Yipul ya in Kutang

Chom ik chasotay kulond Yesu, palonday anch kashalapol wend ‘ubabel’?

Yesu wayipula anch: “Kashalapol ushishamena ni kubabal, watekau kal pa mutu mu chikumbu, ukuyinkish yakudia pa chisu chau, ndiy nany?” (Mateu 24:45) “Kashalapol” ukupana “yakudia” ya mu spiritu chidi chisak cha in Kristu azizidilau many. Ov, mulong wak Yesu uyijimbwil anch ababela?a

Tukutwish kutesh nawamp kusutil ku malejan ma Yesu amwinend chom ik chasotay kulond pasadilay dizu “kubabal.” Chilakej, pisambinay piur pa “kashalapol ushishamena ni kubabal,” Yesu walonda chishimu cha ayangadim ajik dikum adinga amuchingedila ngatan chisu chikwezay. Ayangadim ajik atuvurishin in Kristu azizidilau manany a kurutu kwa muvu wa 1914 adinga ni kuchingel nich impu yikash kwez kwa Ngatan mujim, Yesu Kristu. Mukach mwa ayangadim ajik dikum, atan kadingap ni many mavud pashikay ngatan, ni akanganya kwikal ku musambu wa uruw. Akwau atan adinga ababel. Itekina many makwau mavud chawiy chatwishau kudandamen kumunyik chitokish pa chisu chashikay ngatan ni ayandjika mu musambu.—Mateu 25:10-12.

Pezay Yesu nich ulabu wa Want wend mu muvu wa 1914, avud mukach mwa in Kristu azizidilau many adinga achingejin anch akuya nend kapamp kamwing mwiur. Pakwez, kwadinga mudimu ujim wadingau afanyidin kusal pansh, ni amwing pakach pau kandingap irijekina mulong wa mudimu winou. Mudi ayangadim ayisup, kasambelap kwau kwikasikesh ayinau mu spiritu, chawiy kadingap irijekina chakwel kudandamen mudi misul ya chitokish. Chikalap nchik mwamu, avud au, asala nich kubabal—nich manangu ni kudimuk—ni adinga akash mu spiritu. Pijikau anch kwadinga mudimu ujim wa kusal uyichingedina kurutu, ipana nich musangar mulong wa kuusal. Chawiy, chamekanau kwikal “kashalapol ushishamena ni kubabal.”

Tushinshikinany kand mutapu wasadilay Yesu dizu “kubabal” mu Mateu 7:24. Yesu walonda anch: “Chawiy wawonsu ukata kutesh mazu mamam minam, wend umasadil, ufaniken mudi mwin kubabal watunga chikumbu chend pa diyal.” Muntu ubabela watunga dang, nich kutongin anch chinzwizu chikutwish kwez. Chinyim ni chinech, muntu chisup watunga pa usukuril ni washadisha chikumbu chend. Chawiy, mwin kwilej ubabela wa Yesu udi muntu umena yibudikin yiyimp yidia kurutu ya kusot kulondul manangu ma muntu. Njingunin yend ni kutesh kwend kuwamp yimutwadil ku kwengamishin ritiy rend, yisal yend, ni malejan mend dang pa yalejanay Yesu. Mwamu musadilay “kashalapol ushishamena ni kubabal.”

Shinshikinany kand, mutapu usadidilau dizu dikarumwinau anch “kubabal” mu yikarumun yivud ya Mifund ya Hebreu. Chilakej, Farao wamuteka Josef piur pa in kukumangej yakudia mu Idjibit. Chom chinech chadinga ditenchik dia Yehova mulong wa kuyinkish antu end yakudia. Ov, mulong wak wamutondau Josef? Farao walonda amwinend anch: “Kwikil kand muntu mukwau wakin ubabela wa manangu mudi ey.” (Disambishil 41:33-39; 45:5) Chawiy chimwing, Bibil ulondil anch Abigail wadinga “mwin manangu mavud.” Wamutwadila David muntu wazizilau many wa Yehova yakudia, pamwing ni antu end. (1 Samwel 25:3, 11, 18) Josef ni Abigail atwisha kuyitazuk anch ababel mulong ajingunina rusot ra Nzamb ni asala nich kuman ya kurutu ni dirumburish diwamp dia yom.

Chawiy lel, palonday Yesu anch kashalapol ubabel, wamekesha anch antu afanikeshinau kudi kashalapol winou akumekesh njingunin, manangu, ni kutesh kuwamp kwa dirumburish dia yom mulong engamishin ritiy rau, yisal yau, ni malejan mau pa Dizu dia Nzamb dia uyakin.

[Mazu madia kwishin kwa paj]