Machuku Masatu ma Kwikasikesh Kwa Muspiritu

1. Ov, yom ik tukutwisha kutambul ku chitentam chinech cha distrikt cha pa muvu?

¹ Mwi ngand yiney yiumidina mu spiritu, mawiy kamu mangand ma Satan, Yehova udandamedin kuyinkish atushalapol end dikasikesh. (Isa. 58:11) Chakudia chimwing chisadidilay Yehova chakwel atukasikesh chidi chitentam cha distrik cha pa muvu. Mudi mushejidina piswimp chitentam cha muvu winou, ov, mutapu ik tukutwisha kwirijek chakwel tutambul ni tupana dikasikesh dia muspiritu?​—Jinsw. 21:5.

2. Yitenchik ik tuswiridina kupwish?

² Anch kandikal usala mwamu, itekina katat chisu chakwel utenchik maprogram mey ma pakampwil ni ma mudimu wey chakwel wikalaku mu machuku mawonsu masatu ma chitentam. Ov, wachindin kal chisu ukeza kwikal nich kuswir kwa kuya kwi ndond ya chitentam pichuku-pichuku chakwel ushik ni ushakam nawamp kurutu kwa kusambish program? Tufanyidinap kamu kuburen yakudia yawonsu yikasikeshina ya muspiritu yitenchikinau kudi Yehova mulong wetwetu! (Isa. 65:13, 14) Ov, watenchikinany kal kwin ndond ya kushakam ni nfalang ja kufut motak pa chisu chinech?

3. Yiyul ik yikeza kutukwash ni dijuku dietu chakwel tutaninamu yom yivud kusutil ku program winou?

³ Ov, chom ik chikeza kukukwash chakwel utesha nawamp pa chisu chisadikina program? Anch chitwishikin, chifanyidin kwikal ni chisu chivud cha kulal tul nawamp pichuku-pichuku pa chisu cha chitentam. Pwitin jinkeu jey padiay mwin kulond. Londul mifund yawonsu yidia mu Bibil. Fund manans majim mu wiswimp. Majuku mafanyidin kushakam pamwing chakwel anvaj aman mutapu wa kuyikwash anau kutesh nawamp. (Jinsw. 29:15) Pamwing ap ukutwish wisambinany manans majim ma program urel ni urel mu dijuku. Chakwel dijuku dien didandamena kwikal dikasikena kupwa kwa chitentam, chifanyidin kusutish chisu cha urel wen wa Kwifukwil mu Dijuku chakwel ushinshikinany manans ma pakampwil ma kusadil mu dijuku dien.

4. Mutapu ik tukutwisha kukwash antu akwau a mu chikumangen chakwel atambul dikasikesh dia muspiritu?

⁴ Yikwashany Antu Akwau Kwikal Akasikena: Tusotin kand antu akwau kutambul niyau dikasikesh dia muspiritu. Ov, mu chikumangen mudiaku in kulejan amapal ap antu akwau aswiridina ukwash chakwel aya ku chitentam? Ov, udiany mu mwikadil wa kuyikwash? (1 Yoh 3:17, 18) Amakurump, pakampwil chisak cha atulam, afanyidin kuman in kulejan afanyidina kutambul ukwash.

5. Ov, mutapu ik tukeza kupan maladikij ku chitentam? (Tal kand mu kamushet kadia ku mutu.)

⁵ Mudi pasak, mbing jisatu kurutu kwa kusambish chitentam chetu, tukez kwipan mu kampany wa kuyitazuk antu akwau chakwel eza akumangan netu. Yikumangen yifanyidin kwitekin rutong ra kupan maladikij mawonsu ni kuwanyish teritwar wau mujim anch chitwishikina. Anch dijuku dien dikwet mapaper ma maladikij makushalaku kwinsudiel kwa kampany, maletany amboku, tukez kumasadil chakwel tutazuka nakash antu avud tukuleja uman wa kukashimwish ku chitentam. Maladikij makad kusadil kudi dijuku dien mwi ndond ya chitentam ufanyidinany kumapan kudi antu ezina kukumangan chisu cha kwandam mu chitentam Diakatan. Lamany amboku kopi umwing mulong wa ayinen, mudi uswiridinany kutadinaku chisu cha madiskur makushala ma Diarubing.

6. Ov, mu jinjil ik tukutwisha kumekesh yaku yiwamp ku chitentam?

⁶ Yaku Yiwamp Yikasikeshining: Pa chisu chidia antu avud “ikatina ayinau” ni amekeshina kuburen kubangin yovil ya antu akwau, chisangareshin muchim mudi ik kwikal kudi ambay in Kristu amekeshininga yaku yiwamp! (2 Tim. 3:2) Tumekeshin yaku yiwamp pa kwandam nich kalimish mwi ndond ya kukumangen ni mu mutapu wakad kanvundangesh chakwel tukimb mutapu wa kushakam nau in ku chikumbu chetu, ap antu twezininga nau mu motak, ap in kwilej etu a Bibil. Tukulondul umutakel wa ntakel wa chikunku chisu chikwitay anch tuya tushakam mu yitwam yetu chakwel tutesha mizik ya kusambish nich chikunku ni chikunku cha chitentam. Chitin kumekesh kalimish ap yaku yiwamp chisu cha kusadil telefon wetu pakad kuyirumbangesh antu akwau pasutishinau program. Tufanyidin kand kumekesh yaku yiwamp kusutil ku kulik kwambamb, kutumol jinsangu mu ma telefon, kudia, ap kwendil mu tubway pa chisu cha program.

7. Mutapu ik tukutwish kutambul ni kupan dikasikesh chisu tukumangening ni akadivar netu?

⁷ Kukasikesh Urund: Yitentam yitwinkishing mitapu yivud ya kusanger kukasikesh uumwing wetu wa In Kristu ni wa ukadivar. (Kus. 133:1-3) Ov, mulong wak tukutwishap kukwat mupak wa ‘kwanzuril michim yetu’ ni kutanijan nau akadivar ni anambaz adiokila mu yikumangen yikwau? (2 Kor. 6:13) Ukutwishany witekinany rutong ra kwijik muntu musu umwing ap dijuku disu pichuku-pichuku. Chikunku cha kupim pa midi chiletining chisu chiwamp cha kusal mwamu. Chawiy lel, chifanyidin kusend yakudia yiwanyidina ni kusanger yakudia ni antu akwau anch chitwishikin kupandakan kuyilik kuya kuyiland mu restoran. Chinech chikutwish kushikij ku chiyukish cha muntu musu ni kulet urund uwamp.

8. Ov, mulong wak tufanyidina kwipan ku kusal mudimu pa chisu cha chitentam, ni mutapu ik tukutwisha kusal mwamu?

⁸ Dikasikesh mudi ik kusal mudimu utumbila pamwing ni ambay in kwifukwil! Ov, ukutwish kwipan chakwel upana ukwash ku departema ap ku chikumangen chen mu mudimu wa kukomb? (Kus. 110:3) Anch kand kal wikal ni chisend cha mudimu, shejin amboku ku Departema wa Midimu ya In Kwipan. Makas mavud masadining mudimu usangareshina ni uwamp.

9. Ov, mulong wak tufanyidina kupwitin jinkeu ja pakampwil mwikadil wetu ni kudjal kwetu pa chisu cha chitentam?

⁹ Mwikadil Wetu Ukasikeshining Antu Autumeninga: Tudi in kukumangan mu machuku mawonsu masatu ma chitentam, pakad kwikalaku ching dichuku dimwing. Antu akata kutuman chisu tudia pa ndond yisadikina chitentam akutwish kuman kwikasikesh kushalijadina pakach petu ni antu akad kwikal Atuman. (1 Pita 2:12) Kudjal kwetu ni kwileng kwetu kwi ndond yisadikina chitentam, kwi ndond yetu ya kushakam, ni ku restoran kufanyidin kumulimish Yehova. (1 Tim. 2:9, 10) Anch twadjal yijingidij yetu yikez kutukwash kwiyijikish mudi Atuman a Yehova. Kusal mwamu kukutukwash ni kutwinkish chisu cha kuyilej piur pa chitentam ni kuyilej uman kurutu.

10. Yom ik yamanau yilejena uman uwamp udiokidila ku mwikadil wa In Kristu?

¹⁰ Ov, chom ik chikumekesha mwikadil wetu uwamp pa chisu cha chitentam kudi antu akwau? Kulondulijan nich mutu wa mulong wa mu jurnal, mukurump wa mudimu wa pa ndond yasadikina chitentam walonda anch: “Adi antu akweta kalimish nakash. Atubachikining kushakam nau mivu yawonsu.” Muvu wasutinap ou, muntu wakad Kaman washadisha ka sakosh kend ka kulamin nfalang ku otel kwadinga in kukumangan eza ku chitentam. Pachirishau kasakosh kinak ka nfalang kudi mukurump wa otel nich yom yawonsu yidingamu, mukurump wamuleja mwin kasakosh anch: “Chadinga chom chiwamp kuudia mulong Atuman a Yehova eza kukumangan ku chitentam chau machuku makemp am, ni otel wadinga wizwila nau. Pamwing ap, ey ufanyidinap kuchirish kasakosh.”

11. Mudi mushejina chitentam piswimp, ov, chom ik chifanyidina kwikal mupak wetu, ni mulong wak?

¹¹ Yitentam ya muvu unou yishejin piswimp mau mau. Chitin chisu chivud ni usu mulong wa kurijek program ni mwikadil ukasikeshina wa chitentam. Kimbany mutapu wa kwikalaku mu machuku mawonsu masatu, ni ikalany tayad ku yom yikurijekidinanyau kudiay Yehova ni dirijek diend. Kwatany mupak wa kuyikasikesh antu akwau kusutil ku yaku yen yiwamp, urund usangareshina, ni mwikadil uwamp. Kupwa, en ni antu akwau ukutwishany kwov mudi mwovilay umwing wa ku in kukumangan eza muvu wasutilap ou pafunday anch: “Nikutwishap kuvurik uvud wa yom yipandakena usey yisangareshina yinamana!”

[Dizu dirumburila chipich chidia pa paj wa 4]

Mudi pasak, mbing jisatu kurutu kwa kusambish chitentam chetu, tukez kwipan mu kampany wa kuyitazuk antu akwau chakwel eza akumangan netu

[Dizu dirumburila chipich chidia pa paj wa 6]

Kudjal kwetu ni kwileng kwetu kwi ndond yisadikina chitentam, kwi ndond yetu ya kushakam, ni ku restoran kufanyidin kumulimish Yehova

[Dizu dirumburila chipich chidia pa paj wa 7]

Kwatany mupak wa kuyikasikesh antu akwau kusutil ku yaku yen yiwamp, urund usangareshina, ni mwikadil uwamp

[Kamushet kadia pa paj wa 4]

Yivurikish ya Chitentam cha Distrikt 2011

◼ Yisu ya Program: Program ukusambish pa saa wa 8:20 pamanch machuku mawonsu masatu. Pakwez, yitentam yikusadika mu jingand jilondwilaku ej: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ni Tshikapa, program ukez kusambish pichuku-pichuku pa saa wa 9:20 pamanch. Yis akez kuyazuril pa saa wa 7:00 pamanch ap pa saa wa 8:00 pamanch, mudi chitwishikina. Anch mizik ya kusambish nich yasambish, etwawonsu tufanyidin kushakam pa jindond jetu chakwel program asambisha mu mutapu ufanyidina. [Chirumburikin anch: kushakam mu mutapu umulimishina Yehova].

◼ Kukwatin pa Kushakam: Ukuyikwatin antu ndond ya kushakam ching kusu uyila nau mu motak umwing ap ushichinga nau ku chikumbu chimwing ap in kwilej ey a Bibil.​—1 Kor. 13:5.

◼ Yakudia ya Midi: Tukuyudilany anch muntu ni muntu asenda yakudia yipipela pakwez yikwashina mujimbu, chilakej mudi: mikat, malal, makond, nyimu, ap yitumbul. Yakuna mudi mem, kafe ap chay chifanyidinap kuyisendin mu milond yikutwisha kubarik mulong wa kwipuk makisidan. Chifanyidinap kwez nich maar ma kulewishan ku chitentam. Anch twasend yakudia ni yakuna yituswiridina, chawiy tukuyap kand kuland yakudia kudiau in kuyilandish. Kwipuk antu mudi inay pol kukat kutukwash kupan uman wetu wa kwinang. (Chiyul amboku: In kulandish yakudia kafanyidinap kuyilik andama mwi ndond ya chitentam pa chisu ap chimwing.​—Yoh. 2:13-17.)

◼ Milambu: Tukutwish twamekesh kusanger kwetu yitenchik ya chitentam kusutil ku kulambul milambu mulong wa mudimu usadikina pa mangand mawonsu ku Yot yetu ya Want ap ku chitentam. Milambu yawonsu yikulambulau ku chitentam kusutil ku bank afanyidin kuyilambul mu dijin dia Association “Les Témoins de Jéhovah.”

◼ Akisidan ni Milong Yikash ya Swa-swa: Asadila mudimu wa ukwash mu milong yikash ya swa-swa inana anch akat kuyitazwok nakash ku matelefon ni pa tumilong tukemp. Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwish kutal kukasikan kwa mayej ni kupan ukwash.

◼ Kukwat Yipich: Anch ufanyidin kukwat yipich pa chisu chisutina yikunku, pakwez kangal wasadilany amboku maflash. Kangal amboku wayitazukany in mudimu wa kukwat yipich eza pa ndond yisadikina chitentam. Anch wayimanany ku chitentam, akat kusal mudimu wau wa kukwat yipich, kangal amboku wayisadilany.​—Yoh. 2:13-17.

◼ Matelefon: Chifanyidin kumasadil mu mutapu wakad kuyizuwol antu.

◼ Kwinang: Chameken kal chisu chivud anch, antu akata kuland yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yom yikwau yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya ansh ap chom chikwau kanang), ukwet chisend cha kudjibul mapaper mwi ndond ya kutek yishoshot kangal kumadjibul pansh. Anch twaman anch muntu kanang wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila utukata kwifukwil.​—1 Pita 1:15, 16; Kubur. 19:10; Kuv. 23:14.

◼ Ku Tukushakama:

(1) Kangal kushakam nau antu avud mu kapalikany ap ndond ya kushakam yakwinkishangau pakad mbil ya mwin chikumbu.

(2) Anch uswiridin kuswimp chakwel ulika kwit ndond ya kulal, lond amboku kapamp kamwing.

(3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat.

(4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau.

(5) Kwinang kuding piswimp ni winzamb. Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp.

(6) Mekeshany dibuj dia muspiritu mu kushakam nau akwen, ikalap nchik muntu wakwakina ap akadivar akwau in Kristu ukutwish kwikal nau ndond yimwing.​—Gal. 5:22, 23.

◼ Mudimu wa Kwipan: Musangar tutambwilinga ku kuya kukumangan ku chitentam ukez kwikal ujim anch twipan chakwel tukwash kusal mudimu mudi chitwishikina. (Mid. 20:35) Muntu mwin mwawonsu usotina kusal mwamu ufanyidin kufundish dijin diend ku kapalikany katadina Midimu ya Kwipan ku chitentam. An akweta mivu mwinshin mwa 16 akutwish kand kusal nawamp mu kwipan kusal mudimu ku umutakel wa nvaj ap kalam ap mukurump mukwau witiyijinau.

[Kamushet kadia pa paj wa 5]

Ov, Mutapu ik Tukeza Kupan Diladikij?

Chakwel tuwanyish teritwar wetu, tufanyidin kulond mu wiswimp. Tukutwish kulond chom kanang mudi chinech: “Walankany. Tusadin usu wa kwangan diladikij ed. Dined didi dieyey. Ukutanamu yom yivud.” Piur pa diladikij padi yom yisangareshina, mwinkisha chad mwin chikumbu ku chikas mu mutapu ukutwishay kuman. Ikal nich musangar. Pitupanina maladikij pa kupwa kwa rubing, tufanyidin kupan kand magazet anch chitwishikin.