Mulondulany Kristu mu Kumekesh Kalimish

1. Ov, mutapu ik mutu wa mulong wa Chitentam cha muvu winou ulejena piur pa kumekesh kalimish?

¹ Bibil umulejen Yehova Mwin Mangand Mawonsu, mudi mwin kudjal uyaj. (Kus. 104:1) Yesu wadinga ni kulond ni kusal chisu chawonsu mulong wa kumutumbish Tatukwend ni Yitenchik yend. (Yohan 17:4) Muntu ni muntu pakach petu ukez kwikal nich chisu cha kumwimburij Yesu ni kumutumbish Yehova chisu chikeza kusadik Chitentam cha Distrik “Mulondulany Kristu!”

2. Ov, mulong wak kwirijek kwetu mulong kwikal ku chikunku ni chikunku kumulimishin Yehova?

² Difukwil dia Kalimish: Tukutwish kumulimish Yehova mu kwirijek chakwel twikala ku yakudia ya mu spiritu yarijekinau mulong wetwetu. Ov, wamulejin kal mukurump wey wa mudimu ni kurijek yom yey chakwel ukumangana machuku mawonsu masatu ma chitentam? Ov, wirijekin kal chakwel kushik kurutu kwa saa mulong wa kuman ndond ya kushakam ni kubombakan mu kuwang muminy wa kusambish ni malembil? Ov, warijekin kal yakudia yey ya midi chakwel utwisha kuyidia pa ndond ya chitentam pamwing ni akadivar ney? Kwinsambishil kwa chikunku ni chikunku, ntakel ukushakam ku chimet kurutu kwa chisu chikusambisha mizik ukez kutwit nich kalimish chakwel tushakama pa ndond yetu, tufanyidin kwimik swa mambamb metu ni kushakam mulong wa program asambisha.

3. Ov, mutapu ik kuta matu nakash ku program kukata kulimish difukwil dietu?

³ Kuta matu nakash ku program kukat kumulimish Tatukwetu wa mwiur. Kupwa kwa kuman mutapu chitentam cha distrik chasadika kabamb-a-nsangu umwing wafunda anch in kutal adinga akat kushimok pamanau “mwikadil uwamp wa in kukumangan ku chitentam, mutapu wadingau ni kutesh zong nich kalimish yadingau ni kulond ni kumekesh kwau kwa rukat ra yom ya mu spiritu.” Ndiy walonda kand piur pa “uvud ushimokishina wa an . . . , antu awonsu ading ni chaku chiwamp cha kutang pamwing ma verse ma Bibil Utumbila.” Chisu chisutishinau program, chidiap chisu cha kwisamb yom ya chamwamu, kutumol jinsangu mu ma telefon, kudia, ap kwendol mu tubway. Anikanch afanyidin kushakam pamwing ni anvajau chawiy lel akutwish kuyikwash kutambul ukwash udiokila mu program. (Kuv. 31:12 ; Jinsw. 29:15) Kusal usu wa mutapu winou kumekeshin kalimish mulong wa antu akwau ni kujikitish mulong wa yakudia ya usey ya mu spiritu yipaninau.

4. Ov, mulong wak tufanyidin kudjal ni kwileng nich kalimish ku chitentam?

⁴ Mutapu wa Kudjal ni Kwileng kwa Kalimish: Antu avud asangera yivurish yadinga ku chitentam cha distrik cha muvu wadiap ou ku diskur dialonda anch: “Chisu Chawonsu Mekesh Win Kristu” dialejana anch atushalapol a Nzamb afanyidin kusal usu wa kumekesh kalimish ka win Kristu mu kudjal ni kwileng. Muvu winou tufanyidin kand kushinshikin nakash pa mulong winou. Mutapu wetu wa kudjal umekeshin yovil yetu mulong wa Yehova ni chisend tukweta cha kwikal Atuman end. Tufanyidin kudandamen kudjal mudi ‘muchifanyidina kudi antu itiyina ku kuwap kwa Nzamb.’—1 Tim. 2:9, 10.

5. Ov, mutapu ik tukutwisha kudjal ni kwileng nich kalimish chisu chitwakad kwikal kwi ndond ya chitentam?

⁵ Ov, tufanyidin kudjal ni kwileng nich kalimish ching anch tudi ku program? Vurikany anch antu avud akat kututal pitukata kudjal mabadj metu chitudia pa ndond yisadikina chitentam. Kudjal kwetu ni kwileng kufanyidin kwikal kushalijadina ni antu awonsu. Chawiy lel, ap chisu cha kupim, mudi pituyila kudia kupwa kwa program, tufanyidin kudjal mu mutapu ufanyidina atushalapol adia mu ul mulong wa kukumangan ku chitentam cha win Kristu ni tufanyidinap kudjal masun mudi maloyis (jeans), atuputul, ap mipil ya kufundol. Yidjal yiswapela, yidap ching ya usey, pakwez yinangina, ni ya kalimish. Yikez kupan uman ik mu chisak! Yehova ukat kusangar anch kudjal ni kwileng kwetu kumekeshin anch tudi atushalapol.

6. Ov, yibudikin ik yiwamp yidiokila ku kumekesh kalimish ka Ukristu?

⁶ Yibudikin Yiwamp: Kumekesh kalimish pitukata kwambamb kukat kutwinkish chisu cha kupan uman wa kukashimun ni kuyisha antu atutadila nich chitongijok chiwamp. Kwinsudiel kwa chitentam chimwing, mukurump umwing walonda anch: “Kand kal tumanap antu mudi inay akweta ngikadil yiwamp mwamu. Udiany njil yisotinay Nzamb anch etu tulondula.” Kumekesh kalimish ku chitentam kulejen anch tukwet rukat ni kalimish ka muntu umwing ni mukwau ni kumutumbishin Yehova. (1 Pi. 2:12) Chinech chikumekesh anch tumwovin Nzamb wom ni kumujikitish mulong wa chisend cha kwikal antu afundishinau kudi Tatukwetu. (Heb. 12:28) Salany amboku usu wa kwez kumekesh kalimish ku chitentam cha Distrik cha muvu winou “Mulondulany Kristu!”

[Box on page 5]

Yivurish ya Chitentam cha Distrik

◼ Yisu ya Program: Program ukusambish pa 9:20 pamanch machuku mawonsu masatu. Yis akuyazuril 8:00 pamanch. Pakata kusambish mizik ya Want, etu awonsu tufanyidin kushakam pa jindond jetu pa chisu chinicha chakwel program asambisha mu mutapu ufanyidina. Program ukupwa 5:05 kupwa kwa midi Diakatan ni Diampos ni 4:10 urel Diarubing.

◼ Kutond pa Kushakam: Antu uyila nau mu motak umwing ap aushiching nau mu chikumbu chimwing awiy ukutwisha kukwatin ndond ya kushakam.

◼ Yakudia ya Midi: Tuyudil anch muntu ni muntu asend yom kanang yipipela pakwez yikwashina, chilakej mudi: mikat (yitumbul ap yikwang), mabuj (makond), nyimu, ap ntamb. Yakuna mudi mem, kafe ap chay chifanyidinap kuyisendin mu mulond ukutwisha kubarik mulong wa kwipuk akisidan. Chifanyidinap kusend maar ma kasu ku chikumangan. Anch twasend yakudia ni yakuna tuswiridina, chinech chikupuish rusot ra kuland yakudia yidiokila kudi in kulandish ya kudia. (Chiyul amboku: In kulandish yakudia kafanyidinap kuyilik kwandam mwi ndond ya chikumangan pa chisu ap chimwing.—Yohan 2:13-17.) Antu asadidila a mbwabul a makal mulong wa kwisuk yakudia pa ndond, afanyidin cha kusambish kwit mbil kudi akadivar akweta chisend cha chikumangan chakwel kwijik kwisu kukutwishau kuyitek. Chifanyidin kudimuk nakash chakwel kwipuk makisidan.—Luka 10:38-42.

◼ Yipan:  Afutin nfalang jivud mulong wa kurijek nich chikumangan cha distrik. Tukutwish kumekesh kujikitish kwetu kusutil ku kupan milambu ya kwikatil ku mudimu wa mangand mawonsu ku Chot chetu cha Want ap ku chikumangan.

◼ Akisidan ni Mayej Makash: Asadila mudimu wa ukwash wa mayej makash inanin anch akat kuyitazuk nakash ni pa tumilong tukemp nakash. Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab ku Ukwash wa Kusambish chakwel anch muntu chifuvu udia pa ndond yetu ya chitentam ukutwisha kutal kukasikan kwa mayej ni kupan ukwash.

◼ Kukwat kwa Mazu:  Kwikil chisaj ap chimwing chifanyidinau kutek ku yijimbish mazu ap kwi nzembu ya kasu, akutwish kukwat ching kusu mu mutapu wakad kuyizuwol antu akwau.

◼ Kukwat Yipich: Anch wakwat yipich chisu cha kukumangan, kangal wasadil amboku yimunyik.

◼ Matelefon: Chifanyidin kukepish dizu nakash dia telefon chakwel kangal dia zuwol.

◼ Kwinang: Chameken kal chisu chivud anch, antu akata kuland yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya ansh ap chom chikwau kanang), ukwet chisend cha kudjibul mapaper makuladinay mwi ndond ya kutek yishoshot kangal kumadjibul pansh. Anch twaman anch muntu kampand wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila tukata kwifukwil.—1 Pi. 1:15, 16; Kubur. 19:10; Kuv. 23:14.

◼ Ku Tukushakama: (1) Kangal kushakam nau antu avud mu kapalikany ap ndond ya kushakam yakwinkangau pakad mbil ya mwin chikumbu. (2) Anch uswiridin kuswimp chakwel kulik kwit ndond ya kulal, lond amboku kapamp kamwing. (3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat. (4) Kangal wasadil nayimp chom ap chimwing chitekinau mulong wa angendj. Chifanyidin kwikal nich mwikadil wa kwitudish ni wa kuyibangin antu akwau. (5) Tufanyidin kwikal inangina ni kulam yikumbu yinangina. Chisu chawonsu ufanyidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mudi ndond ya kulal mulong wa akadivar adiokila ku yikumangen ya kulemp. (6) Mekesh mabuj ma spiritu mu kushakam nau akwen, ikalap nchik muntu wakwakina ap akadivar akwau in Kristu ukutwisha kwikal nau ndond yimwing.—Gal. 5:22, 23.