Yehova—“mwin Kukwash” Pa Yisu Yafundau Bibil

“Ey udi mwin kukwash wam, ez swa kudi am, kangal walab, A Nzamb wam!”—KUS. 70:5.

1, 2. (a) Chisu ik chikatau in kumwifukwil Nzamb kukarumukin kudiay ndiy chakwel ayikwasha? (b) Chipul ik chidiaku, ni kwisu kutukutwisha kutan chakul?

PADINGAU mu konje, anvaj a changadim watau kal ukweta mivu 23 atesha anch changadim wau washadikin mu mutapu umwing ushimokishina. Atongina masengan mayimp. Kapamp kamwing akasa yom yau ni achirika kwol kwau, adinga pa chisu chinech chawonsu ni kumulembil Yehova chakwel ayikwasha. Kaman ukweta mivu 20 amukwata mayej makeza kumwikadish nich kalip mwawonsu. Kapamp kamwing wamukarumukina Yehova mu malembil. Maku udia amwinend wadinga urishin nich kukimb mudimu mulong kadingap ni nfalang jivud ja kuland nich yakudia mulong wa changadim wend ukweta mivu 12. Wamuburila Yehova muchim wend wawonsu. Inge, padingau mu yisu ya mar ap yoziu yikash, chakin kamu in kumwifukwil Nzamb akat kukarumukin kudi ndiy chakwel ayikwasha. Ov, kandikal umutazukangap Yehova mu yisu ya mar makash?

² Chipul cha usey chidi chinech: Ov, chakin kamu tukutwish twamuchingejin Yehova anch akula ku malembil metu mitumulembidila chakwel atukwasha? Chakul chikasikeshina ritiy chidi mu Kuseng 70. Kuseng kwinoku kukasikeshina akufunda kudiay David, muntu ushinshamena mwin kumwifukwil Yehova wamana mar ni yoziu yivud yikash ni yikokujol mu mwom wend. Mwin kufund kuseng winou wapepilau washikena ku kulond anch Yehova: “Ey udi mwin kukwash wam, ez swa kudi am, kangal walab, A Nzamb wam!” (Kus. 70:5) Kushinshikin Kuseng 70 kukutwish kutukwash tumana mulong wak niyetu tufanyidin kukarumukin kudiay Yehova pa yisu tudia mu maswir ni kumuchingejin anch ndiy ukata ‘kutukwash.’

“Ey Udi Mwin Kukwash”

3. (a) Kwit ik kwa swa-swa kudia mu Kuseng wa 70? (b) Ruchingej ik rimekeshinay David mu Kuseng wa 70?

³ Kuseng wa 70, usambishin ni upwil nich kwit kukash kwa ukwash wa Nzamb. (Tang Kuseng 70:1-5.) David umwitin Yehova chakwel ‘eza swa’ ni “kangal walab” chakwel amupadish. Mu verse wa 2-4, David wisambidin yom yitan yikusadika chakin kamu. Yom yisatu ya kusambish yidi piur pa antu adinga asotina kumujip. David wading nich kashinsh anch Yehova ukuyipandikan akankuny inay ni kuyikwatish usany mulong wa tuyimp twau. Yom yikwau yaad yambakedinap yidia mu verse wa kanying, yisambidin antu a Nzamb. David ukwet kashinsh anch antu amukimbina Yehova akez kusangar ni kumushiman. Mu kupwish kuseng kwend, David umulejin Yehova anch: “Ey udi mwin kukwash wam.” Talany anch David kalondilap anch, ‘Ukutwish wikal,’ mudi anch umulembidil kand kakwau. Pakwez, ulondil anch, “Ey udi,” chawiy chilejenay ruchingej rend. David witiyijin anch Nzamb ukumukwash.

4, 5. Chom ik twilejina piur pa David mu Kuseng wa 70, ni ruchingej ik tukutwisha kwikal nich?

⁴ Kuseng wa 70 ulejen ik piur pa David? Chisu charay nau akankuny akwata mupak wa kusot kumujip, David kasotap anch aupwisha mulong winou amwinend. Chinyim ni chinech, wamuchingejina Yehova anch ukez kuyishesh akankuny pa chisu ni mu mutapu watenchikay kal. (1 Sam. 26:10, Les Saintes Écritures — Traduction du monde nouveau) David wadandamena nich kujijaman anch Yehova ukat kuyikwash ni kuyikol antu amukimbina. (Heb. 11:6) David witiyija anch in kwifukwil akin akwet mayingishin mawonsu ma kusanger ni kumushiman Yehova kusutil ku kuyilej antu akwau kujimb kwend.—Kus. 5:11; 35:27.

⁵ Mudi David, tukutwish kumuchingejin ching kusu Yehova anch ndiy ‘mwin kutukwash.’ Chawiy lel, piturishina nich yoziu yikash ap anch pitwiyovila anch tukwetap wa kutukwash, tukutwish kapamp kamwing kumulembil Yehova eza swa mulong wa kutukwash. (Kus. 71:12) Ov, chom ik lel chikusalay Yehova pakwakulay ku malembil metu mitumwitina ukwash? Kurutu twisambina mutapu ukutwishay Yehova kutukwash, elany tushinshikinany bil jinjil jisatu jasadilay mulong wa kumukwash David, pamukwashay pa chisu chadingay mu mar makash.

Amukwasha Pantaliken nau Akankuny

6. Chom ik chamukwasha David ijika anch Yehova ukat kuyipandish antu atentamina?

⁶ Kukwatijan nich rusangu rapepilau ridia mu Bibil, David wadinga wij anch muntu utentamina ufanyidin kumuchingejin Yehova chakwel amukwasha. Chisu chaletay Yehova Mabeb pa mangand makad Nzamb, ndiy wamulama Nowa pamwing ni dijuku diend diadinga dimwovila Nzamb wom. (Dis. 7:23) Panakishay Yehova kasu ni sufre padiau antu adinga mu Sodom ni Gomora, ndiy wamukwasha Lot muntu utentamina ni ayangadim end aad chakwel apanda. (Dis. 19:12-26) Chisu chamujipau Farao mwin chibud ni amasalay end kudiay Yehova mu Karung Usuz, Ndiy wayipandisha antu end, chawiy chikatay kuyikwash iyepa disheshik diyimp. (Kub. 14:19-28) Ov, chidi cha kushimok anch, David wamushimana Yehova mu kuseng kukwau anch “Nzamb ukutwish kutuchidij”?—Kus. 68:20.

7-9. (a) Diyingishin ik diadingay nich David dia kuchingejin mu usu wa kupandish wa Nzamb? (b) David walonda anch dipandish diend diadiokala kudi nany?

⁷ David wadinga nich mayingishin mend amwinend mamushikija ku kumuchingejin nakash usu wa kuchidijan ukwetay Yehova. David wimena amwinend anch “makas ma chikupu” ma Yehova makutwish mayipandish antu akata kumusadil. (Kuv. 33:27) Yehova wamupandisha David tupamp tuvud kudiau “akankuny.” (Kus. 18:17-19, 48) Tushinshikinany chilakej chimwing.

⁸ Pasambishau amband in Isarel kumushiman David mulong wa yom ya usu yadingay ni kusal mudi isalay, Mwant Saul wova mukau nakash chawiy tupamp twaad wamwasa David murumbu. (1 Sam. 18:6-9, NW) Tupamp twawonsu twaad David wiyepa kwambuk kwa murumbu. Ov, chadinga kwau kusu mulong wa nkeu ni kuswapal kwa David mudi mwin kwas njit ukweta ronganyin? Bwat. Rusangu ridia mu Bibil rilondil anch “Yehova wadinga nend.” (Tang 1 Samwel 18:11-14, NW.) Kwinyim, pakwatay Saul mpung ya kumujip David kusutil kudiau in Filistin kwakanganya, “Saul washikena ku kwijik anch Yehova wadinga ni David.”—1 Sam. 18:17-28, NW.

⁹ David wadinga ni kulond anch kupand kwend kwadiokala kudi nany? Mazu madia piur pa Kuseng wa 18 (NW) malondil anch David “wamuwangina Yehova mazu ma muminy unou pa dichuku diamupandishau kudi Yehova . . . mu chikas cha Saul.” David wijikisha yovil yend mu muminy, walonda anch: “[Yehova, NW] udi diyal diam ni mpwembu yam; udi mukol wam ni Nzamb wam; udi diyal diam; nikwikangil kudiay ndiy.” (Kus. 18:2) Ov, chikasikeshinap kwijik anch Yehova ukutwish kuyipandish antu end?—Kus. 35:10.

Amutala pa Ulal wa Kuyel

10, 11. Chom ik chitukwashina twijika chisu chayelay David mayej misambidinau mu Kuseng wa 41?

¹⁰ Chisu chimwing Mwant David wayela mayej makash, misambidinau mu Kuseng wa 41. Padingay ulel mulong wa mayej, David wadinga uyedil nakash mu chilik chakwel anch akankuny nend amwing atonga anch “kakulankip kand.” (Verse wa 7, ni wa 8) Chisu ik chayelay David mayej minam makash? Jinsangu jisambidinau mu kuseng winou jisambidin pa chirung chikash cha mwom wa David pa chisu chasotay Absalom mwanend ikundj kumumwang pa want.—2 Sam. 15:6, 13, 14, NW.

¹¹ Chilakej, David wisambidin murund wadingay ni kuchingejin nakash, muntu wadingay ni kudia nend yakudia pamwing, mudi anch ukat kumutungun matung. (Verse wa 9) Rusangu riner rikutwish ratuvurish chishiken chimwing chasadika mu mwom wa David. Pa chisu chabwambwilay Absalom, Ahitofel mwin kumuyul wadingay ni kuchingejin David wikala mwin matung ni winunga pamwing ni Absalom mu wintombuj pantaliken ni mwant. (2 Sam. 15:31; 16:15, NW) Mutongina bil mwant uziyila, muyej ulela, kovilap usu wa kulank, awonsu ij nawamp anch amwombilamu bwalikan kudi akankuny asotila anch afa chakwel atwisha kusal nawamp yom yiyimp yitonginau.—Verse wa 5.

12, 13. (a) Ruchingej ik ramekeshay David? (b) Mutapu ik wamukwashau David kudi Nzamb?

¹² Ruchingej ra David mudiay “mwin kukwash” kiraziyap. David walonda piur pa mwin kwifukwil utentamina anch: ‘Yehova ukez kamukamunin mu dichuku dia mar. Yehova ukat kumutalang pa ulal wa kuyel.’ (Kus. 41:1, 3) Tushinshikinany kand ruchingej ra David payom pinap, mudi mulondilay mu mazu manam ‘Yehova ukat.’ David wadinga nich kashinsh anch Yehova ukez kumukwash. Mutapu ik?

¹³ David kandingap ni kumuchingejin Yehova anch asala chilay chakwel amwoka mayej. Pakwez, David wiyova chakin kamu anch Yehova “ukez kamukamunin”—charumburik anch, ukez kumukwash ni kumwinkish usu padingay ulel mu ulal wend wa mayej. Chakin kamu David wadinga uswiridin ukwash mudi winou. Kuwejin pa mayej madinga mamuziyishina, adinga amwombilamu bwalikan kudi akankuny adinga ni kumulond yom yiyimp. (Verse wa 5, ni wa 6) Chakin kamu Yehova wamwinkisha David usu padingay ni kumuvurish yom yimwongojina. Chisangareshin nakash, mulong David walonda anch: “Ey ukat kwinkasikesh mulong wa kashinsh ka muchim wam.” (Verse wa 12) David watana kand usu padingay ni kutongijokin pa uyakin unou, anch chikalap nchik mwikadil wend wa kuziy ni yom yiyimp yadingau ni kumulond kudi akankuny nend, Yehova wamumana anch udi ikundj wa kashinsh ka muchim. Kwilik David wayerika. Ov, chongojinap kwijik anch Yehova ukutwish wayital ayej?—2 Kor. 1:3.

Amwinkisha Yakudia

14, 15. Chisu ik chikalay David ni amakundj end mu maswir ma yakudia, ni ukwash ik watambulau?

¹⁴ Pikalay mwant wa Isarel, David wadinga ni kudia yakudia yipandakena kutal ni kuna ni wadinga pamwing ni kuyitazuk antu akwau avud eza adia yakudia pamwing nend. (2 Sam. 9:10) Pakwez, David wadinga wij kand chirumburikina kuburen yakudia. Pa chisu chatenchikay mwanend Absalom wintombuj ni wapakisha kumumwang pa want, David pamwing ni antu amwing adinga ashinshamena kudi ndiy adiokal mu Yerusalem. Achina aya kwi ngand ya Gilead, kwingangel kwa Wit wa Yordan. (2 Sam. 17:22, 24, NW) Amushindila ashakam mudi mwin kuchin, David ni antu adinga pamwing nend ikala mu maswir makash ma kutan yakudia ni ya kuna ni pa ndond pa kulal. Ov, kwisu kwelau lel kutan yakudia mwi ngand yiney ya kulemp?

¹⁵ Kukashimuk, David pamwing ni antu end ashika ku ul wa Mahanayim. Atanijana kwinikwa ni amakundj asatu akapukina—Shobi, Makir, ni Barzilai. Niyawiy adinga tayad kutek mwom wau mu chak mulong wa kumukwash mwant watonday Nzamb, mulong anch Absalom watambul want, pakad kwidjidjek wela kuyipup nakash antu in awonsu adinga ni kumukwash David. Chajinguninau yikokujol yadingay nich David pamwing ni amakundj end, antu inay asatu ashinshamena ayiletina yakudia yivud yadinga yiswiridinau, pamwing ni malal, tidiku, masangu, yom ya kwangul ya kwosh, makund, yawonsu ya mitapu ni mitapu, woch, mantek, ni mukoku. (Tang 2 Samwel 17:27-29, NW.) Muchim wa kwakan ni kushinshaman kwa amakundj inay asatu kwamukwata David ku muchim. Ov, mutapu ik welay David kuvuramen yom yiney yamusadilau?

16. Ov, chakin kamu nany wadinga musul wa kumwinkish David ni amakundj end yakudia?

¹⁶ Ov, chakin kamu nany wadinga musul wa kumwinkish David ni amakundj end yakudia? David wadinga nich kashinsh anch Yehova ukat kuyibangin antu end. Chakin kamu Yehova ukutwish wayinkish atushalapol end akwau chibachikin, mu kulond mwi njil yikwau, chakwel ayikwasha ambay nau in kwifukwil adia mu maswir. Padingay ni kutongijokin piur pa yom yasadika mwi ngand ya Gilead, pakad kwidjidjek David wamana riy ra amakundj inay asatu mudi chijingidij cha rukat ridimukina ra Yehova. Padingay kwisudiel kwa mwom wend, David wafunda anch: “Nading nsand, katat nananap kal, pakwez kand kal nimumanangip mwin kutentam amulikil, ap anend aswadil yakudia.” (Kus. 37:25) Ov, chongojinap kwijik anch chikas cha Yehova chiswipinap?—Jinsw. 10:3.

“Mwant Ukutwish Kumukamunin Muntu Muwamp”

17. Chom ik chasalay kal Yehova tupamp ni tupamp?

¹⁷ David wadinga umwing wa in kwifukwil akwashay Yehova pa yisu yafundau Bibil. Kusambish kamu pa chirung cha David, Nzamb wamekesha kal tupamp ni tupamp uyakin wa mazu mafunday kambuy Pita anch: “Mwant ukutwish kumukamunin muntu muwamp mu mar.” (2 Pita 2:9) Tushinshikinay yilakej yikwau yaad.

18. Mutapu ik waletay Yehova dipandish pa machuku ma Ezekias?

¹⁸ Chisu chamwandaminau Yuda kudi amasalay in usu a in Asiriy ni kumwakamishin Yerusalem mu chitot cha chinan K.C.C., Mwant Ezekias walembila anch: “A! [ Yehova, NW] Nzamb wetu, nakwilembil, amboku, tupandisha . . . chakwel mant mawonsu ma pansh mijika anch, ey [ Yehova, NW], yey kusu kwey Nzamb amwiney.” (Isay 37:20) Ezekias wadinga ubangidin bil dijin ni katumb ka Nzamb. Yehova wakula ku malembil minam. Mu uchuku umwing kusu, mwangel umwing wayijipa in Asiriy 185 000, chawiy chayipandishay atushalapol ashinshamena a Yehova.—Isay 37:32, 36.

19. In Kristu a mu chitot cha kusambish atesha chiyul iyepa disheshik ik?

¹⁹ Machuku makemp kamu kurutu afa, Yesu waleta dibabesh dia uprofet mulong wa kuyikwash in kwilej end adinga mu Yudea. (Tang Luka 21:20-22.) Kwasuta mivu makum, pakwez mu muvu wa 66 C.C., wintombuj wa in Yuda wasala ang amasalay in Rome atalikena Yerusalem. Amasalay adinga mwishin mwa umutakel wa Cestius Gallus atwisha kushesh rubumbu ra tempel; ni kupwa aya kwau. Chajinguninau anch chawiy chisu cha kwiyep disheshik dialonday Yesu, in Kristu ashinshamena achinyina ku mikandu. Amasalay in Rome achirika kand mu muvu wa 70 C.C. Pa muvu winou kachirikap, ni amushesha Yerusalem mwawonsu. In Kristu atesha dibabesh dia Yesu achina chak chinech chikash.—Luka 19:41-44.

20. Ov, mulong wak tufanyidin kumuchingejin Yehova mudi ‘Mwin kutukwash’ wetu?

²⁰ Chikasikeshin ritiy mudi ik kutongijokin pa uman ulejena anch Yehova ukata kuyikwash antu end. Yom yasalay pasak yitwinkishin mufulandal wa kuchingejin. Chikalap nchik mar mitukutwisha kuman katat ap mezinaku kurutu oku, niyetu tukutwish twamuchingejin Yehova mudi ‘Mwin kutukwash’ wetu. Ov, mutapu ik ukutwishay Yehova kutupandish? Ov, chidi nchik ku mutambu wa antu ajimbulangau kwisambishil kwa rusangu riner? Mutapu ik wasuta yom ku mutambu wau? El tutalany mu mutu wa mulong wambakedinap ou.

Ov, Uvurikin?

• Kuseng wa 70 utukwinkishin diyingishin dia kwikal nich ruchingej ik?

• Mutapu ik wamukwashau David padingay muyej?

• Yilakej ik yilejena anch Yehova ukutwish wayipandish antu end kudiokal kudi akankuny?

[Chipich chidia pa paj wa 6]

Yehova wakula malembil menday Ezekias