“Dizu dia Uprofet dia Nzamb” ​—⁠Chikunguril cha Distrik cha 1999

¹ In Isarel padingau piswimp ni kwandam mwi Ngand ya Kushilamu, Moses wayikasikesha kuman nich usey mafundish ma Nzamb. Wayileja anch: “Didap dizu diamwamu kud en, pakwez dizu dined dirumburikin mwom wen.” (Kuv. 32:​45-47, NW) Ov tudap in kujikitish kud Yehova pa kuman anch mwom wetu ukwet usey ujim ku mes kwend chidandamedinay kututakel nich Dizu diend dipandikena usey? Chawiy lel tuchingedin nich impu yijim Chikunguril cha Distrik cha machuku masatu “Dizu dia Uprofet dia Nzamb” ni yiturijekidinay Yehova pa chisu chinech.

² Muvu unou, atenchikin kusal yikunguril mu misumb 59 ya République démocratique du Congo. Malejan akumapan mu français, Kiluba, Lingala, Monokutuba, Otetela, Swahili, Tshiluba ni Uruund. Kukwikal kand program wa rudim ra yijingidij ku Kinshasa mulong wa atujikamatu.

³ Chakin anch wirijekinany kal mulong wa kwikal ku chikunguril dichuku ni dichuku mulong witiyinany anch Yehova ndiy ukutazukinanya. Ijikany anch Yehova umen usu ni kwipan kwipaninau atushalapol end mulong wa kwikal ku yikunguril yiney ni ukez kayivurik nich masamun. (Heb 6:10) Anch twikaliku machuku masatu mawonsu, kudiosh ku muminy wa kusambish kushik ku dilembil dia nsudel, tumekeshin kud Yehova anch tumen nich usey ujim mazu matwinkishay. (Kuv. 4:​10, NW) Tumekeshin kand kujikitish kwetu mulong wa mudimu ukash usadilau akadivar avud mulong wa kurijek yikunguril.

⁴ Kukumangan kwa tunan tuvud twa atushalapol a Nzamb ndond yawonsu yisadidilau chikunguril kwitining kwirijek ni dirijek dimwing diwamp. Chitwija anch yirijek mulong wa chikunguril ayisadil nich rukat, tukwikal abachikinau kusadil pamwing chakwel ‘kusal yom yawonsu ni kuyirijek nawamp wakad kurumbangan.’ (1 Kor. 14:40) Jinsangu ni yivurikish yilondwila ayiletin chakwel utwishany kushik ku chikunguril tayad mulong wa kusadil yakudia ya muspiritu ni ukadivar wa Ukristu ukupana chikunguril.

Kurutu kwa Chikunguril

⁵ Ov antu in kusanger Baibel ap amwilejina netu aswiridin ukwash chakwel kwirijek mulong wa chikunguril? Yikuteshau ni kuman ku chikunguril yikutwish kuyibachik chakwel niyawiy ikala in kumwifukwil Yehova. (1 Kor. 14:25) Amakurump afanyidin kwikal tayad kuman yidi ya chikumangen yiswiridina ukwash piur pa ndond ya kushiken (ndond ya kulal) ap mwa kwendil, nakash antu ananapina kal, ni kutal anch ayikwasha nich rukat.​—⁠Gal. 6:⁠10.

⁶ Ov wakwatinany kal yitenchik ya nsudel mulong wa ndond ya kushiken? Anch watongidinany kushiken ku yikumbu ya akadivar pa chisu cha chikunguril, ov wizwishinany kal dipapel dia kwitin muzu wa kulal? Ov walejenany kuvul kwa aan akukubachikijanya, anch uyikwetany? Kalam’a ujindj ufanyidin kutum pakad kulab kusutin adres wa chikunguril mapapel mawonsu ma kwitin muzu mafwachikinau kud Komite wa mudimu. Chidi chipandikenamu usey kuyijikishamu akadivar akutambula aeny kurutu kwa chisu chakwel irijeka kuyitambul kol kwau.​—⁠1 Kor. 14:⁠40.

⁷ Mulong mudimu wa umwingang udi kusu mulong wa yak, tukwitinany kwisendil amboku aspirin wen, maband men, mon ya chipwembu, mon yen ya mwivumu ni yom yikwau ya chilik chimwing yiukutwishanya kwikal nich kuswir. Anch amwiney ap chidi cha dijuku dien ukwet musong kanang​—⁠mud musong wa rudung, diabète, ni yikwau yikwau​—⁠chiwapidil kwikal ni mon yifanyidina, mud kamu chiudingany kol kwen ap mu konje. Chidi cha manangu anch muntu mud winou amubachikija kud chidi cha dijuku ap murund nend wa pa muchim wija ngikadil wend ni ukutwisha kwijik mutapu wa kumukwash.

⁸ Piukasinanya weny wa kuya ku chikunguril ap piuchirikinany, ukutwishany kwikal ni chisu cha kupan uman wa kukashimun. Ov ukwikalany tayad kupan uman kud akwau? Etu awonsu, pamwing ni aan, tukutwish kupan trakt kud antu tukusankana. Chakin anch ukwikalany ni chisu cha kupan mamagazin, mabroshir ap mikand yikwau kud antu asangeridina uruu. Ikalany tayad kupan uman wa kukashimun kud antu aburedinau kushiken nich milad ya kulejan yijikena. Tukutwish kuvuvurish yisu yivud ya kupan uman anch tudjadil chijingidij chetu pituyila ku chikunguril ni pituchirikinaku.

Chisu cha Chikunguril

⁹ Yis ya ndond yikusadilau chikunguril yikwikal wash dichuku ni dichuku pa 8:00. Chawiy lel ukutwish kulamin ndond ya kushakam ching kusu yidi ya dijuku diey ap antu wezina nau pamwing ku motak. Akurijek ndond ya akadivar amapal, ni ndond ya ayilim ni antu akata kwendil mwi nking ya ayibid. Tusotin kuyitongin antu mud inay ni kuyimekeshin muchim wetu uwamp. Kwisudiel kwa dichuku ni dichuku, piukudiokalanya pa ndond ushichany, talany nawamp anch uvuramedinanap chom ap chimwing.

¹⁰ Ov ukubabatishiu ku chikunguril? Mulong wa chikunku cha Diampos pamanch, akutek jinkwas mulong wa antu akubabatishiwa. Departema wa ankwash ukukutakelany kwi ndond yiney. Anch kamu chitwishikin, shakamany pa ndond yiney kurutu chikunku chisambisha. Isendila amboku Baibel wey, buku wey wa miminy, diswin dia kwikusumun nich ni yidjal yifanyidina ya kubabatishiu nich. Maswin ma loyis (jeans) makukatul, mipil pafundodilau ap maswin makwau ma chilik chimwing yifanyidinap bwat mulong wa chinship chinech cha usey. Amakurump ashinshikidina yipul ya buku Notre ministère ni antu akubabatishiwa akutal nawamp anch antu inay apateshin nawamp. Dibabatish chididia chijingidij cha kwipan kud Yehova Nzamb, chifanyidinap anch antu akubabatishiwa akwatijana ku makas pa chisu chikuyibabatishau.

¹¹ Yisaj ya kukwatin yipich ni mazu akutwish kuyisadil, pakwez chifanyidinap kuzuwol akwau, kunyingumok nich mu tubway mulong chinech chikutwish kuyikangesh in kukumangan kuman ap kuyizuwol kulondul program. Yisaj yiney chifanyidinap kuyinungin kwi nshing ja nzembu ap ku yijimbish mazu.

¹² Mulong wa kuswakej yom ni kwikal ni chisu, Sosait wayitin in kukumangan kusend dichuku ni dichuku yakudia. Akadivar amwing alondwil ditenchik dined ni kuman anch chading chiyitwishikidin, pa chisu cha kupim pa midi, kushakam pamwing ni yidi ya dijuku diawu ni kudia yakudia yau. Avud alondining anch akat kwisakin chisu chinech cha kwiswedish ni kusutish chisu chivud ni akadivar ni anambaz au. Pa chinech chiyifanyidin kuland yakudia kurutu kwa chisu ni yakuna ni kuyitek mu sakosh mukemp ap mu termus wa yakudia ukutwishau kutek mwishin mwa nkwas yishichau. Tuyitin in kukumangan awonsu kusal mwamu. Katat kamu ak, amakurump a yiwanj ni in kulandish yakudia adinga kwiswimp ni ndond tukata kusadil yikunguril amen anch akadivar akat kushang ndond yisadidilau chikunguril mulong wa kuya ni kuland yakudia piswimp. Amwing pakach pau asotin katat anch ayinkisha mbil ya kufungul ndond yau ya kulandishin ni kusambish kulandish yakudia kud in kukumangan ku chikunguril. Anch ayinkish mbil yiney, antu avud a pol akutwish kubombakan netu chisu cha chikunguril. Tukuman kand antu ilongidina mu milong yilemp mulong wa kuchingel kuland yakudia; chinech chikuyipish mwikadil wa kwiswedish wa yikunguril yetu. Chawiy lel tumwitin muntu ni muntu kwez ku chikunguril nich yakudia yend ni yakuna yend dichuku ni dichuku. Antu achisotina ukuyanya nau pamwing, afanyidin niyawiy kusal chilik chimwing. Manung ma kam ap ma makalash ni mar maswejina kimanyidinap kwez nich ku chikunguril.

¹³ Ov ukutwishap kwipan mulong wa kusal mudimu wa kwikatin mulong wa kukwash dichuku ni dichuku kukomb ndond kwisudiel kwa chikunguril? Ov ukutwishap kupan ukwash wey mu departema ap umwing ku chikunguril? Anch ukutwish, uwapidil kufundish dijin diey ku departema wa mudimu wa kwikatin, ku chikunguril. Aan akweta mivu mwishin mwa 16 niyawiy akutwish kupan ukwash wau anch asadidil pamwing ni anvajau ap mukurump mukwau. Etu awonsu tukutwish chakin kuwejin ku kwinang kwa ndond yitukumangedina anch twanon ni kudjibwil mapapel ni yishoshot yikwau mu yimpay ya buchafu.

¹⁴ Twatambwil yiyul yipandikena kuwap piur pa yidjal ni kwileng yifanyidina ku chikunguril, chilikej yiyul yidia mu awenjil a Mudimu Wetu wa Want; kudi kand yifwatul ni yipich yidia mu mikand yetu, ni nakash kamu yilondinay Yehova mu Baibel. (Rome 12:2; 1 Tim. 2:​9, 10) Antu ij nawamp chitudinga ni mulong wak tukumangena mu musumb wau. Mutapu wetu wa kudjal ni kwileng yiding komb lel uman ukweta usu. Atushalapol a Yehova avud akat kupanang chilikej chiwamp pa chinech. Pakwez, chisu chimwing ni chikwau tumening spiritu wa mangand ukata kumekan mu mutapu wa kudjal ni kwileng kwa in kukumangan amwing ku yikunguril. Anch muntu wadjal maswin makad kufanyidin, akutwish kutadik anch walond anch nidi muntu umwing wa muspiritu. Yidjal yifanyidina, yinangina ni yiwamp yikat kusangarishang. Mitu ya majuku yifanyidin komb lel kutal nawamp maswin matongidina yidi ya dijuku diawu kudjal. Chinech chidi kand chakin pitudia pol pa ndond ya chikunguril. Kudjal kwa chijingidij chetu kurutu ni kwinyim kwa chikunguril kutumekeshin anch tudi antu ishitwila a Yehova.​—⁠Tal Mako 8:⁠38.

¹⁵ Chamupepilau kud Nzamb, mwant mwin manangu Salomon walonda anch “usup aukasidil mu muchim wa mwanikanch” ni kulond anch ‘mwan ulikinau mwamu ndiy ukez kamukwatish makwend usany.’ (Jnsw. 22:15; 29:15) Pa chisu cha program, Atuman ansand alikinau pakad kuyital akat kuzuwolang akadivar akat kusal usu wa kutambul mafundish mapaninau. Ku yikunguril ya muvu wadap ou, twamen ansand ashicha ndond ya kwiur ya chiwanj ni kukwat in kukumangan yipich. Chimunyik chidiokilaku chipandiken ni chikutwish ap kulemp, kuyipish mes ma antu amunyidikidinau. Chakin anch ansand inay kisakidinap mafundish ma muspiritu mayirijekidinau. Anvaj akwet chisend kurutu kwa Yehova mulong wa ngikadil wa aanau, pakwez tatuku ap maku ukutwish kwijik anch aanend akat kutesh mafundish ma Yehova ni kumalondul ching kamu anch ashich piswimp nend. Akadivar a departema wa ankwash akumulondul mwawonsu uzuwodila in kukumangan mulong wa kumwit akarumuna mwikadil wend ni kumwit nich rukat kulondul program.

¹⁶ Chitutambwilinga aeny ku yikunguril yetu, chidi cha manangu kulam aanetu ni yom yetu. Aanetu chidi chipan cha usey cha Yehova; pakwez twij anch mangand makat kumekeshang spiritu wa wibwambol wa Satan. Chawiy lel ijikany chisu chawonsu kudia aanen. Lamany nawamp yisaj yen ya kukwatin yipich, nsapu yen ni yom yikwau yikwau ya usey; kangal wayishany ndond yiushichanya. Fungany nich afungul yis ya motak wen, tekany yom yen mu mushet wa motak ap yisendany. Chak cha kwandam mu motak wen chikukep.

¹⁷ Chikasikeshin kuman akadivar nau anambaz chifundinau milong yijim pa chisu cha program. Anch twafund milong yijim mu wiswimp chinech chikutukwash kuta matu ni kuvurik yitongijok yijim. Kushinshikin kwa yitufundina mu dijuku ap ni arund kukutukwash kutongin manans majim ma chikunguril ni kulik kumavuramen.

¹⁸ In kumwifukwil Yehova imekeshining pichuku pichuku mud antu akweta muchim wa kupan mulong wa kwamburil yisakin ya uteokras. (Kubud. 36:​5-7; 2 Jins. 31:​10, NW; Rome 15:​26, 27) Milambu yen ya kwikatin mulong wa kwamburil mudimu wa mangand mawonsu yikutwishish kufutin ndond yijim yifanyidina mulong wa kusutish chikunguril.

¹⁹ Mu Amos 3:7 (NW), Yehova ulondin anch “kakusalap chom ap chimwing pakad kulejan mulong wend wa ujindj kud atushalapol end aprofet.” Chidiay “Mwin kumekesh yom yijingamina,” Yehova wafundishisha mu Baibel yitot ya mauprofet mashikena mawonsu chakin. (Dan 2:​28, 47) Kushilamu kupandikena kuwap kufanyidin kand kushiken. Yikunguril ya Distrik ya 1999, “Dizu dia Uprofet dia Nzamb,” yikukasikesh ritiy retu mu kushilamu kwa Nzamb. Tutany matu ku dizu ditulejinay Yehova. Tusadilany yitukumana ni kutesh​—⁠mu chingand, mu chikumangen ni mu mwom wetu. Tumwitin Yehova ayukisha yawonsu usadilany mulong wa kwikal ku machuku masatu mawonsu makwikala musambu upitishina wa muspiritu.

[Mutu wa mulong udia pa paj wa 3]

Tonginany kwikaliku machuku mawonsu: Diakatan, Diampos ni Diarubing.