“Ikalany Nich Yaku Yiwamp Pakach pa Antu a Michid”

1. Ov, mulong wak chidia cha usey kudi etu kwikal nich yaku yiwamp chisu cha chitentam cha distrikt chiezina ech?

¹ Tukat kupwitang manangu ma antu pa yisu ya yitentam yetu ya muvu ni muvu, chawiy lel, chidi cha usey anch kusutil ku yaku yetu tumumekeshin nawamp kamu Nzamb tukata kwifukwil. (Lev. 20:26) Yaku yetu yiwamp mudi kudjal ni kwileng kwetu yifanyidin kutwiyijikish patok mudi in kumulondul Kristu akin. Pitukeza kukumangan ku yitentam ya distrikt ap ya mangand mawonsu yezina kurutu oku, ov, mutapu ik tukutwisha ‘kwikal nich yaku yiwamp pakach pa antu a michid’ ni kumutumbish kand Tatukwetu wa mwiur?—1 Pita 2:12.

2. Ov, yisu ik yimwing ya kumekesh mwikadil wa Ukristu tukeza kwikal nich pa chisu cha chitentam?

² Tumekeshany Untu wa Ukristu: Rukat tukata kumekesh umwing ni mukwau ni mutapu tukata kushakam ni “antu akad kwikal in Kristu” yishalijadin nakash ni spiritu muyimp wa mangand. (Kol. 3:10; 4:5; 2 Tim. 3:1-5) Tufanyidin kwikal antu awamp ni in kushimpish muchim chisu tudia pamwing ni antu asadina mudimu ku otel ap ku restoran ap anch kwalank milong kanang. Yaku yiwamp yikututakel kand kuyikwash antu adia mu maswir ma pakampwil nich tumidimu twa pichuku-pichuku.

3. Ov, chivurish ik chiyivurishinau anvaj kusal ni mulong wak?

³ Anvaj afanyidin kuyilam kamu anau pa ndond ya chitentam, ku restoran ni ku otel. (Jinsw. 29:15) Mband umwing mwin kusal mudimu ku restoran wa ku otel wayileja ambay a uruw anch: “Tuyikatining nakash antu mudi en. Majuku men ni anen akwet kand kalimish ni yaku yiwamp. Antu awonsu alondining nawamp piur pen ni tusotin chakwel usutishangany kupwa rubing ni rubing pinap.”

4. Chisu tudia mu musumb usadikidina chitentam, ov, jinkeu ik tufanyidina kupwintin pa mutapu wetu wa kudjal?

⁴ Kudjal kwa Kwikepish: Kudjal kwetu pa chisu cha chitentam kufanyidin kwikal kuwamp ni kwa kwikepish, kufanyidinap kwamekesh mitapu ya kudjal ya antu awonsu adia mu mangand. (1 Tim. 2:9) Pa chisu tupanina majin metu ku otel ap chisu tubudikinina ni pa yisu ya kupim kurutu ni kupwa kwa yikunku ya program, tufanyidin kwipuk kudjal maswin ma usweral ap kudjal mu mutapu uvudangena. Chawiy lel, tukez kusanger kudjal mabadj metu ma chitentam ni tukezap kwov usany wa kupan uman pitutanininga chisu cha kusal mwamu. Kudjal kwetu ni chaku chetu chiwamp pa chisu tukumangena ku chitentam cha distrikt cha 2014 yikezap ching kusu kuyipwitin antu akweta michim yiwamp ku uruu wa Bibil upandishininga mwom pakwez, yikez kand kumusangaresh Yehova.—Sof. 3:17.

◼ Yisu ya Program: Program ukusambish pa saa wa 8:20 pamanch machuku maad. Pakwez, mulong wa yitentam yitenchikinau mu jingand jijim jilondwilaku ej: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ni Tshikapa, program ukez kusambish dichuku diawonsu pa saa wa 9:20 pamanch. Yis akez kuyazuril pa saa wa 7:00 ap pa saa wa 8:00 pamanch mudi muchifanyidina. Anch mizik ya kusambish nich yasambish, etwawonsu tufanyidin kushakam pa jindond jetu chakwel program asambisha mu mutapu ufanyidina. Program ukez kupwa pa saa wa 15:55 Diampos ni pa saa wa 14:40 Diarubing. Mu jingand jidia kwiur oku, program ukez kupwa nich saa umwing kwinyim.

◼ Kukwatin pa Kushakam: Ukuyikwatin antu ndond ya kushakam ching kusu uyila nau mu motak umwing ap ushichinga nau ku chikumbu chimwing ap in kwilej ey a Bibil.

◼ Yakudia ya Midi: Tukuyudilany anch muntu ni muntu asenda yakudia yipipela pakwez yikwashina mujimbu. Chifanyidinap kutek mem, chay ap kafe ni masikre mu milond yikutwisha kubarik chakwel yez yayitap antu. Chifanyidinap majuku kwez nich maar malewishina ku chitentam. Anch twasend yom yetu ya kudia, mem ni masikre metu, tukwikalap kand ni maswir ma kuland yom yiney pol. Kulik kuland yom yidia pol pa rupang ra chitentam kukutwinkish dilejan diwamp piur pa kwinang kwetu. (Chijikish: Ijikany amboku anch tukwitiyijap muntu ap umwing kwandam mulong wa kulandish yom ya kudia mwindond ya chitentam.—Yoh. 2:13-17).

◼ Kwinang: Yisu yivud chameken anch, antu akata kuland yakudia kudiau in kulandish, akez kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya insh ap chom chikwau kanang), ukwet chisend cha kudjibul mapaper makuladinay mwi ndond ya kutek yishoshot kangal kumadjibul pansh. Anch twaman anch muntu kanang wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila tukata kwifukwil.—1 Pita 1:15, 16; Kub. 19:10; Kuv. 23:14.

◼ Milambu: Tukutwish twamekesh kusanger kwetu yitenchik ya chitentam kusutil ku kulambul milambu mulong wa mudimu usadikina pa mangand mawonsu ku chitentam. Milambu yawonsu yikulambulau ku chitentam kusutil ku bank afanyidin kuyilambul mu dijin dia “ Association ‘Les Témoins de Jéhovah.’ ”

◼ Akisidan ni Milong Yikash ya Swa-swa: Anch kwikal mayej makash kwi ndond ya chitentam, muleja amboku muntu ushicha nend ndond yiney, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwish kutal kukasikan kwa mayej ni kupan ukwash.

◼ Mwon: Anch unining mwon wakufundinau kudi mwingang, pikil amboku wavuramen mwon ufanyidina kuna mu machuku minam maad ma chitentam mulong pamwing ap mwon winou ukutwish kuburen kwindond yidia chitentam chakwel uulandany. Chifanyidinap kudjibul jindong ja antu ayedininga musongu wa diabet ap mayej makwau kwindond yarijekinau kudjibwil yishoshot chakwel chisal chinech chez chalet ubaj kanang kudi antu akwau.

◼ Kukwat Yipich: Anch ufanyidin kukwat yipich pa chisu chisutina yikunku, pakwez kangal wasadilany amboku maflash. Kangal amboku wayitazukany in mudimu wa kukwat yipich eza pa ndond yisadikina chitentam. Anch wayimanany ku chitentam, akat kusal mudimu wau wa kukwat yipich, kangal amboku wayisadilany.—Yoh. 2:13-17.

◼ Fomu Veuillez suivre l’intérêt (S-43): Tupamp twawonsu tukutanijana ni muntu kanang wamekesha musangar chisu twisambina nend kusutil ku uman wa kukashimwish ku chitentam, tufanyidin kwizwish fomu Veuillez suivre l’intérêt. Ufanyidin kupanany fomu winou wizwishinanya kudi akadivar alamininga mikand ku chitentam ap kudiay kalam wa mudimu wa chikumangen chen.

◼ Restoran: Mutumbishany Yehova kusutil ku ngikadil yen yiwamp mu jindond ja marestoran. Udjalany mu mutapu ufanyidina kashalapol mwin Kristu. Lamany nfalang mulong wa kufut mu restoran anch wadiamu chakudia.

◼ Ku Tukushakama: (1) Kangal kushakam nau antu avud mu kapalikany ap ndond ya kushakam yakwinkishangau pakad mbil ya mwin chikumbu. (2) Anch uswiridin kuswimp chakwel ulika kwit ndond ya kulal, lond amboku kapamp kamwing. (3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat. (4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau. (5) Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp. (6) Mekeshany dibuj dia muspiritu mu kushakam nau akwen, ikalap nchik muntu wakwakina ap akadivar akwau in Kristu ukutwish kwikal nau ndond yimwing.—Gal. 5:22, 23.

◼ Mudimu wa Kwipan: Muntu mwin mwawonsu usotina kupan ukwash ku mudimu wa kwisotin ku chitentam chinech ufanyidin kufundish dijin diend ku Kapalikany Katadina Midimu ya Kwipan. An akweta mivu mwinshin mwa 16 akutwish kand kusal nawamp mu kwipan kusal mudimu ku umutakel wa nvaj ap kalam ap mukurump mukwau ufanyidina kuyilam.