“Aurikin ku Rudim Pakwez Ovijadin mu Rukat”

Dipandish. Dikolik. Kupand. Mu kusut kwa yitot ya mivu, antu akat kukimb kwitudish mulong wa yakamish ni minan yikwetau. Ov, mutapu ik tukutwisha kupandakan yikokujol ya mwom? Ov, kukez kwikal dipandish? Anch inge, mutapu ik?

WINOU wawiy wadinga mutu wa mulong wa madiskur ma yitentam ya distrik ya machuku masatu, yatenchikau Atuman a Yehova, yasambisha pa Ndol-Mem 2006. Mutu wa mulong wadinga anch “Dipandish Didi Piswimp!”

Tunan twa in kukumangan adiokala mu jingand kushalijan akumangana ku yitentam chidivu yiney. Yasadika pa Kafunfut ni Kafumpul 2006, mu Prague, musumb ujim mwi Ngand ya Tchèque; mu Bratislava, musumb ujim mwi Ngand ya Slovaquie; mu Chorzów ni Poznan, mu Pologne;a ni mu misumb yitan ya mu Allemagne—Dortmund, Frankfort, Hambourg, Leipzig, ni Munich. Kwadinga antu 313 000 ni kusut akumangana, kuyibombakesh awonsu pamwing.

Mwikadil ik wa mu spiritu wadinga ku yitentam yiney? Mazu ma mutapu ik mayilondinau ku maradio, matelevizion ni mu majurnal? Mutapu ik wovau in kukumangan kupwa kwa yitentam?

Kwirijek

Kwadinga kuchingejin kusanger nakash pakach pa angendj pamwing ni Atuman a ndond yasadikina yitentam mulong wa yitentam yadinga yichingejinau yikutwisha kuyivurish yisu yiney ya mu spiritu. Kutenchik ndond jiwanyidina ja kulal angendj eza wadinga mudimu ujim nakash. Chilakej, pa chitentam chasadika mu Chorzów, Atuman a mu Pologne itiyija kwak ku yikumbu yau angendj 13 000 adiokala kwi Mputu ya Kwingangel. Angendj eza ku chitentam adiokala mu Arménie, Belarus, Estonie, États-Unis, Géorgie, Kazakhstan, Kirghizstan, Lettonie, Lituanie, Moldavie, Ouzbékistan, Russie, Tadjikistan, Turkiménistan, ni Ukraine.

Angendj avud chayifanyidina kusambish kwirijek mulong wa maweny mau angond avud kurutu kwa chisu. Tatiana, mwin kulejan wa chisu chawonsu wa mu Kamchatka, ditung dia mu Russie didia kwindum kwa Japon, wasambisha kutul nfalang ja weny muvu umwing kurutu. Wading ufanyidin kuya weny wa makilometre 10 500. Cha kusambish, wakandama kajil wa yikung asaa 5 a weny, wakandam mu mashuw machuku masatu ma weny, ni kupwa wakandama motak asaa 30 chakwel ashika ku Chorzów.

Tunan twa antu ipana kusal mudimu ku chitentam, arijeka yiwandj ni kuns-kuns kway chakwel yikala jindond jifanyidina mulong wa kwifukwil. (Kuvurik Yijil 23:14) Tujimbula chilakej chimwing kusu, mu Leipzig Atuman a kwinikwa asala mudimu uwamp wa kukomb chiwandj, ni alonda kand anch mwamu mukusalau kupwa kwa chitentam. Mudi chibudikin, in kwimanyin chiwandj apula mapaper mafundau mulong wa kuyifut nfalang chakwel kusadil chiwandj ni jakwasha mulong wa kufutin kuchitokish.

Diladikij

Mu mangand mawonsu yikumangen yangana chijikish cha yitentam “Dipandish Didi Piswimp!” Antu inay afanyidina kukumangan ku yitentam ya pakampwil asala kampany winou nich kuzangurok kujim. Adandamena kulejan chitentam djat ni urel wa dichuku dialondula dichuku dia kusambish kwa chitentam. Ov, mushiku wau wasonga mabuj mawamp?

Bogdan, Kaman mwin Pologne wasankanijana ni ipal umwing wasota kukumangan ku chitentam cha distrik pakwez walonda anch nfalang jend jikepin kakutwishap kuya weny wa makilometre 120 ku Chorzów. Wajingunina anch mu motak ukutwala chikumangen mukwikal ndond yakad muntu. Bogdan ulondil anch: “Twamuleja muntu winou anch tukuya nend pamwing pakad kufut anch wez kwi ndond tukukandamina pa chisu cha 5:30 pamanch.” Ikundj witiyija diladikij ni wakumangana ku chitentam cha distrik. Kwinyim wayifundina akadivar, walond anch: “Kupwa kwa kukumangan ku chitentam chinech cha distrik, nakwat kal mupak wa kwikal muntu muwamp.”

Ikundj umwing wa mu Prague wadinga ushich mu otel umwing mwadingau in kukumangan adiokala mu Grande-Bretagne wayileja in kukumangan pa urel umwing anch niyend wakumangana ku program wa dichuku dinidia. Ov, chom ik chamubachika aya kukumangan? Ikundj winou walonda anch piswimp in kulejan dikum kushalijan amwinkisha diladikij padingay mu mikombil ya musumb, chawiy wiyova anch chimufanyidin aya! Washimoka nakash ni wova maku makash ma kwilej yom yivud.—1 Timote 2:3, 4.

Program Muwamp wa mu Spiritu

Program wisambina mutapu wa kupwish milong kushalijan. Chiyul cha Bibil chikasikeshina chalejana mutapu wa kupwish milong yiney ap kujijaman.

Antu amena mar ma upal, mayej, afisha kal akatish nau, ap akweta milong yindjing ayikasikesha nich Bibil mulong wa kuyikwash kwikal nich ruchingej ruwamp mu mwom. (Kuseng 72:12-14) Ambay atijadina ni anvaj atesha yiyul ya Bibil piur pa mutapu wa kusanger uruw ni mutapu uwamp wa kuyilil an au. (Mulej 4:12; Efes 5:22, 25; Kolosay 3:21) In Kristu ansand—arishina tutaku nich yipwichik ya arund ayimp ku shikol pakwez atambwila chiyul cha manangu cha Dizu dia Nzamb kwolikwau ni mu chikumangen—atambula yiyul yiwamp piur pa mutapu wa kura nich yipwichik ya antu ni mutapu wa kuchin “maku ma usand.”—2 Timote 2:22.

Ukadivar Wakin wa pa Mangand Mawonsu

Atuman a Yehova atambwiling chisu chawonsu umutakel wa Bibil ku yikumangan yau. (2 Timote 3:16) Pakwez, chom chisadila anch yitentam yiney ya distrik yikala ya pakampwil, chadinga kuwap kway pa mangand mawonsu. Yitentam yawonsu ya pakampwil yalejana program umwing wa mu spiritu mu jindim jivud. Dichuku ni dichuku, yid ya Chisak Chitakedila cha Atuman a Yehova yasala ma diskur, ni jinsangu jisangareshina ja ngand jikwau jawejinaku musangar wa pakampwil. Madiskur minam ni jinsangu jinej ajikarumuna mulong wa antu a yisak ya jindim jikwau ataninamu.

In kukumangan asala usu wa kwisamb ni akadivar ni anambaz a jingand jikwau. Ngez umwing walonda anch: “Kushalijan kwa jindim kwaletap mulong ap umwing. Pakwez, kwawejina ku kuwap kwa chinship. Angez adinga nich yishankur kushalijan, pakwez adinga awonsu ovijadin mu ritiy rimwing.” Antu akumangana ku chitentam cha mu Munich alonda anch: “Aurikin ku rudim pakwez ovijadin mu rukat.” Chikalap ngand yau ni rudim rau, antu akumangana iyova anch adinga mukach mwa arund akin—akadivar ni anambaz a mu spiritu.—Zakariy 8:23.

Mazu ma Kujikitish

Chirung cha chisu cha yitentam mu Pologne chapaka ngikadil ni kujijaman kwa in kukumangan. Kwadingap kusu ruval wadinga ni kunak pakwez kwadinga kand mashik makash—piswimp 14 °C. Mukadivar umwing wa mu États-Unis walonda anch: “Chirung chadinga chiyimp nakash ni kand kal nimanangap tamperatir wa mwishin mudi winiwa ku chitentam, ni nateshaku yom yikemp ya program. Pakwez ngikadil yamushena ya chirungil cha antu a ngand jivud, ngikadil ya manangu yikwamushena, ni kwakan kwa pakampwil yaswinkana yom yiney yawonsu. Chikasiken kuvuramen chitentam chinech!”

Chom chikwau chakad kuvuramen kudi in kukumangan in Pologne chadinga chijikish cha kubudikin kwa buku Étude perspicace des Écritures mu Chipolone—chipan chamushena mulong wa kujijaman kwau ku mashik ni ruval. Kubudikin kwa buku musu Vivez en gardant à l’esprit le jour de Jéhovah kwaleta musangar ku Yitentam yawonsu ya distrik “Dipandish Didi Piswimp!”

Antu avud adingaku akez kuvurik chitentam chinech mulong wa mayingishin makwau. Kristina, nambaz wa mu Tchèque wipana kutwal chisak chimwing cha miotak cha in kukumangan angendj, uvurikin anch: “Pa chisu twayiladika nambaz umwing wambwikata, wanlam ba, ni walonda anch: ‘Niyov kal nawamp nakash! Watuletina yakudia ni kutwinkish mem ma kuna. Wajikit amboku mulong wa kwipan kwey kwa rukat.’” Chom chadinga chisambidinay chadinga ditenchik dia yakudia mulong wa in kukumangan angendj. Mukadivar umwing walonda anch: “Wadinga mudimu wa rukat wadinga kand kal ausalap. Mudimu wadinga wa kupan yakudia piswimp 6500 dichuku ni dichuku. Chadinga chikasikeshina pa kuyiman antu avud, pamwing ni an, ipanina mulong wa kukwash.”

Nambaz umwing wadiokala ku Chorzów kudiokal mu Ukraine weza ku chitentam cha distrik walonda anch: “Tudi abachikinau nakash kud rukat, kubangin, ni muchim wa kupan watumekeshinau kudi ambay netu akaritiy. Tukwetap mazu mitukutwisha kusadil mulong wa kujikitish.” Annika mwan mband wa mivu chinan wa ku Finlande wafundina biro wa mutiy wa Atuman a Yehova wa mu Pologne anch: “Chitentam chadinga chamushena nakash kupandakanamu munadinga ni kutongin. Chipandiken kuwap kwikal mu dirijek dia Yehova, mulong ukutwish kwikal ni arund mu mangand mawonsu!”—Kuseng 133:1.

Yirumburil ya in Kutal

Kurutu kwa kusadik kwa yitentam ya distrik, angendj amwing anyingumoka kuya ni kutalijol yom. Ku mutambu wa Bavière, angendj imana atal Yot ya Want, mwayakinau kudi Atuman a kwinikwa. Antu amwing akad kwikal Atuman in kutal ashimoka nakash pa kuman rukat rimekeshinau akadivar. Ngendj umwing ulondil anch: “Patwadinga mu motak pa kuchirik ku otel kutwadinga, muntu watutwala kutal walonda anch twadinga tushalijadin ni antu akwau adinga kuya ni kutal. Twadinga tudjit nawamp, ni twadinga twovijadin ni antu adinga atakedila. Kwadingap kusalijan ni kanvundangesh. Washimoka pa kuyiman angendj ikala arund mu kachisu kakemp kusu.”

Mukadivar wadinga usadidila ku Departema wa Jinsangu ku chitentam cha distrik cha mu Prague walonda anch: “Diarubing pamanch, mukurump wa ampurish watumau ku chitentam watwendina. Wamana anch kudi chisambu ni walonda anch kinikwetap cha kusal kunoku. Walonda kand anch antu amwing ashicha piswimp ni chiwandj adinga iyipwil mutapu ukwikalay program. Pajimbulay Atuman a Yehova, wom wayikwata, pa chinech mukurump wayileja anch: ‘Anch antu ading nich yaku mudi ya Atuman a Yehova, ing ampurish kadingakwap.’”

Antu Avud Apandishau Kal!

Bibil, Dizu dia Nzamb, didi mudi chau pakach pa yishankur kushalijan, ukat kuyikadish in Kristu pamwing mu chisambu ni kwovijan. (Rom 14:19; Efes 4:22-24; Filip 4:7) Mwamu mwasala yitentam ya distrik ya pakampwil “Dipandish Didi Piswimp!” Atuman a Yehova apanda kal ku yipupu yivud yimeshina mangand mar. Kulik kwovijan, chisum, ni katond ka ulombu wa chikit—anch twajimbul kusu yikokujol yikemp yimenau antu—yidiap kand mukach mwau, ni achingejin kurutu pa chisu chikeza mangand kwikol ku milong yiney.

Antu akumangana ku yitentam yiney ya distrik amana cha kusambish kwovijan kudia pakach pa Atuman a jingand ni yishankur kushalijan. Chom chinech chamekana patok kwisudiel kwa yitentam ya distrik. Antu awonsu abula nkash, ayibwikata arund asu, ni akwatijana yipich ya nsudiel. (1 Korint 1:10; 1 Pita 2:17) Asanger ni itiyijin anch kupand ku milong yawonsu ni kuyibangin kudi piswimp, angendj achirika kwolikwau ni ku yikumangen yau nich mupak usu wa kudandamen kulamat ba ku “dizu dia kupand” dia Nzamb.—Filip 2:15, 16.

[Mazu madia kwishin kwa paj]

[Kamushet/Chipich chidia pa paj wa 10]

Jindim Makum Maad ni Musamban Jalondilau Mudi Rimwing

Ku yitentam ya distrik yawonsu chidivu, asutisha program mu rudim rilondinau ndond yiniya. Pasalau yitentam ya distrik mu Allemagne, madiskur amasala mu jindim jikwau 18. Mu Dortmund ma diskur amasala mu Chiarabe, Farso, Chiputulukesh, Chiespanyol, Chirusi; mu Frankfort asala mu Inglish, Français, ni mu Chiserbi ni Chikroas; mu Hambourg asala mu Chidanwa, mu Chinerlande, Chiswis, ni Tamil; mu Leipzig asala mu Chishinwa, mu Chipolone, Chitirk; ni mu Munich asala mu Grek, Chitaliyen, ni mu Chialema cha Yijingidij. Chitentam chasadika mu Prague asala madiskur mawonsu mu Chichek, Inglish ni Chirusi. Mu Bratislava asala program mu Inglish, Chihongri, ni Chislovak ni mu Chislovak cha yijingidij. Mu Chorzów mazu masadilau madinga Chipolone, Chirusi, Chiukren, ni Chipolone cha Yijingidij. Ni mu Poznan, asadila Chipolone ni Chifinland.

Jindim jawonsu jadinga makum maad ni musamban! Chakin kamu, in kutentam adinga aurikin ku jindim, pakwez adinga ovijadin mu rukat.

[Chipich chidia pa paj wa 9]

Angendj in Croate adinga mu Frankfort asangara pa kutambul “Traduction du monde nouveau” mu rudim rau