Dizu dia Nzamb Didi Diom
Manans Majim ma Buku wa Ezekiel —Chikunku cha Kusambish
TUDI mu muvu wa 613 kurutu kwa chirung chetu. Muprofet Yeremiy udi mu Yuda, ulejen pakad wom kwez kwa disheshik dia Yerusalem ni mutapu ngand ya Yuda yikushala mankur. Mwant Nebukadinezar mwin Babilon wadi wayikwatin kal in Yuda avud mu winkwal. Mukach mwau mwadinga Daniel ni arund nend asatu, asadinanga ku chipang cha mwant wa in Kalidey. In Yuda avud atwalau mu winkwal ashich piswimp ni wit Kedar “mu Babilon.” (Ezekiel 1:1-3) Yehova kayishap ankwal pakad muruu. Yehova wamutonda Ezekiel mudi muprofet padingay nich mivu 30.
Buku wa Ezekiel apwisha kumufund mu muvu wa 591 kurutu kwa chirung chetu, usendin chirung cha mivu 22. Ezekiel wafunda nawamp kachom ni kachom. Ulejen chirung cha uprofet wend, wajimbula ni machuku ma ngond ni ngond win pamwing ni muvu. Chikunku cha kusambish cha uruu wa Ezekiel chisadin pa disheshik dia Yerusalem. Chikunku cha kaad chikwet mazu ma dirumburish pantaliken nich michid yadinga yiyombilamu, ni chikunku cha nsudiel chisambidin kuchirish kwa difukwil dia Yehova. Mutu wa mulong winou wisambidin manans majim ma Ezekiel 1:1–24:27, mudi yishimushimu, uprofet, ni masengan ma majest pakad dizu ma yom yikumushikena Yerusalem.
“NAKUTEK KAL EY KWIKAL KALAM”
(Ezekiel 1:1–19:14)
Kupwa kwa kuman chishimushimu chamushena cha ditand dia Yehova, amuleja Ezekiel mudimu ukusalay. Yehova umulejin anch: “Nakutek kal ey kwikal kalam wa muchid wa Isarel. Ey ukez kuyilej kubabesh kwam kwawonsu.” (Ezekiel 3:17) Chakwel anch abwaka kumuta Yerusalem may ni yibudikin yau, amwita Ezekiel asala masengan maad pakad kulond dizu. Pisambinay piur pa ngand ya Yuda, Yehova ulondil kusutil kudiay Ezekiel anch: “Am nikez katum njit kushesh jindond jawonsu jikat kwifukwilau antu akishau.” (Ezekiel 6:3) Kudi antu ashicha mwi ngand, ulondil anch: “Disudiel dienen ushichanya mwi ngand yiney diashik kal.”—Ezekiel 7:7.
Mu muvu wa 612 kurutu kwa chirung chetu, chishimushimu chimwing chamutwala Ezekiel ku Yerusalem. Wamana yom yijondila yadinga yisadikina mu tempel wa Nzamb! Chisu chatumay Yehova usu wend wa mwiur wa kushesh nich (ufanikeshinau nau “antu musamban”) mulong wa kulejan kadimu kend padi in kupumbuk, ching kusu antu atambula ‘chijingidij pa mpal’ awiy apanda. (Ezekiel 9:2-6) Ap anch, cha kusambish, “makal ma kasu”—uruu wa Nzamb wa disheshik usansen —mafanyidin kumichil pa musumb. (Ezekiel 10:2) Ap anch ‘Yehova ukez kulet pa mutu wa muntu muyimp jinjil jend,’ ndiy ushidilamu kuyikumangej antu in Isarel apalangena.—Ezekiel 11:17-21.
Mwiku utumbila wa Nzamb wamuchirisha Ezekiel mu Kalidey. Disengan dimwing dialejana Mwant Sedekias chichininay ni antu end kudiokal mu Yerusalem. Aprofet amakundj ni amband a makasu akat kuyisaul. Ayidjibwil kwa in kwifukwil akish. Yuda amufanikeshin nich mutond wa nviny wa chamwamu. Chishimu cha mbur ni mutond wa nviny chilejen yishiken yiyimp ya Yerusalem pasotilay kuchinin ku Idjibit mulong wa ukwash. Chishimu chipwil nich kushilamu anch ‘Yehova ukez kukuniril ris ra mutond piur pa mukandu ulemp.’ (Ezekiel 17:22) Pakwez, mu Yuda, mukez kwikalap “mikombu ya ant.”—Ezekiel 19:14.
Yakul ku Yipul Yipwilau Piur pa Bibil:
Ezekiel 1:4-28—Ditemb dia mwiur difanikeshin ik? Ditemb difanikeshin chikunku cha mwiur cha dirijek dia Yehova dia yitang ya mu spiritu yishinshamena. Musul wa usu wad udi mwiku utumbila wa Yehova. Mwin kudiendish, ufanikeshina Yehova, ukwet uyaj upandikenamu nakash. Kwitudish kwend akufanikeshin nich nkongal.
Ezekiel 1:5-11—Yitang yinying yikweta mwom yidi anany? Mu chishimushimu chend cha kaad cha ditemb, Ezekiel umen yitang yinying yikweta mwom mudi akerupim. (Ezekiel 10:1-11; 11:22) Mu yirumburil yend yidia mu Ezekiel 10:14, mu mifund ya kusambish ya Hebreu ujimbwil chifu cha ikwal a ngomb anch “chifu cha kerupim.” (Ezekiel 10:14, NW ) Mazu minam mafanyidin mulong ikwal a ngomb udi chijingidij cha dikand ni usu, ni akerupim adi yitang ya mu spiritu ya usu.
Ezekiel 2:6—Ov, mulong wak umujimbwilau Ezekiel chisu ni chisu mudi “mwan a muntu”? Yehova umujimbwil Ezekiel mwamu mulong wa kumuvurish muprofet anch amusala nich mbij ni mash, chawiy chakasikeshina kushalijan kujim kudia pakach pa muruu muntu ni Nzamb udi Musul wa uruu. Mazu minam amasadila kand padi Yesu Kristu tupamp 80 mu Rusangu Ruwamp, mamekeshina patok anch Mwan a Nzamb weza mudi muntu kadingap mudi muntu wa mu spiritu wiyikadisha muntu wa mbij.
Ezekiel 2:9–3:3—Ov, mulong wak muvungur wa madil ni runeng yatalijana mu kan mwa Ezekiel? Chom chayikadisha mivungur yitala mu kan mwa Ezekiel yadinga ngikadil yend piur pa mudimu wend. Ezekiel wadinga usanger nakash kumusadil Yehova mudi muprofet.
Ezekiel 4:1-17—Ov, chakin kamu Ezekiel wasala disengan dimekeshina mutapu wa mutau Yerusalem may? Kudilol kwa Ezekiel chakwel aswimpa nkuny ja kasu ja kwisuk nich ni Yehova wamwinkisha yom yitay kumekeshin chakin anch ndiy wasala disengan dined. Walala mutambu wa ku kamaku mivu 390 mulong wa chitil cha want wa michid dikum—kudiosh kwisambishil kwau mu muvu wa 997 kurutu kwa chirung chetu djat ku disheshik dia Yerusalem mu muvu wa 607 kurutu kwa chirung chetu. Walala mutambu wa ku katatuku mulong wa chitil cha Yuda mivu 40, kudiosh pamutondinau Yeremiy mudi muprofet mu muvu wa 647 kurutu kwa chirung chetu djat mu muvu wa 607 kurutu kwa chirung chetu. Mu chirung cha machuku 430, Ezekiel wadinga ni kudia tuyakudia tukemp ni kuna tumem tukemp, uprofet walejana anch kukez kwikal kamungun pa chirung cha kumuta Yerusalem may.
Ezekiel 5:1-3—Chisal cha Ezekiel cha kunon muril umwing wa nswinch kuupalangesh mu rinkind ni kujilondul nich mpak ya musamun chirumburikin ik? Chom chinech chadinga mulong wa kumekesh anch antu akeza kushalaku akez kuchirik mu Yuda ni kuchirish difukwil diakin kupwa kwa mivu 70 ya disheshik.—Ezekiel 11:17-20.
Ezekiel 17:1-24—Ambur aad adi anany, ni mutapu ik wabukunau jins ja mutond udia mudi kanjadil, ni nany udia “karis ka mutond” wakunirilau kudi Yehova? Ambur aad afanikeshin nyikel mwin Babilon ni mwin Idjibit. Mbur wa kusambish weza witumb pa jins ja kanjadil, charumburik anch, kudi nyikel wa winyikel mu dijuku dia want wa David. Mbur winou wabukuna jins ja mitiy yisapurikina pamuswinkeshau Mwant Yoyakin wa in Yuda amutekap Sedekias. Chikalap nchik manswik ma kushinshaman masukay, Sedekias wakimba ukwash wa nyikel wa Idjibit, pakwez kamukwashap. Chading chimufanyidin kuya mu winkwal ni kufil mu Babilon. Yehova wabukuna kand “ris ra mutond,” Mwant Mesia. Muntu winou amukunirila “piur pa mukandu ulemp,” piur pa mukandu wa Sion wa mwiur, pakezay kwikadil “mutond wa ufun mudi wa kanjadil,” musul wa yiyukish mulong wa divu.—Kuburik 14:1.
Malejan Kudi Etu:
Ezekiel 2:6-8; 3:8, 9, 18-21. Kitufanyidinap kulik kulejan uruu wa Nzamb ap kulik kuyibabesh antu ayimp atwakamishina ni kutwovish wom. Piturishina nich kulik kututesh ap rupompat, tufanyidin kwikal akash mudi kamang. Pakwez, tufanyidin kudimuk kangal tuchinchika muchim, akad kuteshang, ap rukis rikash. Yesu wayovila antu alejay riy, niyetu riy rifanyidin kutubachik kuyilej antu akwau.—Mateu 9:36.
Ezekiel 3:15. Kupwa kwa kwitiyij mudimu wend, Ezekiel washakama ku Tel Abib, ‘yom yamanay ni kutesh mu machuku sambwad yamupandakana,’ pandjikay mu manangu uruu wadinga ufanyidinay kulejan. Ov, niyetu kitufanyidinap kwitekin chisu cha kwilej nich mushiku ni kutongijokin mulong wa kutesh uyakin wa mu spiritu ukurikina?
Ezekiel 4:1–5:4. Chamwita Ezekiel kwikepish ni kukapuk chakwel asala masengan maad ma uprofet pakad kulond dizu. Niyetu tufanyidin kwikepish ni kukapuk pitusadila mudimu watwinkishay Nzamb.
Ezekiel 7:4, 9; 8:18; 9:5, 10. Kituswiridinap kulikin dis dietu diyovila riy antu arumburishinau kudi Nzamb ap kuyanaken.
Ezekiel 7:19. Chisu chikuletay Yehova dirumburish diend pa ditenchik dined dia yom, nfalang jikez kwikalap nich usey ap ukemp.
Ezekiel 8:5-18. Kupumbwok kudi rufu ra mu spiritu. “Kan ka muntu muyimp kakat kumushesh mukwau.” (Jinswir 11:9) Tukusal cha manangu anch twachin yitongijok ya kuta matu kudiau in kupumbwok.
Ezekiel 9:3-6. Kutambul chijingidij—uman umekeshina anch tudi atushalapol a Nzamb twipana kal ni kubabatishiu ni anch tukwet untu wa Ukristu—kudi kwa usey mulong wa kupand ku “mar mapandakena.” (Mateu 24:21) In Kristu azizidilau many, afanikeshinau kudi muntu ukweta kamulond ka ink ka mwin kufund, awiy atakedila mudimu wa kutek chijingidij, wawiy mudimu wa kulejan Want ni wa kwikadish in kwilej. Anch tusotil kulam chijingidij chetu, tufanyidin kuyikwash nich mushiku mu mudimu winou.
Ezekiel 12:26-28. Ap anch kwadinga antu adinga ni kuswingish uruu wend, Ezekiel wading ufanyidin kuyilej anch: “Kinikez kulabishap kand. Yom yawonsu yinalonda yikez kumekan. Yam [Yehova] Nsalejau nilondila.” Tufanyidin kusal yawonsu yitukutwisha kusal mulong wa kuyikwash antu akwau amuchingejina Yehova kurutu aleta nsudiel ya ditenchik dined dia yom.
Ezekiel 14:12-23. Kupand chidi chisend chetu ayinetu. Kwikil muntu ukutwisha kuchisend pa ndond yetu.—Rom 14:12.
Ezekiel 18:1-29. Tukwet chisend cha yibudikin ya yisal yetu ayinetu.
“KUSHESHIK, KUSHESHIK MWAWIY AM NIKEZ KUSHESH”
(Ezekiel 20:1–24:27)
Mu muvu wa sambwad wa winkwal, mu muvu wa 611 kurutu kwa chirung chetu, amakurump a in Isarel eza kudiay Ezekiel kumwipul “yom yisotilay” Yehova. Awiy atesha rusangu rilemp ra wintombuj wa in Isarel ni dibabesh anch ‘Yehova ukez kupuril mpak yend ya musamun’ padi awiy. (Ezekiel 20:1; 21:3) Pamulejay nyikel wa Isarel (Sedekias), Yehova ulondil anch: “Djol chibangul chey, ni kachiful kakemp kakad matu. Kwikil chom chikeza kwikal kand mudi muchadinga. Yiteka atuzwendj kwikal in kutakel, chad yishikumwisha adinga in kutakel! Kusheshik kusheshik. Mwawiy am nikez kushesh musumb. Pakwez yom yiney yikez kumekanap djat ni pakwezilay umwing unatonda [Yesu Kristu] kwez kuulej musumb kadimu. Chawiy nikez kuupan kudi ndiy.”—Ezekiel 21:26, 27.
Yerusalem ufil nich uyimp. Kufa nich kwa Ohola (Isarel) nenday Oholiba (Yuda) akusawil patok. Ohola wiyandjikin kal “mu makas mwa in Asiria asotijanangay nau, awiy kamu akatay nakash.” (Ezekiel 23:9) Kushesh kwa Oholiba kudi piswimp nakash. Mu muvu wa 609 Kurutu kwa chirung chetu, chirung cha angond 18 cha kumuta Yerusalem may chasambisha. Pawa musumb, in Yuda amekesha runeng rau chipandakena. Ezekiel kafanyidinap kand kuyilej ankwal uruu wa Nzamb djat ni pakutambwilay rusangu ra kusheshik kwa musumb kudiokal kudi “umwing ukeza kurezikaku.”—Ezekiel 24:26, 27.
Yakul ku Yipul Yipwilau Piur pa Mifund:
Ezekiel 21:3—“Mpak ya musamun” yipurilay Yehova mu chindal chom ik? “Mpak ya musamun” yisadidilay Yehova mulong wa dirumburish diend piur pa Yerusalem ni Yuda yimeken kwikal Mwant Nebukadinezar wa in Babilon ni amasalay end. Yikutwish kwikal kand chikunku cha mwiur cha dirijek dia Nzamb cha yitang ya mu spiritu yikweta usu ukash.
Ezekiel 24:6-14—Nnung yakwatina kal ankal yakad kwoyish yifanikeshin ik? Yerusalem pamutau may wikala mudi nnung yikweta kan kajim. Ankal a nnung afanikeshin ngikadil yijondila yadinga mu musumb—kwijond, masandj, ni kumwang mash chawiy chaufishau nich. Chawiy musumb wijondil nakash mu chilik chakwel anch ap nnung mwakad chom yitekinau pa makal mau ma kasu ni yikutwish yaswan cha, mulong wa kuyowish ankal.
Malejan Kudi Etu:
Ezekiel 20:1, 49. Chakul cha amapal a in Isarel chimekeshin anch idjidjeka piur pa yom yadingay ni kulond Ezekiel. Kangal twikalany nich chaku cha kwidjidjek piur pa yibabesh ya Nzamb.
Ezekiel 21:18-22. Ap anch Nebukadinezar wasadila kupong, Yehova ndiy walonda nich kashinsh anch nyikel wa michid eza kumurishish Yerusalem. Chom chinech chimekeshin anch ap ayilembil kakutwishap kuyichirish kwinyim in kusal dirumburish dia Yehova alika kuwanyish rutong rend.
Ezekiel 22:6-16. Yehova ukisining makasu, masandj, kusadil kuyimp usu, ni kutambulang kabwik pa kan. Tukutwish kujijaman mu mupak wetu wa kwiyep kusal yitil yiney.
Ezekiel 23:5-49. Kusuk manswik ma chipolitik kwamushikija Isarel ni Yuda ku kwitiyij difukwil dia makasu dia arund nau. El twilamany ku kuta urund ni mangand, urund ukutwisha kushesh ritiy retu.—Yakob 4:4.
Uruu Ukweta Mwom ni Usu
Twilej kal malejan mawamp mu mashapitre 24 ma kusambish ma buku wa Ezekiel udia mu Bibil! Yany yidia mu mashapitre minam yilejen yikata kushikij ku kushadish dilau dia Nzamb, mutapu tukutwisha kutan ranaken rend, ni mutapu tukutwisha kuyibabesh antu ayimp. Uprofet wa disheshik dia Yerusalem umulejen patok Yehova mudi Nzamb ukata ‘kuyilej antu end yom yisu yikeza kamekan kurutu.’—Isay 42:9.
Uprofet winou ufundinau mu Ezekiel 17:22-24 ni 21:26, 27 wisambidin kudishiu Want wa Umesia mwiur. Piswimp kamu ap, winyikel winou ukusal anch rusot ra Nzamb risadika pa divu. (Mateu 6:9, 10) Nich ritiy rikash ni kwitiyij kukash, tukutwish kuchingejin yiyukish ya Want yidia kurutu. Inge, “dizu dia Nzamb didi diom, ni usu.”—Hebreu 4:12.
[Chipich chidia pa paj wa 12]
Ditemb dia mwiur difanikeshin ik?
[Chipich chidia pa paj wa 14]
Kusal mudimu wa kulejan nich mushiku kutukwashin kulam “chijingidij” chetu