“Likany Ris Ra Mitapu Yawonsu”

“Mwom wakin wa muntu kiudiap mu yom yikwetay, ap anch ukwetap nchik mapit mavud.”—LUKA 12:15, Manswik Masu.

1, 2. (a) Chom ik wamena piur pa yisakin ni yitongijok ya antu nlel unou? (b) Ov, mikadil yiney yikutwish kwikal ni usu ik mu mwom wetu?

ANTU avud atongining anch—nfalang, dipit, katumb, mudimu ufutina nawamp, ni dijuku yidi ni yawiy milad ya kupandakan ni diking dia machuku ma kurutu. Chimeken anch mu jingand ja ampich ni ja atuzwendj, yisakin ni yitongijok ya antu avud yiding ching ya kukimb mapit ni kuwin. Ku mutambu ukwau, mutapu wau wa kwisakin yom ya mu spiritu—anch kudi antu amwing isakina yom ya mu spiritu—uvud wau udandamedin kukep.

² Chawiy chasambelay Bibil kulejan. Ulondin anch: “Mu machuku ma kwisudiel anch masej piswimp, kukez kez yom yikash. Antu akez kwikal in kwikat ayinau, in kukat nfalang, . . . akwisangarish ayinau, Nzamb bwat; akez kwikal ni chifu cha Nzamb, pakwez end atun ukash wau.” (2 Timote 3:1-5) Chishichau chisu chawonsu pamwing ni antu a mutapu winou, in Kristu akin adi mu chibachikin chisu ni chisu chakwel niyawiy alondula mutapu winou wa kutong ni mwikadil wau. Chom ik chikutwisha kutukwash kurish nich usu usadina mangand chakwel ‘twilikejany mu chaku cha mangand’?—Rom 12:2.

3. Chiyul ik chaletay Yesu tusotila katat kushinshikin?

³ Chidiay “kalal ni mwin kutenchikish wa ritiy retu,” Yesu Kristu watwinkisha dilejan dikash pa mulong winou. (Hebreu 12:2) Dichuku dimwing padingay Yesu ni kuyilej antu piur pa kurumburik kwa yom yimedina pa difukwil diakin, muntu umwing wamukaturija nich chipul anch: “Mulej, muleja mwanamakwam chakwel twangan nend dipit diatushilay tatukwetu.” Pa kumwakul, Yesu wamwinkisha muntu winou—pamwing ni antu awonsu adinga ni kumutesh—yiyul yimwing yiwamp. Wayinkisha chiyul chikash pantaliken nich ris ni wachikasikeshina nich chilakej chilangwishina yitongijok. Tufanyidin kuta nakash muchim pa yalonday Yesu pa chisu chinech ni kukimb mutapu tukutwisha kutaninamu anch twayisadil mu mwom wetu.—Luka 12:13-21, MM.

Kwit Kwakad Kufanyin

4. Ov, mulong wak kumukaturij Yesu kudi muntu winou kwadingap kufanyidina?

⁴ Kurutu kwa kumukaturij kudi muntu winou, Yesu wading uyilejin in kwilej end ni antu akwau piur pa kwipuk rubabek, kukapuk kumwitiyij Mwan a muntu, ni mulong wa kutambul ukwash wa spiritu utumbila. (Luka 12:1-12) Chakin kamu, yiney yidi yom ya usey yading yifanyidinau in kwilej kulam mu michim yau. Pashikay kal pakach pa diskur dined dishikina ku michim, kukashimuk muntu wamukaturij ni wamwit Yesu ikal nzuj wa mulong wa mapit wadinga uletina mbwandj mu dijuku. Chikwau kand, kudi dilejan dimwing dia usey tukutwisha kwilejin ku chinship chinech.

5. Kwit kwa muntu winou kwajingunisha chom ik padi ndiy amwinend?

⁵ Buku umwing ulondil anch: “Chaku cha muntu chikat kumekenang yisu yivud kusutil ku yikatay kutongin pakatay kutesh dikasikesh dia chirelijon.” Padingay Yesu ni kulejan milong yikash ya mu spiritu, chimeken anch muntu winou wading ni kutongin piur pa yom yelay kusal mulong wa kwikal ni nfalang. Ap anch wading nich diyingish dia kwinan mulong wa uswan kadilejenap. Pamwing ap wasota kutanin mu ulabu ni katumb ka Yesu mudi nzuj wa manangu mu kupwish milong ya antu. (Isay 11:3, 4; Mateu 22:16) Chikalap nchik, chamubachika kwipul, chipul chend chamekesha anch wading ni mulong ukash mu muchim wend—kuburen kukash kuman usey wa yom ya mu spiritu. Ov, kididiap diyingish dia usey nakash dia kwishinshikinap ayinetu? Chilakej, ku yikumangan ya Ukristu, chiswapeling kuzuwol mu manangu metu ap kutongijokin pa yitukutwisha kusal. Pakwez, tufanyidin kuta matu ku yom yilondinau ni kutongin mutapu wa kuyisadil mu mwom wetu chakwel tutwisha kurijek urund wetu ni Tatukwetu wa mwiur, Yehova Nzamb, ni ambay netu in Kristu.—Kuseng 22:22; Marko 4:24.

6. Mulong wak Yesu walika kusal chamwitau kudi ikundj winou?

⁶ Chikalap nchik chom chamubachika muntu winou amwita, Yesu kitiyijap kuyikatwil mulong wau. Pakwez, Yesu wamwela anch: “Muntwey, nany wangikadisha am nzuj ni mwin kwangan wenen?” (Luka 12:14) Palonday mwamu, Yesu wadinga wisambin chom chadinga chijau antu nawamp, kwambatan nich Chijil cha Moses, ayiteka anzuj mulong wa kukatul milong mudi yiney. (Kuvurik Yijil 16:18-20; 21:15-17; Rut 4:1, 2) Pakwez, Yesu wadinga ukwatiken nich yom ya usey nakash—kupan uman wa uyakin wa Want ni kuyilej antu rusot ra Nzamb. (Yohan 18:37) Anch twalondul chilakej cha Yesu, pa ndond pa kwizuwol nich milong ya mangand, tukat kusadil chisu chetu ni usu wetu mulong wa kuyilej antu a ‘michid yawonsu rusangu ruwamp ni kuyikadish in kwilej.’—Mateu 24:14; 28:19.

Babelany Ris

7. Kujingunin ik kwa kashinsh kwajinguninay Yesu?

⁷ Chatwishay kujingunin yitongijok yikurukina yadinga mu muchim, Yesu wajingunina anch kudi chom kanang chikash mu kwit kwa ikundj winou mulong Yesu ayikatwila mulong wau. Chawiy lel, pa ndond pa kulik kusu chamwitau kusal, Yesu waya ku chishin cha mulong ni walonda anch: “Likany ris ra mitapu yawonsu, mulong mwom wakin wa muntu kiudiap mu yom yikwetay, ap anch ukwetap nchik mapit mavud.”—Luka 12:15, MM.

8. Ris yom ik, ni rikutwish kushikij ku kusal ik?

⁸ Ris ripandikenamu kulemp maku ma kusot kwikal ni nfalang ap yom kanang, yikutwishau kusadil nawamp ap kwikal nich rutong riwamp. Kulondwish nich ndinguril umwing, ris ridi “maku makash ma kusot kwikal ni mapit ap ma kusot yom ya muntu mukwau.” Rikutwish kwikal maku ma kusot yom yivud,—yakad kutwish kuwanyish, ris rikat kubachik ku kusot ching kwikal ni yom yivud, pamwing ap yom yayen,— mulong kusu wa kusot kwikal nich, wakad kubangin anch kamu uyiswiridin ap maswir ma antu akwau. Mudi mukatay mwin ris kushang ris ra yom yiswiridinay riyikela yitongijok yend ni yisalijok yend mu chilik chakwel anch chikal nzamb wend. Vurik anch kambuy Paul wamwisikeja muntu mwin ris ni mwin kwifukwil akish, wakad kwez kuswan Want wa Nzamb.—Efes 5:5; Kolosay 3:5.

9. Ris rikutwish kumekan mu mitapu ik yimwing? Let yilakej yimwing.

⁹ Cha musangar, Yesu wababeshana pantaliken nich “ris ra mitapu yawonsu.” Ris riding mu mitapu kushalijan. Chijil cha nsudiel mu Yijil Dikum chijimbwil milad yimwing ya ris, pichilondila anch: “Kangal wikal ni ris ku chikumbu cha mukwen. Kangal wikal ni ris kwi mband wa mukwen, ap ku kashalapol wend, ap ku mwilomb wend, ap kwi ngomb wend, ap ku chimbur wend, ap ku yom yawonsu yidia ya mukwen.” (Kubudik 20:17) Bibil wizwil too nich yilakej ya antu awila mu chitil chijim cha ris ra mulad umwing ap ukwau. Satan ndiy wadinga wa kusambish kovil ris chom chayen—uyaj, katumb, ni ulabu yidi ching kusu ya Yehova. (Kuburik 4:11) Eve wova ris ra kwikwatin chiyul amwinend, ni amudimba pa mulong winou chawiy chaushikijay muchid wa muntu ku chitil ni rufu. (Disambishil 3:4-7) Ayilembil adinga angel alika kusanger ‘ndond yau ya ulabu, chawiy alika kushakam pa ndond yau’ mulong wa chom chakadau kwikal nich mbil. (Yud 6; Disambishil 6:2) Tongin kand ya Balam, Akan, Gehaz, ni Yudas. Pa ndond pa kusanger yadingau nich mu mwom wau, awiy alikina maku makash ma kusot yom ya mujimbu chakwel mayishikija ku kusadil nayimp yisend yadingau nich, kwayishikija ku kusheshik.

10. Mutapu ik tufanyidina ‘kubabal,’ kwambatan nich dibabesh dia Yesu?

¹⁰ Chifanyidin kamu mudi ik anch Yesu wasambish nich mazu “dimukany” kurutu kwa kulond dibabesh piur pa ris! Mulong wak? Mulong chiswapeling kudi antu kuman anch muntu kanang ukwet ris, pakwez chiyikasikedining kwiyijik ayinau anch akwet ris. Pakwez, kambuy Paul ulejen anch: “rukat ra nfalang wawiy muj wa mitapu yawonsu yiyimp.” (1 Timote 6:9, 10) Mwin kwilej Yakob urumburil anch “chawiy upwepu [maku], anch wimish, ukuval chitil.” (Yakob 1:15) Kulondwish nich chiyul cha Yesu, tufanyidin ‘kubabal,’ kichidiap mulong wa kushinshikin akwetu chakwel kuman anch akwet ris, pakwez chidi mulong wa kwishinshikin ayinetu chakwel tuman maku madia mu michim yetu, chakwel ‘twilama ku ris rawonsu.’

Mwom wa Mapit Mavud

11, 12. (a) Dibabesh ik dialetay Yesu piur pa ris? (b) Mulong wak tufanyidina kutesh dibabesh dia Yesu?

¹¹ Kudi kand diyingishin dikwau ditufanyidina kubabel ku ris. Tal yalonday kand Yesu anch: “Mulong mwom wakin wa muntu kiudiap mu yom yikwetay.” (Luka 12:15, MM) Chiyul chinech chifanyidin kamu kuchishinshikin nakash pa chirung chetu chinech cha kukimb mapit ma mujimbu, antu iliken mapit nich musangar ni kupandakan. Ku mazu minam, Yesu wadinga ulejen anch mwom wakin ni wa mazang wengamidinap pa mapit ma ku mujimbu, mavulap nchik.

¹² Pakwez, antu amwing, kakutwishap kwitiyij. Akutwish atong anch mapit makat kuwapish mwom ni kuwikadish wa musangar, wa ukwash nakash. Chawiy lel, akat kwipan ayinau mu kukimbijol yom yikutwisha kuyikwash nich ukaliweny wa kutambul mapit mawonsu ni yisaj yisotilau. Atongining anch, yom yiney yikez kuyinkish mwom uwamp. Pakwez mu kutong kwau mwamu, akat kukangany kutesh yalonday Yesu.

13. Yitongijok ik yisikena tufanyidina kwikal nich piur pa mwom ni mapit?

¹³ Pa ndond pa kushinshik pa kwijik anch chiwapin ap bwat kwikal ni mapit mavud, Yesu walonda anch mwom wa muntu “kiudiap mu yom yikwetay,” charumburik anch, yom yikwetay kal. Pa chinech, etu awonsu twij anch kukwatikesh mwom tukweta, kwitiningap chakin kwikal ni yom yivud. Chitin kusu kwikalaku ni yakudia, yom ya kudjal, ni ndond ya kulal. Ampich akwet yom yiney yivud, ni atuzwendj amen mar pa kwikal nich yiswiridinau. Pakwez, ikala ampich ap atuzwendj, awonsu adi chilik chimwing ku rufu—yom yawonsu yikat kushiken ku kufa. (Mulej 9:5, 6) Chawiy lel, pakwel anch mwom wikala nich rutong ni ufanyidina, ukutwishap ni ufanyidinap kwengamin kusu pa yom yikwetay muntu. Chitongijok chinech chimeken patok anch twashinshikin mulad wa mwom wisambinay Yesu.

14. Yom ik tukutwisha kwilejin ku dizu “mwom” didia mu rusangu ra Bibil?

¹⁴ Yesu palonday anch: “Mwom wakin wa muntu kiudiap mu yom yikwetay,” dizu diasadilau pinap mulong wa “mwom” mu Rusangu Ruwamp rafunday Luka (mu Grek, zo·eʹ) dirumburikinap mutapu ap mulad wa mwom, pakwez mwom awinau, mwom win kamu.a Yesu wadinga ulondin anch, twikala ampich ap atuzwendj, twikala ni mwom wa mazang ap wa mar, tukwetap ukaliweny wa kwijik kulep kwa mwom wetu ap kwijik anch tukwikal aom diamashik. Yesu walonda mu Malejan mend ma pa Mukandu anch: “Ov nany wa pakach pen anch unenganen ukutwish kuwejaku ku mwom wend ap kusu kachisu kakemp?” (Mateu 6:27, MM) Bibil ulejen patok anch ching Yehova kusu ndiy udia “musul wa kupand,” ching ndiy kusu ukutwisha kuyinkish antu ashinshamena “kupand kudia kamu kupand kwakin,” ap “mwom wa chikupu,” mwom wa mivu ni minang, mwiur ap panap pansh.—Kuseng 36:9; 1 Timote 6:12, 19.

15. Mulong wak antu avud atekin ruchingej rau mu mapit ma ku mujimbu?

¹⁵ Mazu ma Yesu mamekeshin mutapu chiswapela kudi antu kwikal nich yitongijok yiyimp piur pa mwom. Ikala ampich ap atuzwendj, antu awonsu adi akad kuwanyin ni akwet nsudiel ya chilik chimwing. Nshakur Moses walonda anch: “Mivu ya kupand kwetu yidi mivu makum sambwad, ap anch usu uwanyin makum chinan, pakwez kwibaz kwau kwawiy mar ni ushon kusu, mulong kachisu kakemp yapwa kwau, niyetu twatwik langam.” (Kuseng 90:10; Yob 14:1, 2; 1 Pita 1:24) Pa chinech, antu akad kwikal nich urund uwamp ni Nzamb akweting chisu chivud chitongijok cha kwel anch “lik tudiany kwetu, tunany lel kwetu, mulong diamashik tufil,” yitongijok yisambinay kambuy Paul. (1 Korint 15:32) Antu akwau, chimenau anch mwom udi wiswimp ni wakad kwijik yikushikena diamashik, apakishin kutan diking ni kwikang mu mapit ma mujimbu. Pamwing ap atongining anch kwikal nich yom yivud ya ku mujimbu yikez kutek mwom wau mu diking nakash. Chawiy lel, asadin usu wa kwikungin mapit ni yom yivud, end isikej lel nich kurumbuk yom yiney nich diking ni musangar.—Kuseng 49:6, 11, 12.

Diking mu Machuku ma Kurutu

16. Pisu pimedinap usey wakin wa mwom?

¹⁶ Chikutwish kwikal chakin anch mwom uwamp—mudi kwikal ni yakudia yivud, maswin, chikumbu, ni yom yikwau yiwamp—kukutwish kwawejin ku mwom wa mazang ni ukutwish ap kutan kwokan kuwamp kwa chimwingang ni kuwejuku mivu yikemp ku mwom wa muntu. Pakwez, ov, mwom wa mulad winou udi kamu wakin ni wa diking? Usey wakin wa mwom kakatap kuwisik nich kuvul kwa mivu yikutwishay kusal muntu ap nich kuvul kwa yom ya mujimbu yikwetay muntu. Kambuy Paul walejana chak cha kuchingejin nakash mu yom mudi yiney. Ndiy wamufundina Timote anch: “Yishinshika ampich a mangand minam chakwel awiy kangal itonga nakash piur, ap kutek ruchingej rau pa mapit mindjing, ching mwi Nzamb, ukat kutwinkish rupit ra yom yawonsu ya kutusangarish nich.”—1 Timote 6:17.

17, 18. (a) Yilakej ik ya kashinsh piur pa mapit yitufanyidina kwimburij? (b) Chishimu ik cha Yesu tukeza kushinshikin mu mutu wa mulong wambakedinap?

¹⁷ Chidi cha usup kuchingejin mu mapit mey mulong makat “kutwikang langam.” Nshankur Yob wadinga mpich nakash, pakwez mar pimamukashimwisha, mapit mend mamukwashap bwat; masheshika kapamp kamwing. Urund wend ukash ni Nzamb wawiy wamulama mu yoziu yawonsu ni mu mar mawonsu. (Yob 1:1, 3, 20-22) Aburaham kalikinap mapit mend mavud mamukangesha kwitiy mudimu ukash wamwinkau kudi Yehova, ni amuyukisha wikal “tatuku wa yisak ya michid.” (Disambishil 12:1, 4; 17:4-6) Yilakej yiney ni yikwau yivud tuwapidil kamu kuyimburij. Twikala ansand ap amapal, tufanyidin kwishinshikin ayinetu chakwel tumana yidia chakin kamu ya usey mu mwom wetu ni pisu tutekina ruchingej retu.—Efes 5:10; Filip 1:10.

¹⁸ Mazu makemp malonday Yesu piur pa ris ni mutapu uwamp wa kuman mwom yidi chakin ya usey ni yifundishina. Pakwez, Yesu wadinga kand ni chom chikwau mu manangu, ni wadandamena kushimunin chishimu chimwing chitongishina piur pa ikundj mpich wakad manangu. Chishimu chinicha chikwet usey ik mu mwom wetu nlel, ni yom ik tukutwisha kwilejinaku? Mutu wa mulong wambakedinap ukez kwakul kuyipul yiney.

[Mazu madia kwishin kwa paj]

Ukwakula Nchik?

• Yom ik tukutwisha kwilejin ku kulik kwa Yesu kwa yamwitau kusal kudi ikundj umwing wadinga mu runtu?

• Mulong wak tufanyidin kubabel ris, ni mutapu ik tukutwisha kusal mwamu?

• Mulong wak mwom wimedinap pa kuvul kwa mapit?

• Yom ik yikutwisha kwikadish chakin mwom wa musangar ni wa diking?

[Chipich chidia pa paj wa 25]

Mulong wak Yesu walika kwitiyij yamwitau kusal kudi ikundj winou?

[Chipich chidia pa paj wa 25]

Ris rikutwish kushikij ku yibudikin yiyimp