Ngikadil Yimutumbishina Nzamb

1. Ov, mulong wak Atuman a Yehova akat kuyijungunin patok chisu chikumangeningau ku yitentam ya distrikt?

¹ Chisu tukumangena ku yitentam yetu ya distrik, chiswapeling kutujingunin patok kudi antu anch tukumangening ku chitentam. Mu jindond jivud ja yitentam, yisaj ya jinsangu ja pol jipanining jinsangu kudi antu awonsu piur pa kwikalaku kwetu ku yitentam ni antu ashicha mu mwab winou amening angendj avud adjita mabadj. Kulondul kwa yivurish yimwing yiney kukez kutukwash chakwel tumumbisha Nzamb kusutil ku ngikadil yetu yiwamp chisu tudia mwi ndond yisadikidina chitentam.​—1 Pita 2:12.

2. Ov, mutapu ik tukutwish kumutumbish Nzamb kusutil ku kudjal kwetu kwa kwikepish chisu tudia mwi ndond ya chitentam?

² Kudjal kwa Kwikepish: Kudjal kwetu kwa kwikepish pa chisu chisadikina program ukwet usu pa antu atumena. Mutapu wetu wa kudjal pa yisu yikwau​—pa chisu cha kujingumok ku otel, pa chisu cha kudia ku restoran, pa chisu cha kuland yom ni yikwau​—ukutwish kulet chilakej chiwamp nakash kudi in kututal. Ap anch tuswiridinap kudjal maswin mafanyidina mu yisu yikwau mudi yiney, maswin mitudjita mafanyidin kwikal misikena, ma kalimish ni makad kwikal ma usweral. In kututal afanyidin kwikal tayad chakwel amana kushalijan kudi pakach petu ni antu akad kwitiyij. (Rom 12:2) Chikwau kand, tufanyidin kudjal mabadj metu ma chitentam, mudi mukezau kulejan ku chitentam, mulong chinech chikutwinkish yisu ya kupan uman ni kuyikwash in kukumangan akwau chakwel atujingunina.

3. Ov, mutapu ik tukutwisha kumekesh kushimpish muchim ni kalimish?

³ Kushimpish Muchim ni Kalimish: Pa chisu chidia antu avud a mu mangand ikatina ayinau ni akat kujikitishang, kusangar mud ik kukeza kwikal ni in kututal mulong wa kushimpish kwetu muchim ni wa kalimish, ku otel ni restoran wa muntu kanang! (2 Tim. 3:1-5) Pitukwatina ndond ya kushakam ap pitudia mu milong chakwel tutambula mikand yisu yibudikina ku chitentam, tufanyidinap kusot ching kuwap kwetu ayinetu, pakwez kusot kuwap kwa antu akwau. (1 Kor. 10:23, 24) Kupwa kwa kukumangan ku chitentam chen cha kusambish, muntu umwing wamekesha musangar walonda anch: “Nivurikinap kand diskur ap dimwing diapaninau pa dichuku dined, pakwez ngikadil ya Atuman yawiy yashala mu manangu mam.”

4. Ov, mulong wak tufanyidina kwipan mu midimu yisadikina ku chitentam anch mashakamin metu matukangeshinap?

⁴ In Kwipan Ayinau: Mwikadil wa kwipan udi chijingidij cha in Kristu akin. (Kus. 110:3) Ov, ukutwish kwipan chakwel upana ukwash ku chitentam? Kwindond ya chitentam chimwing, akadivar ni anambaz uvud wa 600 ipanina chakwel akomba kurutu kwa chitentam kusambish. Mukurump wa mudimu umwing walonda anch: “Chinech chidi chom chishimokishina kupandakanamu tumeninga pinap! Chikasiken kutong anch antu awonsu inay ipanina kwau.” Tuchingedin nich musangar chitentam cha distrikt cha muvu wa 2013 ni chisu tukezap ching kusu kutesh ni kwilej kudiay Nzamb pakwez chisu cha kumutumbish kand ndiy.

[Kamushet kadia pa mapaj 3-6]

Yivurikish Ya chitentam cha Distrikt Cha 2013

◼ Yisu ya Program: Program ukusambish pa saa wa 8:20 pamanch machuku mawonsu maad. Pakwez, mulong wa yitentam yitenchikinau mu jingand jijim jilondwilaku ej: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ni Tshikapa, program ukez kusambish dichuku diawonsu pa saa wa 9:20 Pamanch. Yis akez kuyazuril pa saa wa 7:00 ap pa saa wa 8:00 pamanch mudi muchifanyidina. Anch mizik ya kusambish nich yasambish, etwawonsu tufanyidin kushakam pa jindond jetu chakwel program asambisha mu mutapu ufanyidina. Program ukez kupwa pa saa wa 15:55 Diampos ni pa saa wa 14:40 Diarubing. Mu jingand jidia kwiur oku, program ukez kupwa nich saa umwing kwinyim.

◼ Kukwatin pa Kushakam: Ukuyikwatin antu ndond ya kushakam ching kusu uyila nau mu motak umwing ap ushichinga nau ku chikumbu chimwing ap in kwilej ey a Bibil.​—1 Kor. 13:5.

◼ Yakudia ya Midi: Tukuyudilany anch muntu ni muntu asenda yakudia yipipela pakwez yikwashina mujimbu. Chifanyidinap kutek mem, chay ap kafe ni masikre mu milond yikutwisha kubarik chakwel yez yayitap antu. Chifanyidinap majuku kwez nich maar malewishina ku chitentam. Anch twasend yom yetu ya kudia, mem ni masikre metu, tukwikalap kand ni maswir ma kuland yom yiney pol. Kulik kuland yom yidia pol pa rupang ra chitentam kukutwinkish dilejan diwamp piur pa kwinang kwetu. (Chijikish: Ijikany amboku anch tukwitiyijap muntu ap umwing kwandam mulong wa kulandish yom ya kudia mwindond ya chitentam.​—Yoh. 2:13-17.)

◼ Kwinang: Yisu yivud chameken anch, antu alandila yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya insh ap chom chikwau kanang), ukwet chisend cha kudjibul mapaper makuladinay mwi ndond ya kutek yishoshot kangal kumadjibul pansh. Anch twaman anch muntu kampand wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila tukata kwifukwil.​—1 Pit. 1:15, 16; Kub. 19:10; Kuv. 23:14.

◼ Milambu: Tukutwish twamekesh kusanger kwetu yitenchik ya chitentam kusutil ku kulambul milambu mulong wa mudimu usadikina pa mangand mawonsu ku chitentam. Milambu yawonsu yikulambulau ku chitentam kusutil ku bank afanyidin kuyilambul mu dijin dia « Association ‘Les Témoins de Jéhovah.’ »

◼ Akisidan ni Milong Yikash ya Swa-swa: Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwish kutal kukasikan kwa mayej ni kupan ukwash.

◼ Mwon: Anch unining mwon wakufundinau kudi mwingang, pikil amboku wavuramen mwon ufanyidina kuna mu machuku minam maad ma chitentam mulong pamwing ap mwon winou ukutwish kuburen kwindond yidia chitentam chakwel uulandany. Chifanyidinap kudjibul jindong ja antu ayedininga musongu wa diabet ap mayej makwau kwindond yarijekinau kudjibwil yishoshot chakwel chisal chinech chez chalet ubaj kanang kudi antu akwau.

◼ Kukwat Yipich: Anch ufanyidin kukwat yipich pa chisu chisutina yikunku, pakwez kangal wasadilany amboku maflash. Kangal amboku wayitazukany in mudimu wa kukwat yipich eza pa ndond yisadikina chitentam. Anch wayimanany ku chitentam, akat kusal mudimu wau wa kukwat yipich, kangal amboku wayisadilany.​—Yoh. 2:13-17.

◼ Fomu Veuillez suivre l’intérêt (S-43): Tupamp twawonsu tukutanijana ni muntu kanang usangaredina rusangu ruwamp chisu twisambina ni antu ku chitentam, tufanyidin kwizwish fomu Veuillez suivre l’intérêt. In kulejan afanyidin kusend fomu winou umwing ap maad chakwel amuya nich ku chitentam. Ufanyidin kupanany fomu winou wizwishinanya kudi akadivar alamininga mikand ku chitentam ap kudiay kalam wa mudimu wa chikumangen chen.​—Tal Mudimu Wetu wa Want wa pa Kalang 2009, pa paj wa 4.

◼ Restoran: Tumutumbishany Yehova mu mutapu wetu uwamp twendina mu jindond ja marestoran. Tulamany dikut mulong wa kufut mu restoran anch twadiamu chakudia.

◼ Ku Tukushakama:

(1) Kangal kushakam nau antu avud mu kapalikany ap ndond ya kushakam yakwinkishangau pakad mbil ya mwin chikumbu.

(2) Anch uswiridin kuswimp chakwel ulika kwit ndond ya kulal, lond amboku kapamp kamwing.

(3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat.

(4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau.

(5) Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp.

(6) Mekeshany dibuj dia muspiritu mu kushakam nau akwen, ikalap nchik muntu wakwakina ap akadivar akwau in Kristu ukutwish kwikal nau ndond yimwing.​—Gal. 5:22, 23.

◼ Mudimu wa kwipan: Muntu mwin mwawonsu usotina kupan ukwash ku mudimu wa kwisotin ku chitentam chinech ufanyidin kufundish dijin diend ku kapalikany katadina midimu ya kwipan. An akweta mivu mwinshin mwa 16 akutwish kand kusal nawamp mu kwipan kusal mudimu ku umutakel wa nvaj ap kalam ap mukurump mukwau ufanyidina kuyilam.