Lamany Kushinshaman Kwen Nich Muchim Umwing

“Nikendil mu uyakin wey; bwalikesh muchim wam wova dijin diey wom.”—KUS. 86:11.

1, 2. (a) Kulondwish Kuseng 86: 2, 11, yom ik yikutwisha kutukwash kushal ashinshamena kud Yehova mu kupakiu ap mu yoziu? (b) Mutapu ik wa kukudish muchim wa kushal ashinshamena?

MUTAPU ik in Kristu amwing atumbila ajijamana mivu yivud mulong wa kuyitek mwi nkan ap kand mulong wa kuyizengol mushikediningau kuwa mu kukat yom ya ku mujimbu? Kwakul kud ku michim yetu—yitutongidina yid mukach. Kuseng wa 86 ubombin kutumb ku muchim umwing; ud muchim uwanyidina, udia wakad kwaurik. “O lam mupim wam, mulong am nitumbil,” mwam mwalembilay mwin kuseng David. “Mupandisha kashalapol wey mulong nid iwey mupandisha kashalapol wey ukungamedina mu ey.” David walembila kand anch: “Nlejap njil yey, o Yehova, chakwel nikendil mu uyakin wey; bwalikesh muchim wam wova dijin diey wom.”—Kus. 86:2, 11.

² Ap anch twachingej mudiay Yehova nich muchim umwing, milong yimwing yikutwish kuyipish urund wetu nend Nzamb. Yitongijok yiyimp yid mud ndond yitilau min mwinjil tukata kwendin. Ap anch twashal ashinshamena kud Yehova mu milong yimwing, tukutwish twafap nich mu mipit ya Satan. Yid yikasikeshina mud ik kukudish muchim wa kushinshaman kud Yehova katat kamu, kurutu kupakiu ap yoziu yeza! “Kupandakan yom yawonsu,” Bibil ulondin anch, “lam muchim wey.” (Jinsw. 4:23) Tukutwish kwilej malejan ma usey payitadina muprofet wa ku Yuda watumau kud Yehova mulong wa Mwant Yeroboam wa mu Isarel.

“Lik Nikwinka Chipan”

3. Mutapu ik wasalay Yeroboam ku dirumburish dia rusangu ra kukolik ra muprofet wa Nzamb?

³ Kulejan rusangu. Muntu wa Nzamb amwela anch ukwet usu kud Mwant Yeroboam, wateka difukwil dia mwan a ngomb ku want wa michid dikum kwinkaj kwa Isarel. Mwant wova ujim. Wayileja antu end kumukwat muprofet. Pakwez Yehova wadinga nend kashalapol wend. Kapamp kamwing, chikas cha mwant chazambulay nich nkabu chatalala, ni chintamb chasadinangay mulong wa difukwil dia makasu chabarika. Kapamp kamwing, Yeroboam wazala. Wamwilembila muntu wa Nzamb: “Nilemb amboku, dutish mpal ya Yehova Nzamb wey ni lembil mulong wamam chakwel chikas cham chiyerika.” Muprofet walembila, ni chikas cha mwant chayerika.—1 Ant 13:1-6, NW.

4. (a) Mulong wak chipan cha mwant chadinga kamu kupak kushinshaman kwa muprofet? (b) Muprofet wakula nchik?

⁴ Chad Yeroboam wamuleja muntu wa Nzamb wakin anch: “Ez tuya kwolikwam ni udiap ni unaku ni nikwinkishaku chipan.” (1 Ant 13:7, NW) Muprofet ufanyidin kusalap nchik? Ufanyidin kwitiyij kumwak kud mwant kupwa kwa kupan rusangu ra dirumburish ra kumufish nich? (Kus. 119:113) Ap wadinga ufanyidin kulik kutazuk kwa mwant, mulong wa uyimp wasalay? Yeroboam wadinga mpich ni wadinga kand mwin kupan. Ap muprofet wa Nzamb watonga mu ujindj mulong wa yom ya kumujimbu anch, chipan chinech chid choziu chijim. Pa chinech, Yehova wamuleja muprofet anch: “Kiukutwishap kudia dibot ap kuna mem, ni kangal kuchirikin mwinjil yawezidina.” Chawiy muprofet wamuleja nich kushilamu anch: “Ap anch wangikap nchik chikunku cha chikumbu chey kinikutwishap kuya ney ni kudia dibot ap kuna mem mwindond yiney.” Ni muprofet watumbuka ku betel wayil njil yiny. (1 Ant 13:8-10, NW) Mipak ya muprofet yitufundishin yom ik piur pa muchim ushinshamena?—Rome 15:4.

‘Sangarany’

5. Ov, mutapu ik ukata kurish kish yom ya kumujimbu kushinshaman kwetu?

⁵ Yom ya kumujimbu yikutwishap kumekesh mud yibudikin yakulik kwikal ushinshamena, pakwez yikutwish. Ov, ukwet richingej mu kushilamu kwa Yehova anch ukutuwejinaku yom yiney yawonsu? (Mat. 6:33; Heb. 13:5) Pakad kuswiriken nfalang mulong wa kuman yom “yiwamp” mu mwom wa katat, tukutwish kusal ik? (Tang Filipoi 4:11-13.) Ov, tukat kuswirikenang kusal ma usu nakash mulong wa kusal yivud mu chikumangen ap mu mudimu wetu mulong wa Nzamb? Ov, mudimu utumbila wa Yehova ud pa ndond ya kusambish mu mwomu yetu? Yakul yetu yishindamedin kwijik mutapu tukata kumusadin Nzamb mudimu nich muchim umwing ap bwat. Mupostol Paul wafunday anch: “Mwon wa kumulondul Nzamb ukat kulet mapit mavud kudi muntu ukata kusangar nich yom yikwetay. Mulong etu kitwaletap chom mu mangand, chawiy chimwing kand, kitukusendap chom. Chawiy chifanyidin etu kusangar anch tukwet yakudia ni yidjal.”—1 Tim. 6:6-8.

6. “Chipan” ik chikutwinkishau, ni yom ik yukutwisha kutukwash kwijik anch tukuchitambul?

⁶ Chilikej, muntu udia mpich ukutwish watwinkish mudimu ufanyidina kutufut nawamp ni kwisakin kand yom yikwau. Ap kand, tukutwish kutongin kand anch tukutwish kwikal nich nfalang jivud anch twaya mwi ngand yikwau ap mu teritwar mukwau mulong tukuman mudimu. Kwisambishin, yom yiney yikat kumekan kamu mud mayukish ma Yehova. Pakwez kurutu tukwata mipak pa yom mud yiney, kitufanyidinap kushinshikin yibachikin yetu? Chipwul cha kusambish chawiy ech, “Mupak wam ukwikalap nich kusadish ik pa urund wam nend Yehova?”

7. Mulong wak chidi cha usey kudiosh maswir ma yom ya kumujimbu?

⁷ Dirijek dia Satan didandamedin kuya kurutu mukuletang yom ya kumujimbu. (Tang 1 Yohan 2:15, 16.) Rutong ra Diabul rid mulong wa kuyipish michim yetu. Pachinech, tuswiridin kwikal ababela in kujinguninang ni tudiosha maswir ma yom ya kumujimbu mu michim yetu. (Kubr. 3:15-17) Yesu chamukasikenap kulik chipan cha Satan mulong wa mant mawonsu ma mangand. (Mat. 4:8-10) Wababesha anch: “Dimukany ni kwilamany ayinen ku ris rawonsu; mulong mwom wa muntu kiushichip mu kuvul kwa yom yipitilay.” (Luka 12:15) Anch twikal kamu atumbila yikutukwash kumuchingejin Yehova pakad kwitongin ayinetu.

Muprofet Ipal “Wamudimba”

8. Mutapu ik wezau kupak kushinshaman kwa muprofet wa Nzamb?

⁸ Yom yakimba kamu kwend nawamp anch muprofet wa Nzamb wadandamena kuchirik kwol kwend. Kapamp kamwing, pakad kulab, warisha nich kupakiu kukwau. “Muprofet umwing ipal wadinga ushich ku Betel,” mwamu mulondinay Bibil, “chad mwanend weza ni wasambisha kumulej” yom yawonsu yasadika dichuku dinidia. Chateshay rusangu rinira, muprofet ipal wayileja amutenchikina chimbur chakwel aya akamukwata muprofet wa Nzamb. Pakad kulab, wamutana muprofet wapim lel mwishin mwa mutond ujim ni wamulej anch: “Ez tuya ku chikumbu cham ni udiaku dibot.” Palikay muntu wa Nzamb wakin kuya, muprofet mpal wamuleja anch: “Niyam nid muprofet mud ey, ni mwangel amwinend walondang kud am kuswitin dizu dia Yehova, anch, ‘Muchirisha weza nend ku chikumbu chey chakwel adiaku dibot ni kunaku mem.’” Pakwez Mifund yilondin anch: “Wamudimba kwend.”—1 Ant. 13:11-18, NW.

9. Mifund yilondinap ik mulong wa in kudimban, ni yom ik yikatau kuyipish?

⁹ Twijap mutapu ik wadinga yitongijok ya muprofet ipal. Pamwingap muprofet ipal mu chisu chimwing wadinga muprofet ushinshamena wa Yehova. Pachinech, ndiy wasadina makasu. Mifund yijingunin kamu mwikadil winou. (Tang Jinswir 3:32.) In kudimban akat kuyipishang urund wau nend Yehova ni wa akwau kand.

“Wachirika Nend” Muprofet Ipal

10. Mutapu ik wasalay muprofet wa Nzamb pamutazukau kud muprofet ipal, ni yom ik yamushikena?

¹⁰ Muprofet wa ku Yudea wadinga ufanyidin kwijik manangu ik masadidinay muprofet ipal chakwel amudimba. Wadinga ufanyidin kwiyipul anch, ‘Mulong wak Yehova watumang mwangel kud muntu winy mulong wa kwinlej am?’ Muprofet wadinga ufanyidin kumwipul Yehova mulong wa kutokish yom yiney, pakwez Mifund yilondilap anch mwawiy mwasalay. Pakwez, “wachirika nend [muprofet ipal] chakwel adiaku mukat muchikumbu chend ni anaku mem.” Chad Yehova kasangarap. Chisu chachirikay kal muprofet wadimbau ku Yudea, ntambu wamukwata ni wamujipa. Nsudiel yiyimp mud ik mu mudimu wend!—1 Ant 13:19-25, NW.a

11. Chilikej ik chiwamp chashay Ahija?

¹¹ Pakwez ku mutambu ukwau, muprofet Ahija, watumay amupala Yeroboam many mud mwant, ndiy washala kamu ushinshamena kushik ni ku upal wend. Chisu chakungay kal Ahija ni kufa mes, Yeroboam wamutuma mukajend chakwel amwipula Ahija mulong wa kwijik mutapu ik ukwikalay mwanau wadinga uyedina. Ahija pakad kov wom wamuleja anch mwan wa Yeroboam ching kamu wafa. (1 Ant 14:1-18, NW) Mayukish mavud mamanay Ahija madinga chisend chasadinangay mu dizu dipepidilay Nzamb. Mu mutapu ik? Mwin kupesh Ezra wasadina yom yavunday mud musul wa jinsang.—2 Jins. 9:29.

12-14. (a) Dilejan ik tukwilejinaku ku yom yamushikena muprofet nsand? (b) Kufanakesh ik tuswiridina kushinshikin ni malembil mashindamedina pa chiyul cha Bibil makupanay mukurump.

¹² Bibil kulondilap mulong wak muprofet winou nsand chom chamukangesha kumwipul Yehova kurutu kwa kuchirik kwinyim ni kudia ni kuna nend muprofet ipal. Chitwishikin anch ipal winou wamuleja yom yaswirikenay kutesh? Dilejan ik kud etu? Tuswirikedin kwikal nich kashinsh mulong wa mipak yitentamina ya Yehova. Ni twakwatin kal mipak ya kuyilondul, mutapu wawonsu uyidia.

¹³ Amwing akat kuteshang yadia yiswiridinau kutesh anch ayikish chiyul. Chilikej, mwin kulejan akutwish kumwinkish mudimu ukutwisha wa mukwat chisu chijim nakash chakusal midimu yend ya mudijuku ni ya Nzamb. Ukutwish kwipul chitongijok kud mukurump. Mukurump ukuman nsambishin yend ya yom ni ukwijik anch chimukasikedin kumulej mukadivar mutapu wa kulam dijuku diend. Kupwa mukurump ukutwish kupampish nend mukadivar mulong wa ubaaj wa muspiritu udiaku anch witiyij mudimu umwinkinau. Ov mukadivar ukuvurik ching kusu yirumburil ya mukurump, anch ukutwish kand kwipulaku antu akwau? Mukadivar ufanyidin kuman maswir makwijik yidia yiwamp kudiay ndiy payitadina yom ya muspiritu.

¹⁴ Tushinshikinany kand chom chikwau. Nambaz ukutwish kumwipul mukurump amuleja anch ukutwish kwaurik kudiay nfumwend wakad kwitiyij. Mukadivar ukutwish wamurumburil anch mupak wa kwaurik ap bwat yeya amwiney ukuutonda. Ukutwish kutal chiyul cha Bibil pa mulong winou. (1 Kor. 7:10-16) Ov nambaz ukutwish kamu kukwat nich usey ku yom yalonday kal mukurump? Ap wading watongang kal kwend kumulik nfumwend? Mu kukwat mupak wend, chid cha manangu kudiay ndiy kupan malembil mashindamedina pa chiyul cha Bibil.

Ikal Mwin Kwitudish

15. Yom ik tukwilejina mulong wa kurumbuk kwa muprofet wa Nzamb?

¹⁵ Yom ik kand yikwau yitukutwisha kwilej mulong wa kurumbuk kwa muprofet wa ku Yuda? Jinswir 3:5 jilondin anch: “Mukungamena Yehova ni muchim wey wawonsu. Kangal wachingej ronganyin rey.” Pandond pakudandamen kusal yamulejay Yehova mud mwasalay pakusambish, pachinech muprofet wa ku Yudea weza kuchingejin yitongijok yend. Kurumbuk kwend kwashadisha mwom wend ni dijin diend diwamp kud Nzamb. Kuman kwa Yom mud yiney kupanin usey wa kwikal ikepishina ni kwikal ashinshamena mu mudimu utwinkinay Yehova!

16, 17. Yom ik yikutukwasha kushal ashinshamena kud Yehova?

¹⁶ Yitongijok yiyimp yidinga ku michim yetu yikimbining kutushadish. “Kwikil chom chikata kudimban mudi muchim wa muntu, muchim uyedil wakad kutwish kuyerik.” (Jer. 17:9) Anch twakimb anch tushal atumbula kudiay Yehova, tufanyidin kudandamen kusal mudimu nakash tudjola muntu mukur nich yisalijok yend ya kwitutul ni kwitongamin. Ni tufanyidin kumudjal muntu musu, “kwanitangilanyau mu chifu cha Nzamb mu kutentam ni mu kutumb kwakin.”—Tang Efes 4:22-24.

¹⁷ “Pakwez in kwitudish akwet manangu,” mwawiy mulondina Jinswir 11:2. Kwitudish mudiay Yehova ku kutukwash kulik kusal uyimp. Chilikej, kuziy ku kutwish pakemp pakemp kuyipish yitongijok yetu. (Jinsw. 24:10) Tukutwish twaziy ni twalik kusal mudimu utumbila ni twasambish kutong anch ok twasal kal nakash mivu yivud, ni kutong kand anch chinech chawiy chisu kudiau akwetu niyau chikusal. Ap tukutwish kutongin pa mashakamin “mawamp” ma mwom. Pachinech, ‘mukwipanang kusal ma usu metu’ ni “lamatinany mu mudimu wa Mwant” ukulam michim yetu.—Luka 13:24; 1 Kor. 15:58.

18. Yom ik tukutwisha kusal anch tutwishinap kukwat mupak?

¹⁸ Mukusut kwa yisu, tukuswiriken kukwat mipak yikash, ni njil yitukutwisha kulondul yikutwishap kwikal yiwamp. Ov, utongin anch chid chiwamp kupwish milong yetu ayinetu? Ap anch twashiken kwikal mu mwikadil winou, chid cha manangu twita ukwash kud Yehova. “Anch umwing wenen waburen chiyul,” mulondinay Yakobu 1:5, “lik amwita Nzamb, ndiy ukat kupan yiwenaku.” Tatukwetu udia mwiur ukutwinkish Spiritu utumbila utuswirikedina mulong wa kukwat mipak yiwamp.—Tang Luke 11:9, 13.

Dandamen Kushal Ushinshamena

19, 20. Yom ik tukudandamena kusal?

¹⁹ Muvu ya karumbangesh yiyepay Salomon mulong wa difukwil diakin yaleta choziu chikash kud atushalapol ashinshamena a Nzamb. Chimeken kamu anch yayikisisha antu mu mitapu kushalijan. Pakwez, amwing ashala kamu ashinshamena kudiay Yehova.

²⁰ Dichuku diawonsu, tukat kurish nich kutond ni kukwat mipak mulong wa kupakiu kwa kushinshaman kwetu. Ni etu ayinetu tukutwish kamu kumekesh anch tushinshamen. El chisu chawonsu tushala ashinshamena kudiay Yehova mukubombikesh michim yetu pamwing, nich kashinsh kawonsu anch ukudandamen kuyukish antu end ashinshamena.—2 Sam. 22:26, NW.

[Mazu madia kwishin kwa paj]

Ov, Mutapu ik Ukwakula?

• Mulong wak tufanyidina kudiosh maswir ma yom ya kumujimbu mu michim yetu?

• Yom ik yikutukwasha kushal ashinshamena kudiay Yehova?

• Kwitudish kutukwashining mutapu ik kushal ashinshamena kudiay Nzamb?

[Chipich chidia pa paj wa 9]

Ov, chikukasikedin kujijamen yoziy?

[Chipich chidia pa paj wa 10]

Ukat kupan malembil mashindamedina pa chiyul cha Bibil?