Chisu cha Kudia ni Kusangar Muspiritu

1. Mutapu ik ukatay Yehova kuyibangin atushalapol end?

¹ Yehova uyibangidin atushalapol end muspiritu. Pakwez pafembinau nzal ya muspiritu antu avud adia mu mangand, etu tukat kudia nawamp. (Isay 65:13) Mwi njil mukatay kutudishin Yehova muspiritu yidi chitentam cha distrik cha muvu ni muvu. Ov wirijekin mulong wa kukumangan ku yikunku yawonsu ya Chitentam cha Distrik chezinaku chikweta mutu wa mulong ulondila anch “Atakedinau Nich Mwiku wa Nzamb?” Autenchikin kal musambu uwamp wa yakudia ya muspiritu yitadila.

2. Chitin ik chakwel wirijekany kurutu kwa chisu mulong wa chitentam?

² Irijeka Kurutu: “Yitongijok ya mwin mushiku ya kusal yom yishikin ku kupit.” (Jinsw. 21:5) Chawiy lel, anch witenchik chakwel wikalaku mu machuku mawonsu masatu ma chitentam, kangal walik kumulej mukurump wey wa mudimu anch uswirikedin konje. Anch ukimbin ndond ya kulal ov wirijekin kal? Ukutwish kand witenchik mulong wa yakudia ya midi chakwel ukadia ni akadivar ney kwi ndond kusadikidina chitentam. Irijeka mulong wa kushikang kurutu kwa saa dichuku diawonsu chakwel umana ndond ya kushakam ni kuwang pamwing muminy wa kusambish ni malembil.

3. Masun ma mutapu ik mitufanyidina kwez kudjal?

³ Tufanyidin tushinshikina anch masun mitukeza kadjal madi mawamp ni mafanyidina. (1 Tim. 2:9, 10) Chitentam cha distrik chidi chisu chiwamp cha kuyilej antu uman. Kusutil ku kudjal kwishitwila pitudia mu musumb musadikina chitentam ni ku kudjal mabadj metu, tukat kushalijan nau antu akad kwitiyij ni tukat kuyisangaresh in kututal.

4. Yom ik yikutukwasha ni dijuku dietu chakwel tutaninamu nakash ku program?

⁴ Tangany Matu Nawamp: Kitusotinap kachom ap kamwing kakuletau ku musambu winou wa muspiritu katusuta! (Jinsw. 22:17, 18) Kulondwishang mu Bibil wetu patanginau maverse ni kufund yikutwisha kutukwash kulondul program ni kwiyepish kampuw. Chad urel, tukutwish twasadil manans majim ma program mitwafundang chakwel tumisambina ni akwetu. Mu mivu yasutinang ey chameken anch asand amwing akatining kushakam pamwing ku chitentam akat kwambambang kwau pasadikina program ap akat kufundijadin nich matelefon mau. Anch tukwet an, ni azamburika kal, chikwikal chiwamp kushakam nau pamwing chakwel tutesha program mud dijuku kangal tuyilika an ishakamina kulemp netu ap akashakama ni akwau bwat.

5. Ov, mutapu ik tukusala chakwel tusangera nakash chitentam?

⁵ Yisangera Akwen: Yakudia yitadina yiletining musangar anch uyidil ni arund ney. (Jinsw. 15:17) Chawiy chimwing, kukumangan pamwing ni akadivar nau anambaz etu kuletining musangar nakash ku chitentam. Pakwez anch program kand kal asambish chidi chiwamp mudi ik kumanijan nau akwetu ezang chakwel tulangwishijan nich musangar! (Kus. 133:1) Chawiy anch ntakel wa chitentam watwit tushakama pa jindond jetu kurutu kwa mizik yisambisha, tukwimik mambamb metu ni kushakam kurutu program asambisha.

6. Londap yom wamena yimekeshina mutapu utukutwisha kulejan uman mu musumb musadikina chitentam.

⁶ Jingunin Yisu ya Kulejan: Chisu chivud yitentam yiding yisu yiwamp ya kulejan. In kukumangan amwing akata kuya kudia ku yikumbu kulandishinau yakudia kupwa kwa program akat kuyipul kudi in alandishinamu ap antu akwau pa mulong wa mutu wa mulong umenau pa badj. Chinech chikat kufungul mambamb chakwel kupan uman nawamp mulong wa uyakin. Antu amwing ipula, ayitazuka chakwel alondula yikunku ku chitentam eza akumangan.

7. Mulong wak tufanyidin kushik ku chitentam cha distrik chidia kurutu?

⁷ Tunan twa asaa tusutining mulong wa kurijek program, jindond ja kukumangen, kutung ma departema ma chitentam, ni kurijek madiskur. Mudimu winou wawonsu wa rukat usadiningau chakwel kurijek musambu winou wa muspiritu umekeshining rukat ra Yehova mulong wa kuyilam antu end. Komb etu awonsu tuwapidin kushikaku chakwel twileja yom yivud! Chawiy anch twikalaku, kushalijan ni antu a mangand, tukez “kawang nich musangar, mulong wa mwikadil uwamp wa muchim.”—Isay 65:14, NW.

[Box on page 4]

Yivurish ya Chitentam cha Distrik

◼ Yisu ya Program: Program ukusambish pa 9:20 pamanch machuku mawonsu masatu. Yis akuyazuril 8:00 pamanch. Anch mizik ya kusambish nich yasambish, etu awonsu tufanyidin kushakam pa jindond jetu chakwel program asambisha mu mutapu ufanyidina. Program ukupwa 4:55 urel Diakatan ni Diampos, pakwez Diarubing ukupwa 4:00 urel.

◼ Kukwatin pa Kushakam: Ukuyikwatin ndond ya kushakam ching kusu antu uyila nau mu motak umwing ap ushichinga nau mu chikumbu chimwing.

◼ Yakudia ya Midi: Tukuyudilany anch muntu ni muntu asenda yakudia yipipela pakwez yikwashina mujimbu, chilakej mudi: mikat, mabuj (mud makond), nyimu, ap yitumbul. Yakuna mudi mem, kafe ap chay chifanyidinap kuyisendin mu milond yikutwisha kubarik mulong wa kwipuk makisidan. Chifanyidinap kwez ni maar ma kulewishan ku chitentam. Anch twasend yakudia ni yakuna yituswiridina, chawiy kitukuyap kand kuland yakudia kudiau in kuyilandish. (Chiyul amboku: In kulandish yakudia kafanyidinap kuyilik andama mwi ndond ya chitentam pa chisu ap chimwing.—Yoh. 2:13-17.) Antu asadidila ambwabul a makal mulong wa kwisuk yakudia pa ndond yiniya, afanyidin cha kusambish kwit mbil kudi akadivar akweta chisend cha chitentam chakwel ijika kwisu kukutwishau kuyitek. Chifanyidin kudimuk nakash chakwel kwipuk makisidan.—Luka 10:38-42.

◼ Milambu: Tukutwish twamekesh kusanger kwetu yitenchik ya chitentam kusutil ku kulambul milambu mulong wa mudimu usadikina pa mangand mawonsu ku Yot ya Want yetu ap ku chitentam.

◼ Akisidan ni Milong Yikash ya Swa-swa: Asadila mudimu wa ukwash mu milong yikash ya swa-swa inana anch akat kuyitazuk nakash ni pa tumilong tukemp nakash. Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwisha kutal kukasikan kwa mayej ni kupan ukwash.

◼ Kukwat Mazu: Kwikil chisaj ap chimwing chifanyidinau kutek ku yijimbish mazu ap ku moj ya nzembu, akutwish kukwat ching kusu mu mutapu wakad kuyizuwol antu akwau.

◼ Kukwat Yipich: Anch wakwat yipich chisu chisadikina program, kangal wasadil amboku yimunyik. Kangal amboku wayitazukany in kusalang mudimu wa kukwat yipich eza pa ndond pasadikina chitentam. Anch wayimanany kwi ndond ya chitentam, akwat lel yipich, kangal wayisadilany.—Yoh. 2:13-17.

◼ Matelefon: Chifanyidin kumasadil mu mutapu wakad kuyizuwol antu.

◼ Kwinang: Chameken kal chisu chivud anch, antu akata kuland yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yom yikwau-yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya ansh ap chom chikwau kanang), ukwet chisend cha kudjibul mapaper mwi ndond ya kutek yishoshot kangal kumadjibul pansh. Anch twaman anch muntu kampand wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila utukata kwifukwil.—1 Pita 1:15, 16; Kubur. 19:10; Kuv. 23:14.

◼ Ku Tukushakama: (1) Kangal kushakam nau antu avud mu kapalikany ap ndond ya kushakam yakwinkangau pakad mbil ya mwin chikumbu. (2) Anch uswiridin kuswimp chakwel kulik kwit ndond ya kulal, lond amboku kapamp kamwing. (3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat. (4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau. (5) Kwinang kuding piswimp ni winzamb. Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp. (6) Mekeshany dibuj dia spiritu mu kushakam nau akwen, ikalap nchik muntu wakwakina ap akadivar akwau in Kristu ukutwisha kwikal nau ndond yimwing.—Gal. 5:22, 23.