Ov, Wirijekinany Mulong wa Musambu wa Muspiritu?
1. Kwirijek kwa mutapu ik kufanyidina kusal kurutu kwa musambu?
1 Musambu witining kwirijek nawamp. Chifanyidin bil kukimb yakudia, kuyisuk nawamp, ni kupwa kuyipan. Chitining kand kwirijek nawamp mulong wa kupan yakudia. Chikwau kand, chifanyidin kand kurijek ndond ya kudil. Antu atazukinau niyau afanyidin kwirijek nawamp, pakampwil anch akudiokal kulemp. Ap anch kuding midimu yivud ya kusal, kusanger kudia yakudia yital, pamwing ni arund ni dijuku diawonsu, kusangareshining nakash. Piswimpap kamu Atuman a Yehova a pa mangand mawonsu akez kukumangan pamwing mu yisak yijim ni yikemp-yikemp chakwel asangera musambu wa muspiritu. Chitentam cha Distrik chikweta mutu wa mulong ulondila anch: “Chishany ku Mes!” Asadil kal mudimu ujim mulong wa kurijek program ni kutenchik yom nawamp. Etu awonsu atutazukin. Chakwel anch tukumangana ni twisakina yiyukish, niyetu twirijekany nawamp.—Jinsw. 21:5.
2. Ik tufanyidina kusal chakwel anch twikalaku ku chikunku ni chikunku chawonsu cha musambu wetu wa muspiritu?
2 Isakinany Nakash: Ov, wirijekin kal chakwel wikalaku ku chikunku ni chikunku chawonsu cha musambu winou wa muspiritu? Anch chiswirikedin, muleja mukurump wey wa mudimu anch ukuya kukumangan ku yikunku yawonsu ya chitentam, pamwing ni yikunku ya dichuku dia kusambish. Ov, wirijekin kal mulong wa kufutin weny wey ni mulong wa ndond ya kulal? Amakurump afanyidin kushinshikin nawamp mulong wa amapal, ayilim ni antu akwau aswirikedina ukwash.—Yer. 23:4; Gal. 6:10.
3. Mulong wak kitufanyidinap kukumangan ku chitentam cha michid kwakadau kututazuk?
3 Ku jindond jimwing kukusadik yitentam ya michid. Ijikany anch kudi yikumangen yimwing ni antu amwing atazukinau kwez ku yinship yiney. Pa kwitenchik kwinoku, biro wa mutiy wapampishin nawamp mulong wa kwijik uvud wa antu akutazukau, ni kushinshikin uvud wa jinkwas ni mahotel kwa kulal. Kukutwish kwikal runtu rupandakena anch in kukumangen ez akumangan ku chitentam cha michid kwakadiau kuyitazuk.
4. Yivurish ik yikutukwasha chakwel twikala tayad kurutu kwa kusambish program dichuku ni dichuku?
4 Irijeka chakwel ushikang kurutu kwi ndond kusadikidina chitentam dichuku ni dichuku chakwel umana ndond ya kushakam kurutu program asambisha. Kurutu chikunku chisambisha itekinangaku minit yikemp chakwel ukimba program. Kusal mwamu ku kukukwash urijeka muchim wey nawamp piur pa jinsangu yikulondau. (Ezra 7:10) Anch ntakel wa chikunku watek mizik ya kusambish nich, yitesha nawamp ni irijeka chakwel uwanga muminy wa kusambish ni kutesh malembil.
5. Mutapu ik ukutwishau in dijuku dietu kutaninamu ku program?
5 Anch yid yawonsu ya dijuku yishich pamwing pa chisu chisadikina chitentam, anvaj akushinshikin nawamp kutal anch an au alondwil program nawamp. (Kuv. 31:12) Antu awonsu ayikasikeshin kulondwish mu ma Bibil mau chisu chitanginau maverse. Kufund tumanans mu wiswimp kukutwish kwakukwash utesha nawamp. Kurutu, tumanans twey tukez kukukwash kuvurik manans majim ma madiskur. Ipukany kwishawat chamwamu chisu chisadikina chikunku ap kutumbok chamwamu. Anch ukwet telefon wey, kangal ulik akurumbangesha ap kuyirumbangesh akwen chisu chisadikina program. Kupwa kwa yikunku ya pa dichuku ni dichuku, ov, ukutwish wisambany ni akwen piur pa yom yakusangareshang yadia ku program?
6. Chom ik chidinga cha pakampwil ku yitentam yetu, ni mutapu ik tukwisakinach nakash?
6 Ku chitentam cha distrik, tukweting mutapu wa kusanger nakash urund wetu ni akadivar ni anambaz akad kwikal nich ronganyin rujim ra mangand. (Kus. 133:1-3; Marko 10:29, 30) Ov, ukutwish wiyijikish kudi antu ushicha nau piswimp chakwel wisamba nau pa chisu kupim cha pa midi? Wawiy winou uwamp umwing wa kusend yakudia yiswapela ni wa kushal ching mwi ndond musadikidina chitentam pa ndond pa kubudik kuya ku restora. Sal usu wey anch kangal uburena mutapu wa kwisamb ni kwongojijan.—Rome 1:11, 12.
7. Kwirijek ik tufanyidina kusal piur pa yitadila masun tukeza kadjal?
7 Kudjal: Tufanyidin twijika anch Yehova wayileja in Isarel kuchimin jinsambu kujimbul ja ku yidjal yau, ni kusutishaku kabab ka kamoj ka ndand ujalirikina ku rusamp ni rusamp. (Kuch. 15:37-41) Chom chinech chadinga chijingidij chimekena ku mes chadinga ni kuyivurish anch adi antu aurilau mulong wa kumwifukwil Yehova. Nlel, kudjal kwetu kwa kalimish ku chitentam kutwauril ni mangand. Kudi uman wa usu kudiau antu atumena ap pa chisu tuyilinga mu kudia ku marestora anch program wapwa. Chawiy lel, ufanyidin kutongin nawamp kurutu kwa chisu piur pa masun ukeza kadjal.
8. Mutapu ik tukutwisha kuyilej antu akwau chisu tudia mu musumb musadikidina chitentam?
8 Panany Uman: Anch twasambel twirijek, tukutwish kupam uman kudi antu adia mu musumb musadikidina chitentam. Mukadivar umwing ni mukajend aya ku restora kupwa kwa program, wakwata badj wend ni wamwipula mwin kulandish anch: “Ov, uyimen antu avud adjadina mabadj minam?” Mwin kulandish wakula anch mwaning, niyimen antu avud amudjita ni niyipwil anch adi anany. Chipul chinech chayishikija ku kusambish mambamb, ni mukadivar wamutazuka mwin kulandish eza ku chitentam.
9. Mutapu ik tukutwisha kumekesh musangar wetu kudiay Muntu ututazukina, Yehova?
9 Ap anch akadivar netu awiy akusala madiskur mawonsu, mainterview, ni yakumenaku, udi Tatukwetu wa mwiur, Yehova, ndiy udia mwin rukat Usadila musambu winou wa muspiritu wa pa muvu ni muvu. (Isay 65:13, 14) Tukumekesh kudiay Muntu ututazukina anch tusangaredin anch twikalaku dichuku ni dichuku ni kudia yakudia yital ya muspiritu yitwinkishinau. Ov, wapwishin kal kwirijek chakwel wikalaku?
[Box on page 6]
Yivurish ya Chitentam cha Distrik
◼ Yisu ya Program: Program ukusambish pa 9:20 pamanch machuku mawonsu masatu. Yis akuyazuril pa 8:00 pamanch. Anch mizik ya kusambish nich yasambish, etwawonsu tufanyidin kushakam pa jindond jetu chakwel program asambisha mu mutapu ufanyidina. Program ukupwa pa 4:55 urel Diakatan ni Diampos, pakwez Diarubing ukupwa pa 4:00 urel. Pakwez chitentam cha michid, program wa Diakanying ukusambish pa 1:20 kupwa kwa midi ni ukupwa pa 4:55 urel.
◼ Kukwatin pa Kushakam: Ukuyikwatin antu ndond ya kushakam ching kusu uyila nau mu motak umwing ap ushichinga nau ku chikumbu chimwing.
◼ Yakudia ya Midi: Tukuyudilany anch muntu ni muntu asenda yakudia yipipela pakwez yikwashina mujimbu, chilakej mudi: mikat, mabuj (mudi makond), nyimu, ap yitumbul. Yakuna mudi mem, kafe ap chay chifanyidinap kuyisendin mu milond yikutwisha kubarik mulong wa kwipuk makisidan. Chifanyidinap kwez nich maar ma kulewishan ku chitentam. Anch twasend yakudia ni yakuna yituswirikedina, chawiy tukuyap kand kuland yakudia kudiau in kuyilandish. Kuyiyepang antu mudi inay pol kukat kutukwash kupan uman wetu wa kwinang. (Chiyul amboku: In kulandish yakudia kafanyidinap kuyilik andama mwi ndond ya chitentam pa chisu ap chimwing.—Yoh. 2:13-17.)
◼ Milambu: Tukutwish twamekesh kusanger kwetu yitenchik ya chitentam kusutil ku kulambul milambu mulong wa mudimu usadikina pa mangand mawonsu ku Yot yetu ya Want ap ku chitentam.
◼ Akisidan ni Milong Yikash ya Swa-swa: Asadila mudimu wa ukwash mu milong yikash ya swa-swa inana anch akat kuyitazwok nakash ni pa tumilong tukemp kwau. Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab departema wa Ukwash wa Kusambish chakwel anch muntu chifuvu udia pa ndond yetu ya chitentam ukutwisha kutal kukasikan kwa mayej ni kupan ukwash.
◼ Kukwat Mazu: Kwikil chisaj ap chimwing chifanyidinau kutek ku yijimbish mazu ap ku moj ya nzembu, akutwish kukwat ching kusu mu mutapu wakad kuyizuwol antu akwau.
◼ Kukwat Yipich: Anch wakwat yipich chisu chisadikina program, kangal wasadil amboku yimunyik. Kangal amboku wayitazukany in kusalang mudimu wa kukwat yipich eza pa ndond pasadikidina chitentam. Anch wayimanany kwi ndond ya chitentam, akwat lel yipich, kangal wayisadilany.—Yoh. 2:13-17.
◼ Matelefon: Chifanyidin kumasadil mu mutapu wakad kuyizuwol antu.
◼ Kwinang: Chameken kal chisu chivud anch, antu akata kuland yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yom yikwau-yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya ansh ap chom chikwau kanang), ukwet chisend cha kudjibul mapaper mwi ndond ya kutek yishoshot kangal kumadjibul pansh. Anch twaman anch muntu kanang wadjibul kal dipaper ap lejer pansh ap mu rupang, tufanyidin kumunon ni kumudjibul ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila utukata kwifukwil.—1 Pita 1:15, 16; Kubur. 19:10; Kuv. 23:14.
◼ Ku Tukushakama: (1) Kangal kushakam nau antu avud mu kapalikany ap ndond ya kushakam yakwinkangau pakad mbil ya mwin chikumbu. (2) Anch uswirikedin kuswimp chakwel ulika kwit ndond ya kulal, lond amboku kapamp kamwing. (3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat. (4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau. (5) Kwinang kuding piswimp ni winzamb. Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp. (6) Mekeshany dibuj dia muspiritu mu kushakam nau akwen, ikalap nchik muntu wakwakina ap akadivar akwau in Kristu ukutwisha kwikal nau ndond yimwing.—Gal. 5:22, 23.