Yivurikish ya Chitentam
Yisu ya Program: Program ukusambish pa saa wa 8:20 pamanch machuku mawonsu maad. Pakwez, mulong wa yitentam yitenchikinau mu jingand jijim jilondwilaku ej: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ni Tshikapa, program ukez kusambish dichuku diawonsu pa saa wa 9:20 Pamanch. Yis akez kuyazuril pa saa wa 7:00 ap pa saa wa 8:00 pamanch mudi muchifanyidina. Anch mizik ya kusambish nich yasambish, etwawonsu tufanyidin kushakam pa jindond jetu chakwel program asambisha mu mutapu ufanyidina. Program ukez kupwa pa saa wa 15:55 Diampos ni pa saa wa 14:40 Diarubing. Mu jingand jidia kwiur oku, program ukez kupwa nich saa umwing kwinyim.
‘Kumushiman Yehova ni Miminy’: Antu a Nzamb a pasak amushimana Yehova nich miminy, chawiy lel miminy yidandamedining kwikal chikunku chimwing cha usey nakash mu difukwil diakin nlel unou. (Kus. 28:7) Chikunku ni chikunku cha chitentam chetu cha region chisambishining nich miminy. Miminy yiney kayitekiningap mulong wa kuyitudish antu kusu pakwez ayitenchiking chakwel twileja ni tumwifukwila nich Yehova. Chawiy lel, anch ntakel wa chitentam wijikish anch mizik yasambish kal, chawiy chisu cha kushakam ni kutesh mizik nich musangar pa ndond pa kusambish kwisamb ni antu akwau. Anch twasal mwamu tukumekesh anch tusangaredin usu wasalau yid ya in kutenchik miminy ya Watchtower. Tupamp twaad pa muvu, akadivar ni anambaz inay akasining weny mulong wa kuya ku Patterson, udia mu New York, mulong kutenchik miminy yiwamp yitusangareshina. Kupwa kwa kutesh miminy yiney, etwawonsu tufanyidin kwinung mu kumushiman Yehova kusutil ku kuwang miminy yetu ya Want.
Kukwatin pa Kushakam: Ukuyikwatin antu ndond ya kushakam ching kusu uyila nau mu motak umwing ap ushichinga nau ku chikumbu chimwing ap in kwilej ey a Bibil.
Kudjal Kuwamp: Kudjal kwetu ku chitentam kufanyidin kwikal kuwamp ni kuwanyidina, kufanyidinap kwikal mudi kudjal kwa antu a mangand. (1 Tim. 2:9) Ap pa kwandam ni kubudik ku hotel ni pa chisu cha kupim kurutu ni kupwa kwa yikunku ya chitentam, tufanyidinap, kudjal kwa usweral ap kwileng kuyimp. Chawiy lel tufanyidin kusanger kudjal mabadj metu ma chitentam ni kwipuk kwov usany wa kupan umwing anch chitwishikin. Kwileng kwetu ni yaku yiwamp pa chisu tukeza kukumangan ku chitentam yikez kuyisangaresh antu akweta michim yiwamp ni kuyipwitin ku rusangu ra Bibil ra dipandish ni kukez kand kumusangaresh Yehova.—Sof. 3:17.
Kwikal Nich Yaku Yiwamp mu Kusadil Matelefon: Tukwikal nich yaku yiwamp pa chisu cha program pitukata kusadil matelefon ap yom yikwau ya elekitronik chakwel kangal twazuwol antu akwau. Anch tusadidin camera, tukwatin mazu, tablette électronique, ap yom yikwau, tufanyidin kuyisadidin mu mutapu wakad kuyizuwol antu akwau ap kuyikangesh kuman. Tukumekesh kand yaku yiwamp mu kwipuk kutumwol jinsangu ap ma email pa chisu cha program. Chifanyidinap kuyitazuk antu akwatininga yipich mulong wa kwit nfalang pa ndond ya chitentam. Ap anch wayimanany pa ndond ya chitentam, kangal wayitazukinay amboku chakwel akukwatany yipich.—Yoh. 2:13-17.
Yakudia ya Midi: Tukwitinany chakwel muntu ni muntu asenda yakudia yipipela pakwez yikwashina mujimbu mudi: mikat, yitumbul, mabuj mudi makond ap mabuj makwau. Chifanyidin kusendin yom ya kuna mudi mem, kafe ap chay mu milond yakad kubarik mulong wa kwipuk ma aksident. Chifanyidinap kusend maar ku chitentam. Anch twasend yom yetu ya kudia, mem ni masikre metu, tukwikalap kand ni maswir ma kuland yom yiney pol. Kwipuk kuya kuland pol kukez kupan uman uwamp piur pa kwinang kwetu. (Chijikish: Ijikany amboku anch tukwitiyijap muntu ap umwing kwandam mulong wa kulandish yom ya kudia mwindond ya chitentam.—Yoh. 2:13-17).
Milambu: Tukutwish twamekesh kusanger kwetu mulong wa yitenchik ya chitentam kusutil ku kulambul milambu mulong wa mudimu usadikina pa mangand mawonsu ku chitentam. Milambu yawonsu yikulambulau ku chitentam kusutil ku bank afanyidin kuyilambul mu dijin dia « Association ‘Les Témoins de Jéhovah.’ »
Mwon: Anch unining mwon wakufundinau kudi mwingang, pikil amboku wavuramen mwon ufanyidina kuna mulong pamwing ap mwon winou ukutwish kuburen kwindond ya chitentam. Chifanyidinap kudjibul jindong ja antu ayedininga musongu wa diabet ap mayej makwau kwindond yarijekau ya kudjibwil yishoshot chakwel chisal chinech kangal chalet ubaj kanang kudi antu akwau.
Akisidan ni Milong Yikash ya Swa-swa: Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwish kutal kukasikan kwa mayej ni kupan ukwash.
Fomu Veuillez suivre l’intérêt (S-43): Tupamp twawonsu tukutanijana ni muntu kanang usangaredina rusangu ruwamp chisu twisambina ni antu ku chitentam, tufanyidin kwizwish fomu Veuillez suivre l’intérêt. Ufanyidin kupanany fomu winou wizwishinanya kudi akadivar alamininga Mikand ku chitentam ap kudiay kalam wa mudimu wa chikumangen chen.
Restoran: Tumutumbishany Yehova mu mutapu wetu uwamp pitwendidina mu jindond ja marestoran. Tufanyidin kudjal maswir mamekeshina kalimish ka mudimu wa kulejan wa in kristu. Tulamany dikut mulong wa kufut mu restoran anch twadiamu chakudia.
Ku Tukushakama:
Kangal kushakam nau antu avud mu kapalikany ap ndond ya kushakam yakwinkishangau pakad mbil ya mwin chikumbu.
Anch uswiridin kuswimp chakwel ulika kwit ndond ya kulal, lond amboku kapamp kamwing.
( Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat.
Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau.
Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp.
Mekeshany dibuj dia muspiritu mu kushakam nau akwen, ikalap nchik muntu wakwakina ap akadivar akwau in Kristu ukutwish kwikal nau ndond yimwing.—Gal. 5:22, 23..
Mudimu wa kwipan: Muntu mwin mwawonsu usotina kupan ukwash ku mudimu wa kwipan ku chitentam chinech ufanyidin kufundish dijin diend ku Kapalikany katadina Midimu ya Kwipan. An akweta mivu mwinshin mwa 16 akutwish kand kusal nawamp mu kwipan kusal mudimu ku umutakel wa nvaj ap kalam ap mukurump mukwau ufanyidina kuyilam.