Yawonsu Yalonday Yehova Yawanyina

“YAM KUSU Nzamb, kwikil mukwau mudi am. Kudiokal pa kusambish nakulejany yom yikeza kamekan kurutu. Nakulejanya pakur yom yikeza kez.” (Isay 46:9, 10) Mwamu mulondilay Yehova ndiy utwishininga kulejan ya kurutu pakad kwidimb.

Kukangany kwa muntu kusambel kwijik yishiken ya kurutu kwijiken nakash. Kulond anch Bibil udi buku wa uprofet kufanyidin lel kuyikasikesh in kusot uyakin awonsu asala usu chakwel kulond anch Nzamb ndiy musul wend. El tushinshikinany mauprofet mamwing mawanyina kal madia mu Bibil.

Michid ya Pasak

Nzamb wasambela kulond anch, Edom, Mowab, ni Amon akez kuyinongish shitit. (Yeremiy 48:42; 49:17, 18; 51:24-26; Abidias 8, 18; Sofoniy 2:8, 9) Kunong kwa antu inay mudi yisak ya michid kushalijan kulejen patok uyakin wa uprofet wa Dizu dia Nzamb.

Chakin kamu, muntu ukutwish watadik anch muntu win mwawonsu ukutwish kubwak anch muchid winou, wikalap nchik ukash, ukez kunong walik kwikalaku. Pakwez chitong chinech chivuramedin uyakin anch Bibil uyiling kulemp nakash. Chilakej, Bibil walonda tuyom tukemp-tukemp piur pa mutapu ukezay kuwa Babilon. Bibil wabwaka anch musumb akez kuukwat kudi in Mediy, ni anch amasalay akez kwez mwishin mwa umutakel wa Sirus, ni anch tuwit tukata kuulam musumb akez kutuumish.—Isay 13:17-19; 44:27–45:1.

Shinshikin anch kadiap mu yawonsu mwabwakay Bibil anch muchid ap antu akez kunong chikupu. Chinyim ni chinech, pasambelay kulond anch in Babilon akez kumukwat Yerusalem, Nzamb walonda anch musumb akez kuutungiril kand, chikalap nchik usu wa Babilon wa kulik kuyilikishaku aswik. (Yeremiy 24:4-7; 29:10; 30:18, 19) Chom chinech chawanyina, ni an a in Yuda adiaku mudi muchid djat ni ilel.

Chikwau, Yehova wabwaka anch Idjibit ukez kuwa kakwikalap usu wa mangand pakwez anch “kwinyim kwa yom yiney, antu akez kashakam kand mu Idjibit mudi mwashakamau pasak.” Pa chisu chau, usu winou wa pasak ukez kwikal “kawant kakemp.” (Jeremiy 46:25, 26; Ezekiel 29:14, 15) Chom chinech chikala chakin kand. Chikwau, Yehova wabwaka anch Gres ukez kuwa walik kwikal usu wa mangand, pakwez kalondap anch muchid winou ukez kulik kwikalaku. Ov, chom ik twilejina ku kunong kwa yisak yabwakay Yehova anch yikez kunong ni kwikalaku kwa yikwau yalikay kulondil anch yikez kunong? Anch mu Dizu dia Nzamb mudi uprofet wakin.

Tuyom Tukemp-tukemp Tushimokishina

Mudi mutwamana kal kwiur oku, Yehova wisambina tuyom tuvud tukemp-tukemp piur pa kuwa kwa Babilon. Chilik chimwing, pabwakay kuwa kwa Tir, buku wa Ezekiel walonda anch mayal mend, mabay mend, ni rufunfut rend akez “kuya kuyidjibul mu karung.” (Ezekiel 26:4, 5, 12) Uprofet winou wawanyina mu muvu wa 332 K.C.C. pasadilay Alexandre le Grand amasalay end mulong wa kushesh chikunku chijim cha musumb mulong wa kutung njil ya kuya ku chikunku cha ditung dia Tir, chakwatau kand.

Uprofet ufundilau mu Daniel 8:5-8, 21, 22 ni 11:3, 4 ni wawiy wisambina tuyom tukemp-tukemp tuvud tukash piur pa “mwant [mujim] wa in Grek.” Nyikel winou akez kumujipin pa musong wa usu wend, ni want wend akez kuwanganijan yikunku yinying kadiap kudi an end. Kwiyimp kwa mivu 200 ni kusut kupwa kwa kuufund uprofet winou, Alexandre le Grand wikala mwant winou mukash. Rusangu ra mangand ritulejin anch wafa rufu rakad kuchingejin ni anch want wend awangana kudi atulal end anying—kadingap anend.

In rinyinyit alonda anch chimeken mudi anch uprofet winou aufunda kupwa kwa kusadik kwa yom. Shinshikin kand ku rusangu ridia kwiur oku risambidinau mu buku wa Daniel. Ang washinshikin kusutil ku uprofet, rikwet tuyom twa usey nakash. Pakwez anch warishinshikin mudi rusangu rirumbidijinau mudi uprofet, ov, mumekenap kuburen kukash kwa jinsangu ja usey? Anch muka makasu wadingaku kwinyim kwa Alexandre, wapakisha kuyikashimwish in kutang nich uprofet wa kurumburidij, ov, mulong wak walikay kwisambin kupwa kamu rufu ra Alexandre, aad a an end asota kutenchik want wau pakwez ayijipa? Ov, mulong wak kalondap anch kwasuta makum ma mivu kurutu atulal awonsu anying imikisha ayinau pa yikunku yikwau ya want wa Alexandre? Pa chinech, ov, mulong wak walikay kujimbul dijin dia mwant mujim ni majin ma atulal end?

Kulond anch uprofet wa Bibil aufunda kwinyim kwa chinship chinech akulondidin nakash pakwez kwikil uman wa kukasikesh nich chitong chinech cha antu ashinshikina cha kusambish uman akwata mupak anch kusambel kwisambin yinship ya kurutu chitwishikinap. Mulong alikin kwitiyij Bibil mudi Dizu dia Nzamb, adi ashindidilau kurumburil kachom ni kachom kulondulijan nich yitongijok ya chiuntu, kuman kwa yom kwa chiuntu. Chikalap nchik mwamu, Nzamb nich manangu wapepila uprofet uvud wisambidina tuyom tukemp-tukemp chakwel kumekesh anch ndiy musul wa Bibil.a

Uprofet wa Bibil ukutwish kukasikesh ritiy rey anch witekin chisu cha kutongijokin pa mauprofet kanang ni kuwanyin kwau. Ov, ukutwishap kwilej uprofet wa Bibil? Buku Chom ik Chakin Kamu Chifundishinay Bibil pa paj wa 200, ukutwish kukukwash pa mulong winou.b Anch wasadil chiyul chinech, shinshikin mulong winou nich rutong ra kutung ritiy rey. Kangal waya mau-mau, mulong kwau kusu wa kutang yom yivud. Pakwez, tongijokin nawamp pa uyakin ulondila anch chom chawonsu chikubwakay Yehova chikat ching kwikal chakin.

[Mazu madia kwishin kwa paj]

[Kamushet/​Chipich chidia pa paj wa 24]

YIJIL YA MWOM

Panap padi chitongijok chikwau cha kushinshikin nawamp. Nzamb wabwaka nich uyakin kulank ni kuwa kwa mausu ma mangand ndiy kand udia Musul wa yijil ya mwom yidia mu Bibil. Yimwing ya yijil yiney ey kamu ey:

Chawonsu chiukukuna chawiy ukwangula. —Galatia 6:7.

Kudi chiyukish chijim mu kupan kupandakanamu cha kutambul.—Midimu 20:35.

Chisambu chengamidin pa kuwanyish maswir ma muspiritu.—Mateu 5:3.

Anch wasadil yijil yiney mu mwom wey, ukutwish kuchingejin anch yikwikal yakin kudi ey.

[Yipich chidia pa paj wa 22, 23]

Dizu dia Nzamb diabwaka disheshik

dia chikupu dia michid yiney . . .

EDOM

BABILON

. . . kudiap kwa michid yiney

GRES

IDJIBIT

[Dizu dirumburilas]

Pictorial Archive (Near Eastern History) Est.

WHO photo by Edouard Boubat

[Chipich chidia pa paj wa 23]

Alexandre le Grand