Yehova Udi Nzamb Mwin Kujikitish

“Nzamb kadip wakad kutentam wa kuvuramen mudimu wen ni rukat riukata kumekeshilany mu dijin diend.”—HEBREU 6:10.

1. Mutapu ik wamekeshay Yehova kujikitish kwend mulong wenday Rut mwin Mowab?

YEHOVA ukwatining nich usey nakash usu usadilau antu asotila chakin kamu kusal rusot rend, ni ukat kuyiyukish nakash. (Hebreu 11:6) Chaku chinech cha untu wa Nzamb chawiy chijikenay Bowaz, ikundj ushinshamena, mulong wamwela Rut mwin Mowab, wamubangina nich rukat mawenend mufir anch: “El Yehova ayukisha yisal yey, ni kwikala difut diwanyidina kudi ey kudiokal kudi Yehova.” (Rut 2:12, NW) Ov, Nzamb wamuyukisha Rut? Inge! Chawiy, chafundinau rusangu rend mu Bibil! Chikwau kand, atijana ni Bowaz ni wikala ngakiril wenday Mwant David ni Yesu Kristu. (Rut 4:13, 17, NW; Mateu 1:5, 6, 16) Chilakej chinech chidi chimwing cha yilakej yivud yidia mu Bibil yilejena anch Yehova ukat kuyijikitish atushalapol end.

2, 3. (a) Chom ik chisadila anch kujikitish kwa Yehova kwikala kwa pakampwil? (b) Ov, mulong wak Yehova utwishining kumekesh kujikitish kwakin? Let chilakej.

² Yehova wela kuman anch kudi kuburen kutentam ku mutambu wend anch wakanganya kumekesh kujikitish. Hebreu 6:10 ulondil anch: “Nzamb kadip wakad kutentam wa kuvuramen mudimu wen ni rukat riukata kumekeshilany mu dijin diend, muukata kuyisadilany in Kristu, ni katat uchidi kuyisadilany.” Chisadila anch mazu minam mikal ma pakampwil chidi mulong Nzamb umekeshil kujikitish mulong wa antu ipanina ikalap nchik akayitil ni kuburen kuwanyidin ku uyaj wend.—Rome 3:23.

³ Mulong wa kuburen kwetu kuwanyidin, tukutwish kwiyov anch yisal yetu yitukata kumusadil Nzamb yidi yikemp ni kiyifanyidinap chiyukish cha Nzamb. Pakwez, Yehova, uteshil nawamp win kamu yibachikin ni ngikadil yetu, ni chakin kamu ukat kusanger mudimu wetu utukata kusal ni muchim wetu wawonsu. (Mateu 22:37) Chilakej: Maku anch watan chipan—usang wakad usey—pa tebur wend. Ukutwish waman chipan chinech mudi chidi chakad usey ni ukutwish kuchidjibul. Pakwez, kamukand kadia pamwing ni chipan kamekeshin anch chipan chidiokil kwa changadim wend, wasadidina nfalang jend jawonsu jading jilaminay mulong wa kuchiland. Maku ukuman katat chipan mu mutapu windjing. Pamwing nich mansonj mu mes, ukumubwikat mwanend ni kumujikitish chakin kamu.

4, 5. Yesu wamwimburija Yehova mutapu ik mu kumekesh kujikitish?

⁴ Chijay nawamp kamu yibachikin ni mimbu yetu, Yehova ukat kutujikitish pitukata kumwinkish yom yetu ya usey, yikala yikemp ap yivud. Yesu wadinga chifanikesh chiwanyidina cha Tatukwend pa mulong winou. Vurik rusangu ra makut ma mwadia-mufu ridia mu Bibil. “Ndiy [Yesu] wazambula mes wayiman antu ampich ading ni kudjibwil mulambu wau mu chipau. Ndiy wamumana kand mband kazwendj mwadia-mufu wadjibwilaku makut maad. Ndiy walond anch: ‘Nakulejany chakin kamu, mwadia-mufu kazwendj ou, ndiy wapan chiyipandakena awiy awonsu; mulong inang awonsu apanang mu mutapu wa dipit diau; pakwez mband ou wapanang yom yend yawonsu yiswirikedilay kwend.’”—Luka 21:1-4.

⁵ Mwaning, chadingay wij ngikadil ya mband winou—anch udi mwadia-mufu ni kazwendj—Yesu wamana usey wakin wa chipan chend, ni kapamp kamwing wamekesha yovil ya kujikitish. Chawiy chimwing kand ni Yehova. (Yohan 14:9) Ov, chikasikeshinap kwijik anch yikalap nchik mikadil yey, ukutwish kwitapil dilau dia Nzamb wetu mwin kujikitish ni Mwanend?

Yehova Umuparijin Mwin Etiopi Umwovila Nzamb Wom

6, 7. Mulong wak ni mutapu ik wamekeshay Yehova kujikitish padiay Ebed Melek?

⁶ Bibil umekeshin chisu ni chisu mutapu umekeshinay Yehova kujikitish mulong wa antu asadila rusot rend. Tal mutapu wamusadilay Ebed Melek mwin Etiopi wamwova Nzamb wom, muntu washakama pa chirung chimwing ni Yeremiy ni wadinga kashalapol wa mu chikumbu cha Mwant Sedekias wa in Yuda, wakad kushinshaman. Ebed Melek watesha anch amakurump a in Yuda amufisha nich cha makasu muprofet Yeremiy ni amudjibwila mu dijiy, chakwel afilamu nich nzal. (Yeremiy 38:1-7) Chading chijay anch Yeremiy amukisa kwau chamwamu mulong wa uruu wadingay ni kulejan, Ebed Melek wateka mwom wend mu chak ni waya kudi mwant. Nich kukapuk, mwin Etiopi walonda anch: “Nsalejam, antu inay asalang kal nayimp. Amudjibwilang kal Yeremiy mu dijiy, chakin mwinimwa ukufa nich nzal.” Kulondulijan nich mbil ya mwant, Ebed Melek wasenda amakundj 30 ni wamupandisha muprofet wa Nzamb.—Yeremiy 38:8-13.

⁷ Yehova wamana anch Ebed Melek wadinga nich ritiy, ramukwasha kupandakan wom welay kwov. Chawiy, Yehova wamujikitisha ni wamwela Ebed Melek kusutil kudi Yeremiy anch: “Mudi munalonda, mwawiy munikusala, am nikulet kusheshik ku musumb winou, kiukuzangamap, bwat . . . Pakwez am, . . . nikukuchidij ey pa dichuku dinidia, kakukupanap kudi antu wovila ey wom. Am nikukulam ey, . . . Ukupand mulong ey winkungamedin am.” (Yeremiy 39:16-18) Inge, Yehova wamupandisha Ebed Melek, pamwing ni Yeremiy, mu makas ma amakurump ayimp a in Yuda ni kupwa mu makas ma in Babilon, ashesha shitit Yerusalem. Kuseng 97:10 ulondil anch: “[Yehova] ulamin mipim ya aend a kashinsh, Ndiy ukuyikamunin ku chikas cha ayimp.”

“Tatukwey Ukat Kumen mu Ujindj Ukez Kakufut”

8, 9. Mudi mwalejanay Yesu, Yehova ukat kusanger malembil ma mutapu ik?

⁸ Uman ukwau umekeshina anch Yehova ukat kujikitish ni kukwat nich usey yisal yetu ya kwipan kudi Nzamb ukutwish kumeken ku yilondila Bibil piur pa malembil. Ikundj mwin manangu walonda anch: “Kulembil kwa antu atentamina wawiy musangar wend [Nzamb].” (Jinswir 15:8) Pa chirung cha Yesu, amakurump avud a relijon adinga ni kulembil patok, chadingap mulong wa kumekesh kwipan kwakin kudi Nzamb, pakwez chading mulong wa impu ya kusot kwimekesh kudi antu. Yesu walonda anch: “Awiy akil kal difut diau.” Chad Yesu wayileja in kwilej end anch: “Pakwez ey, chiukulembila, andam kwey mu kapalikany key ka mukach, wend upatuku chiy, walembil kudi Tatukwey udia mu ujindj, ni Tatukwey ukat kumen mu ujindj ukez kakufut.”—Mateu 6:5, 6.

⁹ Chakin kamu, Yesu kadingap ufishin nich malembil ma patok, mulong niyend amwinend wadinga yisu yimwing ni kulembil patok. (Luka 9:16) Yehova ukat kusanger nakash pitukata kumulembil nich kashinsh ka muchim, pakad yitong ya kwimekesh kudi antu akwau. Chakin kamu, malembil metu ma mu ujindj, udi uman uwamp wa rukat retu rikash ritumukatina Nzamb ni kumuchingejin kwetu. Chawiy lel, chidiap cha kushimok anch chisu chivud Yesu wadinga ni kusot ndond ja ujindj mulong wa kulembil. Dichuku dimwing, walembila “pamanch pankunku pakucha.” Dichuku dikwau, “ndiy waya ku mukandu ni kulembil.” Ni kurutu kwa kuyitond atwimbuy end 12, Yesu wasutisha uchuku wa kabuj amwinend mu kulembil.—Mako 1:35; Mateu 14:23; Luka 6:12, 13.

10. Anch malembil metu mamekesh uyakin ni yovil yikash, tukweting kashinsh ka chom ik?

¹⁰ Tongin mutapu wateshay Yehova mazu madiokala ku muchim wa Mwanend! Chakin kamu, yisu yimwing Yesu walembila “ni kudil kukash ni mansoj ku mes, . . . ni amwova mulong wa wom wa wi-Nzamb wend wadinga nich.” (Hebreu 5:7; Luka 22:41-44) Anch malembil metu mamekesh uyakin mudi winou ni yovil yikash, tukutwish kwikal nich kashinsh anch Tatukwetu wa mwiur uteshil kamu ni usanger. Inge, “[ Yehova] udi piswimp kudi awonsu akata kutazuk . . . padi Ndiy chakin.”—Kuseng 145:18.

11. Mutapu ik wovilingay Yehova piur pa yitukata kusal mu ujindj?

¹¹ Anch Yehova ukat kujikitish pitukata kumulembil mu ujindj, ukat kujikitish kand pitukata kumuziyil mu ujindj! Inge, Yehova wij yawonsu yitusadila mu ujindj. (1 Pita 3:12) Chakin kamu, kushinshaman ni kuziyil kwetu pitudia kwa ayinetu udi uman uwamp umekeshina anch tumusadidil Yehova nich ‘muchim umwing’, muchim ukweta chibachikin chishitwila ni ushinshamena ku yom yitentamina. (1 Jinsangu 28:9) Mwikadil winou ukat kusangaresh nakash muchim wa Yehova!—Jinswir 27:11; 1 Yohan 3:22.

12, 13. Mutapu ik tukutwisha kulam manangu ni muchim wetu ni kwikal mudi Nataniel mwin kwilej ushinshamena?

¹² Chawiy lel, in Kristu ashinshamena akat kwiyep kusal yitil ya mu ujindj yikata kujondish manangu ni muchim, mudi kutal pornografi ni mafilim ma yisal ya chisum. Ap anch chitwishikin kuyijindjik antu yitil yimwing, twij anch “yom yawonsu yiburikin, yilel kurutu kwa mes kwend, ni yetu tukez kwakul kudiay ndiy ku mwom wetu.” (Hebreu 4:13; Luka 8:17) Anch twasal usu nakash wa kwipuk yom yikisinay Yehova, tukat kwikal nich kom kishitwila ni kusangar pa kwijik anch twitiyikin kudi Nzamb. Mwawiy, Yehova ukat kumusanger chakin kamu muntu “ukata kwendil mu kashinsh ni kusadil mu kutentam, ni kulond yakin mu muchim wend.”—Kuseng 15:1, 2.

¹³ Mutapu ik lel tukutwisha kulam manangu ni muchim wetu mu mangand mizwila too nich uyimp? (Jinswir 4:23; Efesus 2:2) Kuwejin ku kwisakin muchifanyidina yitenchik yawonsu ya mu spiritu, tukutwish kusal usu wetu wawonsu wa kulik kuyip ni kusal yom yiwamp, kusal swa chakwel anch kangal yitongijok yiyimp yijika mij ni kushikij ku kusal chitil. (Yakob 1:14, 15) Tongin bil musangar ukwikala nich anch Yesu wakwel yamwelay Nataniel anch: ‘Talany ikundj ou mwi ndiy mwikil makasu!’ (Yohan 1:47) Nataniel amutazukining kand anch Bartelemi, weza kwitapil dilau dia kwikal umwing wa atwimbuy 12 a Yesu.—Mako 3:16-19.

“Mwin Kupesh wa pa Mutu wa Riy ni Kushinshaman”

14. Mutapu ik wakulay Yesu ku chisal cha Mariy kulondwish ni mutapu wakulau akwau?

¹⁴ Chidiay “chifu cha Nzamb wakad kumekan ku mes,” Yehova, chisu chawonsu Yesu ukat kumwimburij muchifanyidina Tatukwend mu kumekesh kuyisanger antu amusadidila Nzamb ni michim yitok. (Kolosai 1:15) Chilakej, machuku matan kurutu kwa kufa kwend, Yesu ni in kwilej end amwing ayitazuka ku chikumbu cha Simon wa ku Betaniy. Urel, Mariy, mpanyend a Lazar ni Mart, wanona “mulond wa many ma nardus ma usey ukash kamu” (ma usey wa difut dia muvu wa kabuj), ni wamuzizila Yesu pa mutu ni ku yidjatil. (Yohan 12:3) Antu amwing alonda anch: “Mulong wak kumashesh mwamu?” Pakwez, Yesu wamana chisal cha Mariy mu mutapu windjing. Wachimana mudi chisal chijim cha muchim wa kupan ni kurumburik kujim piur pa rufu rend radinga piswimp ni kumujik. Chawiy, pa ndond pa kumulond Mariy, Yesu wamushimana nakash. Ndiy walonda anch: “Ku mangand mawonsu kukez kulejanau Rusangu Ruwamp, chom chasalay mband winou akez kuchilejan kwikal chivurikish chend.”—Mateu 26:6-13.

15, 16. Ukwash ik tutanidinamu mutapu wikalay Yesu muntu ni mutapu wamusadilay Nzamb?

¹⁵ Twitapidil dilau dia kwikal ni Yesu, muntu mwin kujikitish mudi Ntakel wetu! Chakin kamu, mwom wa Yesu mudi muntu wamutenchika mulong wa mudimu wadia umulamidinau kudi Yehova—kusal mudi mwin Kupesh wa pa Mutu ni Mwant, cha kusambish pa chikumangen cha antu azizidilau many ni kupwa pa mangand.—Kolosai 1:13; Hebreu 7:26; Kuburik 11:15.

¹⁶ Kurutu eza pa divu, Yesu wadinga ni kuyisanger nakash antu awonsu. (Jinswir 8:31) Pikalay muntu, weza kutesh nawamp kurumburik kwa mar mu yoziu tukata kujijaman mu mujikit wa Nzamb. Kambuy Paul wafunda anch: “Chawiy chamufanikesha ndiy [ Yesu] mu yom yawonsu kwikal mudi anamakwend, chakwel ukutwish kwikal mwin kupesh wa pa mutu wa riy ni kushishaman . . . Mulong amwinend wamana mar mu yoziu, ndiy ukutwish kuyikwash ozilau.” Yesu ukutwish “kutwovil riy mu kuziy kwa michim yetu” mulong ndiy “watondilau kumwoz mu yawonsu mudi mutudia etu, pakwez ndiy kakwetip chitil.”—Hebreu 2:17, 18; 4:15, 16.

17, 18. (a) Mikand yafundilau yikumangen sambwad ya mu Aziy Mukemp yimekeshin ik piur pa kusanger kukash kwa Yesu? (b) In Kristu azizidilau many akat kuyitenchik mulong wak?

¹⁷ Chovu chijim chadingay nich Yesu cha yoziu ya in kwilej end chamekana patok kupwa kwa kuvumbuk kwend. Shinshikin mikand yayituminay yikumangen ya mu Aziy Mukemp, mudi mwayifundau kudi kambuy Yohan. Ku chikumangen cha mu Simirin, Yesu walonda anch: “Am nij kal yakamish yey, ni uzwazu wey.” Chakin kamu, pinap Yesu wadinga ulondil anch ‘Nij nawamp kamu yikokujol yey; nij kamu mar miumena.’ Kupwa, wasadila riy ni ulabu yadiokala ku mar mend amwinend djat ni ku rufu, Yesu wawejinaku anch: “Ikal ni kujijaman ni kushik ku rufu, ni yam nikez kukwink chibangul cha kupand.”—Kuburik 2:8-10.

¹⁸ Mikand yayituminau ku yikumangen sambwad yizwil too nich mazu mamekeshina anch Yesu wij nawamp yoziu ya in kwilej end ni kusanger kwend kwakin mwom wau wa kushinshaman. (Kuburik 2:1–3:22) Ijik anch antu afundilau kudi Yesu adinga in Kristu azizidilau many adinga nich ruchingej ra kuyikel pamwing nend mwiur. Mudi Nsalejau, adinga ayitenchikin mulong wa mudimu wau wa piur wa kumukwash kuwanyish nich ranaken rijim yisakin ya mulambu wa difut dia Kristu padi anaantu ayedina.—Kuburik 5:9, 10; 22:1-5.

19, 20. Mutapu ik ukatau antu a chisak chipandikena kujimb kumekesh kujikitish kwau kudi Yehova ni Mwanend?

¹⁹ Chakin kamu, rukat ra Yesu mulong wa in kwilej end azizidilau many riyil kand djat ni kudi “amikoku akwau” ashinshamena, mamiliyon ma antu masadila katat “chisak chipandikena kujimb . . . [cha] antu a mangand mawonsu,” akeza kupand ku “mar makash” mezinaku. (Yohan 10:16; Kuburik 7:9, 14) Antu inay ezin avud kudi Yesu chakwel ajikitishin mulong wa mulambu wa difut diend ni mulong wa ruchingej rau ra mwom wa chikupu. Mutapu ik ukatau kumekesh kujikitish kwau? Amujikitishin kusutil ku “kumusadil [Nzamb mujikit utumbila] muten ni uchuku.”—Kuburik 7:15-17.

²⁰ Rapor wa mangand mawonsu wa muvu wa mudimu wa 2006, udia pa paj wa 27 djat pa paj wa 30, uletin uman wovikena anch atushalapol inay ashinshamena akat kumusadil chakin kamu Yehova mudimu utumbila “muten ni uchuku.” Chakin, mu muvu winou, awiy pamwing ni kachisak kakemp kashadilaku ka in Kristu azizidilau many asadin uvud wa asaa 1 333 966 199 mu mudimu wa kulejan—uvud wilikena ni wa mivu 150 000 ni kusut!

Dandamenany Kumekesh Kujikitish Kwen!

21, 22. (a) Piur pa kumekesh kujikitish, ov, mulong wak ufanyidinau ilel in Kristu kwilam? (b) Chom ik tukushinshikina mu mutu wa mulong wambakedinap ou?

²¹ Mu kusadil ni antu akayitil, Yehova ni Mwanend amekeshin kal kujikitish kujim nakash. Pakwez, cha ushon, antu avud kakatap kumubangaku nakash Nzamb, ni akwatiken kusu nich yisakin yau ayinau. Pisambinay piur pa antu akwikalaku mu “machuku ma kwisudiel,” Paul wafunda anch: “Antu akez kwikal in kwikat ayinau, in kukat nfalang . . . akad kujikitish.” (2 Timoteu 3:1-5) Antu inay ashalijadin nakash kamu ni in Kristu akin, akata kumekesh mu malembil madiokila ku muchim, kuziyil kwa kwikatil, ni kusal mudimu ni muchim umwing mulong wa kumekesh kujikitish kwau mulong wa yawonsu yiyisadidinau kudi Nzamb!—Kuseng 62:8; Mako 12:30; 1 Yohan 5:3.

²² Mu mutu wa mulong wambakedinap ou, tukushinshikin yitenchik yivud ya mu spiritu yitwinkishinay Yehova mulong wa rukat rend. Pitutongidina piur pa ‘yipan yiney yiwamp,’ el kujikitish kwetu kuvulijana nakash.—Yakob 1:17.

Ov, Mutapu ik Ukwakula?

• Mutapu ik wimekeshay Yehova kwikal Nzamb mwin kujikitish?

• Pitudia kwa ayinetu mutapu ik tukutwisha kusangaresh muchim wa Yehova?

• Mutapu ik wamekeshay Yesu kujikitish kwend?

• Kwikal muntu kwamukwasha Yesu mutapu ik kwikal nyikel mwin ranaken ni kujikitish?

[Chipich chidia pa paj wa 19]

Mudi nvaj mwin rukat, Yehova ukat kujikitish pitumwinkishina yom yetu ya usey