Ov, Udi “Mpich Kudi Nzamb”?

“Mwamu muchikwikala kudi antu akata kwikumangejin mapit ayinau, pakwez aburedin mapit makin ku mes kwa Nzamb.”—LUKA 12:21, Manswik Masu.

1, 2. (a) Antu asotining kwipan nakash mulong wak? (b) Mar ni ubaj ik yikutwishau in Kristu kurish nich?

KUKIMB DIPIT kudingap mudi masengan ma an. Pakwez, kudi mudi masengan ma dram usengenau chisu ni chisu mu mwom kudi antu a reng ni reng ni mu a yisak ni yisak. Chilakej, mu mivu chitot ya 19 in Australie, in Afrique du Sud, ni in Canada ipana nakash mu kukimbijol ndond jisu ja or ni ngand ya États-Unis yiyipwitin antu kudiokal kulemp asotina kudiokal mu jingand jau ni antu asotila kukimb mapit mu jingand jindjing, yisu yikwau jingand ja chisum jakad kwakan nawamp. Chakin kamu, antu avud asotining kwitek mu ubaj ukash ni kwipan nakash mulong wa kwikal nich mapit masotina michim yau.

² Ap anch nlel unou antu avud kakimbinap yipau yimekena ku mes, afanyidin kusal mudimu ukash mulong wa mwom wau. Chikasiken kusal mudimu ukash mu ditenchik dined dia yom. Chiswapel kubangin nakash yakudia, maswin, ni ndond ya kushakam pa ndond pa kukimb yom ya usey nakash yikatau antu kudiul ap kuvuramen. (Rom 14:17) Yesu waleta chilakej ap anch chishimu, chimekeshina nawamp chibachikin chinech cha antu. Chidi mu Luka 12:16-21.

3. Rumburil mu wiswimp chilakej cha Yesu chidia mu Luka 12:16-21.

³ Yesu waleta chilakej chinech pisambinay piur pa kuswir kwa kwipuk ris, ku twashinshikinang kachom pa kachom mu mutu wa mulong wasambelangaku. Kupwa kwa kuyibabesh mulong wa ris, Yesu wisambina piur pa mpich wadinga kasangerap mulong wa jinkil jend jikuru jadinga jizwila too yom yiwamp yadingay nich pakwez wajibwita ni kutungiril wajijimbish mulong wa kulaminamu yom yiwamp yivud. Padingay ni kutong anch ukat kwiswedish ni kusanger mwom uwamp, Nzamb wamuleja anch mwom wend washik kal kwinsudiel, chad yom yawonsu yiwamp yalamay muntu winou yikwikal ya muntu mukwau. Chawiy, Yesu walonda mazu manam ma nsudiel anch: “Chidi mwamu kudi muntu ukata kwijindjikin dipit diend amwinend, kadip mpich kudi Nzamb.” (Luka 12:21) Ov, dilejan ik tukutwisha kwilejin ku chishimu chinech? Mutapu ik tukutwisha kusadil dilejan dined mu mwom wetu?

Muntu Udia mu Mwikadil Ukash

4. Ov, tukutwish kulond anch Yesu wisambina muntu wa mutapu ik mu chishimu chend?

⁴ Chilakej chaletay Yesu chijiken kudi antu avud. Tumen anch Yesu wasambisha rusangu nich kulond anch: “Divu dia muntu mpich diasonga yakudia yivud.” Yesu kalondap anch muntu watana mapit mend mu jinjil jimwing ja makasu ap jiyimp. Mu mutapu ukwau wa kulond, Yesu kisambinap muntu muyimp. Chakin, kwambatan nich yalonday Yesu, chiwapidil kutong anch muntu wisambinay mu chishimu wasala mudimu ukash. Chitwishin kulond patok anch muntu winou warijeka yom ni kuyilam mulong wa machuku ma kurutu, pamwing ap wading usotin anch dijuku diend dikala mu mwikadil uwamp. Chawiy lel, kwambatan ni yitonginau antu, chitwishikin kusadil chilakej chinech mulong wa kumufanikesh muntu usadina mudimu ukash ni uwanyishina nakash yisend yend.

5. Ov, muntu wisambinay Yesu mu chishimu wading urishin nich mwikadil ik?

⁵ Chikalap nchik mwamu, Yesu wela ching kumutazuk muntu wasadinay mu chishimu anch mpich, urumburikina muntu watana kal yom yend yivud ya ku mujimbu. Pakwez, mudi mwalejanay Yesu, mpich wadinga mu mwikadil ukash. Divu diend diasonga yakudia yivud nakash kusut yadingay ni kuchingejin, kusutamu ap kupandakenamu yadingay nich kuswir ap yelay kulam. Ov, chom ik chafanyidinay kusal?

6. Ov, chom ik chifanyidinau kutond nlel unou atushalapol a Nzamb?

⁶ Nlel unou, atushalapol a Yehova avud arishin ni mikadil yikash mudi yarishay nich mpich. In Kristu akin asadin usu wa kwikal in kashinsh, in mushiku, ni in kusal mudimu akash. (Kolosay 3:22, 23) Ap anch asadin mudimu wayen ni ap anch isakin ayinau, akat kutwish, ap kupandakan mu yisadilau. Pakatau kuyinkish ndond ya piur ku mudimu ap mitapu yisu ya winsak, arishining nich mupak ufanyidinau kukwat. Ov, afanyidin kwitiyij ndond yiney ya piur chakwel atambulang nfalang jivud? Chilik chimwing, ansand avud atuman akat kutwish ku shikol. Mudi chibudikin, akutwish kuyinkish matapish ap mabourse ma kuya nich kwilejin ku shikol ya piur kwi ndond yiwamp nakash. Ov, afanyidin kulondul yisadinau antu awonsu ni kwitiyij yiyinkishinau?

7. Ov, mutapu ik muntu wisambinay Yesu mu chishimu wapwishay mulong wend?

⁷ Anch twachirikin ku chilakej cha Yesu, chom ik chasalay mpich chisu divu diend diasonga yakudia yivud ni waburena ndond ya kulamin mbut jend? Ndiy wakwata mupak wa kubwit jinkil jadingay nich ni kutung jijim mulong wa kulaminamu jimbut jikwau ni yom yiwamp. Kwirijek kwinoku kwasala anch iyova kwikal mu diking ni kusanger wasambisha kutong amwinend anch: “Nikuulej mupim wam anch, Mupim, ey ukwet kal kwey yom yiwamp ya kushakam mivu yivud; iswedisha bil kamu kwey, diang, nang, sangar kwey.”—Luka 12:19.

Mulong Wak Wadinga “Chisup”?

8. Ov, chom ik cha usey chavuramenay muntu wisambinay Yesu mu chishimu?

⁸ Mudi mwa chimekeshay Yesu, yitenchik ya mpich yadinga ching kusu nich yovil ya makasu ya diking. Yikutwish kumekan mudi ya ukwash, pakwez wavuramena chom cha usey—kusal rusot ra Nzamb. Muntu winou wading ukat kwitongin ching amwinend, mutapu ukezay kutwish kwiswedish, kudia, kuna ni kwisangaresh. Ndiy watonga anch, mulong ukwet “yom yiwamp” yivud ukez kand kushakam “mivu yivud.” Pakwez cha ushon kudi ndiy, yom kiyashikenap mwamu. Mudi mwalonday Yesu kwinsambishil anch: “mulong mwom wakin wa muntu kiudiap mu yom yikwetay.” (Luka 12:15, MM ) Uchuku winiwa kamu, yom yawonsu yapitay muntu winiwa yashadika pakad kuchingejin, mulong Nzamb wamwela anch: “Chisup ey! Uchuku unou kamu ey ukukatuk mupim. Ov, nany ukeza kutambul yom yiney yawonsu yiwakumangejina kal?”—Luka 12:20.

9. Ov, mulong wak muntu wisambinau mu chishimu amutazuka anch chisup?

⁹ Pinap twashik kal pa dinans dijin dia chishimu cha Yesu. Nzamb wamutazuka muntu winou anch chisup. Buku Dictionnaire exégétique du nouveau testament (allemand) urumburil anch dizu dia Grek diasadilau “dirumburikining kuburen chovu.” Dikishoner winou ulejen anch mu chishimu chinech, Nzamb umeken mudi usadidil dizu dined mulong wa kulejan anch “kwirijek kwa mpich mulong wa machuku ma kurutu kudi kwa usup.” Dizu dined disambidinap ching muntu uburedina manangu, pakwez disambidin kand “muntu ulikina kwitiyij kwengamin padi Nzamb.” Yirumburil ya Yesu piur pa mpich yituvurishin yom yayilejay kwinyim in Kristu a mu mivu chitot ya kusambish adinga mu chikumangen cha Laodikea, mu Aziy Mukemp anch: “Ukat kulondol anch, Am yam mpich, napitil kal mapit, kiniswiridinip kand chom; ey kiwijip anch udi mwin kufa mukan ni kwitanyish ni uzwendj ni uputames ni mudj.”—Kuburik 3:17.

10. Ov, mulong wak kwikal nich “yom yiwamp” yivud kurumburikinap kwikal ni “mivu yivud”?

¹⁰ Tufanyidin kutongijokin nakash pa dilejan dined. Tukutwish kwikal mudi muntu wisambinau mu chishimu—tukutwish kusal mudimu ukash ni kushinshikin anch tukwet katat “yom yiwamp” yivud pakwez twaburen kusal yom ya usey mulong wa kwikal nich ruchingej ra kwikal nich “mivu yivud”? (Yohan 3:16; 17:3) Bibil ulondin anch: “Pa dichiku dia ujim . . . dipit dikez kakwaship,” ni “mwin [kuchingejin] mu dipit ukez kawa.” (Jinswir 11:4, 28) Chawiy lel, Yesu wapwisha chishimu nich chiyul chinech: “Mwamu muchikwikala kudi antu akata kwikumangejin mapit ayinau, pakwez aburedin mapit makin ku mes kwa Nzamb.”—Luka 12:21, MM.

11. Mulong wak chidiap cha usey kutekin ruchingej ni diking pa yom ya ku mujimbu?

¹¹ Palonday Yesu anch: “mwamu muchikwikala,” wading ukat kulejan anch yamushikena mpich wa mu chishimu yikutwish kuyishiken kand antu akata kutung mwom wau—ruchingej ni diking diau—ching kusu pa yom ya ku mujimbu. Chiyipinap ‘kwitekin dipit diey’ pakwez chiwapinap kuburen kwikal “mpich kudi Nzamb.” Mwin kwilej Yakob walonda mazu ma chilik chimwing pafunday anch: “Ezany katat, en ukata kulondany anch, Ilel ap diamashik tukuya ku ul winou, tukadilaku muvu kwinikwa, tukisakiliku mapit; ni yen kiwijanyip yikusuta diamashik.” Chom ik chelau kusal? “Ing chifanyidin walonday anch, Mwant anch wasot, tukwikal aom, tukusal chom ech ni cha.” (Yakob 4:13-15) Ikalap nchik mpich ap ikalap nchik nich yom yivud yikutwishay kwikal nich muntu, yawonsu yikez kumekan yakad usey anch kadiap mpich kudi Nzamb. Ov, chirumburikin ik lel kwikal mpich kudi Nzamb?

Kwikal Mpich Kudi Nzamb

12. Ov, chom ik tufanyidina kusal chikeza kutwikadish ampich kudi Nzamb?

¹² Mu mazu ma Yesu, kwikal mpich kudi Nzamb kupwitijadin nich kwisakin mapit kwa muntu ipend, ap kupit kwa muntu ipend yom ya ku mujimbu. Chad, Yesu walonda anch rutong retu ra kusambish mu mwom rifanyidinap kwikal ra kwiruzukin mapit ap kwisangaresh nich yom tukutwisha kwikal nich. Pakwez, tufanyidin kusadil mapit metu mulong wa kukudish ap kukasikesh urund wetu ni Yehova. Kusal mwamu kukez chakin kamu kutwikadish ampich kudi Nzamb. Mulong wak? Mulong ufungwil chis ku yiyukish yivud yidiokila kudi ndiy. Bibil utulejin anch: “Chiyukish cha [Yehova] chawiy chikata kulet dipit, ni Ndiy kakuwejangikup ushon.”—Jinswir 10:22.

13. Ov, mutapu ik chiyukish cha Yehova chikat ‘kulet dipit’?

¹³ Pakatay Yehova kuyiyukish antu end, uyinkishining ching yom yiwamp. (Yakob 1:17) Chilakej, payinkishay Yehova in Isarel ngand ya kushakam, yadinga ngand “yizwila mayel ni woch.” Ap anch ngand ya Idjibit yadinga niyawiy mutapu winou, pakwez ngand yayinkishau in Isarel kudi Yehova yadinga yishalijadin ku chom chimwing cha usey nakash. Moses wayileja in Isarel anch “Ngand yiniya ayilamin kudi [Yehova] Nzamb wen.” Mu mutapu ukwau wa kulond, ela kupandakan mulong Yehova wela kusambish kuyilam. Anch in Isarel ashala ashinshamena kudi Yehova, ndiy wela kuyiyukish nakash ni ela kuyipandakan patok michid yawonsu yading yiyinyingumukina. Chakin kamu, chidi chiyukish cha Yehova chikata “kulet dipit”!—Kuchind Michid 16:13; Kuvurik Yijil 4:5-8; 11:8-15.

14. Ov, chom ik chikatau kuyishiken antu adia ampich kudi Nzamb?

¹⁴ Dizu “mpich kudi Nzamb” adirumburil kand anch mpich “ku mes kwa Nzamb.” (MM) Antu adia ampich a yom ya ku mujimbu akat kubangin yisu yivud piur pa mutapu ukutwishau kumekan ku mes kwa antu akwau. Yiney yimekening yisu yivud mu mashakamin mau. Asotin kwimekesh kudi antu nich yilejenay Bibil anch: “kwibaz kwa yom.” (1 Yohan 2:16) Chinyim ni chinech, antu adia a mpich kudi Nzamb adi itiyikina kudi Nzamb, itapidil dilau diend, ni ranaken ripandakena ni akwet urund ukash wa pakampwil ni ndiy. Kwikal mu mwikadil winou wa usey kuyinkishin chakin kamu yovil ya musangar ni diking, kupandakanamu yikutwisha kulet mapit mawonsu ma ku mujimbu. (Isay 40:11) Chipul chishadilaku chidi ech, yom ik tufanyidina kusal mulong wa kwikal ampich ku mes kwa Nzamb?

Mpich ku Mes Kwa Nzamb

15. Ov, chom ik tufanyidina kusal mulong wa kwikal ampich kudi Nzamb?

¹⁵ Mu chilakej cha Yesu, muntu warijeka yom ni kusal mudimu ukash mulong ching wa kwipitish amwinend, ni amutazuka anch chisup. Chawiy lel, pa kwikal mpich kudi Nzamb tufanyidin kusal usu wa kusal mudimu ukash ni kwipan nakash mu mudimu udi chakin kamu wa usey ni ufanyidina ku mes kwa Nzamb. Pakach pa midimu yiney padi mbil ya Yesu anch: “Yangany kudi antu a michid yawonsu, yikarumunany kwikal in kwileja.” (Mateu 28:19, MM) Chifanyidinap kusadil chisu chetu, usu, ni ukaliweny wetu, mulong wa kuwapish ching mwikadil wetu bwat, pakwez kuyisadil mu kulejan Want ni mu mudimu wa kwikadish in kwilej, kukutwish kwikal mudi kutudik dipit. Antu asala mwamu ashikena mu kwangul yiyukish yivud mu spiritu, mu mutapu umekeshina yibudikin yilondwilaku ey.—Jinswir 19:17.

16, 17. Yilakej ik ukutwisha kurumburil mulong wa kumekesh yom yifanyidina kusal mu mwom chakwel muntu ikala mpich kudi Nzamb?

¹⁶ Shinshikin yamushikena ikundj umwing mwin Kristu mwi ngand yimwing ya Kwingangel. Ndiy wading nich mudimu wa nfalang jivud wa kurijek ma ordinater. Pakwez, mudimu wend wasenda chisu chend chawonsu ni wiyova kwikal kazweny mu spiritu. Kupwa, pa ndond pa kusal usu chakwel apita mu mudimu wend, ndiy wasambisha mudimu wa kusal makrem ni kumalandish mu balibal chakwel ikala nich yisu yivud ya kuwanyish maswir mend ma mu spiritu ni yisend yend. Ambay nend a mudimu asambisha kumusip, pakwez yom yela kushiken kwisu? Ndiy ulondin anch: “Katat, nikwet nfalang jivud kupandakanamu ni pa chisu nadinga nikat kusal nich maordinater. Mudimu winou wangikisha musangar ukash mulong nadingap ni kwiyakamish kand mulong wa kubangin yom yinadinga nikat kutan ku mudimu wam wa pasak. Ni cha usey nakash, katat, ni yovil piswimp nakash ni Yehova.” Kuswimp kwinoku kwa mukwasha mwin Kristu ou asambisha mudimu wa chisu chawonsu, ni katat usadin ku biro wa mutiy wa atuman a Yehova mwin ngand yend. Chakin, chiyukish cha Yehova ‘chiletining dipit.’

¹⁷ Chilakej chikwau chidi cha mband umwing wapamina mu dijuku dimwing mwadingau ni kuman kwilej nich usey nakash. Ndiy wileja ku ma universite mu France, mu Mexique, ni mu Swisse ni wela kwikal nich mudimu wa nfalang jivud. Mband winou walonda anch: “Kutwish kwading mu makas mam; ntumb ni kalimish yadinga yilondwil kwawonsu, pakwez mu muchim niyova kuburen kwa chom kanang, kuburen kwa musangar ukash.” Kupwa wileja piur pa Yehova. Walonda anch: “Pinadinga niyil kurutu mu spiritu, rusot ra kumusangaresh Yehova ni kumufut ap kakemp pakach pa yom yangikishay kwankwasha kuman patok njil mwa kuya—kumusadil mudimu wa chisu chawonsu.” Ndiy walika mudimu wend wa ku mujimbu ni amubabatisha. Mu mivu 20 yasutina, wasala mudimu wa chisu chawonsu nich musangar. Ulejen anch: “Antu amwing atongin anch nashadishin ukaliweny wam, pakwez itiyijin anch nikwet musangar, ni akat kubaz yany yitakedila mwom wam. Nikat kumulembil Yehova pichuku-pichuku mulong ankwasha nikala mwin kwitudish chakwel nikala mwin kwitiyik kudi ndiy.”

18. Ov, mutapu ik tukutwisha kwikal ampich kudi Nzamb mudi Paul?

¹⁸ Saul, wikala kambuy Paul, wading ni mudimu uwamp. Pakwez, ndiy wafunda anch: “Chakin, nikat kuchind yom yawonsu anch yamwamu, mulong wa kumwijik Yesu Kristu Nsalejam kwapandikana yawonsu kuwap.” (Filip 3:7, 8) Kudi Paul, mapit matanay kusutil kudi Kristu mapandikenamu yawonsu yelay kumwinkish mangand. Chawiy chimwing, mu kulik choy cha kusot kwitek kurutu ni kulondul mwom wa kwipan kudi Nzamb, niyetu tukutwish kusanger mwom uwamp nakash ku mes kwa Nzamb. Dizu dia Nzamb ditukasikeshin anch: “Ku kwitudish ni kumwov [Yehova] wom kwawiy kwa kupitil dipit, ni katumb, ni mwom.”—Jinswir 22:4.

Ov, Ukutwish Kurumburil?

• Muntu wisambinay Yesu mu chilakej chend wading nich mulong ik?

• Ov, mulong wak muntu wisambinau mu chishimu amutazuka anch chisup?

• Ov, chirumburikin ik kwikal mpich kudi Nzamb?

• Ov, mutapu ik tukutwisha kwikal ampich kudi Nzamb?

[Chipich chidia pa paj wa 30]

“Chiyukish cha [Yehova]—chawiy chikata kulet dipit, ni Ndiy kakuwejangikup ushon”