Mukungamena Yehova
1. Wisu mutu wa mulong wa chitentam, ni mulong wak udi ufanyidina?
1 Isay wafunda anch ‘Yehova udi Nzamb wa dirumburish.’ “Ayuk kwau awonsu amukungamedina [Yehova].” (Is. 30:18b) Jinsangu jivud ja Bibil jilejen anch Nzamb wayirumburisha akankuny nend ni kuyikul atushalapol end ashinshamena. Jinsangu mud jinej jilejen yom ik kudi in kumwifukwil Yehova nlel unou? Yom ik tukutwisha kusal katat chakwel kwirijek mulong wa ‘dichuku dijim ni dikwatishena wom dia Yehova’? (Yowel 2:31, 32) Chitentam chetu cha Distrik “Dipandish Didi Piswimp!” chikutubachik kutong mulong wa yipul yiney ni kwishinshikin ayinetu. Chikutukwash kumukumangen Yehova.
2. Mutapu ik tukutwisha kujikitish mulong wa chitentam chetu cha distrik?
2 Ov, wirijekin mulong wa kukumangan ni kutaninamu machuku mawonsu masatu ma chitentam? Chilakej, wamulejin kal mukurump wey wa mudimu mulong wa kukwink chisu cha kukumangan? Kangal wachingel anch yikwiyezin pakad kusal usu. Lembil mulong wa chom chinech. Kupwa, it. (Neh. 2:4, 5) Chawiy kand chimwing, tufanyidinap kuchingel anch tukez kwirijek kwetu mulong wa weny, ndond ya kulal, ni yom yikwau ya usey. Kwirijek kwinoku kuwamp kumekeshin kujikitish kwetu kujim mulong wa yakudia ya muspiritu yiletinau ku tebur wa Yehova. Amakurump afanyidin kudimuk chakwel kuyikwash antu akweta kuswir kwa ukwash mu kwirijek kwau mulong wa chitentam, nakash amapal adia mu chikumangen.—Gal. 6:10.
3. Ngikadil ik yifanyidina kumekan pakach pa antu a Yehova mu musumb usadidilau chitentam?
3 Chaku Chiwamp Chimutumbishin Nzamb: Chisu tukumangena ku yitentam antu avud, chaku chetu chiwamp udi uman kud antu. Chinech chitwitin yom ik? Mwi ndond ya chitentam, antu tudia nau afanyidin kusangar mulong wa ngikadil yetu ya Ukristu, mud kushimpish muchim, kudimuk, kwilam, ni kwitudish. (Gal. 5:22, 23; Filp. 4:5) Etu awonsu tufanyidin kumekesh rukat “kirikat kwisadilangip yom ya ukwash irinau, kirikat kwisotilangip yom yau irinau, kirikusulangip muchim.” Anch yikokujol ap yom yakad kufanyin yashiken, tusotil kusal yom yawonsu “ku uyaj wa Nzamb.”—1 Kor. 10:31; 13:5.
4. Mutapu ik ukutwishau anvaj kuyikwash anau chakwel iyendisha mu mutapu umutumbishina Yehova?
4 Kupwa kwa chitentam chimwing, mukurump umwing wa otel wabaza nakash chaku ni mwikadil wa asand etu washikena kukulond anch usotil “chisu chawonsu kuyak Atuman a Yehova mu otel wend.” Chiletishin musangar nakash! Chinech chimekeshin dilij diwamp ni kulam kuwamp kwenen anvaj. Chikutwishap kwikal cha manangu kud anvaj kuyilik anau kwiman mwi ndond pakad kuyital. An afanyidin chisu chawonsu kuyital nawamp. (Jinsw. 29:15) Chaku chau chiwamp chimutumbish amboku Yehova ni kusangarish muchim wend!—Jinsw. 27:11.
5. Mutapu ik tukutwisha kumutumbish Yehova kusutil ku kudjal ni kwileng kwetu?
5 Kudjal ni Kwileng Kwa Kwikepish: Umwing ni umwing wetu ukutwish kukwash ku chitongijok chiwamp cha antu awonsu adia ku chitentam anch wipuk milad ya kudjal ni kwileng yakad usey, yipandakena, yakad kwikepish, ap yimekeshina yom kanang. Yiney yidi ya kusadil chisu cha kuya ni kuchirik ku musumb wa chitentam, chisu tukwashina kurijek ndond ya chitentam, ni chisu tukumangen ku yikunku ya chitentam. Chitudia atushalapol a Nzamb, twakamin cha kusambish mulong wa dijin ni ntumb ya Yehova, kangal mulong wa kutond ap musangar wetu ayinetu. Atatuku akwet chisend cha kwijik anch majuku mau madjadil kwakad kwimekesh ni kwibaz yisu yin yawonsu.—1 Tim. 2:9.
6. Mulong wak tufanyidina kumekan mutapu umwing wa kalimish mu chisu cha kwiswedish tukweta pa chirung cha chitentam?
6 Chidi kand cha usey kwikal ni mwikadil wa kalimish chisu cha kwiswedish. Chifanyidin kudjal maswin metu twadjalang pa chisu cha chitentam ap anch tudil kupwa kwa yikunku. Kudjal badj wetu wa chitentam kutwinkishin mitapu ya kulejan uman.—2 Kor. 6:3, 4.
7. Mutapu ik tukutwisha kukwash ku kutenchik ni musangar wa chitentam? (Tal “Yivurish ya Chitentam cha Distrik.”)
7 Isay wabwaka anch: “[Yehova] uchingedil kukwovilany riy, ni kukwanakenany.” (Is. 30:18a) Kujikitish mulong wa ranaken ni rukat ridimukina ra Yehova yifanyidin kutubachik kumutumbish kusutil ku chaku ni kudjal kwetu chisu tukumangena pamwing ku yitentam yetu. Chitentam cha Distrik “Dipandish Didi Piswimp!” chimutumbish amboku Nzamb wetu ni chitukwasha kumukungamen ndiy!
[Caption on page 5]
[Picture on page 5]
Yivurish ya Chitentam cha Distrik
◼ Yisu ya Program: Program ukusambish machuku mawonsu pa 9:30 muten wa pamanch. Yis akuyazuril pa 8:00 muten wa pamanch. Minit yikemp kurutu kwa kusambish chikumangan, ntakel ukushakam pa chimet pabudilau mizik ya Want. Etu awonsu tufanyidin kushakam kurutu kwa chisu chakwel program ukutwish kusambish mu mutapu wa kalimish. Program ukupwa pa 5:15 muten wa urel Diakatan, pa 5:05 muten wa urel Diampos, ni pa 4:10 muten wa urel Diarubing.
◼ Kutond pa Kushakam: Antu uyila nau mu motik umwing ap aushiching nau mu chikumbu chimwing awiy ukutwisha kukwatin ndond ya kushakam.
◼ Yakudia ya Muten: Apanin chiyul anch muntu ni muntu asenda yakudia yikemp pakwez yikwashina mujimbu, chilakej: mikat, mabuj (makond), nyimu, yitumbul ap ntamb. Yakuna mud mem, kafe ap chay chifanyidin kuyisendin mu chom chakad kubarikang mulong wa kwipuk kuletish akisidan. Chifanyidinap kusend mar ma makulewish ku chitentam. Anch twasend yom yakudia ni yakuna tukweta nich kuswir, chikutwish kukepish maswir ma kuland ya in kulandish. (Kwijikish amboku: In kulandish yakudia kafanyidinap kwandam mwi ndond ya chikumangan chisu ap chimwing.—Yohan 2:13-17.) Antu asadidila ambabul a kwisukin yakudia pa ndond ya chitentam, afanyidin kwit mbil kudiau akadivar akweta chisend cha chitentam mulong kwijik ndond yikutwishau kuyitek. Chifanyidin kubabal mulong wa kwipuk makisidan—Luka 10:38-42.
◼ Yipan: Asadidil nfalang jivud nakash mulong wa kurijek chitentam cha distrik. Tukutwish kumekesh kujikitish kwetu mu kupan milambu ya kwikatil ku Chot chetu cha Want ap ku chitentam mulong wa mudimu wa mangand mawonsu.
◼ Akisidan ni Mayej Makash: Asadila mudimu wa ukwash wa mayej makash inanin anch akat kuyitazuk nakash ni pa tumilong tukemp nakash. Anch kwikal mayej makash kwi ndond ya chitentam, muleja amboku muntu ushicha nend ndond yimwing, ndiy ukwijikish pakad kulab ku Ukwash wa Kusambish chakwel anch muntu chifuvu udia pa ndond yetu ya chitentam ukutwish kutal kukasikan kwa mayej ni kupan ukwash.
◼ Kukwat kwa Mazu: Kwikil chisaj ap chimwing chifanyidinau kutek ku yijimbish mazu ap kwi nzembu ya kasu, akutwish kukwat ching kusu mu mutapu wakad kuyizuwol antu akwau.
◼ Kukwat Yipich: Anch wakwat yipich chisu cha kukumangan, kangal wasadil amboku yimunyik.
◼ Matelefon: Chifanyidin kukepish dizu nakash dia telefon chakwel kangal mazuwol.
◼ Kwinang: Chameken chisu chivud anch, antu alandila yakudia kudiau in kulandish, akat kudjibul yishoshot mu rupang. Ndond yawonsu yikat kwizul nich mapaper, malejer, yijiku ya milond ya maar ni yikwau. Anch muntu wasot kuland yakudia kudiau in kulandish (chilakej: swit, biskwit, mukat, yikunku ya insh ap chom chikwau kanang), ukwet chisend cha kudjibul mapaper makuladinay mwi ndond ya kutek yishoshot kangal kumadjibul pansh. Anch twaman anch muntu kampand wadjibul kal dipaper ap lejer pansh ap mu rupang, tufanyidin kudinon ni kudidjibul mwi ndond ya kutek yishoshot. Akadivar, tusalany amboku usu wa kulam rupang ra chitentam ni ndond yawonsu yinangina. Kwinang udi mulong umutadina muntu ni muntu ukumangena. Anch muntu ni muntu wasal mudimu wend, kwinsudiel kwa chikumangan, jindond ja chitentam jikushal jinangina. Tusotil kumekesh ngikadil ya Nzamb utumbila tukata kwifukwil.—1 Pit. 1:15, 16; Kub. 19:10; Kuv. 23:14.
◼ Kutukushakama: (1) Kangal kushakam nau antu avud mu kapalikany ap mu chikumbu chakwinkangau pakad mbil ya mwin chikumbu. (2) Anch uswiridin kuswimp chakwel kulik ndond ya kulal yiwitina, sal amboku swa. (3) Kurutu kwa kwisuk, chiwapidin kwit mbil kudiay mwin chikumbu ap akadivar atadila Chot cha Want mulong wa yitenchik ya diking yifanyidinau kukwat. (4) Kangal wayipish chom ap chimwing chitekinau mulong wa angendj. Chaku chifanyidin kwikal cha kwitudish ni cha kuyibangin akwen. (5) Tufanyidin kwikal inangina ni kulam yikumbu yinangina. Chisu chawonsu uwapidin kusha chikumbu chinangina ni cha kurijek nawamp. Chinech chitadil kand Chot cha Want, chikutwishau kusadil mud ndond ya kulal mulong wa akadivar adiokila ku yikumangen ya kulemp. (6) Mekesh mabuj ma spiritu mu kushakam nau akwen, ikalap nchik muntu wakwakina ap akadivar akwau in Kristu ukutwisha kwikal nau ndond yimwing.—Gal. 5:22, 23.