Dizu dia Yehova Didi Diom

Manans Majim ma Mikand ya In Korint

KAMBUY PAUL ubangidin nakash ukash wa muspiritu wa chikumangen cha In Korint. Watesha anch mudi ruvundu mukach mwa akadivar adingamu. Itiyijin kwau masandj. Chikumangen achinach chamufundina kand Paul, mulong chadinga chisotin kwijik nawamp piur pa milong kanang. Chawiy piswimp ni muvu wa 55 C.C., pachidiay mu Efes padingay mu weny wend wa kasatu wa umishoner, Paul wafunda mukand wend wa kusambish pa mikand yaad yayifundilay In Korint.

Chimeken anch, mukand wa kaad, waufunda pa kusut kwa angond akemp kupwa kwa kufund wa kusambish, wawiy mukand wambakedinap. Mulong mikadil yadinga mukach ni pol pa chikumangen cha mu chitot cha kusambish cha In Korint yifaniken nakash nakash ni ya pa chirung chetu chinech, komb uruu udia mu mikand ya Paul yayifundilay In Korint udi wa usey nakash kudi etu.—Heb. 4:12.

‘BABALANY, IMANANY DANG, IKALANY AKASH’

(1 Kor. 1:1–16:24)

Paul wayilembila anch: “Ulondany chom chimwing.” (1 Kor. 1:10) Kwikil “dishin dikwau dikutwishay muntu kutung, ching kusu Yesu Kristu.” (1 Kor. 3:11-13) Piur pa muntu umwing wadinga ni kusal masandj mu chikumangen, Paul ulondil anch: “Mwopatany muntu muyimp udia pakach pen ayinen.” (1 Kor. 5:13) Ndiy ulondil anch: “Mujimbu kautekilip mulong wa makaj, pakwez udi mulong wa Mwant.”—1 Kor. 6:13.

Payakulay piur pa “yipul [yafundau] mu mukand” wau, Paul uyikinshin chiyul chiwamp piur pa kwatijan ni ujich. (1 Kor. 7:1, MM) Kupwa kwa kurumburil piur pa umutu wa Ukristu, piur pa kusal yom mu kuwamp ku yikumangan ya Ukristu, ni uyakin wa disanguku, Paul wayilembila anch: “Babalany, imanany dang mu ritiy, jijamanany [mudi amakundj], ikalany akash.”—1 Kor. 16:13, MM.

Yakul ku Yipul Yipwilau Piur pa Bibil:

1 Kor. 1:21—Ov, chakin kamu Yehova ukat kusal “usup” mulong wa kuyipandish akaritiy? Bwat, kimwawiyap. Pakwez, mulong “in mangand kakutwishap kumwijikin Nzamb ku chiyul chau,” chikatay kusadil mulong wa kuyipandish antu amekena mudi ayisup kudi mangand.—Yoh. 17:25.

1 Kor. 5:5—Chirumburikin ik ‘kumupan muntu muyimp kudi Satan ashesha mujimbu wend, chakwel mupim wend wez upanda’? Pakatau kumwopat mu chikumangen muntu wakad kusot kukarumuk udandamedina kusal yitil, wikadiling kand chid cha mangand mijondila ma Satan. (1 Yoh. 5:19) Chawiy chilondilingau anch amupan kal ku makas ma Satan. Kumwopat muntu kuding nich chibudikin cha kumushesh, ap kudiosh, chom chijondila mu chikumangen ni kuchidij mupim wend, ap manangu mend mamuyikedila.—2 Tim. 4:22.

1 Kor. 7:33, 34—Chirumburikin ik “yom ya mangand” yikata kwiyakamishay nich ngatan ap ngachik? Paul wisambidin yom ya mangand ya mu mwom yifanyidinau kubangin angatan ni angachik in Kristu. Mu yom yiney mudi yakudia, ya kudjal, ni chikumbu, kudioshamu yom yiyimp ya mangand minam, yichininau in Kristu.—1 Yoh. 2:15-17.

1 Kor. 11:26—“Tupamp” twich tufanyidina kuvurik rufu ra Yesu, ni “pakwezilay”? Paul kadingap nikulond anch chifanyidin kuvurik chisu chawonsu rufu ra Yesu. Dizu dia Grek diasadilau mulong wa “tupamp tuvud” dirumburikin “chisu chawonsu” ap “kapamp kin kawonsu.” Chawiy lel, Paul wadinga ulondil anch kapamp kin kawonsu kadingau in Kristu azizidilau many ni kudia yijingidij ya Chivurikish, charumburik anch, kapamp kamwing pa muvu, pa Nisan 14, awiy akat kuvurik “rufu ra Mwant.” Akusal mwamu “ni pakwezinay,” ap anch, djat ni pakezay kuyakin mwiur pakuyivumbulau.—1 Tes. 4:14-17.

1 Kor. 13:13—Mu mutapu ik rukat ripandakenamu ritiy ni ruchingej? Anch “yom ya ruchingej” yasadik ni “kushinshik” kway kwawanyin, kuchingejin kwa ritiy ni ruchingej yapwa kal. (Heb. 11:1) Rukat ripandakenamu ritiy ni ruchingej mulong rawiy rikushal chikupu.

1 Kor. 15:29—Chirumburikin ik kubabatishiu “mulong wa afu”? Paul kandingap ulondila anch antu adia aom chifanyidin kuyibabatish mulong wa antu afa kal pakad kuyibabatish. Paul wisambidin dibabatish dia in Kristu azizidilau many mu mutapu wa mwom mudandamedinau nich kujijaman kwau djat ni ku rufu rau kupwa kukulondul kuvumbuk kwau mu mwom wa muspiritu.

Malejan Kudi Etu:

1 Kor. 1:26-31; 3:3-9; 4:7. Kwibaz kwa kwikepish mudiay Yehova, kangal mud ayinetu, kuletining uumwing mu chikumangen.

1 Kor. 2:3-5. Padingay ni kupan uman mu Korint, musumb ujim wa filozofi wa in Grek ni wa kwilej kujim, pamwingap Paul wadinga ni kubangin piur pa anch ukutwish kuyitiyikish in kumutesh. Pakwez, kadingap ni kulikin kuziy ap wom wadingay ni kwov umukangesha kusal mujikit wamwinkishau kudi Nzamb. Chawiy chimwing, kitufanyidinap kulikin mikadil yakad kufanyin yituchirisha kwinyim tulika kulejan rusangu ruwamp ra Want wa Nzamb. Tufanyidin nich ruchingej kumuchingejin Yehova atukwasha mudi mwasalay Paul.

1 Kor. 2:16. Kwikal nich “chiyul cha Kristu” kudi kwijik mutapu wend wa kutong, kutong mudi mwadingay ni kutong, kutesh kurumburik kwin kamu kwa untu wend, ni kwimburij chilakej chend. (1 Pita 2:21; 4:1) Chidi chijim mudi ik anch twileja muchifanyidina mwom ni mujikit wa Yesu!

1 Kor. 3:10-15; 4:17. Tufanyidin kushinshikin ni kurijek ukaliweny wetu wa kulejan ni wa kwikadish in kwilej. (Mat. 28:19, 20) Anch tulejenap nawamp, mwin kwilej wetu kakutwishap wapandakan yoziu ya ritiy, ni tukutwish twovu kusansan kukash kwa kumushadish mu chilik cha kwel anch kupand kwetu kukwikal mudi “wasuta kal mu kasu.”

1 Kor. 6:18. ‘Kuchin kusotan’ kudiap ching kusu kuchin yisal ya por·neiʹa pakwez kand kudi kuchin pornografi, kwijond mu ngikadil, kutongijok ching yom ya masandj, kwizez kwi mband ap ikundj wakad kwikal weyey—chom chin chawonsu chikutwisha kushikij ku masandj.—Mat. 5:28; Yak. 3:17.

1 Kor. 7:29. Antu atijadina afanyidin kudimuk chakwel anch kangal ibangina nakash umwing ni mukwau mu chilik cha kutek pa ndond ya kaad mu mwom wau yisakin ya Want.

1 Kor. 10:8-11. Yehova wova ujim nakash pa chisu chamunyinyitau Moses ni Aron kudiau in Isarel. Tukusal cha manangu anch twipuk chaku cha kunyinyitan.

1 Kor. 16:2. Nfalang jitukata kupan mulong wa kutwal kurutu yisakin ya Want jikwikal jivud anch twatenchik kurutu kwa chisu ni twasal mudi mutwakwata chiyul.

“IKALANY . . . AWANYIDINA”

(2 Kor. 1:1–13:14)

Paul uyilejin in Korint anch afanyidin “kumulikishin ni kumwongoj” mwin kusal yitil ukarumukina wapupau. Ap anch mukand wau wa kusambish wayovisha ushon, Paul umekeshin musangar mulong awiy ova ‘ushon wayikarumuna’—2 Kor. 2:6, 7, MM; 7:8, 9.

‘Mudi mwadingau ni kwikal ampich mu yom yawonsu,’ Paul uyikasikeshin in Korint ‘chakwel apandakana mu kupan.’ Kupwa kwa kuyakul in kumupompat, wayinkisha awonsu chiyul cha nsudiel anch: “Ikalany awanyidina; londulany mazu mam, ikalany mu kwovijan, shakamany mu chisambu.”—2 Kor. 8:7; 13:11.

Yakul ku Yipul Yipwilau Piur pa Bibil:

2 Kor. 2:15, 16—Mutapu ik tudia “res ruwamp ra Kristu”? Chidi mwamu pitukata kulondul yilondilay Bibil ni kulejan uruu udiamu. Ap anch antu akad kutentam akisin “res” riner, pakwez ridi res ruwamp kudi Yehova ni antu atentamina.

2 Kor. 5:16—Ov, in Kristu azizidilau many ‘kijap kand ap umwing mu mujimbu’ mutapu ik? Awiy kakatap kand kuyital antu kwengamin nich pa chidiau ku mujimbu, charumburik anch, kwikal ku mutambu umwing kwengamidina pa dipit, pa ulombu wa chikit, pa kabil ap ngand yidiokilay muntu. Chidia chijim kudi awiy udi urund wau wa muspiritu ni ambay nau akaritiy.

2 Kor. 11:1, 16; 12:11—Ov, Paul wadinga mukash pantaliken nau in Korint? Bwat, kadingap. Pakwez, kudi antu amwing ndiy wamekana kwikal mwin kwitutul, mukash mulong wa yom yashikenay mu kulond mulong wa kuchidij ukambuy wend.

2 Kor. 12:1-4—Muntu ik ‘wakandjikau mu paradis’? Mulong Bibil kisambidinap kand muntu mukwau wamana chishimushimu chinech ni maverse malondwilaku kwichidij kwa Paul piur pa ukambuy wend, chakin kamu wadinga pamwingap ni kwisambin uman wend amwinend. Chom chamanay kambuy chadinga mudi paradis wa muspiritu usangaredina chikumangen cha Ukristu cha “ku disudiel dia mangand.”—Dan. 12:4.

Malejan Kudi Etu:

2 Kor. 3:5. Chakin, verse winou utulejin anch Yehova ndiy ukata kuyiwanyish kamu in Kristu chakwel asala mujikit kusutil ku Dizu diend, kusutil ku mwiku utumbila wend, ni kusutil ku chikunku cha dirijek diend cha pansh. (Yoh. 16:7; 2 Tim. 3:16, 17) Tukusal nawamp anch twilej Bibil ni mikand yengamidina pa Bibil nich mushiku, kudandamen kulembil mulong atwinkish mwiku utumbila, ni kukumangan ni kwakul ku yikumangan ya Ukristu.—Kus. 1:1-3; Luka 11:10-13; Heb. 10:24, 25.

2 Kor. 4:16. Mulong Yehova ukat kupizuril ‘muntu wetu wa mukach pichuku pichuku,’ tufanyidin twisakina chisu ni chisu yitenchik ya Yehova, kangal twasutish dichuku ap dimwing pakad kushinshikin milong ya muspiritu.

2 Kor. 4:17, 18. Kuvurikang anch “mar metu madi ma kachisu kakemp kusu” kukutwish kwatukwash twikal ashinshamena kudi Yehova mu yisu ya mar makash.

2 Kor. 5:1-5. Paul ulejen pinap yovil yiwamp mudi ik ya in Kristu azizidilau many piur pa ruchingej rau ra mwom wa mwiur!

2 Kor. 10:13. Mudi chijil, ching anch kudi yitenchik yimwing ya pakampwil mulong wetwetu tukwasha kudia kuswir kujim, tufanyidin tusala ching mu teritwar wa chikumangen chetu.

2 Kor. 13:5. Chakwel ‘twipaka ayinetu anch tudi mu ritiy,’ tufanyidin kwisik ngikadil yetu nich yom yitwilejina yidia mu Bibil. Chakwel ‘twiyijika ayinetu chitudia,’ tufanyidin tukula muspiritu, pamwing nich kwifumb kwa “manangu” metu ni kujimb kwa mudimu wetu wa ritiy. (Heb. 5:14; Yak. 1:22-25) Kusutil ku kusadil chiyul cha manangu cha Paul, tukutwish twadandamen kwendil mwi njil ya uyakin.

[Picture on page 26]

Dizu “mudi muukez kadiany mabot minam tupamp tuvud ni kuna rupas” dirumburikin ik?—1 Cor. 11:26