Dizu dia Yehova Didi Diom

Manans Majim ma Buku wa Ezekiel—Chikunku cha Kaad

UDI ngond wa Kachirikin mu muvu wa 609 Kurutu kwa Chirung Chetu. Mwant wa in Babilon wasambisha kuwombamu kapamp kansudiel musumb wa Yerusalem. Pasak, uruu wa Ezekiel wayilejay ayong adinga mu Babilon wading wimedin pa mutu wa mulong umwing: kuwa ni kusheshik kwa Yerusalem, musumb ukatishena. Katat, ap anch, mutu wa mulong wa uprofet wa Ezekiel waswimpa kal wikal kal wa disheshik dikash dikuyishikena michid ya apagan mulong yasangera mar makash mayishikena antu a Nzamb. Pawa Yerusalem kwinyim kwa angond 18, uruu wa Ezekiel wikala kand nich mutu wa mulong usu: kuchirishiu kwa uyaj wa difukwil diakin.

Mu Ezekiel 25:1–48:35 mudi uprofet wisambidina piur pa michid yimunyingumukina Isarel ni kukolik kwa antu a Nzamb.a Kudi ching Ezekiel 29:17-20, ulejena yom mutapu yalondulijana mu mivu ni mutapu yilondulijadina mitu ya milong. Pakwez, maverse minam manying malondulijadin mu kulondwish uprofet wabwakau mulong wa Idjibit. Mudi chikunku cha Mifund yapepilau spiritu, buku wa Ezekiel ukwet uruu ukweta ‘mwom, ni usu,’—Hebreu 4:12.

‘NGAND YINEY YIKWIKAL MUDI CHIR CHA EDEN’

(Ezekiel 25:1–39:29)

Pamanay yisal ya michid yikwau pawa Yerusalem, Yehova wamusadila Ezekiel chakwel abwaka piur pa Amon, Moab, Edom, Filisitin, Tir, ni Sidon. Idjibit akez kumubuw. ‘Farao mwant wa in Idjibit ni antwend’ ayifanikesha nich mutond wa kanjadish ukezau kukatul nich “mpak ya musamun ya mwant wa in Babilon.”—Ezekiel 31:2, 3, 12; 32:11, 12.

Kwinyim kwa angond musamban kupwa kwa disheshik dia Yerusalem mu muvu wa 607 Kurutu kwa Chirung Chetu, muntu umwing wapanda weza wamulej Ezekiel anch: “Musumb aukwatang kal.” Muprofet ‘wasambisha kulond’ ni antu adinga mu uyong. (Ezekiel 33:21, 22) Wayileja uprofet wa kuchirishiu. Yehova ukez “kuyinkish mwin kuyitakel . . . kashalapol [wend] David.” (Ezekiel 34:23) Edom akez kumushesh, pakwez Yuda chinyim ni ngand yiney, ukez kwikal “mudi chir cha Eden.” (Ezekiel 36:35) Yehova washilamu kuyichidij antu end achirika kwi njit ja “Gog.”—Ezekiel 38:2.

Yakul ku Yipul Yipwilau Piur pa Bibil:

Ezekiel 29:8-12—Ov, chisu ik chikala Idjibit mpay mu mivu 40? Kupwa kwa kusheshik kwa Yerusalem mu muvu wa 607 Kurutu kwa Chirung Chetu, in Yuda ashala achinina mu Idjibit chikalap nchik kuyibabesh kwayibabeshay muprofet Yeremiy. (Yeremiy 24:1, 8-10; 42:7-22) Kwinoku kwadingap njil ya awiy kupandil mulong Nebukadinezar weza kwas njit ni in Idjibit ni wamukwata. Mivu 40 ya kusheshik kwa Idjibit yadinga kupwa kwa kukwachik kwinoku. Ap anch rusangu ra muntu riletinap uman wa kusheshik kwinoku, tukutwish kwikal nich ruchingej anch kwasadika mulong Yehova udi Mwin Kuwanyish uprofet.—Isay 55:11.

Ezekiel 29:18—Mutapu ik ‘wayiserolau mabal pa mitu, ni kuyisupwol yitat pa makij’? Kuwombamu musumb wa Tir kwadinga kukash ni kwita usu ukash mu chilik chakwel anch mitu ya amasalay a Nebukadinezar yakatwoka nswich mulong wa nkakat jadinga mu yiful yau ni pa makij mau pabudika yitat mulong wa kusend yom ya kutung nich yikumbu ni jimpwembu.—Ezekiel 26:7-12.

Malejan Kudi Etu:

Ezekiel 29:19, 20. Mulong in Tir achinina pa ditung nich mapit mau mavud, Mwant Nebukadinezar watambula yom yikemp yadiokala kudi in Tir. Ap anch Nebukadinezar wading ni kwibaz, ntakel mupagan wa choy, Yehova wamwinkisha difut mulong wa mudimu wend mu kumwinkish ngand ya Idjibit mudi ‘difut dia amasalay end.’ Ov, kitufanyidinap kumwimburij Nzamb wakin kusutil ku kulambul yitad ya mburamatad mulong wa mudimu utusadidilay? Yidiap ngikadil ya in kutakel, ap mutapu usadidilau yitad ukutwisha kutukangesh kuwanyish chisend chinech.—Rom 13:4-7

Ezekiel 33:7-9. Chisak cha kalam cha katat—azizidilau many ashadilaku—ni ambay nau kafanyidinap dichuku ap dimwing kulik kulejan rusangu ruwamp ni kuyikasikesh antu piur pa kwez kwa “mar mapandakena.”—Mateu 24:21.

Ezekiel 33:10-20. Kupand kwetu kwimedin pa kukarumuk kwetu kulik mikadil yiyimp ni ku kuziyil ku yom yitinay Nzamb. Chakin kamu, njil ya Yehova ‘yitentamin.’

Ezekiel 36:20, 21. Mulong wa kulik kushakam kwambatan nich chadinga chijikenau mudi anch, ‘antu a Yehova,’ in Isarel akwatisha dijin dia Nzamb usany pakach pa michid. Tufanyidinap kwikal in kumwifukwil Yehova a dijin kusu.

Ezekiel 36:25, 37, 38. Paradis wa mu spiritu tusangeridina nlel wizwil “nich antu” Atumbila. Chawiy lel, tufanyidin kwikasikesh chakwel twishitula.

Ezekiel 38:1-23. Tukwet ruchingej mudi ik pa kwijik anch Yehova ukez kuyipandish antu end kwi njit ja Gog, mwant wa ngand ya Magog! Gog didi dijin dia “mwant wa mangand minam,” Satan Djabul, kupwa kwa kumwopat mwiur. Ngand ya Magog yirumburikin nsulangen ya divu, muyishidinau Satan ni ayilembil end.—Yohan 12:31; Kuburik 12:7-12.

‘BABAL KU YOM YAWONSU YINIKULEJILA’

(Ezekiel 40:1–48:35)

Udi muvu wa 14 kupwa kwa kukwachik kwa musumb wa Yerusalem. (Ezekiel 40:1) Kwadinga kwashal kal mivu makum matan ni musamban ya uyong. (Yeremiy 29:10) Ezekiel udi katat piswimp ni kuwanyish reng ra mivu makum matan. Amutwala mwin ngand ya in Isarel, mu chishimushimu. Amuleja anch: “Mwan a muntu, tal, tesh nawamp ni kubabal ku yom yawonsu yinikulejila.” (Ezekiel 40:2-4) Chamusangaresha Ezekiel nakash mudi ik pa kuman chishimushimu cha tempel musu!

Tempel wa uyaj wamanay Ezekiel wading nich yis 6, tupalikany twakwambambin 30, Ndond Yitumbila, Ndond Yitumbila Nakash, chintamb cha mabay, ni chintamb cha yakupesh ya milambu ya kwosh. “Mem mading ni kubudik” ku tempel mikala kawit mujim. (Ezekiel 47:1) Ezekiel wamana kand chishimushimu cha mutapu wayikatwilau ngand kabil ni kabil—rupangu ni rupangu wading usambishidin kwingangel waya kurand nich mwimbu pakach chikunku cha ngand ya Yuda ni ya Benjamin. “Chikumbu cha [Yehova]” ni “musumb” utazukinau anch Yehova-Shama wadinga mu mwimbu winou.—Ezekiel 48:9, 10, 15, 35.

Yakul ku Yipul Yipwilau Piur pa Bibil:

Ezekiel 40:3–47:12—Chom ik chafanikesha tempel wa mu chishimushimu? Tempel winou mujim nakash wamanay Ezekiel mu chishimushimu chakin kamu kandikal amutungap. Wafanikesha tempel wa mu spiritu wa Nzamb—ditenchik diend dia difukwil diakin dia katat difaniken nich tempel. (Ezekiel 40:2; Mika 4:1; Hebreu 8:2; 9:23, 24) Chishimushimu cha tempel chawanyina mu “machuku ma nsudiel,” atenchika win kupesh. (2 Timote 3:1; Ezekiel 44:10-16; Malakiy 3:1-3) Pakwez, ukez kuwanyin kapamp kansudiel mu Paradis. Tempel wa chishimushimu wayinkisha in Yuda adinga mu uyong ruchingej ra kushilamu kwa difukwil dishitwila dikezau kuchirish ni anch dijuku ni dijuku dia in Yuda dikez kutambul uswan mwin ngand.

Ezekiel 40:3–43:17—Kwilik tempel kurumburikin ik? Kwilik tempel chidi chijingidij chimekeshina anch chakin kamu rutong ra Yehova piur pa difukwil diakin rikez kuwanyin.

Ezekiel 43:2-4, 7, 9—Kwisu kwadinga “mijimbu ya ant au afa kal” yadioshau mu tempel? Chimeken anch yital ya mijimbu yiney yadinga akish. Anyikel a Yerusalem ni antu end ayipisha tempel wa Nzamb nich akish—ni kuyisal anch ikala ant au.

Ezekiel 43:13-20—Chom ik chifanikeshinau nich chintamb chamanay Ezekiel mu chishimushimu? Chintamb cha chifanikesh chidi rusot ra Nzamb rambatena nich difut dia chakupesh cha Kristu. Azizidilau many ayijimbwil anch atentamina ni “chisak chipandakena kujimb” chishitwil ku mes kwa Nzamb mulong wa difut dined. (Kuburik 7:9-14; Rom 5:1, 2) Pamwing ap wawiy mulong, “dijiy dia utad wa bronze wa kwenguril” diadinga mu tempel wa Salomon—dilong dijim dia mem mwadingau kowal in kupesh—dimekenap mu chishimushimu cha tempel.—1 Ant 7:23-26, Les Saintes Écritures — Traduction du monde nouveau.

Ezekiel 44:10-16—Nany ufanikeshinau nich chisak cha in kupesh? Chisak cha in kupesh chafanikesha chisak cha in Kristu azizidilau many a katat. Ayitokisha mu 1918 pezay Yehova mwin “kushitwish utad wa argent” mu tempel wend wa mu spiritu. (Malakiy 3:1-5) Antu itokisha ap anch in akarumuka akudandamen nich chisend chau cha pakampwil cha kusal mudimu. Kupwa, chading chifanyidin kusal usu ukash chakwel ilama ayinau “ku manans ma yitil ya mangand,” chawiy chikwikalau yilakej ku “chisak chipandiken kujimb,” chifanikeshinau nich michid yakad kwikal ya in kupesh.—Yakob 1:27; Kuburik 7:9, 10.

Ezekiel 45:1; 47:13–48:29—“Ngand” ni ngand ya uswan yadinga yifanikeshin ik? Ngand yifanikeshin ndond yisadidinau antu a Nzamb mudimu. Chikalap nchik ndond yikutwishau kwikal in kumwifukwil Yehova, ndond yiney yidi ngand yarijekau anch akat kukasikeshin difukwil diakin. Kukatwol kwa ngand kukez kuwanyin kapamp kansudiel mu mangand masu pakezay kuswan muntu ni muntu ushinshamena ndond.—Isay 65:17, 21.

Ezekiel 45:7, 16—Chom ik chifanikeshinau nich milambu yapanau antu mulong wa win kupesh ni mulong wa mwin kutakel? Mu tempel wa mu spiritu, chinech chisambidin cha kusambish ukwash wa mu spiritu—kukwash ni kumekesh muchim wa kusal pamwing.

Ezekiel 47:1-5—Chom ik chifanikeshina mem ma kawit kamanay Ezekiel mu chishimushimu? Mem mafanikeshin yitenchik ya mu spiritu ya Yehova mulong wa mwom, pamwing nich difut dia ya kupesh dia Yesu Kristu ni ronganyin ra Nzamb ridia mu Bibil. (Yeremiy 2:13; Yohan 4:7-26; Efes 5:25-27) Kawit kaya mu kukurik pakemp-pakemp kukwatijan nich kwez kwa chisak cha antu asu itiyija difukwil diakin. (Isay 60:22) Kawit kakez kwikal nich mem mavud ma mwom mu Mivu Kanan, ni mu mem mukez kwiwejin chovu chijim chikeza kudiokal mu “mikand” yikezau kuburil.—Kuburik 20:12; 22:1, 2.

Ezekiel 47:12—Mitond ya mabuj yifanikeshin ik? Mitond ya chifanikesh yifanikeshin yitenchik ya mu spiritu ya Nzamb mulong wa kuyichirish antu ku kuwanyin.

Ezekiel 48:15-19, 30-35—Musumb wamanay Ezekiel mu chishimushimu ufanikeshin ik? “Yehova Shama” udi mwi ngand ‘yakad kwikal yitumbila’, kumekeshina anch yifanyidin kufanikesh chom chimwing cha pa divu. Musumb umeken anch ufanikeshin wintakel wa pa divu ukatau kwisakin antu akeza kusal “ngand yisu” yitentamina. (2 Pita 3:13) Kwikal nich yis ku mutambu ni mutambu kufanikeshin anch chiswapel kwandamamu. Atulam adia pakach pa antu a Nzamb afanyidin kwikal aswapela kushejin.

Malejan Kudi Etu:

Ezekiel 40:14, 16, 22, 26. Rubumbu rafatulau mabu ku yis ya tempel kumekeshin anch ching kusu antu atentamina awiy akweta mbil ya kwandamamu. (Kuseng 92:12) Chom chinech chitulejin anch Yehova ukwitiyij difukwil dietu ching anch tutentamin.

Ezekiel 44:23. Tukutwish kwikal in kujikitish mudi ik mulong wa mudimu usadina chisak cha katat cha in kupesh! “Kashalapol ushinshamena ni kubabal” utakedil mu kupan yakudia ya mu spiritu pa chisu chau yitukwashina kujingunin kushalijan pakach pa yom yijondila ni yidia zwang kurutu kwa Yehova.—Mateu 24:45.

Ezekiel 47:9, 11. Ronganyin—chidi chifanikesh chimwing cha usey cha mem ma chifanikesh—rawanyisha kuyerik kwamushena pa chisu chetu. Kwawonsu kumaniau, makat kuyiletin antu mwom wa mu spiritu. (Yohan 17:3) Chikwau kand, antu alikina mem ma mwom akez ‘kuyikish mem ma mungu’—akez kuyishesh chikupu. Chidi cha usey mudi ik anch ‘twikasikesh chakwel tulejana dizu dia uyakin nich kutentam’!—2 Timote 2:15.

‘Nikez Kumekesh Katumb ka Dijin Diam Dijim’

Kupwa kwa kumumwang pa want mwant wa nsudiel wa mu dijuku dia David, Nzamb wakin walikidila chisu chilemp chisuta kurutu kwa kwez kwa ‘umwing watonday’ kudil want. Pakwez, Nzamb kavuramenap manswik mend masalay ni David. (Ezekiel 21:27; 2 Samwel 7:11-16, NW) Uprofet wa Ezekiel ulondil piur pa “kashalapol wam David,” ukez kwikal “kafung” ni “mwant.” (Ezekiel 34:23, 24; 37:22, 24, 25) Muntu winou kadiap muntu mukwau, udi ching Yesu Kristu mu Want. (Kuburik 11:15) Yehova ukez kumekesh “katumb ka dijin [diend] dijim” kusutil Want wa Mesia.—Ezekiel 36:23.

Katat kamu ak, antu awonsu ajondishina dijin ditumbila dia Nzamb akez kuyishesh. Pakwez antu aditumbishina mu mwom wau mu kumwifukwil Yehova mwi njil yitiyijinay akez kutambul mwom wa chikupu. Katat twisakinany amboku yiyukish yivud ya mem ma mwom mavulijadina nakash mu machuku metu manam ni tusala anch difukwil diakin dikala chom chakusambish mu mwom wetu.

[Mazu madia kwishin kwa paj]

[Chipich chidia pa paj wa 22]

Kawit ka mem ma mwom kamanay Ezekiel mu chishimushimu kafanikeshin ik?

[Chipich chidia pa paj wa 23]

Uyaj wa tempel wa mu chishimushimu cha Ezekiel

[Dizu dirumburila]

Pictorial Archive (Near Eastern History) Est.