Yehova Ututadil Mulong Wa Kuwap Kwetu

“[Yehova] mes mend pansh pawonsu, chakwel ayimanyin apanyina michim yau yawonsu kudi ndiy.”—2 JINS. 16:9.

1. Mulong wak Yehova ukat kutupapat?

YEHOVA udi Tatuku utentamina. Utwij kamu nawamp ni wij ap ‘yitongijok yetu yidia mu manangu.’ (1 Jins. 28:9) Pa chinech, kakatap kutupapat mulong wa kutan kurumboku kwetu. (Kus. 11:4; 130:3) Pakwez, nich rukat rend ukimbining kutuking ku chom ap chisu chikutwisha kukimb kuyipish urund wetu nend ndiy ap kand mulong wa kuyipish ruchengej retu ra kutambul mwom wa chikupu.—Kus. 25:8-10, 12, 13.

2. Yehova umekeshining usu wend kudi nany?

² Yehova udi mwin dikand ni ukat kuman yom yawonsu. Mu diyingishin dined, ukutwish kuyikwash antu end ashinshamena akutwisha kumutazuk, ni ukuyiking kand mu yisu ya yoziu. “[Yehova] mes mend pansh pawonsu, chakwel ayimanyin apanyina michim yau yawonsu kudi ndiy,” mwamu mulondilay 2 Jinsangu 16:9. Ijik anch Yehova usadididil usu wend mulong wa ay amusadedina nich muchim uwanyidina, muchim udia wishitwila ni yibachikin ya win yakin. Kakatap kubangin mulong wa akamakasu ap in rubabek.—Yosh. 7:1, 20, 21, 25; Jinsw. 1:23-33.

Kwend Nend Nzamb

3, 4. Chirumburikin ik ‘kwend pamwing nend Nzamb,’ ni yilikej ik ya mu Bibil yikutwisha kutukwash kwijik?

³ Kudi avud, kitiyiningap anch Sakatang wa mangand mawonsu ukutwish wayitiyij antu enda nend pamwing mu mwikadil wa muspiritu. Pakwez, yawiy yiney yisotilay Yehova etu tusala. Mu yisu yafundau Bibil, Enok ni Nowa ‘enda pamwing nend Nzamb.’ (Dis. 5:24; 6:9) Moses “wadandamena mudi umumen Nzamb wakad kumekanang ku mes.” (Heb. 11:27) Mwant David watana kwikepish mu kwendang pamwing ni Tatukwend wa mwiur. Walonda anch: “[Yehova] udia kurutu kwam, ni udi kand ku chikas cham cha katatuku, kinikez kashemunikip.”—Kus. 16:8.

⁴ Mwawiy, tukutwishap kamu twamukwat Yehova ku chikas ni twasambish kwend nend. Pakwez, tukutwish kusal mwamu mu chinfan. Mutapu ik? Mwin kuseng Asaf wafunda anch: “Pakwez chawiy chimwing, nading ney yisu yawonsu, ey wanlamin nich chikas chey cha katatuku. Ukat kwintakel mu chiyul chey.” (Kus. 73:23, 24) Nich kwikepish, tukwend pamwing nend Yehova anch twalondul chiyul chend chitutambwila mu Dizu diend diafunday ni kusutin kudiay “kashalapol wakin ukweta manangu.”—Mat. 24:45; 2 Tim. 3:16.

5. Mutapu ik ulaminingay Yehova mes mend mudi tatuku mulong wa atushalapol end ashishamena, ni tukutwish kwiyovap nchik kudi ndiy?

⁵ Mulong Yehova uyikatin awonsu endina nend, ukat kuyiking mud tatuku mwin rukat, ukat kuyilam, kuyichidij, ni kuyifundish. Nzamb ulondil anch: “Am nikez kukwijidish ni kukulej mwi njil yiukeza kuya, nikez kuyul padi ey ni dis diam.” (Kus. 32:8) Iyipula amwiney: ‘Ov, nikat kumuman Yehova mud nendin nend pamwing chikas ku chikas kwawonsu kudiay, mu kuteshang manangu mend ni kwijikang rukat rend ridia pad am? Ronganyin ram ra kwikalaku kwend rukat kusadishap manangu mam, mazu mam, ni maswir mam? Ni anch nendangan, nikumumanap Yehova mudi Nzamb muyimp, pakwez mudi ukweta musangar, Tatuku mwin riy ukimbin kuyikwash akarumukina, aswiridina kuchirik kudiay ndiy?’—Kus. 51:17.

6. Mutapu ik chidia chakutaninamu kumukwat Yehova mudi nvaj upandikenamu anvaj a chiuntu?

⁶ Mu yisu yimwing, Yehova ukutwish kutukwash kurutu kamu kwa kulondul njil yiyimp. Chilikej, ukutwish waman muchim wetu udia wa rubabek wasambish kuswiriken yom yiyimp. (Yer. 17:9) Mu mwikadil mudi winou, kakutwishap kusal mudi nvaj wa chiuntu mulong “Mes mend matadil pansh” ndiy ukwet mwikadil wa kuman yom yidia mukach mwetu, ni kupapat manangu metu. (Kus. 11:4; 139:4; Yer. 17:10) Shinshikin yasalay Nzamb mu mashakamin madingay nich Baruk mu mwom wend, kalerik wenday muprofet Yeremiy ni murund nend wa piswimp.

Tatuku Wakin Kudiay Baruk

7, 8. (a) Baruk wading nany, ni yitongijok ik yiyimp yasambishay kutek mu muchim wend? (b) Mutapu ik Yehova mwamekeshay kubangin kwend mud tatuku padiay Baruk?

⁷ Baruk wadinga nich mudimu wa kutang ni kufund wa usala kamu nich kushishaman ku mutambu wa Yeremiy pakwez wadinga kamu mudimu ukash—wakulejan dirumburish dia Yehova mu Yuda. (Yer. 1:18, 19) Pa chinech, Baruk wadinga ni dijuku dijim, wasambisha kukimb “yom yiwamp” amwinend. Pamwing ap wadinga nich maswir ma amwinend ap kand maswir mulong wa yom ya kumujimbu. Pa yom mudi yiney, Yehova wamana anch yitongijok yiyimp yasambish kal kumekan mu muchim wa Baruk. Yehova walonda kamu swa kusutil kudiay Yeremiy pa mulong winou, ni kumulejang Baruk anch: “Ulondin anch: ey ukat kulond anch: ‘Nafa kal kwam! [Yehova] wanwejinaku kal ushon pa mar mam. Naziy kal ni kwinan, kinikwetap chisu cha kwiswedish.’” Kupwa Nzamb walonda anch: “Ov, ey ukat kuchingej yom yiwamp ching kusu kudi ey amwiney. Kangal kusal mwamu, bwat.”—Yer. 45:1-5.

⁸ Ap anch wamuleja kamu Baruk patok, Yehova kasadilap nich ujim, pakwez wasadila nich kubangin kwa kin kwa winvaj. Chikwau kand, Nzamb umening anch maswir ma mwan a muntu makatap kumekesh ching yitonijok ap muchim uyimp. Yehova wading wij kand anch Yerusalem ni Yuda ading mu machuku mau ma nsudiel, ni chawiy chasotay anch Baruk kangal ipwakala ku chirung chinech chiyimp. Pa chinech, Ndiy weza kumutongish kashalapol wend nich kashinsh, Nzamb wamuvurisha anch: “Am nikat kulet kusheshik kudi antu awonsu,” wawejaku kand anch anch Baruk wasadin nich manangu, ukwikwal mwom. (Yer. 45:5) Pa chinech, Nzamb walonda anch: ‘Ikal nich kashinsh, Baruk. Lam mu manangu mey mulong wa yom yikusadika mulong wa mwikadil wa yitil wa Yuda ni Yerusalam. Dandamen kuziyil ni ukwikal nich mwom! Nikukuking.’ Yehova watenchika muchim wa Baruk mulong Baruk witiyija kamu ni wapanda ku kusheshik kwa Yerusalem, kwasadika mu mivu yasutap 17.

9. Mutapu ik ukutwisha kwakul ku yipul yilangwishinau mu paragraf winou?

⁹ Pautongidina pa rusangu ra Baruk, shinshikin yipul yilondwila ey ni mifund: Mutapu ik kushakam kwa Nzamb nend Baruk kwamekesha yom ik padiay Yehova ni mulong wa yovil yend padiay kashalapol wend? (Tang Hebereu 12:9.) Mu kuman chirung chiyimp chitushicha, yom ik tukutwisha kwilejin ku chiyul chamwinkau Baruk kudi Nzamb ni mu mutapu wasadilay? (Tang Luka 21:34-36.) Mu kumwimburij Yeremiy, mutapu ik amakurump in Kristu mukumekeshau kubangin kwa Yehova mulong wa atushalapol end?—Tang Galatia 6:1.

Rukat ra Tatuku Ramekena mu Mwan

10. Mutapu ik Yesu muwanyidinay kukwat ndond mudi Mutu wa chikumangen cha win Kristu?

¹⁰ Kurutu kwa chirung cha win Kristu, rukat ra Yehova mulong wa antu end warilejenanga kusutil kudiau a profet ni atushalapol akwau ashishamena. Mu yisu ya katat, rimekedin kudi awonsu, kusutin kudiay udia Mutu wa chikumangen cha win Kristu, Yesu Kristu. (Efes 1:22, 23) Pa chinech, mu mukand wa Kuburik, Yesu amulejen mud mwan a mukoku ukweta “mes sambwad, yiney yading aruu a mwiur sambwad a Nzamb, atumangay mu mangand mawonsu.” (Kubur. 5:6) Mwawiy, mudi mwamwinkau dikand nich ukash wa spiritu utumbila wa Nzamb, Yesu ukwet kujingunin kwa kin. Ni ndiy ukat kumanang chitudia, ni wijing yom yawonsu.

11. Kristu ukwet mudimu ik, ni mutapu ik mwikadil wend umekeshinay kudi etu ud mudi wa Tatukwend?

¹¹ Mudi Yehova, Yesu ni ndiy kadiap mudi mpurij mwiur. Ukat kutupapat mudi nvaj mwin rukat. Chawiy Yesu chikwetay mwaz anch “Tatuku wa Chikupu,” yituvurishining mulong wa mudimu ukwikalay nich wa kupan mwom wa chikupu kudi awonsu akuteka ritiy padiay ndiy. (Isay 9:6, NW) Pa chinech, mudi Mutu wa chikumangen cha in Kristu, Kristu ukat kuyibachik in Kristu akweta mushiku aswila kal mu spiritu, pakampwil mudi amakurump chakwel aletang rongoj ap chiyul kudi ay achiswirikedina.—1 Tes. 5:14; 2 Tim. 4:1, 2.

12. (a) Yom ik yadinga mu mikand sambwad yatumay Yesu ku yikumangen ya ku Asia Mukemp? (b) Mutapu ik amakurump mumekeshinau mwikadil wa Kristu mulong wa amikoku a Nzamb?

¹² Kwipan kupandakena kwa Kristu mulong wa amikoku kwamekena ku mikand yatumay kudi amakurump sambwad mulong wa yikumangen ya ku Asia Mukemp. (Kubur. 2:1–3:22) Mu mikand yiney, Yesu walejana ni kubabesh kwend mulong wa yom yasadikanga ku chikumangen ni chikumangen ni mulong wa kubangin kwend kupandakena mulong wa in kumulondul end. Yawiy kand yisadidilau nakash nlel—kushik kamu ni pakuwanyina kuziurik kwa kuburik pakwezila “Dichuku dia Mwant.”a (Kubur. 1:10) Rukat ra Kristu rimekedin kudi amakurump, asadila mudi atufung a muspiritu mulong wa chikumangen. Uyikwatil mudi “wapana uruu kudi antu” mulong wa kupan ukwash, dikasikesh, ap kand chiyul chiswirikedinau. (Efes 4:8; Mid. 20:28; tang Isay 32:1, 2.) Ov, ukat kuman ma usu minam mudi kwipan kwa Kristu kusangerishina mulong weyey?

Akwashinau mu Chisu Chiwanyidina

13-15. Mutapu ik utondiningay Nzamb kwakul malembil metu? Pan yilakej.

¹³ Ov, kandikal ulembilangap chipandikena mulong wa ukwash ni watambul kwakul kudiokila kudikasikesh dia kukwendin kudi mwin Kristu waswila kal muspiritu? (Yak. 5:14-16) Ap kand ukwash ukutwish kwez ku mulad wa diskur dikusalau mu chikumangen cha win Kristu ap kand ku jinsangu jitutanina mu mikand yetu. Yehova ukat kwakulang malembil kusutil mu yom mudi yiney. Chilikej, kupwa kwa kusal diskur, mukurump umwing amulondula kud nambaz umwing mulong wa kumulej uyimp wend wasalay pasutil kal kamu mbing jivud. Pa ndond pakwinan pa mulong wend, wamekesha kusanger mulong wa manans ma mifund yimwing madinga mu diskur dinidia. Wayisadina mu mashakamin mend ni yamukwasha nakash. Musangar mudi ik wiyovay mulong wa kuya ku chikumangan chinicha!

¹⁴ Pa yitadina ukwash udiokilinga kusutin ku malembil, shinshikinany chilikej cha amakuny asatu adinga mu rukan pakwez adinga atambwil kal ronganin ra uyakin wa Bibil pa chisu chadingau chiyikasinau ni adinga in kulejan akad kal kutambul dibabatish. Mulong wa ubaj wasadika, in rukan awonsu ayitekila yijil yivud. Kupwa asambisha kutombuk. In rukan akwata mipak anch pakupwishau kudia yakudia ya pamanch dichuku dilondwilaku, kakutwishap kand kuchirish malong mau, mwamu mwatonginau kusal. Pakwez, in kulejan asatu akad kal kutambul dibabatish ay adinga afanyidin kutong kapamp kaad. Anch abombakan nau pamwing mu kutombuk, akuyipish chijil cha Yehova chidia mu Rome 13:1. Anch alik kubombakan nau, akutwish ayisal nayimp kudi akwau.

¹⁵ Yatwishisha kovijan umwing ni mukwau, chid mulong antu asatu ay alembila mulong wa kutambul manangu. Chikwacha pamanch, amakuny asatu ay amana anch akwata mupak umwing uwanyidina—alika kwau kudia ya kudia. Pezau atulam a rukan kusend malong, in amakundj asatu ay kadingap kwau nich cha kuchirish. Musangar mudi ik wikalau nich ni kwijik anch ‘ukata kutesh kulembil’ udi nau piswimp!—Kus. 65:2.

Tal ku Rutu Nich Ruchingej

16. Mutapu ik mudimu wakulejan umekeshina kubangin kwa Yehova mulong wa antu end adia mudi amikoku?

¹⁶ Mudimu wa kulejan rusangu ruwamp wa mangand mawonsu udi kand win kashinsh ukwau utubangidinay Yehova mulong wa antu akweta michim yakin, ikalap kwawonsu kushichau. (Dis. 18:25) Yehova, ukuyisadil angel end, ukutwish kuyitakel atushalapol end mulong wa kutan antu adia mudi amikoku—ap anch ashich mu teritware mwakad kal kushikangap rusangu ruwamp. (Kubur. 14:6, 7) Chilakej, kusutil kudi mwangel, Nzamb wamutakela Filip, mwin kulejan wa mu mivu chitot ya kusambish chakwel aya akamutana mukurump mwin Etiop ni amurumburila Mifund. Mudi chibudikin? Muntu witiyija rusangu ruwamp ni amubatisha mulong wa kumulondul Yesu.b—Yoh. 10:14; Mid. 8:26-39.

17. Mulong wak kitufanyidinap kwiyakamish mulong wa machuku ma kurutu?

¹⁷ Mutapu udandamedina kuya ditenchik dia yom dined kwi nsudiel, yatakelau kulejan anch “yidi disambishil dia yakamish” yiyil kamu ku rutu. (Mat. 24:8) Mudi chilikej, usey wa yom ya kudia upandiken nakash mulong antu avud aswirikedin yakudia, mwikadil uyimp, ap kand kuwa kwa usey kwa nfalang. Midimu yikasiken pa kuyiman, ni in midimu apandiken kuvul ni asadil chad ma saa mavud ku midimu. Ap anch mwamu muchidia, awonsu akata kutek yisakin ya muspiritu pa ndond ya kusambish ni kulam ‘disu dipipela’ kakwetap kuswir kwa kwiyakamish. Ij anch Nzamb uyikatil ni ukuyikwash. (Mat. 6:22-34) Shinshikin chilikej mutapu Yehova wamukingay Yeremiy mu chirungu cha kanvundangesh mu Yerusalem kwinsudiel kwa muvu wa 607 K.C.C.

18. Mutapu ik wamekeshay Yehova rukat kudiay Yeremiy chisu chamushakaminau Yerusalem?

¹⁸ Mu chikunku cha nsudiel cha kumushakamin Yerusalem kudi in Babilon, Yeremiy wadinga mu rukan mu chipang cha mwant. Mutapu ik wadingay ufanyidinay kupat ya kudia? Anch kadingap mu rukan, wadinga kamu ufanyidin kukimb amwinend. Pakwez, wading upandidin kudi antu adinga amunyingumukinamu, amwing a pakach pau adinga kand amukisin! Pakwez, Yeremiy kachingejinap mudiay muntu pakwez wamuchingejina Nzamb, wa mushilamu mulong wa kumulam. Ov, Yehova washakama kukwatishan nich dizu diend? Inge! Wamana anch Yeremiy dichuku din diawonsu adinga akat kumwinkish “dibot pichuku pichuku kudi in kwosh mabot, djat kamu ni papwila mabot mu ul.” (Yer. 37:21) Yeremiy, mudi kand Baruk, Ebed-melek, ni akwau kand apanda mu chirungu cha kamungun, ku mayej, ni ku rufu.—Yer. 38:2; 39:15-18.

19. Paturishina nich mulong wa machuku ma kurutu, yom ik tufanyidina kusal?

¹⁹ Mwawiy, “mes ma Nsalejetu mayitadil in kutentam, ni matu mend makat kutesh kulembil kwau.” (1 Pita 3:12) Ov, usanger mulong wa Tatukwey udia mwiur ukuchidijina? Ov, wiyovil anch udiap mu ubaj ni mu diking mu kwijikang anch mes mend madi padi ey mulong wa kuwap kwey? Ijik anch, ufanyidin kudandamen kwend nend Nzamb—kwikil chom cha kurutu chikutwisha kukukangesh. Tufanyidin kwikal nich kashinsh anch Yehova chisu chin chawonsu utulamining, ni mes mend ma rukat mad padiau ashinshamena end.—Kus. 32:8; tang Isay 41:13.

[Mazu madia kwishin kwa paj]

Ov, Ukutwish Kurumburul?

• Mutapu ik tukutwisha kumekesh anch ‘twendin pamwing nend Nzamb’?

• Mutapu ik wamekeshay Yehova rukat rend kudi Baruk?

• Mudi Mutu wa chikumangen cha win Kristu, mutapu ik Yesu umekeshinay mikadil ya tatukwend?

• Mwi njil ik tukutwisha kumekeshin ruchingej mudiay Nzamb mu yisu ya mar?

[Chipich chidia pa paj wa 9]

Mudi Yeremiy nend Baruk, amakurump in Kristu nlel unou amekeshining kubangin kwa Yehova

[Chipich chidia pa paj wa 10]

Mutapu ik ukatay kulet Yehova ukwash pa chisu chifanyidina?