Chitentam Chetu—Chimekeshining Uman wa Usu Piur pa Uyakin

1. Ov, misambu ya yirung yayinkisha in Isarel chisu ik cha kumekesh ni kwisambin pa uyakin wa muspiritu wa usey?

¹ In Isarel a pasak akumangananga tupamp tusatu pa muvu mulong wa misambu ya yirung. Ap anch amakundj awiy kusu ela kukumangan, yisu yivud majuku min mawonsu maya ku Yerusalem mulong wa kusangar yitentam yiney. (Kuv. 16:15, 16) Yinship mudi yiney yading yisu ya kutongijokin ni ya kwisambin pa uyakin wa muspiritu wa usey. Ov, wisu umwing wa uyakin winou? Wakusambish udi anch Yehova udi mwin kupan, Mwin rukat. (Kuv. 15:4, 5) Wakaad udi anch ndiy ukutwish kwikal mwin kupan umutakel ni diking. (Kuv. 32:9, 10) In Isarel afanyidina kand kutongijokin anch awiy ading antu mulong wa dijin dia Yehova, awiy afanyidin kumekesh kutentam kwend. (Kuv. 7:6, 11) Nlel unou, chitentam chetu cha pa muvu chikweting chiyukish cha mutapu umwing.

2. Ov, mutapu ik program wa chitentam ukeza kumunyik uyakin?

² Program Umunyikininga Uyakin: Ku yitentam yetu, tukat kusangerang madiskur, madram, yakumenaku, ni mainterview yimunyikininga usey wa uyakin wa mu Bibil. (Yoh. 17:17) Katat, asadil usu wawonsu chakwel chitentam chezina kurutu oku chisadik. Dirijek dia Yehova dirijekin program wa pakampwil utondinau kwambatan nich maswir ma katat ma mudimu wa chingand wa pa mangand mawonsu. (Mat. 24:45-47) Ov, wirijekin kal chakwel ukamana ni kutesh yom yikeza kusadik?

3. Ov, chom ik tufanyidina kusal chakwel tutaninamu ku program winou?

³ Chakin kamu, tukez kutaninamu ching kusu anch twikalaku ni twapwitin jinkeu jetu mu machuku mawonsu masatu. Anch kandikal usala mwamu, mwijikisha mukurump wey wa mudimu piur pa kutambul konje. Itekina chisu chiwanyidina cha kulal tul nawamp pichuku-pichuku chakwel utwisha kulondul nawamp program. Antu avud amening anch kudandamen kupwitin jinkeu jau padiay mwin kulond ni kufund manans majim makeza kuyikwash kuchirikin. Kangal kulikidil telefon wey ap chom chimwing chikwau chikuzuwol ap kuyizuwol antu akwau. Ipuk kwambamb, kutumol jinsangu mu ma telefon, kudia, kuna pa chisu cha program.

4. Ov, mutapu ik anvaj akutwishau kuyikwash anau chakwel ataninamu pa chisu cha chitentam?

⁴ Pa muvu wa Sabat, padingau majuku ma in Isarel ni kukumangana mulong wa kutesh kutang kwa Yijil pa chirung cha Musambu wa Ankunku, awiy ading ni ‘anau chakwel niyau atesha, ileja.’ (Kuv. 31:12) Chidi chom chikasikeshina mud ik pa kuman majuku mashicha pamwing pa chirung cha chitentam ni ansand achila ku mes ni kupwitin jinkeu jau! Ov, ukutwishap urel win wawonsu kushinshikin pa yom yiwafunda ni kwisambin pamwing manans ma program wa pakampwil miwasangera? “Usup aukasidil mu muchim wa mwanikanch” chawiy, en anvaj salany usu wa kuyilam anen, kuwejinaku an akweta dikum dia mivu, pa chisu chakudia yakudia ya midi ni ap ku otel, pa ndond pa kuyilik ‘aletisha usany.’—Jinsw. 22:15; 29:15.

5. Ov, mutapu ik mwikadil wetu uwamp chisu tudia ku otel ukeza kutumbish uyakin?

⁵ Mwikadil Wetu Uwamp Utumbishining Uyakin: Mwikadil wetu uwamp mu musumb ukusadikina chitentam ukutumbish uyakin. (Tit. 2:10) Antu a ku otel ashinshikina chisu chisak cha antu chashakama ku otel chaziyila ku umutakel wa mwin otel ni amekesha kushimpish muchim ni ranaken kudi in kusal mudimu a ku otel. (Kol. 4:6) Chisu antimesh a biro wa mutiy isamba pamwing ni mwin otel mu muvu wasutin ou, Mwant Mband wa ku Otel wayileja anch: “Tukatining antu en kwez ku otel wetu mulong ading antu awamp. Akweting yaku ni untu uwamp, ni yisu yin yawonsu akat kuyisadin antu in mudimu a ku otel nich kalimish.”

6. Ov, mutapu ik tukutwisha kutumbish uyakin kusutil ku kudjal maswin mu musumb usadikina chitentam?

⁶ Chisu tudjitinga badj wetu wa chitentam, chidingap kusu chijingidij cha kumekesh chitentam ni chikwashina kuyijingunin in kukumangan akwau pakwez kand mulong wa kupan uman kudi antu atumena. Antu adia mu musumb usadikina chitentam akez kuman anch antu adjita badj wa chitentam adjit nawamp ni pakad kwimekesh, pakad usweral ni maswin malangwishina maku madia mu mangand. (1 Tim. 2:9, 10) Chawiy lel, tufanyidin kupwitin jinkeu pa mutapu wa kudjal ni kwileng kwetu mu musumb usadikina chitentam, kuwejaku chisu tupanina majin metu ku otel. Kwez mu tupulut ni mu mipil ya kufundol kukezap kumesh katumb. Ap anch chitentam chikwikal mwin ndond yakad kutung nawamp, maswin metu mafanyidin kumesh katumb. Anch tusotin kuswimp maswin kupwa kwa program ni tusotin kuya ku restoran, tufanyidin kuvurik anch chisu chawonsu tudi in kukumangan a chitentam ni tufanyidinap kudjal maswin ma usweral.

7. Ov, mulad ik umwing wa kusanger uumwing wetu wa win Kristu pa chisu cha chitentam?

⁷ Ku misambu ya yirung, in Isarel akasikesha chirungul cha urund pamwing ni ambay in kwifukwil adiokal ku michid yikwau ni mangand, ni chinech chakasikesha uumwing. (Mid. 2:1, 5) Pa chisu cha chitentam urund wetu wa pakampwil ni akadivar in Kristu ukez kumekana nakash. Mwikadil wetu usangareshina wa paradis wa muspiritu winou uyishimokishining antu atutadilinga. (Kus. 133:1) Pa ndond pa kuyilik akadivar ni anambaz tushicha nau piswimp kuya kuland yakudia pa chisu chakudia, chiwamp mud ik kusend yakudia yiwanyidina ni kwitekin yisu yifanyidina ya kusankanijan ni kwisamb nau!

8. Ov, yiyingish ik yidiaku ya kusal mudimu wa kwipan anch mikadil yetu yitwishikin?

⁸ Yisu yivud antu atumeninga ashimokining kusutil ku kwirijek kwetu kuwamp ni mutapu tutenchikininga chitentam, pakampwil chisu chayilejau anch midimu yawonsu ayisadining kudi antu in kwipan. Ov, ukutwish ‘kwipan amwiney kwa kwisotin’ ku mudimu wa ku chitentam? (Kus. 110:3) Yisu yivud dijuku din diawonsu dikat kusal mudimu wa kwipan mudi njil ya kuyijidish anau. Anch uding mwin usany, kusal mudimu ku chitentam udi mulad umwing uwamp wa kusankanijan ni in kukumangan akwau. Nambaz umwing walonda anch: “Kudioshaku dijuku diam ni arund akemp, nijikap antu avud kwinikwa.” Pakwez, pinasambisha kukwash kudiosh yishoshot, nasankanijana ni akadivar ni anambaz avud. Chasangaresha nakash! Mutapu uwamp wa kutanduril urund wetu udi kusutil ku kukumangan ku chitentam kukez katuletin musangar nakash. (2 Kor. 6:12, 13) Anch kandikal usalap mudimu wa kwipan, yipula amakurump mutapu ukutwish kuwanyish yitinau chakwel uusala.

9. Ov, mutapu ik tukeza kuyitazuk antu akwau chakwel eza kukumangan ku chitentam?

⁹ Kuyitazuk Antu Akwau chakwel Eza Kutesh Uyakin: Mudi pasak, mbing jisatu kurutu kwa kusambish chitentam chetu, tukez kwipan mu kampany wa kuyitazuk antu akwau chakwel eza akumangana. Yikumangen yikez kusot kuwanyish teritwar wau mujim anch chitwishikina nich maladikij. (Tal mushet “Ov, Mutapu ik Tukeza Kupan Diladikij?”) Maladikij mamwing ma kushalaku mafanyidin kumasend ku chitentam. Maladikij minam akutwish kumasadin kudi in kukumangan mulong wa kupan uman wa kukashimuk mu musumb usadikina chitentam.

10. Lejan uman umekeshina anch kampany wetu wa kupan diladikij uletining yibudikin.

¹⁰ Ov, antu itiyijining ku kampany winou wa pa muvu? Ku chitentam chimwing mwin kukumangan wayikwasha ambay aruw kutan ndond ya kushakam. Awiy amuleja anch atambula diladikij ni “amana anch chisangareshin.” Chawiy, asala makilometre 320 Km mulong wa kukumangan! Chilakej chikwau, nambaz umwing wading ni kusal mudimu wa ku chikumbu ni chikumbu wapana diladikij kudi ikundj umwing wasangera piur pa chitentam. Chawiy, ndiy witekina chisu cha kwisamb nend pa diladikij. Mu machuku makemp kupwa kwa kukumangan ku chitentam, nambaz wamumana ikundj ni umwing wa arund nend ku chitentam ni ading asendin umwing wa mikand yisu!

11. Ov, mulong wak kukumangan ku chitentam cha pa muvu kuding kwa usey?

¹¹ Misambu ya yirung yading yitenchik ya rukat yidiokidila kudiay Yehova mulong wa kuyikwash in Isarel ‘amusadil ndiy nich muchim wa kashinsh ni ujijamena.’ (Jos. 24:14) Chilik chimwing kand, kukumangan kwetu ku yitentam ya distrikt ya pa muvu, kutukwashining “kwendil mu uyakin” ni chiding chikunku cha usey wa difukwil dietu. (3 Yoh. 3) Yehova ayukisha amboku usu wa antu in kukat uyakin awonsu mulong wa kukumangan ni kutaninamu nakash!

[Dizu dirumburila chipich chidia pa paj wa 4]

Mwikadil wetu uwamp mu musumb ukusadikina chitentam ukutumbish uyakin

[Dizu dirumburila chipich chidia pa paj wa 5]

Mbing jisatu kurutu kwa kusambish chitentam chetu, tukez kwipan mu kampany wa kuyitazuk antu akwau chakwel eza akumangana

[Kamushet kadia pa paj wa 3-6]

Yivurikish Ya Chitentam Cha Distrikt Cha 2012

◼ Yisu ya Program: Program ukusambish pa saa wa 8:20 pamanch machuku maad. Yis akez kuyazuril pa saa wa 7:00 pamanch. Anch mizik ya kusambish nich yasambish, etwawonsu tufanyidin kushakam pa jindond jetu chakwel program asambisha mu mutapu ufanyidina. Program ukez kupwa pa saa wa 3:55 urel.

◼ Kukwatin pa Kushakam: Ukuyikwatin antu ndond ya kushakam ching kusu uyila nau mu motak umwing ap ushichinga nau ku chikumbu chimwing ap in kwilej ey a Bibil.—1 Kor. 13:5.

◼ Yakudia ya Midi: Tukuyudilany anch muntu ni muntu asenda yakudia yipipela pakwez yikwashina mujimbu. Chifanyidinap kutek mem, chay ap kafe ni masikre mu milond yikutwisha kubarik chakwel yez yayitap antu. Chifanyidinap majuku kwez nich maar malewishina ku chitentam. Anch twasend yom yetu ya kudia, mem ni masikre metu, tukwikalap kand ni maswir ma kuland yom yiney pol. Kulik kuland yom yidia pol pa rupang ra chitentam kukutwinkish dilejan diwamp piur pa kwinang kwetu. (Chijikish: Ijikany amboku anch tukwitiyijap muntu ap umwing kwandam mulong wa kulandish yom ya kudia mwindond ya chitentam.—Yoh. 2:13-17.)

◼ Kwinang: Chameken kal chisu chivud anch, antu akata kuland yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yom yikwau yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya ansh ap chom chikwau kanang), ukwet chisend cha kudjibul mapaper mwi ndond ya kutek yishoshot kangal kumadjibul pansh. Anch twaman anch muntu kanang wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila utukata kwifukwil.—1 Pita 1:15, 16; Kubur. 19:10; Kuv. 23:14.

◼ Milambu: Tukutwish twamekesh kusanger kwetu yitenchik ya chitentam kusutil ku kulambul milambu mulong wa mudimu usadikina pa mangand mawonsu ku chitentam. Milambu yawonsu yikulambulau ku chitentam kusutil ku bank afanyidin kuyilambul mu dijin dia “Association ‘Les Témoins de Jéhovah.’”

◼ Akisidan ni Milong Yikash ya Swa-swa: Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwish kutal kukasikan kwa mayej ni kupan ukwash.

◼ Mwon: Anch unining mwon wakufundinau kudi mwingang, pikil amboku wavuramen mwon ufanyidina kuna mu machuku minam masatu ma chitentam mulong pamwing ap mwon winou ukutwish kuburen kwindond yidia chitentam chakwel uulandany. Chifanyidinap kudjibul jindong ja antu ayedininga musongu wa diabet ap mayej makwau kwindond yarijekinau kudjibwil yishoshot chakwel chisal chinech chez chalet ubaj kanang kudi antu akwau.

◼ Kukwat Yipich: Anch ufanyidin kukwat yipich pa chisu chisutina yikunku, pakwez kangal wasadilany amboku maflash. Kangal amboku wayitazukany in mudimu wa kukwat yipich eza pa ndond yisadikina chitentam. Anch wayimanany ku chitentam, akat kusal mudimu wau wa kukwat yipich, kangal amboku wayisadilany.—Yohan 2:13-17.

◼ Fomu Veuillez suivre l’intérêt (S-43): Tupamp twawonsu tukutanijana ni muntu kanang usangaredina rusangu ruwamp chisu twisambina ni antu ku chitentam, tufanyidin kwizwish fomu Veuillez suivre l’intérêt (S-43). In kulejan afanyidin kusend fomu winou umwing ap maad chakwel amuya nich ku chitentam. Ufanyidin kupanany fomu winou wizwishinanya kudi akadivar alamininga mikand ku chitentam ap kudiay kalam wa mudimu wa chikumangen chen.—Tal Mudimu Wetu wa Want wa pa Ndol-Mem 2011, paj wa 3.

◼ Restoran: Tumutumbishany Yehova mu mutapu wetu uwamp twendina mu jindond ja marestoran. Tulamany dikut mulong wa kufut mu restoran anch twadiamu chakudia.

◼ Ku Tukushakama: (1) Kangal kushakam nau antu avud mu kapalikany ap ndond ya kushakam yakwinkishangau pakad mbil ya mwin chikumbu. (2) Anch uswiridin kuswimp chakwel ulika kwit ndond ya kulal, lond amboku kapamp kamwing. (3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat. (4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau. (5) Kwinang kuding piswimp ni winzamb. Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp. (6) Mekeshany dibuj dia muspiritu mu kushakam nau akwen, ikalap nchik muntu wakwakina ap akadivar akwau in Kristu ukutwish kwikal nau ndond yimwing.—Gal. 5:22, 23.

◼ Mudimu wa kwipan: Muntu mwin mwawonsu usotina kupan ukwash ku mudimu wa kwisotin ku chitentam chinech ufanyidin kufundish dijin diend ku kapalikany katadina midimu ya kwipan. An akweta mivu mwinshin mwa 16 akutwish kand kusal nawamp mu kwipan kusal mudimu ku umutakel wa nvaj ap kalam ap mukurump mukwau ufanyidina kuyilam.

[Kamushet kadia pa paj wa 6]

Ov, Mutapu ik Tukeza Kupan Diladikij?

Chakwel tuwanyish teritwar wetu, tufanyidin kulond mu wiswimp. Tukutwish kulond chom kanang mudi chinech: “Walankany. Tusadin usu wa kwangan diladikij ed. Dined didi dieyey. Ukutanamu yom yivud.” Ikal nich musangar. Pitupanina maladikij pa kupwa kwa rubing, tufanyidin kupan kand magazet anch chitwishikin.