Yehova Kakuyilikangip Atumbila end

“[Yehova] kakuyilikangip atumbila end, ukayilam chikupu.” —KUS. 37:28.

1, 2. (a) Ov, chom ik chasadika mu chitot cha dikum K.C.C. chapaka atushalapol atumbila a Nzamb? (b) Mu yom ik yisatu Yehova yiyilamidinay antu end atumbila?

TUDI mu chitot cha dikum K.C.C. ni chadinga chisu cha kukwat mipak. Kwadinga njit mulong wa guvernema wa muchidi wa Isarel wa kwinkaj chakwel atambula dipandans. Mwant musu, Yeroboam wakimba kukasikesh dikand diend mukusambish kutek relijon musu wa Ngand. Wapana yitiyij yend kusutin ku mikand. Yik yikusalau atushalapol atumbila a Yehova? Akutwish kushal ashinshamena kud Nzamb wifukwedinau? Tunan twa antu asala mwamu, ni Yehova wayikwasha mulong wa kulam kushinshaman kwau.—1 Ant 12:1-33, NW; 2 Jins. 11:13, 14.

² Atushalapol ashinshamena a Nzamb ayipakin kand ni nlel unou. “Ilamany ayinen, babalany,” kubabesh kwa Bibil. “Mukankuny nen, sakudimban ukat kuzomb mudi ntambu wonyina ukata kukimb nany ukudiay.” Mutapu ik tukutwisha “kwiman dang mu ritiy”? (1 Pita 5:8, 9 Manswik Masu) El tushinshikina yom yimwing yashikena ku musambu wa Mwant Yeroboam mu muvu wa 997 K.C.C. ni tumana yom tukutwisha kwilejinaku. Mu machuku minam ma nsudiel, atushalapol a Yehova ayizengodin. Akat kurish nich yisadish ya kupumbok chisu chiyinkishinau mudimu. Yom mud yiney, Yehova kakuyilikangip atumbila end, ni ukutwish kand kutulam niyetu nlel.—Kus. 37:28.

Chisu Chidiau mu Yizengol

3. Ov,mulong wak kuyikel kwa Mwant David kwadingap kwa chisum?

³ El bil tushinshikina chakusambish yom yashikena chakwel Yeroboam ikala Mwant. Jinswir 29:2 jilondin anch: “Pakwez anch antu ayimp ayikel, antu akez kwinan.” Mu kuyikel kwa mwant wa Isarel David, antu kinanapu. David kandingap utentamina bwat, pakwez wadinga utumbila kud Nzamb ni wadinga umuchingejin. Winyikel wa David kiwadingap wa chisum. Yehova wasala manswik nend David, mukulondang anch: “Chikumbu chiey ni want wey yikwikal yiminya chikupu ni chikupu, nkwas yey yikushakam chikupu ni chikupu.”—2 Sam. 7:16, NW.

4. Mayukish mamanay Salomon mu winyikel wend madinga mashindamedin ku chom ik?

⁴ Winyikel wa Salomon mwan wa David wadinga wa chisambu kwinsambishin ni wading ufanyidin kuya kamu kurutu mulong wadinga ulejen Kuyikel kwa Mivu Kanan ya Kristu Yesu. (Kus. 72:1, 17) Kwikil muchid ap umwing pa michid 12 ya in Isarel wadinga nich diyingishin dia kutombuk. Pachinech, mayukish madingay nikusanger Salomon ni antu end madinga makwet mipak. Yehova wamuleja Salomon anch: “Mulong wa chikumbu chinech utungina, anch wendin mwi mbil jam, anch wasadin mipak yam ni anch walam yijil yam ni kwendilam, kapamp kamwing nikuwanish dizu diam pad ey, dinamuleja tatukwey David; mwawiy, am nikez kashakam mukach mwa an a Isarel ni nikezap kulik muchid wam wa Isarel.”—1 Ant 6:11-13, NW.

5, 6. Yom ik yamekana kudiay Salomon mu kuburen kushinshaman kwend kudiay Nzamb?

⁵ Mu kupam kwend, Salomon kashinshamanap kand kud Yehova ni wasambisha kwiyandjik mu difukwil dia makasu. (1 Ant 11:4-6, NW) Pakemp pakemp, Salomon walika kuziyil ku yijil ya Yehova ni wikala chad mwin chisum. Chom chinech chasadika nakash kushik ni ku rufu rend, chawiy amuswinkana kud mwanend Rehoboam, ni amwita kupipej chisend. (1 Ant 12:4, NW) Yom ik yasalay Yehova palikay Salomon kushinshaman?

⁶ Bibil utulejin anch: “Yehova wova ujim mulong wa Salomon, mulong muchim wend wapumbuka . . . kud Nzamb wa Isarel, wamekana kud ndiy tupamp twad.” Yehova wamuleja Salomon anch: “Mu diyingishin dined . . . mulong ulaminap manswik mam ni mbil jam janakuleja mud yijil, nikulikapu ku kutambul want ni nikez kamwikish kamu kashalapol wey.”—1 Ant 11:9-11, NW.

7. Ap anch Salomon amulika, mutapu ik Yehova walamay antu end atumbila?

⁷ Yehova wamutuma muprofet Ahija chakwel ayikola antu mu chisum cha Salomon. Mwin kukolan winou wadinga Yeroboam, ikundj mwin manangu wasala mudimu chisu chadingay Salomon mwant. Chawiy Yehova walama manswik ma Want masalay nend David, witiyija anch michid 12 yaurika mu yisak yaad. Michid dikum akumwikay Yeroboam; michid yaad yikushal ya dijuku dia David, yatakelau kud Mwant Rehoboam. (1 Ant 11:29-37; 12:16, 17, 21, NW) Yehova wamuleja Yeroboam anch: “Tal yikushikena kamu: anch waziyil yawonsu nikukulejanya, mwawiy anch wendin mwi njil yam ni anch wasal kamu yom yitentamina ku mes mam mukulamang mbil ni yijil yam, mud mwasalay David kashalapol wam, chawil am nikez kwikal ney, ni nikukutungin chikumbu cha ufun, mud chanamutungina David, ni nikez kakwinkish kamu Isarel.” (1 Ant 11:38, NW) Yehova wasala mulong wa antu end ni wayiletina mayukish mu kuyikol ku chisum.

8. Kupakiu ik kuyizengodidinau antu a Nzamb nlel?

⁸ Chisum ni kasolikany yivulijadin nlel. “Muntu umuyikedil mukwau mu uyimp,” mwamu mulondilay Mulej 8:9, NW. Angend a mushing akweta ris ni antu a yisal yiyimp akat kushikij antu ku mar ma nfalang. Antakel mu guvernema, wingend a mushing, ni relijon akat yisu yivud kutek antu mu uzweny. Mud mwin kutentam Lot, pachinech, antu a Nzamb atumbila nlel “akamunin ku ya usany yisadilingau antu ayimp.” (2 Pita 2:7) Pachinech, anch tusotin anch tushakama kukwatijan nich yijil ya Nzamb, niyetu akutuzengol kud atankel akwata dizaz.—2 Tim. 3:1-5, 12.

9. (a) Yom ik yapanay Yehova mulong wa kuyikol antu end? (b) Mutapu ik tukweta kashinsh anch Yesu washala kamu ushinshamena kud Nzamb?

⁹ Tukutwish kwikal nich kashinsh, ku uyakin wetu wa dishin anch: Yehova kakuyilikangip antu end atumbila! Tongin bil yom yasalay chakwel ayiswinkana anyikel adinga ayimp. Nzamb wapana kal Want wa Umesia mu makas ma Kristu Yesu. Yesu Kristu ukuyikel mwiur mu mivu kanan. Kurutu oku ukulet mayukish kud antu akata kovu dijin dia Nzamb wom. (Tang Kuburik 11:15-18.) Yesu washala ushinshamena kud Nzamb kushik ni ku rufu. Ndiy kayiziyishapu antu end, mud mwasalay Salomon.—Heb. 7:26; 1 Pita 2:6.

10. (a) Ov, mutapu ik tukumekesha anch tutekin usey ku Want wa Nzamb? (b) Ap anch tudi mu kupakiu, kashinsh ik tukweta?

¹⁰ Want wa Nzamb udi want wa kashinsh ni ukupwish mar mawonsu. Kushinshaman kwetu kud mudiay Yehova Nzamb ni want wend. Nich kutek ruchingej retu rawonsu mu Want wend, etu tufanyidin kukis mangand makad wimzamb ni twikala nich mushiku mukusal midimu yiwamp. (Titus 2:12-14) Twikasikeshin kushal akad chidik mu mangand minam. (2 Pita 3:14) Ap anch turishin nich kupakiu nlel unou, tukutwish kwikal nich kashinsh anch Yehova ukutuking pakupakau ritiy retu. (Tang Kuseng 97:10.) Pachinech, Kuseng 116:15 utukasikeshin anch: “Kufa kwa antwend chom chilimin.” Atushalapol a Yehova akwet usey nakash kudi ndiy ni kakutwishap wayilik ayishesha awonsu.

Pitudia mu Kusadish kwa in Kubumbok

11. Mutapu ik walikay Yeroboam kushinshaman?

¹¹ Mwant Yeroboam mu winyikel wend wapwishaku kamu mar kudi antu a Nzamb. Pakwez, chisal chend chapaka kutumb kwa antu a Nzamb. Pakad kusanger mudimu wend wamwinkishau mudi mwant, Yeroboam wakimba jinjil ja kukasikeshin winyikel wend. “Anch antu inay adandamen kupan mulambu mu chikumbu cha Yehova ku Yerusalem,” watonga anch, “michim ya antu inay yikezapu kuburen kuchirik kudi ant aw, kudi Rehoboam Mwant wa Yuda; ni kapamp kamwing akez kwinjip ni akez kuchirik kudiay Rehoboam mwant wa Yuda.” Chawiy, Yeroboam wateka relijon musu wa kwifukwil an angomb a or aad. “Chad wateka umwing ku Betel, ni mukwau ku Dan. Chom chinech chadinga kamu chisal cha chitil, ni antu asambisha kuya kud umwing wadinga ku Dan. Ni asambisha kutung yikumbu yizambukina ni kutek in kupesh akad kwikal an a lev.” Yeroboam weza kutek kand dichuku diamwinend dia “musambu mulong wa an a Isarel,” ni wasambisha “kupesh pa yintamb yom ya kosh.”—1 Ant 12:26-33, NW.

12. Ov, yom ik yasalau antu atumbila a Nzamb adinga ku Want wa kwikaj chisu chatekay Yeroboam kwifukwil mwan a ngomb mu Isarel?

¹² Yom ik yikusalau antu atumbila a Nzamb katat adia ku want wa kwinkaj? Mud mwadingau mushinshamenau angakau, in Lev adinga ashicha mu misumb yayinkau mu teritwar wa want wa kwinkaj asala kamu pakad kulab. (Kub. 32:26-28; Kuch. 35:6-8; Kuv. 33:8, 9) Asha mapit mau, asenda majuku mau amatwal kwindum kwa Yuda, chawiy adandamena kumwifukwil Yehova pakad kwidjidjek. (2 Jins. 11:13, 14) In Isarel akwau adinga ashichamu machuku makemp mu Yuda atonda kushakamamu kamu rawonsu pandond pa kuchirik kand kwolikwau. (2 Jins. 10:17) Yehova wamana anch njil yakuchirik mulong wa difukwil diakin yid yakwazuril chakwel majuku makwau masadika ku Want wa kwinkaj makutwish kulik kwifukwil mwan a ngomb ni kuchirik ku Yuda.—2 Jins. 15:9-15.

13. Mu chirung cha katat ech, mutapu ik kusadish kwa in kubumbok mukwezina kupak antu a Nzamb?

¹³ In kubumbok nich kusadish kwau kuyikisishining antu a Nzamb nlel. Anyikel amwing apakishin kutek milad yau kushalijan ya ma relijon ma Ngand, akat kuyishindin antu aw itiyija. Amakurump a relijon wa makasu ni akwau akat kwitutul mukulondang anch awiy adia in kupesh a piur. Pakwez, ching pakach pa in Kristu akin pawiy tutanina azizidilau many akin, asadina “want wa in kupesh.”—1 Pita 2:9; Kubur. 14:1-5.

14. Chom ik tukusalap ku chitongijok cha mwin kubumbok?

¹⁴ Mud in Lev atumbula achirika mu chitot cha dikum K.C.C., antu atumbila a Nzamb nlel unou kakatap kuziyin ku yitongijok ya in kubumbok. In Kristu azizidilau many ni anamakwau, awiy akat kwiyep swa ni kulik yitongijok ya in kubumbok. (Tang Rome 16:17.) Anch twaziyil kamu kud anyikel a ma guvernema mu yom kushalijan ni twalik kwandam mu milong ya mangand, ntumb yetu yikuya kamu ku Want wa Nzamb. (Yoh. 18:36; Rome 13:1-8) Tukat kuyilikang afilinga mukan anch amusadedin Nzamb pakwez yisu yimwing akat kumutun mu yisalijok yau.—Titus 1:16.

15. Mutapu ik umenayap “kashalapol ushishamena ni kubabal” mulong wa kutumb kwetu?

¹⁵ Tonginap kand mutapu wasalau kal Yehova anch chiswapel kud antu akweta michim yitudishina adiokila mu mangand mayimp, mukulond kwa chinfan, chad ezin mu paradis wa mu spiritu watangay. (2 Kor. 12:1-4) Ni muchim wizwila nich kushikitish, tushadin kamu alamatina kudiay “kashalapol ushinshamena ni kubabal, watekau kal pa mutu pa chikumbu, ukuyinkisha yakudia pa chisu chau, ndiy nany.” Kristu wamuteka kal kashalapol wend “piur pa yom yend yawonsu yikwetay.” (Mat. 24:45-47) Pachinech, anch twovilap kurumburik ku mipak yimwing yikwatinay chisak cha kashalapol, etu kitukwetap diyingishin dia kulik ap kuchirik mwi ngand ya Satan. Komb, kutumb kwetu ku kutubachik tusala nich kwikepish ni kumuchingel Yehova atokisha yom.

Paulamina Yisend Yakwinkishay Nzamb

16. Chisend ik chamwinkau muprofet wa ku Yuda?

¹⁶ Yehova wamufishap nich Yeroboam mulong wa yisal yend ya wintombuj. Wamutuma muprofet wa ku Yuda aya kwinkaj kwa Betel chakwel amumana Yeroboam pa chisu chapeshangay pa chintamb. Muprofet wading ufanyidin kulond rusangu ra dirumburish dia kukolik kud Yeroboam. Pakad ntad, chadinga kamu chisend chikash.—1 Ant 13:1-3, NW.

17. Mutapu ik wakingay Yehova muruu wend?

¹⁷ Yeroboam wova ujim nakash pateshay dirumburish dia Yehova. Wazambula chikas wamwisik muntu watumay Nzamb, wayilej antu adingay nend piswimp anch: “Mukwatany!” Pakwez, kurutu muntu amukwata, “chikas chazambulay mulong wa kumwilik chamutalala, ni katwishap kuchichirish amwinend. Ni chintamb chabarika twa chaurik ni maut mapalangana pa chintamb.” Yeroboam wikasikesha kumulej muprofet chakwel atutisha mpal ya Yehova ni alembila mulong wa chikas chend chakwel chiwapa. Muprofet wamulembila Yehova, ni chikas chend chayerika. Mwamu Yehova wamukinga muruu wend ku uyimp.—1 Ant 13:4-6, NW.

18. Ov, mutapu ik utukinginay Yehova patusadina mudimu wend utumbila pakad wom?

¹⁸ Anch twiyandjik kamu mukulejan rusangu ruwamp ra Want ni kwikadish in kwilej, niyetu mu chisu chinech tukutwish katan antu akad kutukat, ap akweta rikis, in kwikatwol. (Mat. 24:14; 28:19, 20) Pakwez kitufanyidinap kulik wom utukangesha kov musangar wa mushiku wetu wa kusal mudimu. Mud muprofet wakad dijin mu chisu cha Yeroboam, tukwet “kutumb ni kutentam kurutu kwend [Yehova] machuku metu mawonsu.”a (Luka 1:74, 75) Ap anch tukwetap ukwash wa yishimu-shimu nlel, Yehova udandamedin kutuking mud Atuman end mukusadin spiritu wend utumbila ni angel. (Tang Yohan 14:15-17; Kuburik 14:6.) Nzamb kakutwishap kuyilik akata kudandamen pakad wom kulejan dizu diend.—Filip. 1:14, 28.

Yehova Ukuyiking Atumbila End

19, 20. (a) Kashinsh ik tukweta anch Yehova kakutwishapu watulik? (b) Yipul ik tukwisambina mu muntu wa mulong ulondwilap?

¹⁹ Yehova ud Nzamb wetu utumbila. (Kubur. 15:4; 16:5) Ud “utentamina mu yisalijok yend yawonsu.” (Kus. 145:17) Ni Bibil utukasikeshin anch: “Ukat kulam jinjil ja antwend amwitiyila.” (Jinsw. 2:8) Pakata kurishau nich kupakiu ap yitongijok ya in kubumbok ap pakwetau matat nich mudimu uyikishinau, antu a Nzamb atumbila akweting ruchingej anch Yehova ukuyitakel ni kuyikwash.

²⁰ Ov, muntu ni muntu yom ik yiswirikedinay kumekesh katat mu yom mud ey: Yom ik yikwinkwasha kulam kutumb kwam kud Yehova pamilong ya kupakiu ap yoziu yikutwisha kwinshiken? Ap kulond anch, mutapu ik nikutwisha kukasikesh kutumb kwam mudiay Nzamb?

[Mazu madia kwishin kwa paj]

Ov Ukutwish Kwakul?

• Mutapu ik wamekeshay Yehova anch kakutwishap wayilik antu end atumbila pamanau mar?

• Chom ik tukusalap kud in kupumbok ni yitongijok yau?

• Mutapu ik Yehova mukinginingay antu end atumbila pasadiningau mudimu wa kulejan?

[Kart/Chipich chidia pa paj wa 5]

(Chakwel kutan mazu mawonsu, tal mu mukand)

WANT WA KWINKAJ (Yeroboam)

Dan

SHEKEM

Bethel

WANT WA KWINDJUM (Rehoboam)

YERUSALEM

[Chipich]

Yehova kayilikap atumbila end chisu chatekay Yeroboam difukwil dia mwan a ngomb

[Chipich chidia pa paj wa 3]

Mayukish masangeray Salomon ni antu end madinga makwet mipak