Rusangu ra Nowa ni ra Mabeb Rakin, Kiridiap Rungany

OV UKWET impu yikash ya kuman mangand mawamp—mushichau antu mu chisambu umwing ni mukwau? mu mungand mwakadi njit, mwakadi chisum, ni mar? Anch inge, ukutwish watan dikasikesh mu rusangu ra pakur riwija nawamp. Ridi rusangu ra Nowa, ikundj wakin ni muwamp watunga waat mwipandishinay amwinend ni dijuku diend ku mabeb meza pa mangand mawonsu mayijipa antu ayimp.

Kudi jinsangu jikemp jijikena mu mangand mawonsu. Rusangu ra yom yamushikena Nowa ridi mu buku wa Disambishil udia mu Bibil, mu shapitre wa 6 djat ku shapitre wa 9, ni arisambidin kand mu Koran ni mu jingany ja michid yivud ya antu mu mangand mawonsu. Ov, chakin kamu kwadinga Mabeb, ap anch madi kwau rungany ra chamwamu rikatau kwisambin mulong wa kuyikasikesh antu asala yom yitentamina? In teoloji ni in siyans isambina kal pa mulong winou mu kusut kwa yitot ya mivu. Pakwez, Bibil, Dizu dia Nzamb, kidikwetap kwikanyek pa mulong winou—rusangu riner ridi rakin, kiridiap rungany. Tushinshikinany mayingishin manam:

Rusangu ridia mu Disambishil rijimbwil muvu, ngond, ni dichuku dia ngond diasambisha Mabeb, chisu ni kwindond kwashinda waat, ni chisu chauma divu. Jinsangu jikwau piur pa waat nijawiy ajilejen nawamp mutapu mwautenchikau, yipim yau, ni mutond wasadilau pa kuutung. Chinyim ni chinech, jingany, jiding jakad kutwish kwijik yom kamwing ni kamwing.

Jinsangu jaad ja majuku jidia mu Bibil jilejen anch Nowa wadinga muntu wakinakin. (1 Jinsangu 1:4; Luka 3:36) Ezra ni Luka, awonsu aad afunda jinsangu ja majuku minam, asanda yom nawamp-nawamp. Luka walejana dijuku dia Kristu djat kudia Nowa.

Profet Isay ni Ezekiel isambina piur pa Nowa ni Mabeb ni Paul ni Pita atwimbuy a Kristu niyawiy.—Isay 54:9; Ezekiel 14:14, 20; Hebereu 11:7; 1 Pita 3:19, 20; 2 Pita 2:5.

Yesu Kristu wisambina niyend piur pa Mabeb, walonda anch: “Yom yasuta pa chirung cha Nowa, yawiy kand yikeza kusut pa chirung cha Mwan a Muntu. Mu machuku ma Nowa, antu awonsu ading ni kudiang ni kuna, ading ni kwatijanang djat ni pa dichuku diandamay Nowa mu waat, chad mabeb ma mem meza mayijip awonsu.” (Luka 17:26, 27, Manswik Masu) Anch Mabeb kimadinga kwapu, komb mazu ma Yesu piur pa “chirung cha Mwan a Muntu” madi ma chamwamu.

Kambuy Pita wabwaka anch kukez kwikal “in kukudiwolany” akeza kupipesh yom yilondila Bibil. Pita wafunda anch: “Awiy adi antu atakedilau kudi maku mau mayimp ma mujimbu,” mulong “awiy akatil kuvuramen anch, . . . divu adidiosha ku mem.” Ov, tufanyidin kuvuramen ‘chom’ chinech chakin? Chakapuk chaya mwang! Pita wandadamena anch: “Chawiy maur ni divu, mangand ma katat, ayilamidin kand . . . chakwel yez yisheshik nich kasu. Ayilamin mulong wa kuchingel Dichuku dikurumburishay Nzamb ni kuyishesh antu amubwambwidila ndiy.”—2 Pita 3:3-7, MM.

Nzamb ukez, kayishesh antu ayimp kakwau kand, ni kukez kwikal kand in kupand. Anch mwom wetu wikal mudi wa Nowa, tukutwish twikal mukach mwa antu atentamina akezau kupandishin mu mangand mawamp.