Kudilany mu RONGANYIN RAKIN Nich “Michim Yitentamina”

ATUSHALAPOL awonsu a Yehova akimbin anch itiyika kudi ndiy. Chitusotina anch atwitiyija, tufanyidin tusala usu wa kuwapish mudia ritiy retu ni kumusadil mudimu utumbila nich mushiku. Pakwez, kambuy Paul, utubabeshin piur pa chak chikutwisha kwikalaku, chak chimwing chayikwata in Yuda amwing adingaku pa chirung chend anch: “Akwet kal mushiku wa Nzamb, pakwez kiudip wa ronganyin.” (Rome 10:2) Choviken patok, ritiy retu ni kumwifukwil Yehova kufanyidinap kwengamin kwau pa yovil ya chamwamu. Tuswiridin ronganyin rakin ra Sakatang wetu ni ra rusot rend.

Ndond yikwau mu yom yafunday, Paul wisambina mwikadil witiyijinay Nzamb nich impu yetu ya kwak ronganyin rakin. Ndiy walembila anch in kwilej a Kristu izulijana “ronganyin” ra rusot ra Nzamb “chakwel [enda] ku kufanyin kwawonsu ku kumusangarish [ Yehova, NW]” mudi muyilau ni kusong “mabuj mu midimu yawonsu yiwamp ni kukudil mu ronganyin ra Nzamb.” (Kol. 1:9, 10) Ov, mulong wak tuswiridina nakash “ronganyin” rakin? Ni mulong wak tufanyidin twizula nich ronganyin riner?

Ronganyin Ridi ra Usey ku Ritiy

Ronganyin rakin ra Nzamb ni ra rusot rend mudi muridia mu Bibil ridi mufulandal wa ritiy retu. Pakad ronganyin riner, ritiy retu mudiay Yehova rikutwish rikal mudi kakafumbufumb kakutwisha kuwa anch kwikal rinkind. Paul utukasikeshin chakwel tumusadila Nzamb mudimu utumbila ni “kusadil kwa [s]piritu” ni kukarumukin ku “manangu masu.” (Rome 12:1, 2) Kwilej Bibil pakad kujing kukutwish kwatukwash pa mulong winou.

Ewa, chibol wa rawonsu wa mu Pologne, witiyijin anch: “Anch nalika kwilej Dizu dia Nzamb chisu ni chisu, ing namana ndond yimwing mu kupam mu ronganyin ra kumwijik Yehova. Kwijikan mudi mwin Kristu ing kwasambisha kusheshik pakemp pakemp, ni ing ritiy ram mudiay Nzamb raziya—ni ing kwikal nich chibudikin cha kushesh urund wam ni Nzamb.” Chom chinech kangal cheza chitushiken! Tushinshikinany chilakej cha ikundj umwing wizulijana nich ronganyin rakin ra Yehova ni kupwa witiyika kudi Ndiy.

“A, Mudi Nikatila Yijil Yey!”

Muminy udia mu Kuseng wa 119 mu ma Bibil metu wisambidin yovil ya mwin kufund kuseng piur pa yijil, malejan, yijidik, ni yany ya Yehova. Mwin kufund kuseng wafunda anch: “Nikusanger mu yany yey. . . . Malejan mey mawiy musangar wam.” Wafunda kand anch: “A, mudi nikatila yijil yey! Nikat kuyitong mu yisu yawonsu.”—Kus. 119:16, 24, 47, 48, 77, 97.

Dizu “mudi nikatila” ni “kuyitong” dikwet chitong cha kutongijokin pa Dizu dia Nzamb, chakin kamu, kusanger mu kutongijokin kwinoku. Mazu minam makasikeshin rukat rijim radingay nich mwin kufund kuseng ra kwilej chijil cha Nzamb. Rukat riner kiradiokalap ku yovil ya chamwamu ya mu muchim wa mwin kufund kuseng. Pakwez, ndiy wadinga nich yovil yikash ya ‘kwitongijokin amwinend’ kukwatijan nich chijil, chakwel ikal nich jingunin ya mazu ma Yehova. Tukutwish twakuman mu manangu mend anch ndiy wadinga ni kusot amwijika Nzamb ni rusot rend mudi muchifanyidina kamu.

Choviken patok anch rukat ra mwin kufund kuseng ra kukat kwend Dizu dia Nzamb radiokala mu muchim wend. Tukutwish niyetu twiyipul anch: ‘Ov, mwamu chidia ku mutambu wam? Ov, nikat kusanger kutang ni kutongijokin chikunku cha Bibil pichuku pichuku? Ov, nikat kutang Dizu dia Nzamb nich mushiku ni ukwash wa malembil?’ Mu chilik tukutwish twakul anch inge ku yipul yiney, chawiy ukezany “kukudil mu ronganyin ra Nzamb.”

Ewa ulondil anch: “Nadandamena nich kuwapish dilejan diam. Kudiosh patwatambwila broshir ‘ Voyez le bon pays, ’ nikat kumusadil piswimp chisu chin chawonsu nilejina. Nikat kusal usu wa kukimbijol mu buku Étude perspicace des Écritures ni mu mikand yikwau ya kukimbijodil.”

Tushinshikinany kand chilakej cha ambay a uruw Wojciech ni Małgorzata, antu adinga nich yisend yijim ya dijuku. Mutapu ik wirijekau chakwel atenchika nawamp program wau wa kwilej Bibil? “Twitekina chisu cha muntu ni muntu kwilej Dizu dia Nzamb mudi muchitwishikina. Kupwa, pa chisu cha dilejan dia dijuku ni mu mambamb metu pichuku pichuku, tukulejijan manans mitwatana masangareshina ap makasikeshina.” Kwilej nakash kwa muntu ipend kwayiletina musangar ujim ni kwayikwasha ‘akudila mu ronganyin rakin.’

Ileja Nich Muchim wa Kulam

Mudi in Kristu, twitiyijin anch ridi rusot ra Nzamb “kuyipandish antu awonsu ni kwez ku kwijik uyakin.” (1 Tim. 2:3, 4) Uyakin winou ukasikeshidin usey wa kutang Bibil ni kusal usu chakwel “wijikany nawamp.” (Mat. 15:10) Chakwel kusal chifanyidin kwikal ni muchim wa kulam. Yawiy ngikadil yamekeshau antu adinga pasak ku Bere chisu chayilejau kudi Paul rusangu ruwamp: “Patambulau dizu nich michim yitentamina adinga ni kutang mukand wa Nzamb pichuku pichuku, ni kutal anch yom yiney mwamu muyidia.”—Mid. 17:11.

Ov, wimburijinany chilakej cha in Bere cha kwikal nich michim yitentamina ni kudiosh mu manangu men yizuwol ya chamwamu piwilejinanya Bibil? Mwin Kristu ukutwish wasal usu chakwel ayimburija in Bere, ap anch pasak kadingap ni kusanger dilejan. Chikwau, antu amwing asadiling mudi atangin ni ilejinaku pakemp payilau mu kunanap, pakwez kimwawiyap chifanyidina kwikal ku mutambu wa mwin Kristu. Chikalap nchik mivu yikadilay kal nich muntu, chifanyidin kusal usu wa kwipuk usweral. Ni piutangina, ukutwish wasal usu wa kukimb jinsangu jiukutwisha kuyilej antu akwau. Chilakej, ov, ukutwish witekinach mudi rutong rey ra kumulej mwin kwol kwey ap murund mwin Kristu yom yiwatangang ap yiwilejang pa yisu ya kwilej kwey amwiney? Kusal mwamu kukutwish kwatek mu manangu ni mu muchim yom yiney ni yikwikal nich chibudikin chiwamp padi antu akwau.

Piur pa yisu yey ya kwilej, londul chilakej cha Ezra, kashalapol wa pasak wa Nzamb, muntu “wateka muchim wend kukwilej Yijil ya [ Yehova, NW].” (Ezra 7:10) Ov, mutapu ik ukutwisha kusal mwamu? Ukutwish wisadil mwikadil ufanyidina ukukutwishisha kwilej. Kupwa, shakam ni mulembila Yehova akutakela ni akwinkisha manangu mend. (Yak. 1:5) Iyipula amwiney anch, ‘Chom ik nisotila kwilej pa chisu chinech chinilejina?’ Piutangina, kimb chakwel ujingunina manans majim. Ukutwish wamafund ap kutek kashony pa yikunku yiusotila kuchirikin kand. Tongin mutapu ukutwisha kusadil malejan minam mu mudimu wa kulejan, piukwatina mipak, ap pa chisu chiuyikasikeshina ambay ney akaritiy. Piswimp ni kwinsudiel kwa dilejan diey chirikin mu yom yiwileja kal. Chawiy chikeza kukutwishish ulama yom yiwileja kal.

Ewa ulejen mutapu ukatay kusal: “Pinadinga nitangin Bibil, nadinga ni kusadil mareferans madia mu mulong, Index des publications Watch Tower, ni Watchtower Library pa CD-ROM. Nadinga ni kufundol tumanans nikutwisha kusadil mu mudimu wa kulejan.”

Antu amwing akata kusanger nakash kwilej, iyandjika kal nakash mu milong ya muspiritu. (Jinsw. 2:1-5) Chikwau kand, akwet yisend ni yikokujol yivud piur pa kwitekin chisu cha kwilej kwau ayinau. Anch mwamu chidia ku mutambu wey, ov, yitenchik ik yiufanyidina kutenchik?

Nikuman Nchik Chisu?

Ukutwish pamwingap witiyij anch chiswapeling kwitekin chisu cha kusal yom yiusangaredina. Antu avud amen kal anch chidi cha ukwash kwilej nakash ni kwitekin jintong jakin, mudi kumutang Bibil mwawonsu. Chakin kamu, chikutwish chikal chikash kutang jinsangu jilemp jilemp ja majuku, jinsangu jirumburila kachom ni kachom ka tempel, ap mauprofet makash makash kutesh mamekena anch misambidin kulemp milong ya mwom wa pichuku pichuku. Pakish kusal nzau ja usey chakwel uwanyish rutong rey. Chilakej, kurutu ushinshikin chikunku cha Bibil chimekena kwikal chikash, ukutwish watang bil jinsangu jichombilamu ap kurumburik kwach. Jinsangu jinej jikutwish jikal mu buku “ Toute Écriture est inspirée de Dieu et utile, ” wapalangeshinau kal mu jindim piswimp 50.

Chidi cha ukwash kusadil kutongijok piutangina Bibil. Chom chinech chikutwish chakukwash umana chipich kanang mu manangu mey cha antu isambidinau ni yinship yasadikaku. Kusadil kwau kusu yiyul yiney kukez kusal anch yikunku yiwilejina yikusangaresha nakash ni yikal ya usey kudi ey. Chibudikin, ukovu impu ya kwitenchikin chisu chilemp cha kwilej. Chikez kukuswapel kulam chaku cha kutang Bibil pichuku pichuku.

Anch yiyul yidia kwiur oku yikutwish yamukwash muntu ni muntu parend, ov, mutapu ik ukutwisha kusal dijuku dikwatikena nakash? Ov, mulong wak ulikinany kushakam pamwing chakwel wiswedishany ni kwisambin piur pa yiyukish yidingaku mu dilejan dia dijuku? Pamwingap mu minsamb yiney mukutwish mwabudik yitongijok yiwamp, kulankang pa mbwidid dichuku ni dichuku, ap pa machuku kanang chakwel ushinshikinany chikunku chimwing cha Bibil. Ap ukutwish wisambinany mutapu wa kutenchik program wa dilejan dia dijuku. Chilakej, majuku mamwing mamen kal anch chidi cha usey kwisambin mufund wa dichuku ap kutang chikunku cha Bibil pa chisu chipwishina dijuku kudia. Kurutu muntu kanang akuswola pa tebur ap aya akasal mujikit ukwau, dijuku dikutwish diasutish minit 10 ap 15 chakwel isambina Mifund ap atenchika program wa kutang Bibil. Cha kusambish, chom chikutwish chamekanaku mudi chikasiken, pakwez chikutwish chikal chaku cha dijuku ni chisangareshina.

Wojciech nenday Małgorzata arumburil chom chakwasha dijuku diau anch: “Pasak, chisu chetu chadinga ni kusutil mu midimu ya chamwamu, yakad usey. Twakwata mupak wa kukepish chisu twadinga ni kusadil mulong wa kutumol mikand pa Internet. Twakepisha kand chisu chetu cha kwiswedish ni twitekina dichuku dia pakampwil ni chisu mulong wa dilejan dikurikina.” Chakin kamu dijuku dined dinaninap mulong wa yitenchik yiney yidiasala, ni chikutwish chikal kand mwamu mu dijuku diey.

Chidi cha Usey Kukudil mu Ronganyin Rakin!

Kwilej Dizu dia Nzamb kukurikina kukutwish kwasong “mabuj mu midimu yawonsu yiwamp.” (Kol. 1:10) Mudi muchikala mu mwom wey, kuya kwey kurutu kukumekan kudi antu awonsu. Ukwikal muntu ukudila muspiritu nich chovu chiwamp cha uyakin wa Bibil. Mipak yey yikwikal yisikena ni yikukukwash kuyikwash antu akwau, ukwikalap mudi antu akad kwijik. Chipandakenamu yawonsu, ukez kumushejin Yehova piswimp. Ukez kusanger nakash ngikadil yend, ni chom chinech chikez kumekan patok piuyilejinach antu akwau.—1 Tim. 4:15; Yak. 4:8.

Chikalap nchik mivu yiukweta ap ronganyin rey, sal usu wey wawonsu chakwel udandamen kusanger mu Dizu dia Nzamb ni wilejad nakash ni muchim utentamina. Ukutwish wamuchingejin Yehova anch kakezap kuvuramen usu wey. (Heb. 6:10) Ndiy ukez kukuruzukin yiyukish yend yipitishina.

[Kamushet kadia pa paj wa 13]

PITUKATA ‘KWIZUL NICH RONGANYIN’ RAKIN . . .

—Kol. 1:9, 10

Tukat kwikal nich chiyul, tukat kutwish kusadil njingunin ni kukwat mipak ya manangu.

—Kus. 119:99

Tukat kutan musangar ujim mu kuyikwash antu akwau chakwel amushejina Yehova.

—Mat. 28:19, 20

[Chipich chidia pa paj wa 14]

Chikutwish chikal chikash kutan ndond yiwamp ya kwilejen, pakwez chidi cha usey

[Chipich chidia pa paj wa 15]

Majuku mamwing matangining chikunku cha Bibil kupwa kwa kudia