Tumutumbishany Yehova mu Kukumangan Kujim
1, 2. Ov chikumangan cha distrik chitwinkishin mutapu uwamp wa kusal ik, ni yisu mitapu tukutwisha kuwanyish chinech?
1 Muvu ni muvu yikumangan yetu ya distrik yikat kutwinkish mutapu uwamp nakash wa kumutumbish Yehova. Yovil yetu yidi mud ya David, wawanga anch: “Nikakujikitishil mu kukumangan kujim, nikakushiman mukach mwa antu avud.” (Kus. 35:18) Ku Chikumangan cha Distrik “Kumuziyil Nzamb” chezina kurutu oku, ov, mutapu ik tukutwisha kwikal nich kashinsh anch mud antu inungina, tukat kumushiman Yehova?
2 Mutapu umwing tukutwisha kusal mwamu udi kusutil ku chaku chetu. Ntakel wa ndond yimwing ya chikumangan walond anch: “Pa dishin dia yikumangan yen, twayilejang yisak ya marelijon makwau yisotila kusadil ndond kwez ni kutal mutapu urijekinau Atuman a Yehova chikumangan, mulong akwet ditenchik diwamp.” Kusutil ku mutapu wetu wa kumekan, ku kovijan kwetu, ni ku chaku chetu, umwing ni umwing wetu ukwashin mu mazu mud minam ma kushiman, mayila kamu chakin kud Nzamb wetu.—1 Pi. 2:12.
3, 4. Kwikepish kukutukwash mutapu ik chakwel kudjal mu mutapu uyifanyidina atushalapol in Kristu, ku chikumangan ni kupwa kwa yikunku?
3 Kumekan kwa Muntu pa Rend: Chakwel kudjal ni kwileng ayinetu mu mutapu uletina kushiman kud Yehova chitin kulik kwimekesh. (1 Tim. 2:9) Buku L’École du ministère, paj wa 132, ulondil anch: “Muntu wikepishina ukat kubangin piur pa kulik kuyipwakesh akwau chamwamu ni kulik kupwitin chamwamu kwau manangu kud ndiy amwinend.” Mu jingand jivud, kudjal kwa kwimekesh kumeken ndond yawonsu. Pakwez, Yehova ubazin usu tusadila mulong wa kumumekesh ndiy muchifanyidina. (Midimu 15:14) Ap anch chikumangan chikutwish kusadikin mu chiwandj cha masengan ap ndond ya kwipimishin, chikumangan chetu chikal kal “kukumangan kujim” mu machuku masatu ma chikumangan. Chawiy lel, pitukumangena kurutu kwa Yehova, tufanyidin kudjal kwa kalimish kamufanyidina Muntu wa piur nakash mu mangand.—1 Jins. 29:11.
4 Tuswiridin kand nakash kuta muchim ku kumekan kwetu kwinsudiel kwa chikunku dichuku ni dichuku. Ap anch tukutwish kwikal nich maswir ma kudjal masun mawanyidina mu chisu cha kwipimish ap chisu tudila ku restoran, chidi cha usey anch kudjal kwetu ni kwileng kudandamen kwikal kufanyidina kamu kudi antu “akata kwijimbul anch, amwitiyijina Nzamb.” (1 Tim. 2:10, MM) Kudjal kwitiyikina kudiap kujingunikidina ku kudjal kukatishinau antu avud mu mangand. (1 Yohan 2:16, 17) Mikand yetu ya Ukristu yikwet yifwatul ya ukwash ya kudjal kwa kwikepish, kwa kwirijek kuwamp kwa amakundj ni amband mu mikadil kushalijan. Kudjal mabadj metu chisu cha chikumangan mu musumb musadikidina chikumangan kukusadil mud chivurikish anch tudi atushalapol in Kristu pa yisu yawonsu.—2 Kor. 6:3, 4.
5, 6. Mutapu ik tukutwisha kumekesh kalimish mulong wa program wa yakudia ya muspiritu ya Yehova?
5 Tulimishany Program wa Yakudia ya Muspiritu wa Yehova: Mwant Mujim wa mangand mawonsu waturijekidin kal musambu kurutu oku. (Isa. 25:6; 1 Kor. 10:21) Anch tusanger kamu nakash kwikalaku ku program wa yakudia ya muspiritu ya Yehova, rutong retu rukwikal ra kukumangan machuku mawonsu masatu ma chikumangan. Ov, wirijekin kal mulong wa ndond ya kushakam, wa weny, ni kwit konje ku mudimu wa ku mujimbu? Ov, witekidin kal chisu chifanyidina mulong wa kwirijek ni kwend chakwel utwish kushik kwi ndond ya chikumangan kurutu kwa chisu ni kuman ndond ya kushakam, kubombakan nau akadivar netu, ni kwinung nau mu kumushiman Yehova mu muminy ni malembil ma kusambish?—Kus. 147:1.
6 Kalimish mulong wa program wa yakudia ya muspiritu ya Yehova kakutubachik kuta matu nakash ku program ni kwipuk kwambamb kwakad kufanyin nau akwetu, kudia, ap kwend mu tubway. Kusutil ku chisak cha kashalapol ushinshamena ni kubabal, Yehova uturijekidin yakudia ya muspiritu yituswiridina katat ak. (Mat. 24:45) Tufanyidinap etu awonsu kwishalap ap umwing wa program winou. Anvaj afanyidin kushakam pamwing nau anau ni kuyikwash kutaninamu sens.—Kuv. 31:12.
7. Ov, yom ik yitwitinau kusal mulong wa yakudia ya midi, ni mulong wak?
7 Chitin anch tusendany yakudia kulik kutumbuk ndond ya chikumangan mulong wa kukimb yakudia chisu cha kupim midi. Chading chiletina kushiman nakash mulong ku chikumangan cha muvu wadiap ou in kukumangan avud alondula kamu umutakel winou. Chikwikal chiletina kushiman kupandakena nakash anch antu awonsu asal mwamu muvu unou! (Heb. 13:17) Chitenchik chinech chitwinkishin mutapu uwamp wa kusanger urund ukasikeshina nau akadivar netu ni kuwejin ku chovil cha umwing ni chisambu yiletina kalimish kud Yehova.—Kus. 133:1.
8, 9. Chikumangan chitwinkishin mutapu ik ukwau wa kumushiman Yehova?
8 Kulejan Uman wa Kukashimwish: Chisu tuyila ni kuchirik kwi ndond ya chikumangan, tukwet mitapu yivud ya kumushiman Yehova ni milamu yetu. (Heb. 13:15) Ap anch tudil ku restoran ap twambambin ni muntu ku otel, tukimbany amboku mitapu ya kupan uman. Manangu metu ni michim yetu yikwizul sens nich mapit ma muspiritu. Twanganijanany amboku yom yiney yiwamp nau antu tusankena kwa kukashimwish.—1 Pi. 3:15.
9 Tuchingejin nich impu ya kashinsh mutapu winou wa kumutumbish Yehova “pakach pa yisak yikumangena.” (Kus. 26:12) Tumutumbishany amboku Yehova mu umwing ku Chikumangan cha Distrik “Kumuziyil Nzamb.”
[Caption on page 1]
[Study Questions]
[Caption on page 5]
Yivurish ya Chikumangan cha Distrik
◼ Yisu ya Program: Program ukusambish pa 9:30 pamanch machuku mawonsu masatu. Yis akuyazuril pa 8:00 pamanch. Aminit akemp kurutu kwa kusambish chikunku, ntakel ukushakam pa chimet chisu chibudila mizik ya Want. Etu awonsu tufanyidin kushakam pa jindond jetu pa chisu chinicha chakwel program atwish kusambish mu mutapu ufanyidina. Program ukupwa pa 5:05 kupwa kwa midi Diakatan ni Diampos ni pa 4:10 kupwa kwa midi Diarubing.
◼ Yipan: Afutin nfalang jivud mulong wa kurijek nich chikumangan cha distrik. Tukutwish kumekesh kujikitish kwetu kusutil ku kupan milambu ya kwikatil ku mudimu wa mangand mawonsu ku Chot chetu cha Want ap ku chikumangan.
◼ Yakudia ya Midi: Ayudil anch muntu ni muntu asend yom kanang yipipela pakwez yikwashina, chilakej mud: mikat (yitumbul ap yikwang), mabuj (makond), nyimu, ap ntamb. Yakuna mud mem, kafe ap chay yifanyidin kusedil mu mulond ukash mulong wa kwipuk aksident. Chifanyidinap kusend maar ma kasu ku chikumangan. Anch twasend yakudia ni yakuna tuswiridina, chinech chikupuish rusot ra kuland yakudia yidiokila kud in kulandish ya kudia. (Chiyul amboku: In kulandish yakudia kafanyidinap kuyilik kwandam mwi ndond ya chikumangan pa chisu ap chimwing.—Yohan 2:13-17.) Antu asadidila ambwabul a makal mulong wa kwisuk yakudia pa ndond, afanyidin cha kusambish kwit mbil kud akadivar akweta chisend cha chikumangan chakwel kwijik kwisu kukutwishau kuyitek. Chifanyidin kudimuk nakash chakwel kwipuk maaksident.—Luka 10:38-42.
◼ Kwinang: Chameken anch chisu chivud, antu alandina yakudia kud in kulandish, akudjibul yishoshot pansh. Mwamu ndond yawonsu yikat kwizul nich mapaper, masashe, yijiku ya milond ni yikwau-yikwau. Anch muntu watond kuland yakudia kud umwing wa in kulandish (chilakej: maswit, yitumbul, tumabot, yikunku ya ansh ap yom yikwau), ndiy ukwet chisend, cha kudjibul yishoshot mwi ntuku wa kutek yishoshot ni pikil kuyidjibul pansh. Akadivar amboku tusalany usu nakash wa kulam ndond yetu ya chikumangan ni kuns-kuns kwinangina. Kwinang udi mulong umutadila muntu ni muntu wezina ni kukumangan. Anch muntu ni muntu wasal yimufanyidina kusal, kwinsudiel kwa dichuku, ndond ya chikumangan yikushal yinangina. Tusotil kumekesh ngikadil ya Nzamb utumbila tukata kwifukwil.—1 Pi. 1:15, 16; Kub. 19:10; Kuv. 23:14.
◼ Anvaj ni An: In kututal ashimokining pa kuman ansand ashich zoong pa chisu cha program, akat kufund ni kulondul kutang kwa mifund mu Bibil wau. Chiwapidilap kuyisha anikanch pakad kuyital nawamp. Anch ov ja kuya ku musalany, nvaj ap muntu mukurump ufanyidin kuyitwal. Chikutwish kwikal kand cha manangu kwikal nich mem mau ma kuna mawanyidina; chinech chikutwish kudiosh maswir ma kusha ndond mulong wa kukimb mem chisu cha chikunku. Pa chisu cha kupim, tusotin kuyilam anetu chakwel kangal asambisha kukadabijan mau, palemp eza awa ap kuyiwish antu akwau. Ruzuwol rikutwish kuletish minan ni usany pa dijin dia Yehova. Chaku chetu chiwamp chiletining uyaj kud Yehova ni katumb ku usey wa piur wa mafundish ma Bibil.—1 Kor. 14:40.
◼ Kukwat Mazu ku Yisaj: Kwikil chisaj ap chimwing chifanyidinau kutek kwi nshing ya nzembu ap ku yijimbish mazu ni akutwish kuchisadil mu mutapu umwing wakad kulet kampuw kud antu akwau.
◼ Matelefon ma ku Makas: Chiwapidil kumatek chakwel kangal malet kampuw.
◼ Ku Yikumbu Tukwikala: (1) Kangal kutek antu avud mu chikumbu chimwing wakad mbil ya mwin chikumbu. (2) Anch ufanyidin kulik kwit ndond ya kulal, sal amboku swa. (3) Kurutu kwa kwisuk, chiwapidin kumwit mwin chikumbu ap akadivar atadila Chot cha Want mulong wa yitenchik yifanyidinau kukwat. (4) Kangal kusadil mutapu uyimp yom yiyitekidinau angendj. Chaku chifanyidin kwikal cha kwitudish ni cha manangu. (5) Kwinang kwambakedin pa kulamat kwetu kud Nzamb. Chisu chawonsu uwapidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mud ndond ya kulal mulong wa akadivar adiokila yikumangen ya kulemp. (6) Mekesh mabuj ma spiritu mu kushakam nau akwen, ikala muntu wakwakina ap akadivar akwau in Kristu akutwishau kukutek nau ndond yimwing.—Gal. 5:22, 23.