, ni chom ik tufanyidina kusal chakwel tutaninamu?

¹² Chisu chawonsu Yehova ukat kuyikwash atushalapol end kusal rusot rend. Chilakej, Noa, watambula yany yovikena, yiwanyidina piur pa mutapu wa kutung waat—mudimu umwing wasadika kapamp ka kusambish! Ni wasadika. Ov, mulong wak? Mulong Noa “wasala mudi mwamulejinau yom yawonsu kudi Nzamb, ndiy wayisala.” (Disambishil 6:14-22) Ilel kand, Yehova ukat kuyiwanyish muchifanyidina atushalapol end chakwel asala rusot rend. Inge, mudimu wetu wa kusambish udi kulejan rusangu ruwamp ra Want wa Nzamb ni kuyikwash antu afanyidina kwikal in kwilej a Yesu Kristu. Mudi muchadinga ku mutambu wa Noa, kutwish kwetu kwengamidin pa kuziyil. Tufanyidin kulondul nich kuziyil umutakel upaninay Yehova kusutil ku Dizu diend ni ku dirijek diend.—Mateu 24:14; 28:19, 20.

13. Kusutil ku yom ik kukatay Yehova kutwinkish diyiy?

¹³ Chakwel anch tuwanyish mudimu winou, tufanyidin kwilej mutapu wa ‘kusadil mu kutentam’ chom chetu cha kusal nich mudimu cha kusambish—Dizu dia Nzamb—didia dia ukwash “kuyilej antu kuyibabesh ni kuyitenchik, ni kuyilej kwirijek mu kutentam, chakwel muntu wa Nzamb ukwikal uwanyidina mu kusal mudimu wawonsu uwamp.” (2 Timoteu 2:15; 3:16, 17) Mudi muchadinga mu mivu chitot ya kusambish, Yehova utwinkishin diyiy dia usey kusutil ku chikumangen cha Ukristu. Ilel, mu yikumangen 99770 yidia mu mangand mawonsu, Shikol ya Mudimu wa Uteokras ni Chikumangan cha Mudimu yikat kusadik rubing ni rubing mulong wa kutukwash mu mudimu wa kulejan. Ov, ukat kusanger yikumangan yiney yijim kusutil ku kukumangan pakad kujing ni kusadil yom yiwilejina?—Hebreu 10:24, 25.

14. Ov, mutapu ik ukatau atushalapol a Yehova kumekesh kusanger kwau mulong wa chisend cha kumusadil Nzamb? (Tal yirumburil yidia mu tablo udia pa paj wa 27 djat ku wa 30.)

¹⁴ Mamiliyon ma antu a Nzamb pa mangand makat kumekesh kusanger kwau mulong wa diyiy ditambwilau kusutil ku kwipan nakash mu mudimu wa kulejan. Chilakej, mu muvu wa mudimu wa 2006, atutwambil a Want 6 741 444 asadin asaa 1 333 966 199 mu milad yawonsu ya mudimu, ni kutakel malejan ma Bibil ma ku yikumbu 6286618. Yiney yidi kusu yimwing ya yom yiletina dikasikesh yidia mu rapor wa mangand mawonsu. Tukwitin kushinshikin nawamp pa rapor winou chakwel utaninaku dikasikesh, mudi kamu akadivar netu a mu mivu chitot ya kusambish atana dikasikesh kusutil ku marapor piur pa kupalangan kwa mudimu wa kulejan pa chirung chau.—Midimu 1:15; 2:5-11, 41, 47; 4:4; 6:7.

15. Ov, mulong wak muntu ap umwing kafanyidinap kuziy mulong wa mudimu wend umusadidilay Yehova ni mupim wawonsu?

¹⁵ Dipumb diamushena dia kushiman dikata kuya kudi Nzamb muvu ni muvu dimekeshin kusanger kujim kwa atushalapol a Yehova mulong wa dilau diau dia kumwijik Yehova ni kupan uman wend. (Isay 43:10) Chidi chakin anch, mulambu wa kushiman upaniningau antu amwing a reng retu, ayej, ap wa akadivar ni anambaz ayibid ukutwish kwikal mudi makut ma mwadia-mufu. Chikalap nchik mwamu kangal twavuramen anch Yehova ni Mwanend chakin kamu asangaredin antu awonsu amusadidila Nzamb ni mupim wawonsu, mudi musadilau yawonsu yitwishinau kusal.—Luka 21:1-4; Galatia 6:4.

16. Yom ik ya kufundish nich yatwinkishinay Nzamb katat kamu ak?

¹⁶ Kuwejin pa diyiy dia mudimu wa kulejan, Yehova, kusutil ku dirijek diend, ukat kutuwanyish nich yom ya mudimu ya kulejan nich yiwamp. Mu makum ma mivu ya katat ey, mu yom yiney mwikadil kal mabuku mudi La vérité qui conduit à la vie éternelle, Vous pouvez vivre éternellement sur une terre qui deviendra un paradis, Ronganyin Ritwadila ku Mwom wa Chikupu, ni piswimp ap kamu, Chom ik Chakin Kamu Chifundishinay Bibil? Antu asangaredina chakin kamu yitenchik yiney akat kuyisadil nawamp mu mudimu wa kulejan.

Sadil Nawamp Buku Chifundishinay Bibil

17, 18. (a) Yikunku ik ya buku Chifundishinay Bibil yiukatininga kwisambin mu mujikit wey wa kulejan? (b) Chom ik chalonday kalam wa munyimuku umwing piur pa buku Chifundishinay Bibil?

¹⁷ Nich mashapitre mend 19, ni wenjil wend wisambidina yom yivud, ni wovikena nawamp, ufundinau mu mutapu uswapela, buku Chom ik Chakin Kamu Chifundishinay Bibil? amutenchikin chakwel ikala chiyukish mu mujikit wa kulejan. Chilakej, shapitre wa 12 wisambidin mutu wa mulong ulondila anch “Mashakamin Mamusangareshina Nzamb.” Malejan minam mamulejin mwin kwilej mutapu ukutwishay kwikal murund wa Nzamb, chom chakadau antu avud kutongin ap chimeningau anch chikasiken. (Yakob 2:23) Mutapu ik wakinau antu buku winou ukwashina kwilej nich Bibil?

¹⁸ Kalam wa munyimuku wa mu Australie ulondil anch buku Chifundishinay Bibil ukwet “usu wa kuyipwitin swa in chikumbu mu mambamb.” Uwejidin kand anch buku winou uswapel nakash kumusadil chawiy “watwishishin kal atutwambil a Want avud kuchirish usu ni kusanger mujikit wa kulejan. Chakin, antu avud amutazukining buku winou anch Chikunku cha Or!”

19-21. Shimunin uman umwing ukasikeshidina usey wa buku Chifundishinay Bibil.

¹⁹ Mband umwing wa mu Guyane wamwela chibol umwing anch: “Nzamb ndiy wakutumang” kwol kwam. Mu machuku makemp, mbay nend a mband winou wamusha ni anau aad. Chibol waburila buku Chifundishinay Bibil pa shapitre wa 1 ni watanga dizu piur paragraf wa 11, udia mwishin mwa kamutu kamulong kalondila anch: “Mutapu Ik Wovilingay Nzamb Piur pa Kuburen Kutentam Kuturishina Nich?” Chibol walonda anch: “Yitongijok yamushika ku muchim. Chakin kamu, watumbuka, waya kwinyim kwa makashing mend, ni wadila nakash.” Mband winou witiyija kwilej Bibil pakad kujingish ni nambaz umwing wadinga piswimp ni katat uyil kamu kurutu.

²⁰ José, ushichinga mu Espagne, wafisha mukajend ku akisidan wa motak. Wakimba rongoj mu kuna mon ya kulewish (mudi damb), ni amukwasha kudi in kupan yiyul ya manangu. Pakwez, in kupan yiyul ya manangu katwishap kwakul ku chipul chinech chadinga chimunenganeshina nakash José: “Ov, mulong wak Nzamb wamulika mukajam afa?” Dichuku dimwing José wasankanijana ni Francesc, wadinga kusal nend mu chapu chimwing. Francesc wamwita anch isambina shapitre wa 11 wa buku Chifundishinay Bibil, ukweta mutu wa mulong ulondila anch: “Mulong wak Ulikidinay Nzamb Mar?” Yirumburil ya Bibil ni chilakej cha mulej ni nsand a shikol yamukwata José ku muchim. Wasambisha kwilej nakash nich kashinsh kawonsu, wakumangana ku chitentam cha munyimuku, ni katat ukat kukumangan ku yikumangan ku Chot cha Want.

²¹ Roman, ngend-a-mushing wa mivu 40 wa mu Pologne, ulimishining nakash Dizu dia Nzamb. Pakwez, mudi mwadingay ukwatiken nakash ni mudimu wend, wayaku kurutu mu chilik kanang mu kwilej kwend kwa Bibil. Pakwez, ndiy wakumangana ku chitentam cha distrik ni watambula buku Chifundishinay Bibil. Kupwa kamu, mwikadil wend wamekesha kuya kurutu. Ndiy walonda anch: “Nich buku winou, malejan mawonsu ma pa dishin ma Bibil mezin kwinung pamwing chakwel masala chitongijok chimwing, mudi mu masengan ma kubomb chikunku ni chikunku chakwel kusal chipich chimwing.” Katat Roman ukat kwilej Bibil pakad kujing ni uyil nawamp kurutu.

Dandamen Kukul mu Kujikitish

22, 23. Mutapu ik tukutwisha kudandamen kumekesh kujikitish kwetu mulong wa ruchingej ridia kurutu kwetu?

²² Mudi mwarumburilau ku Chitentam cha Distrik, “Dipandish Didi Piswimp!” In Kristu akin aswiridin nakash “kwikol kwa chikupu” kwashilayimu Nzamb ni kutwishikin kusutil ku mash mamwangay Yesu Kristu. Kwikil njil yipandikenamu kuwap yetwetu kumekesh kujikitish kwa muchim wetu mulong wa ruchingej riner ripandikena kuwap ching kudandamen kwitokish “ku midimu yifila, ni kumusadil Nzamb mwom [mudimu utumbila]?”—Hebreu 9:12, 14.

²³ Mwaning, chidi chakin kamu chilay kuman atutwambil inay mamiliyon musamban ni kusut ajijamen ni kushinshaman mu mudimu wa Nzamb pa chisu kudia chipwichik chikash cha kwisotil yisu yawonsu yom ya piur. Udi kand uman ulejena anch atushalapol a Yehova asangaredin nakash kamu chisend cha kumusadil Nzamb, ni ij anch “mudimu [wau] kiudip wamwamu mu Mwant.” Kujikitish kwinoku kangal kwaziy!—1 Korint 15:58; Kuseng 110:3.

Ov, Ukwakul Nchik?

• Chom ik chitulejinay nfund-a-kuseng piur pa kumujikitish Nzamb ni piur pa yitenchik yend ya mu spiritu?

• Mutapu ik uwanyidina ilel unou mazu ma Hagai 2:7?

• Mutapu ik uyiwanyishinay Yehova atushalapol end chakwel amusadil muchifanyidina?

• Chom ik ukutwisha kusal chakwel kumujikitish Yehova mulong wa ranaken rend?

[Chipich chidia pa paj wa 31]

Yehova utuwanyishin kamu mulong tusala rusot rend