Akash Chikalap Nchik Kuziy

KUZIY kwey kukutwish kwakulimin nakash. Ku kulamatin mudi amazambu. Ukutwish watongin anch ukez katwishap kukupandakan dichuku ap dimwing, ap ukutwish wiyov mudi ufanyidinap, anch wiyilikej ni antu akwau ni ukutwish wakwat mupak anch akwen akupandakenamu kulemp. Ku mutambu ukwau, ukutwish pamwingap urishin nich musong wa mayej makash makutwisha makupwish usu ni musangar mu mwom wey. Kwikalap chom ap chisu, umeken mudi ufil mu chilemb. Ukutwish wiyov mudi mwovay Yob, muntu wamwela Nzamb anch: “A Ing njindjika kwam mwi ndond ya afu, Njindjika kwam ching anch ujim wey wasut, chad ntekina machuku mulong wa kwinvurik kand am!”—Yob 14:13.

Mutapu ik ukutwisha kukolik ku mwikadil winou wakad ruchingej? Chikutwish chikal chikash, kiufanyidinap kutongin pa milong yey ching mu kachisu kakemp. Chilakej, ufanyidin kushinshikin yipul yapepilay Yehova yamwipulay kashalapol wend Yob: “Ov, ey wading kwisu pinatanga ngand? Lond bil anch ukwet ronganyin. Ov, nany wateka kujimb kwau, umwij? Ap, nany wasutishap mwoj pa ngand?” (Yob 38:4, 5) Pitutongijokina pa usey wa yipul yiney, tuding abachikinau twitiyija manangu makash ni dikand dia Yehova. Ndiy ukwet diyingishin diwamp dilikididinay mwikadil wa mangand ma katat udandamena.

“Muy mu Mujimbu”

Kashalapol mukwau ushinshamena wamuleja Yehova amudosha “muy mu mujimbu,” mulong umwing wadinga udandamedina. Kambuy Paul wamwilembila Nzamb tupamp tusatu chakwel amudosha mu choziu chinech. Chikalap muchadinga, mudi muy umupampina, ni kwawiy kwadinga ni kumupwish Paul musangar wa kusal mudimu wa Yehova. Paul wakufanikesha nich kumubul jimbat chisu ni chisu. Chakul cha Yehova chadinga anch: “Ranaken ramam ruwanyidin kal kudi ey; mulong usu wamam ukuwanyishil mu kuziy.” Yehova kaudioshap muy winou wadinga mu mujimbu. Paul wafanyidina kura nich, pakwez wawejinaku kand anch: “Mulong anch niziyilip nchik chawiy nidi kal mukash.” (2 Kor. 12:7-10) Chom ik chasotay kulond?

Chakin, mulong wa Paul kiwashadikap mudi muchilay. Pakwez, kiwamukangeshap ku kusal yom yijim-yijim mu mudimu wa Yehova. Paul wamuchingejina Yehova chakwel amukwasha ni wadinga chisu ni chisu ni kumwit ukwash wend. (Filip. 4:6, 7) Piswimp ni kwisudiel kwa mwom wend wa pansh, Paul watwisha kulond anch: “Narish kal kurish kuwamp, napwish kal kubambil nalamina ritiy.”—2 Tim. 4:7.

Yehova ukat kuyisadil antu akad kuwanyin chakwel awanyish rusot rend chikalap nchik kurumbuk kwau ni milong yau, ni ntumb yiyiling kudi ndiy. Ukutwish wayinkish umutakel ni manangu chakwel ara nich yikokujol yau ni chakwel alama musangar wau mu mudimu wend. Inge, ukutwish wayisadil antu akad kuwanyin asala midimu yijim-yijim chikalap nchik kuziy kwau.

Paul walonda mulong wak Nzamb kamudioshap muy wadinga mu mujimbu wend anch: “Chakwel nilika kwitumbish nakash.” (2 Kor. 12:7) “Muy” wa Paul wamuvurisha mimbu yend ni wamukwasha chakwel ikala mwin kwitudish. Kukwatijadin nich yalejanay Yesu anch: “Wawonsu ukez kwizambul amwinend akez kamushikumwish, ni wawonsu ukez kwishikumwish amwinend akez kamuzambul.” (Mat. 23:12) Yoziu yikutwish yayifundish atushalapol a Nzamb, kwishikumwish ni ku kuyikwash asanger anch kujijamen nich kushinshaman chiyifanyidin akungamena padiay Yehova. Chawiy, mudi Paul, akutwish lel “itumbishin mu Mwant [Yehova].”—1 Kor. 1:31.

Kuziy Kujingamena

Antu amwing akutwish ikal nich kuziy kwakadiau ayinau kwijik ap kulikinau kwau kwitiyij. Chilakej, muntu kanang ukutwish wikal wichingejidin nakash, uchingejidin nakash mu mapit mend. (1 Kor. 10:12) Kuziy kukwau kukwetingau anch kudi maku ma kusot kwizambwish nakash.

Yowab, wadinga kalal mujim wa amasalay a Mwant David, wadinga muntu ukapukina, wisumina, ni mwin manangu ma kupwish nich milong. Pakwez, wafa nich mashakamin mayimp mamekesha ma kwipep, ni spiritu wa kwitutul. Wajipa nich chisum atulal akwau aad a amasalay. Cha kusambish wafundakesha wamujip Abner. Kupwa kwinyim, mu kadimba-dimb anch uyil akamulangwisha musanyend Amasa, Yowab nich chikas chend cha katatuku wamukwata Amasa fe ku wendj mudi anch sot amususa ni kapamp kamwing wamupampa mpak yend ya musamun yadinga mu chikas chend cha kamaku. (2 Sam. 17:25; 20:8-10, Les Saintes Écritures — Traduction du monde nouveau) Yowab amuswinkana kudiay Amasa mudi kalal mujim wa amasalay ni ndiy wasadila chisu chinech chakwel amudioshap mukankuny nend, chimeken anch oku wadinga nich chitongijok anch amuchirishin pa ndond yend mudi kalal mujim. Ukutwish wajingunin anch Yowab katwishap kulam muchim wend, pamwing nich maku mend ma choy. Wasala nich chisum pakad kwinan ap pakemp. Padingay Mwant David piswimp ni kufa, wamuleja mwanend ikundj Salomon asala chakwel anch Yowab afuta mulong wa uyimp wend.—1 Ant 2:5, 6, 29-35, NW.

Chakin kamu tufanyidinap kwilikidin ku maku metu mayimp. Pakad kwikal mudi Yowab, tukutwish twakuyikel kuziy kwetu. Cha kusambish tufanyidin kujingunin ni kwijik. Kupwa tukutwish twakwat mupak wa ku kupandakan. Tukutwish kumulembil Yehova chisu ni chisu, kumwitang ukwash wend chakwel tuwina kuziy kwinoku, ni twileja nich mushiku Dizu diend, kusotang mitapu ya kura nich yibachikin yiney. (Heb. 4:12) Tukuswiriken kusal usu tupwisha kurumbuk kwetu chisu ni chisu ni kangal twaziy muchim. Njit jikutwish jalab nakash mu chirung chin chawonsu tudia akad kuwanyin. Paul witiyija chom chinech ku mutambu wend amwinend, ni wafunda anch: “Nikat kusal yinakad kusot kusal, pakwez yinikisila yawiy yinikata kusal.” Pakwez, mudi muwija, Paul kilikidinap ku chom chinech, mudi anch kadingap utwishina kuyikel mwikadil wend. Chinyim ni chinech, wadandamena kura nich kuziy kwend, wakungamena pa ukwash wa Nzamb kusutil kudi Yesu Kristu. (Rome 7:15-25) Kwi ndond yikwau, Paul walonda anch: “Nikat kuziyish mujimbu wam ni kuutek ku uswik; mudi kulond anch: Pinikulejana rusangu ruwamp kudi akwetu, amwinam kangal narezikuku.”—1 Kor. 9:27.

Antu akweting chivadik cha kwiyingish ayinau. Tukutwish twasal pa chinech kusutil ku kukudish kuman yom mudi mumeningay Yehova, kusal mudi mwayiyulau in Kristu kudiay Paul anch: “Katukinany ku tuyimp; ulamatany ku yiwamp.” (Rome 12:9) Mwi njit jetu ja kupandakan kuziy kwetu, tukuswir kwikal nich win yakin, kujijaman, ni kwipup ayinetu. David wamwilembila Yehova anch: “Pakip muchim wam ni manangu mam.” (Kus. 26:2) Ndiy wading wij anch Nzamb chakin kamu ukutwish washik ku yibachikin yetu yikurikina ni kutwinkish ukwash pituuswiridina. Anch twitiyij umutakel uletinay Yehova kusutil ku Dizu diend ni mwiku wend utumbila, tukutwish twaya kurutu chakwel tuwina njit pantaliken nich kurumbuk kwetu.

Antu amwing akutwish iyakamish nich milong yitonginau anch kakutwishap kuyipwish ayinau. Chakin kamu, amakurump a chikumangen akutwish apan ukwash ni dikasikesh dia rukat. (Isay 32:1, 2) Pakwez, chidi cha manangu anch twikala nich kuchingejin yom yakin. Pa milong yimwing, kwikiling mutapu wa kuyipwish yawonsu bwi mu ditenchik dined dia katat dia yom. Chikalap nchik mwamu, antu avud ilejin kal mutapu wa kura nich, ni kwayitwishisha ashakam mashakamin mawamp.

Kashinsh ka Ukwash wa Yehova

Yikalap milong ya mutapu ik yiturishina nich mu yisu yiney yikash, tukutwish twikal nich kashinsh anch Yehova ukez kututakel ni kutukwash. Bibil utukasikeshin anch: “Ikepishany ayinen mwishin mwa chikas cha usu wa Nzamb, chakwel ndiy ez akuzambulany en pa muten watonday kal. Tekany minan yawonsu padiay ndiy, mulong ndiy ukat kukulamany en.”—1 Pita 5:6, 7.

Chisu chijikay Kathy, wasala ku Bethel mivu yivud, anch nfumwend wadinga uyedil mayej ma Alzheimer, wiyova anch kakezap kutwish kura nich yikokujol yadinga yimuchingedina kurutu. Wamwilembila Yehova chakwel amwinkisha manangu ni usu wa muchim pa dichuku ni dichuku. Mudi ukash wa mujimbu wa nfumwend waya mu kuyip pakemp-pakemp, akadivar in rukat asala usu wau wawonsu chakwel ileja mutapu wa kura nich mayej minam ni anambaz in kubangin amukasikesha muchim. In Kristu inay adinga chikunku cha ukwash wa usu waletay Yehova, ni Kathy watwisha kumubangin nfumwend djat ni pafilay mu kusut kwa mivu 11. Ndiy ulondil anch: “Namujikitisha Yehova nich mansoj ni muchim wawonsu mulong wa ukwash wend wawonsu; wanlama chakwel nidandamen. Kinadingap nija anch nikutwish nasal yadinga yichingejidinau mu chisu chilemp mwamu cha kuziy!”

Ukwash wa Kupandakan Nich Kuziy Kujingamina

Pakatau kwiyov antu anch kafanyidinap, akutwish atongin anch Yehova kakuteshap kumutazuk kwau chakwel ayikwasha mu chisu cha mar. Chidi lel cha usey kutongijokin pa yalonday David pa chisu chanengananay mulong wa chitil chijim chasalay ni Batisheba anch: “Ey kiukudiulip muchim ubukukina ni runeng.” (Kus. 51:17) David wilemba chakin kamu, ni wadinga wij anch ukutwish wamushejin Nzamb ni kukungamen pa riy rend. Yesu niyend wamekesha spiritu wa Yehova wa kubangin. Mateu mwin kufund Rusangu Ruwamp usadidil mazu ma Isay padiay Yesu anch: “Kakubukunip mushiy usotilau kukatul, ap kakukatulip mwoj wa lamp anch kukat kwez mish.” (Mat. 12:20; Isay 42:3) Padingay pansh, Yesu wayovila antu ikepishina ni ayimana mar riy. Kakatulap, mudi muchadinga, kandikal kasu ka mwom wa muntu wadinga mudi mwoj wa lamp usotila kujim. Pakwez, wayidisha nich riy antu amena mar chakwel avuvurisha kasu ka mwom wau. Mwamu mwadingay padingay pakach pa antu. Ov, witiyijinap anch Yesu udi kand mwamu ni anch ukutwish wakwanaken mulong wa kuziy kwey? Shinshikin yilondilay Hebereu 4:15 yilejena anch ndiy Muntu ukutwisha “kutwovil riy mu kuziy” kwetu.

Pafunday piur pa ‘muy wadinga mu mujimbu wend,’ Paul walonda anch usu wa Kristu wadinga ‘mudi ntent’ padiay ndiy. (2 Kor. 12:7-9) Wiyova anch Nzamb umulamin kusutil kudiay Kristu, mudi mwiyovilingay muntu udia mwi ntent kwichidij kudiokal ku rinkind wa mashik. Mudi Paul, kitufanyidinap kuwil mu kuziy ni milong yetu. Chakwel tushala akash mu spiritu, tukutwish twasadil yitenchik yawonsu yitwinkishinay Yehova kusutil ku chikumangen chend chidia pa divu. Tukutwish twasal yawonsu tukutwisha kusal ni kupwa tukarumukina kudi Yehova nich ruchingej rawonsu anch ndiy ukutakel jinzau jetu rumwing ku rumwing. Kuman mutapu usu wa Nzamb utukwashina mu kuziy kwetu, tukez kutwish kulond mudi mwalonday Paul anch: “Mulong anch niziyilip nchik chawiy nidi kal mukash.”—2 Kor. 12:10.

[Chipich chidia pa paj wa 3]

Paul wadandamena kumulembil Yehova amutakela pawanyishinay mujikit wend

[Chipich chidia pa paj wa 5]

Mwant David wamwinkisha Yowab ukalal wa amasalay

[Chipich chidia pa paj wa 5]

Yowab wasala chakwel amujipa mukankiny nend, Amasa

[Chipich chidia pa paj wa 6]

Amakurump aletin umutakel wa rukat wa Mifund ukutwisha kutukwash tura nich milong yetu