Yehova Udi ‘Mwin Kutukwash’
“[Yehova] ukat kuyikwash awiy ni kuyikamunin.”—KUS. 37:40.
1, 2. Uyakin ik piur pa Yehova udia musul wa rongoj ni wa usu kudi etu?
UREL wa muten udingap wa chikupu. Mudi munyingumukina divu, urel niwawiy uyiling ni ukat kushemunik. Pakwez, Sakatang wa divu ni muten, ndiy kakatap kukarumuk. (Mal. 3:6) Bibil ulondil anch, kudi ndiy kwikiling “kukarumuk, ap urel wakad kushemunikang.” (Yak. 1:17) Uyakin winou wa pa dishin piur pa Yehova udi chakin kamu musul wa rongoj ni wa usu mulong wetwetu, pakampwil pa chisu turishina nich yoziu ni yikokujol. Ov, mulong wak?
2 Mudi mutwamanang mu mutu wa mulong wasambelangaku ou, Yehova wimekesha kwikal “mwin kukwash” pa yisu yafundau Bibil. (Kus. 70:5) Ndiy kakatap kukarumuk ni ulondiling ching uyakin; chawiy, in kumwifukwil end ilel akwet mayingishin mawonsu ma kumuchingejin anch “[u]kuyikwash awiy ni kuyikamunin.” (Kus. 37:40) Ov, mutapu ik ukatay Yehova kuyikamunin atushalapol end mu yisu ya katat? Mutapu ik mukutwishay kutukamunin muntu ni muntu panrend?
Kuyikamunin Kudi Akankuny
3. Ov, mulong wak tufanyidin kwikal nich kashinsh anch akankuny kakutwishap kuyilikish antu a Yehova alika kulejan rusangu ruwamp?
3 Kwikil rupompat ripandakena ra Satan rikeza kuyikangesh Atuman a Yehova chakwel alika kumwifukwil ching kusu Yehova mudi muchifanyidina. Dizu dia Nzamb ditulejin nich kashinsh anch: “Ut wawonsu ukuchilau mulong wa kukurishish ukez kupandikanap bwat, ni rudim rawonsu rikeza kakulankin mu dirumburish ukez karifish nich.” (Isay 54:17, NW) Akankuny apakisha kal tupamp ni tupamp pakwez akangeny kuyilikish antu a Nzamb alika kusal mudimu wau wa kulejan. Tushinshikinany yilakej yaad.
4, 5. Rupompat ik rayipompatau antu a Yehova mu muvu wa 1918, ni kwadinga chibudikin ik?
4 Mu muvu wa 1918, antu a Yehova ara nich rupompat ra amakurump a chirelijon radinga nich diloz dia kukangesh mudimu wau wa kulejan. Pa Ndol-Mem 7, guvernema wa mwab wa mu États-Unis waleta mbil ya kumukas J. F. Rutherford, wadinga wimanyidina mudimu wa kulejan pa mangand mawonsu pa chisu chinicha, pamwing ni antu akwau adinga ku biro mujim. Mu kusut kwa angond aad, Mukadivar Rutherford ni ambay nend ayifisha nich chakad kufanyin ukankuny ni ayikatwila mivu yivud yikusalau mu rukan. Ov, akankuny nau ayiwina pasadilau dirumburish mulong wa kujidik chikupu mudimu wa kulejan? Chakapuk chaya mwang!
5 Vurikany kushilamu kwa Yehova: “Ut wawonsu ukuchilau mulong wa kukurishish ukez kupandikanap bwat.” Yom yakarumuka mu mutapu umwing wakad kuchingejin, pa Rish 26, 1919—kwinyim kwa ngond chidivu Mukadivar Rutherford pamwing ni ambay nend ayifisha nich—akadivar akasau ayileja anch akuyilikishaku ching afuta bil yibau. Muvu walondulaku, pa Ndol-Mem 5, 1920, yom yayifundinau kiyadingap kand nich usey. Akadivar asadila want ipau mulong wa kukasikeshin kand pa mudimu wa Want. Kwikala yibudikin ik? Kwikala kwiwejin kwamushena kusambishin kamu pa chisu chinicha! Ntumb ya yom yawonsu yasalau yaya kudiay “mwin kukwash.”—1 Kor. 3:7.
6, 7. (a) Kutenchik ik kwa kuyitaliken Atuman a Yehova kwasadika mu Allemagne Nazi, ni kwadinga chibudikin ik? (b) Rusangu ra katat ra antu a Yehova riletin uman wa uyakin ik?
6 Tushinshikinany katat chilakej cha kaad. Mu muvu wa 1934, Hitler wachipa kuyinongish Atuman a Yehova mu Allemagne. Kuchip kwinoku kwadinga nich yom yivud ya kusal. Asambisha kuyikwat ni kuyitek mu rukan. Tunan twa Atuman ayizengola; yitot yau ayijipa mu yibeng ya mar. Ov, Hitler wawina mu kutenchik kwend kuyinongish Atuman? Ap wakangesha kamu kulejan kwin kwawonsu mu Allemagne? Katwishap bwat! Pa chisu chayizengolau, akadivar netu adandamena nich mudimu wa kulejan mu ujindj. Pawawa winyikel wa Nazi, awiy asadila want ipau wau chakwel adandamena nich kulejan. Ilel, mu Allemagne mudi in kulejan a Want 165000. Kakwau kand, “mwin kukwash” wikala wakin ku kushilamu kwend anch: “Ut wawonsu ukuchilau mulong wa kukurishish ukez kupandikanap bwat.”
7 Rusangu ra katat ra Atuman a Yehova rikwet uman ulejena anch Yehova kakezap kuyilik antu end mudi chisak ayinongisha. (Kus. 116:15) Ov, chikwikal nchik kudi etu muntu ni muntu? Ov, mutapu ik ukatay Yehova kutukamunin muntu ni muntu?
Chiding Nchik pa Dichidij dia ku Mujimbu?
8, 9. (a) Ov, mutapu ik twija anch tudiap akanginau ku mujimbu? (b) Chom ik chakin chitufanyidina kwijik?
8 Mudi muntu ni muntu panrend, twij anch tudiap akanginau ku mujimbu. Tudi mudi mwadingau in Hebereu asatu ashinshamena alika kwifukwil mukish wa or wasalay Mwant Nebukadinezar. Ansand inay in kumwov Nzamb wom kalondap anch Yehova ukusal chilay chakwel ayikamunina kangal ayisala nayimp ku mujimbu. (Tang Daniel 3:17, 18.) Yom yakarumuka, ni Yehova wayipandisha ku ruteng ra kasu. (Dan. 3:21-27) Ap pa yisu yafundau Bibil, yilay ya kuyipandish antu yadinga ya pachipatu kiyadingap ni kusadik pa chisu chawonsu. Atushalapol avud ashinshamena a Yehova ayijipa kudi akankuny.—Heb. 11:35-37.
9 Chadi chidi nchik ku mutambu wetu ilel? Chidiay “mwin kukwash,” chakin kamu Yehova ukutwish kuyipandish antu mu mikadil yikutwisha kuyiletin rufu. Ov, tukutwish twalonda anch mu mwikadil unou Yehova ukusal ni mu mwikadil ou kakusalap? Bwat. Pakwez, muntu ukutwisha kupand ku mwikadil ukash ukutwish wiyov anch Yehova ndiy wamukwashang. Chikwikal kurumbuk kudi antu akwau anch alik yovilay muntu. Tufanyidin chakin kamu kwijik anch in Kristu avud ashinshamena afa payizengolau, mudi muchadinga mu winyikel wa Nazi. Ni akwau afila mu mikadil yimwing yikash. (Mul. 9:11) Tufanyidin twiyipul anch, ‘Ov, Yehova wakanganya kwikal “mwin kukwash” ku mutambu wa antu inay ashinshamena ajipau?’ Chitwishikinap chikal uyakin.
10, 11. Ov, mulong wak muntu kakwetingap usu kurutu kwa rufu, pakwez chom ik chikutwishay Yehova kusal piur pa rufu?
10 Tushinshikinany chom chinech: Muntu kakutwishap wiyep rufu, mulong kwikil muntu ukutwisha ‘kuchidij mupim wend ku usu wa Sheol,’ ap anch Hades, nzay muyilingau antu awonsu. (Kus. 89:48) Ov, chidi nchik lel ku mutambu wa Yehova? Nambaz umwing wapanda ku chisum cha Nazi uvurikin anch makwend wadinga Kaman wamuleja dichuku dimwing anch amwongoja pafishay akatish nend mu chibeng cha mar: “Anch rufu rikez kuyilam antu chikupu, rikez kwikal rikash kumupandakanamu Nzamb, ov, rikez kutwish?” Chakin kamu, rufu kirikwetap usu kumupandakanamu Musul wa mwom! (Kus. 36:9) Antu awonsu adia mu Sheol, ap anch Hades, adia mu chivurikish cha Yehova, ukez kuyipandish umwing ni umwing wau.—Luka 20:37, 38; Kubur. 20:11-14.
11 Pa chisu chawiy chimwing, Yehova ukwachikin nakash nich mwom wa in kumwifukwil end ilel. El tushinshikinany katat jinjil jisatu mudingay chakin kamu ‘mwin kutukwash.’
Utulamin Muspiritu
12, 13. Ov, mulong wak diking dia muspiritu didi dia usey ujim, ni mutapu ik utukinginay Yehova muspiritu?
12 Yehova ukat kutulam muspiritu, kwawiy kudia kwa usey nakash. Chitudia in Kristu akin, tuteshin anch kudi chom chimwing chidia cha usey nakash chipandakenamu mwom wetu. Dipit dietu dipandakenamu didi urund wetu ni Yehova. (Kus. 25:14; 63:3) Pakad urund winou, mwom wetu wa katat ukwetap usey nakash ni ruchingej retu ra kwez kwikal nich mwom mu machuku ma kurutu rikwikal ra chamwamu.
13 Tujikitishin mudi ik, Yehova utwinkishin ukwash wawonsu utuswiridina chakwel twikala nend mu urund. Tukwet Dizu diend, spiritu wend utumbila, ni chikumangen chend cha pa mangand mawonsu mulong wa kutukwash. Ov, mutapu ik tukata kutaninamu mu yitenchik yiney? Kusutil ku kwilej Dizu diend pakad kujing, tukukasikesh ritiy retu ni kutokish ruchingej retu. (Rome 15:4) Kusutil ku kulembil nich muchim utok mulong wa spiritu wend, tukutambul ukwash wa kujijamen choziu cha kwiyandjik mu mwikadil wijondila. (Luka 11:13) Kusutil ku kudandamen nich umutakel uletinay chisak cha kashalapol kusutil ku mikand yirumburila Bibil pamwing ni yikumangan ya chikumangen, yitentam ya pakampwil ya dichuku dimwing, ya munyimuku ni ya distrik, akutudish “yakudia pa chisu chau” yiwamp ya muspiritu. (Mat. 24:45) Yitenchik yiney yikat kutulam muspiritu ni yitukwashining tumushejina Nzamb piswimp.—Yak. 4:8.
14. Shimunin uman umwing ukasikeshidina diking dia muspiritu.
14 Chakwel kukasikesh diking dined dia muspiritu, muvurikany nvaj wisambidinau kwisambishin kwa mutu wa mulong wasambelang ou. Machuku makemp kwinyim kwa kuyijikish anch changadim wau, Theresa, washadika, atambula jinsangu jiyimp anch: Amujipin.a Tatuku uvurikin anch: “Namwilembila Yehova chakwel amulama. Patwamutana wafil kal, nikutwish nakulejany anch cha kusambish niyipula anch mulong wak malembil mam kamakulangap. Chakin, nadinga nij anch Yehova kakatap kusal yilay mulong wa kuyilam antu end umwing ni umwing. Nadandamena kulembil chakwel nitesha kurumburil kwa yom. Nikat kutan rongoj mu kwijik anch Yehova ukat kuyilam antu end muspiritu—charumburik anch, ukat kutwinkish yituswiridina chakwel tulama urund wetu ni ndiy. Diking dined diawiy didia dia usey nakash, mulong dikwatin ku dikez dietu dia chikupu. Pa chinech, Yehova wamulama Theresa; mulong wamusadila nich kushinshaman pa chisu chafay. Natana chisambu pinijika anch ruchingej rend ra mwom wa kurutu ridi mu makas mend.”
Utulamin mu Mayej
15. Mu jinjil ik mukutwishay Yehova kutukwash pitudia ni mayej?
15 Yehova ukutwish watutal “pa ulal wa kuyel,” mudi mwamulamay David. (Kus. 41:3) Ap anch Yehova kakatap kusal ilel unou yilay ya kutwok nich, pakwez utukwashining. Mutapu ik? Yijidik yidia mu Dizu diend yikutwish yatukwash chakwel tukwata mipak ya manangu piur pa milong yitadila mutapu wa kwiyokish. (Jinsw. 2:6) Tukutwish twatan jinsangu ja ukwash ni yiyul yiwamp mu mitu ya milong yidia mu Chinong cha Kalam ni Réveillez-vous ! yisambidina kamu pa mayej metu min. Kusutil ku spiritu wend, Yehova ukutwish watwinkish “ukash upandakena ukash wawonsu” wa kurish nich mwikadil wetu ni kulam kushinshaman kwetu, chikalap nchik chom chawonsu chikutushikena. (2 Kor. 4:7) Nich ukwash winou, tukutwish twiyep kwikal alimidinau nich mayej anch tukutwish twashadish kuman kwetu kwa muspiritu.
16. Mutapu ik wasalay mukadivar umwing mulong wa kura nich mayej?
16 Tushinshikinany mukadivar nsand wisambidinau kwisambishil kwa mutu wa mulong wasambelang ou. Mu muvu wa 1998, amukwata mayej majimbwilingau anch sclérose latérale amyotrophique, ap anch SLA, mamushikija ku kwikal nich kalip.b Mutapu ik wasalay mulong wa kura nich mayej minam? Ndiy urumburil anch: “Nova kuswan ni ushon mu chisu chimwing panamana anch rufu rawiy njil yimwing kusu ya kwipandish kwam. Paniyova runeng nakash, namwilembila Yehova anch anginkisha yom yisatu: muchim witudishina, kushimpish ni kujijamen. Nova anch Yehova wakula ku malembil mam. Muchim witudishina wankwasha nitongijokina ching kusu pa yitongijok yongojina, mudi muukeza kwikadil mwom mu mangand masu pinikeza kwend kand, kusanger yakudia yitadila, ni kwisamb pamwing ni dijuku diam kakwau. Kushimpish kwakwansha nira nich yikokujol ya kalip. Kujijamen kwantwishisha nidandamena nich kushinshaman ni kulik kushadish kwisikan kwam kwa muspiritu. Nikutwish chakin kamu nalond mudi David mwin kufund kuseng, mulong niyovil anch Yehova wankwashin kal mu ulal wam wa mayej.”—Isay 35:5, 6.
Amwinkisha Yakudia
17. Chom ik chashilayimu Yehova kutusadil, ni kushilamu kwinoku kurumburikin ik?
17 Yehova washilamu kutubangin ku mujimbu. (Tang Mateu 6:33, 34 ni Hebereu 13:5, 6.) Chom chinech chirumburikinap anch tufanyidin kwetu kwishakamin oku tuchingedil maswir ma ku mujimbu miwanyisha aminam ap anch tulika kusal mudimu. (2 Tes. 3:10) Kushilamu kwinoku kurumburikin ik pa mulong winou: Anch twasurab bil Want wa Nzamb mu mwom wetu ni tudi tayad kusal mudimu mulong wa maswir metu ma ku mujimbu, tukutwish twamuchingejin Yehova atukwasha tutana maswir ma ku mujimbu. (1 Tes. 4:11, 12; 1 Tim. 5:8) Ukutwish watwinkish yituswiridina mu jinjil jimwing jakad etu kuchingejin, pamwingap kusutil kudiay mbay netu mwin kwifukwil ukutwisha watukwash ap watwinkish mudimu.
18. Shimunin uman umwing ulejena anch chitwishikin tutambul ukwash mu yisu ya maswir.
18 Vurikany maku udia amwinend wisambidinau mu mazu ma kusambish ma mutu wa mulong wasambelang. Pa chisu chashemunikinay pamwing ni changadim wend kwi ndond yisu, chadinga chimukasikedin kuman mudimu. Ndiy ulondil anch: “Nadinga ni kuya mu mudimu wa chingand pamanch, ni urel wawonsu nadinga ni kusutish mu kukimbijol mudimu. Nivurikin dichuku dimwing naya ku makashing majim nikalanda mayel. Nimana kupwa natala kwadingau ni kulandishin yakudia ya mayij, pakwez kinadingap ni nfalang jivud chakwel nilandaku. Kandikal novangap ushon mudi unova mu mwom wam. Panachirika ku chikumbu kudiokal mu makashing minam pa dichuku dinidia, kampay kam kadinga kizwil too nich yakudia ya mayij ya milad ni milad. Mwadinga yakudia yivud ya kudia mu angond. Nadila mansoj ni namujikitisha Yehova.” Kupwa nambaz winou amuleja anch twimpay twinetu atushang kudi mukadivar udinga mu chikumangen wadimina yakudia ya mayij mu chir chend. Weza kumufundil anch: “Ap anch nakujikitisha nakash pa dichuku dinidia, namujikitisha kand ni Yehova mulong ndiy wasadila riy chakwel wivurisha rukat rend.”—Jinsw. 19:17.
19. Pimakeza mar mapandakena, ruchingej ik rikezau kwikal nich atushalapol a Yehova, ni tufanyidin kukwat mupak wa kusal ik katat?
19 Choviken patok, yasalay Yehova pa yisu yafundau Bibil pamwing yisadilay katat yitwinkishin mayingishin ma kumuchingejin Mwin Kutukwash. Pimakweza mar makash pa mangand ma Satan, tukez kaswiriken nakash ukwash wa Yehova chipandakenamu. Chikwau, atushalapol a Yehova awonsu akez kukarumukin kudiay ndiy nich ruchingej rawonsu. Akez katwish kuzambul mes ni kusangar, pakwijikau anch dipandish diau diez kal piswimp. (Luka 21:28) Pa chisu chawiy chimwing, chikalap nchik yoziu yikutushikena, el tukwatany mupak wa kumuchingejin ching kusu Yehova, twikalany nich kashinsh kawonsu anch chakin kamu, Nzamb wetu wakad kukarumukang, ndiy ‘Mwin Kutukwash.’
[Mazu madia kwishin kwa paj]
a Tal mutu wa mulong “Kura Nich Chishiken cha Mar Chakad Kutwish Kutesh,” udia mu Réveillez-vous ! wa Kafunfut 22, 2001, pa paj wa 19-23.
b Tal mutu wa mulong “Ritiy Ram Rankwasha—Nishakam Nich SLA,” mu Réveillez-vous ! wa Chiwong 2006, pa paj wa 25-29.
Ov, Uvurikin?
• Mutapu ik ukutwishay Yehova kuyipandish antu afa kal?
• Ov, diking dia muspiritu didi dia usey ik?
• Chirumburikin ik kushil kwashilayimu Yehova anch ukutubangin ku mujimbu?
[Chipich chidia pa paj wa 8]
Mukadivar Rutherford wakasau mu muvu wa 1918 pamwing ni ambay nend ayilikishaku, ni yom yayifundinau kiyadingap kand nich usey
[Chipich chidia pa paj wa 10]
Yehova ukutwish watutal pa “ulal wa kuyel”